Faigofie, ae o Saʻo Aʻiaʻi?

IĀ SETEMA 2005, na tatala aloaʻia ai e le lotu Egelani le Tusi Paia e taʻua o le 100-Minute Bible. Na fuafua e 100 minute e faitau ai, ma o loo aotele e le Tusi Paia fou ia Tusitusiga Eperu i vaega e 17 e taʻitasi itulau, ma le Tusitusiga Eleni i vaega e 33 e taʻitasi itulau, lea ua tuuesea ai isi vaega ia na taʻua e se alii, o “vaega e lē faaoso ai se naunau fiafia.” E faigofie i le faitau, ae faamata e saʻo aʻiaʻi?

E ese mai le aveese o le suafa o le Atua o Ieova, ua mātauina e isi tagata aʻoga o le Tusi Paia le tele o isi mea ua aveesea foʻi. (Salamo 83:18) O se faaaʻoaʻoga ua taʻua i le vaega 1, na faia e le Atua ‘le lagi ma le lalolagi i se vaitaimi e ono aso.’ Ae ua taʻua i le Kenese 1:1 “Na faia e le Atua le lagi ma le lalolagi i le amataga.” E ese mai lenā, ua faamatala atili i le uluaʻi tusi isi gaoioiga o le foafoaga e aofia ai le lalolagi, lea e ono “aso” le umi po o ni vaitaimi na faia ai. Ua taaofaʻi e le Kenese 2:4 le taimi atoa o le foafoaga lea e taʻua, o “le aso na faia ai e Ieova le Atua le lalolagi ma le lagi.”

E tusa ai o le manatu o le 100-Minute Bible, na osofaʻia Iopu le tagata faamaoni e se “tasi o auauna [a le Atua], o Satani, . . . o lana tiute o le gaoioi e molia tagata.” Po o e silafia mai le eseesega o nei manatu? E uiga atu le upu “Satani” i “Lē Taufaaleaga.” Na i lo o le avea ma auauna a le Atua, o Satani o le fili sili o le Atua ma na ia filifilia ia lava, e molia pe tuuaʻia tagata.—Faaaliga 12:7-10.

Ae faapefea la le vaega o le Tusi Paia Kerisiano Eleni a le 100-Minute Bible? I le faataoto i mamoe ma ʻoti, ua taʻua i le lomiga fou e faapea, e fiafia Iesu i ē na fesoasoani “i so o se tasi, po o le ā lava le faatauvaa,” ae o le mea moni, na fetalai Iesu e na te faamanuia iā i latou e faia mea lelei i ē o mulimuli i ona tulaga aao—o ona “uso.” (Mataio 25:40) O le tala otooto o le Faaaliga ua taʻu atu ai i le ʻaufaitau o le Tusi Paia fou e faapea, “o le a matuā faatamaʻia atoatoa Roma, le Papelonia tele.” Ae ua iloa e tagata aʻoga o le Tusi Paia, e leai se fuaiupu i uluaʻi tusitusiga e lagolago ai lea faaiʻuga e uiga i le faailoga e iloa ai “Papelonia le aai tele!”—Faaaliga 17:15–18:24.

E leai se isi mea e suitulaga i le Tusi Paia atoa, mo ē o loo saʻili ia iloa Lē na Faia i tatou ma ia malamalama i lona finagalo. E moni o le a sili atu i le 100 minute e faitau ai le Tusi Paia, ae o le faia faapea, e aumaia ai faamanuiaga aogā. (Ioane 17:3) Tau ina ia e talia lenei luʻi ma e seleseleina ai faamanuiaga.—2 Timoteo 3:16, 17.