Fesili Mai le ʻAufaitau

O le ā “le taua . . . o le Atua e ona le malosi uma lava” iā Amaketo, ma o le ā le iʻuga?—Faaaliga 16:14, 16.

I se faaupuga faigofie, o le taua o Amaketo, o le taua lea e faia i le lumanaʻi i le lalolagi atoa, lea o le a faaumatia ai fili o le Atua e Iesu Keriso le Tupu tofia a Ieova. Ua faamatala i le Tusi Paia, o nei fili “o tupu o le lalolagi ma le atu laulau uma,” ua faapotopoto e ‘agaga o temoni’ ma ua faapotopoto “i le taua i le aso tele o le Atua e ona le malosi uma lava . . . i le mea ua igoa i le gagana Eperu o Amaketo.”—Faaaliga 16:14, 16.

E lē o se nofoaga moni lea e faapotopoto ai nei itu taua. E uiga atu le upu “Amaketo” i le mauga o Mekito. (Faaaliga 16:16) E leʻi iai muamua se mauga e igoa i lenā igoa. E lē mafai foʻi ona faapotopoto i se nofoaga e tasi “tupu o le lalolagi, ma a latou ʻau.” (Faaaliga 19:19) O le mea moni, e faasino atu le “mea” po o le nofoaga, i le tulaga lea ua iai taʻitaʻi faapolotiki o le lalolagi ma ē o lagolagoina i latou—e tetee iā Ieova ma “ʻau foʻi o i le lagi” lea o loo taʻitaʻia e le taʻitaʻiʻau, le “Tupu o tupu, ma le Alii o alii,” o Iesu Keriso.—Faaaliga 19:14, 16.

O le itu e mataʻina ai, e fesootaʻi atu le upu “Amaketo” i se aai anamua o Isaraelu e taʻua o Mekito. Sa tu Mekito i se tulaga e sili ona tāua i sasaʻe o le mauga o Karamelu, lea na avea ma taulaʻiga autū o fefaatauaʻiga ma auala a vaegaʻau. Sa avea foʻi o se nofoaga e fai ai le tele o taua. O se faaaʻoaʻoga, na faatoʻilalo e le faamasino Isaraelu o Parako se ʻautau malosi mai Kanana, lea na taʻitaʻia e Sesera “e latalata ane i le vai i Mekito.” (Faamasino 4:12-24; 5:19, 20) E lata ane foʻi i inā, na matuā faatoʻilalo ai e Kitiona le ʻautau a Mitiana. (Faamasino 7:1-22) O le faafesootaʻi atu la o Mekito i le taua o loo fotuaʻi mai, ua faamautinoa mai ai e le Tusi Paia iā i tatou, o le a matuā faatoʻilalo e le Atua e ala mai i lona Alo ʻau uma o loo tetee atu iā te Ia.

O le ā le iʻuga? O le a aveesea e le taua iā Amaketo faiga piʻopiʻo ma mea leaga uma mai le lalolagi. O le a oo ai i le vaitaimi e sili ona mataʻina i le talafaasolopito o tagata. (Faaaliga 21:1-4) E ala mai i le pulega alofa a le Malo o le Atua, o le a faaliliuina ai le lalolagi i se parataiso lea o le a soifua ai e faavavau ē amiotonu.—Salamo 37:29.