Talaaga o le Soifuaga

Loʻu Fiafiaga i le Faia o Soo

Faamatalaina e Pamela Moseley

I le 1941 a o matuā aafia Egelani i le Taua Lona Lua a le Lalolagi, na ave ai aʻu e loʻu tinā i le aai o Leicester i se tauaofiaga a Molimau a Ieova. Sa faia e Joseph Rutherford se lauga faapitoa e faatatau i tamaiti. Ina ua ma papatiso ma loʻu tinā i lenā tauaofiaga, sa ou mātauina le fiafia o i latou na fesoasoani iā i maʻua ina ia ma agaʻigaʻi i luma faaleagaga. Ou te leʻi iloa i lenā taimi le tele o le fiafia e maua i le faia o soo o Iesu Keriso.

O LE tausaga na muamua atu sa amata ai ona ma agaʻigaʻi i luma ia avea i maʻua ma soo. O loo oʻu manatua pea se aso mataʻutia iā Setema i le 1939 ina ua gāpā le Taua Lona Lua a le Lalolagi. Sa ou vaaia le tafe ifo o loimata o loʻu tinā i ona alafau a o ia tuufesili pea, “Aiseā ua lē maua ai se filemu i le lalolagi?” Sa auai oʻu mātua i le vaegaau i le Taua Muamua a le Lalolagi, ma ua la iloa lelei le mataʻutia. Na fai atu e loʻu tinā lenā fesili i le faifeʻau o le lotu Egelani i Bristol. Ae na pau lava le tali a le faifeʻau: “Ua leva ona iai taua ma o le a faaauau pea ona iai.”

E leʻi leva talu mai lenā taimi, ae asiasi mai loa se tamaʻitaʻi ua matua lava i lo matou aiga. O ia o se Molimau a Ieova. Sa fesili i ai loʻu tinā i le fesili lava lea e tasi: “Aiseā ua lē maua ai se filemu i le lalolagi?” Sa faamatala e le Molimau, o taua o se vaega o le faailoga e iloa ai ua tatou ola i le faaiʻuiʻuga o lenei faiga o mea ua tumu i le sauā. (Mataio 24:3-14) E leʻi umi ae fai le matou suʻesuʻega faale-Tusi Paia ma lana tama teine. Ma o i laʻua o nisi o le toʻatele sa maimoaina ma le fiafia lo ma papatisoga ma loʻu tinā. Aiseā e maua ai e tagata le fiafia i le faia o soo? Na ou iloa mulimuli ane le māfuaaga. Seʻi oʻu faamatala atu nisi o mea ua ou aʻoaʻoina i le silia i le 65 tausaga o le faia o soo.

Le Olioli i le Aʻoaʻo Atu

Na amata ona ou auai i le talaʻiga o le Malo i Bristol ina ua 11 oʻu tausaga. Na tuu mai e se uso  iā te aʻu se laau tā pese ma se pepa o loo iai ni faamatalaga pupuu faale-Tusi Paia ma faapea mai: “O lau mea e fai, ia e asiasi i fale uma lava i le itu le lā o le auala.” Na ona uma mai lava o lana faamatalaga, alu loa ma laʻu talaʻiga na o aʻu lava. O le mea moni lava, sa ou lagona le lē toʻa. Ou te tāina se lauga faale-Tusi Paia sa puʻeina, ona ou faaali lea i se tagata o le aiga se pepa o loo iai ni faamatalaga pupuu faale-Tusi Paia, lea sa talosagaina ai tagata e talia lomiga faale-Tusi Paia.

I ni tausaga mulimuli ane ai, sa matuā faamamafa ai lava le tatau ona faitau le Tusi Paia i le talaʻiga mai lea fale i lea fale. I le amataga lava, sa lē faigofie ona ou talanoa i tagata ou te lē masani ai, faapea ma le faamatalaina o mau ona o loʻu tulaga matamuli. Peitaʻi, a o faagasolo taimi na iʻu ina ou maua le toʻa e faia ai faapea. O le taimi lenā na amata ai loa ona ou fiafia i le talaʻiga. Sa manatu nisi tagata na pau le matou mea o loo fai o le faatau atu o tusi, ae peitaʻi pe a matou faitau ma faamalamalama i ai mau o le Tusi Paia, ona latou manatu lea o i matou o faiaʻoga o le Afioga a le Atua. Sa ou matuā fiafia lava i le talaʻiga, lea na ou manaʻo ai e faateleina atu le faia o soʻu sao. O le māfuaaga lenā na ou amata ai loa i le auaunaga faataimi atoa o se paeonia iā Setema 1955.

E Tauia le Maumauaʻi

O se tasi o lesona na muamua oʻu aʻoaʻoina e faapea, e tauia le maumauaʻi ma le agalelei. I se tasi taimi, na ou tuua ai se mekasini o Le Olomatamata i se fafine, o lona igoa o Violet Morice. Ina ua ou toe foʻi e asi le fafine, sa ia talia fiafia aʻu, na tū lelei i le faitotoʻa ma faalogologo totoʻa mai a o oʻu faamatalaina atu iā te ia manatu mai le Tusi Paia. O taimi uma lava ou te asiasi atu i ai, e foliga mai lava o ia o se tagata e fiafia moni. Peitaʻi, ina ua ou ofo i ai se suʻesuʻega faifai pea o le Tusi Paia, na ia tali mai: “Leai. Seʻi matutua laʻu fanau ona fai lea o saʻu suʻesuʻega.” Pagā loʻu lē fiafia na iai! O loo taʻua i le Tusi Paia e iai “ona pō e saʻili ai, ma ona pō e tuu ai ua lē iloa.” (Failauga 3:6) Na ou filifili loa e aua le tuua le asiasi pea i ai.

Pe tusa o se masina mulimuli ane, na ou toe foʻi ai ma talanoaina nisi mau o le Tusi Paia ma Violet. E leʻi umi, ae fai lana suʻesuʻega faale-Tusi Paia i vaiaso taʻitasi i le faasitepu i luma o lona fale. I se tasi aso na ia faapea mai ai: “O le ā sou manatu, ou te iloa e sili atu ona lelei pe a e susū mai i totonu.” Na iʻu ina avea Violet ma se aumea talitonu ma o saʻu uō mamae foʻi! Ioe, na papatiso Violet e avea ma Molimau a Ieova.

I se tasi aso na matuā faateʻia ma lē mautonu ai Violet ina ua ia iloa ane, ua sola lana tane ma ua uma foʻi ona ia faatau atu lo la fale e aunoa ma lona iloa. Peitaʻi, sa lagona le fiafia ona na toe maua se isi ona fale i le aoauli o le aso lava lenā, ona o le fesoasoani a se tasi o uō Molimau. Ona o lona loto faafetai mo Ieova, na filifili ai Violet e faaaogā lona olaga atoa e auauna ai o se paeonia. Pe a ou mātauina la le auala ua faatumuina ai o ia e le agaga o Ieova i le maelega mo le tapuaʻiga moni, ona ou iloa ai lea o le māfuaaga e fiafia tele ai lenei galuega o le faia o soo. Ioe, o laʻu galuega lea o le a fai i loʻu olaga atoa!

O le 1957 na tofia ai i maʻua ma se tasi tuafafine e igoa iā Mary Robinson e ma te paeonia i Rutherglen i Glasgow, o se vaipanoa e tele ai fale faigaluega i Sikotilani. E ui sa ma talaʻi i tau e puaoa, matagi, timuga, faapea ma le kiona, ae sa iai ni iʻuga lelei na maua ai. I se tasi aso sa ou feiloaʻi ai iā Jessie. Sa ou fiafia tele e suʻesuʻeina le Tusi Paia ma ia. O lana tane e suafa iā Wally, o se tagata Komunisi, ma sa ia taumafai e ʻalofia aʻu i le taimi muamua. Ina ua suʻesuʻe e lenei tamāloa le Tusi Paia, na ia iloa ai e na o le Malo o le Atua o le a aumaia suiga manaʻomia i tagata, ma sa faafiafiaina ai o ia. Mulimuli ane, na iʻu ina avea i laʻua ma nisi e faia soo.

Aua le Vave Faia se Faaiʻuga

Na ma mauaina se isi tofiga fou i Paisley, i Sikotilani lava i se taimi mulimuli ane ai. I se tasi aso a o oʻu iai i le talaʻiga,  na matuā lē fia faalogo mai lava se fafine ma soona tapuni mai le faitotoʻa. Peitaʻi e leʻi leva ona ou alu ese ma le fale ae toe sau e suʻe mai le mea o oʻu iai e faatoese mai. Ina ua ou toe foʻi i ai i le vaiaso na sosoo ai, fai mai lana faamatalaga: “Na ou lagona e pei ua ou tapunia le faitotoʻa i fofoga o le Atua. Na pau lava le manatu na oso ane, o loʻu alu atu e saʻili oe.” O lona igoa o Pearl. Na ia taʻu mai sa matuā lē fiafia lava i ana uō ma ona tauaiga, ona tatalo lea i le Atua ia maua sana uō moni. Fai mai lana faamatalaga: “Ae sosoo loa ma lou afe mai i lo matou fale, ona ou manatu lea, atonu o oe o le uō moni lea na ou tatalo ai.”

Sa lē faigofie le avea ma uō a Pearl. O le fale o Pearl sa i le tumutumu o se aʻega tū lava, ma sa tatau lava ona ou savali i ai. I le aso na ou alu ai i lona fale ma te ō i lana sauniga muamua lava, toetoe a lē mafai ona ou savali i le malosi o timuga ma matagi. Na iʻu ina tiaʻi loʻu faamalu ona ua malepe. E na o le ono masina mulimuli ane talu ona ia soona tapuni mai le faitotoʻa iā te aʻu, ae faailogaina loa e Pearl lona tuuina atu i le Atua e ala i le papatisoga.

E leʻi leva lava talu mai le taimi lenā, ae filifili loa lana tane e suʻesuʻe le Tusi Paia, ma e leʻi umi se taimi, ae ma ō faatasi ma lenei tamāloa i le talaʻiga mai lea fale i lea fale. E pei lava o le tulaga masani, sa matuā maligi lava timuga. Ae na faapea mai lana tala: “Aua e te popole, e masani ona ou tū mo le tele o itula i tau faapenei e matamata i lakapi, e mautinoa lava e mafai foʻi ona ou tū i le timu mo Ieova.” E masani ona ou fiafia i uiga maumauaʻi faapea o tagata Sikotilani.

Maʻeu soʻu lagona faamalieina na iai ina ua ou toe asiasi atu i le vaipanoa lava lea ina ua mavae le tele o tausaga, ma iloa ai le toʻatele o i latou sa ou faia a latou suʻesuʻega o loo tumau pea i le faatuatua! O le fiafiaga lenā e maua i le faia o soo. (1 Tesalonia 2:17-20) I le 1966, ina ua silia i le valu tausaga o oʻu paeonia i Sikotilani, na valaaulia ai aʻu i le Aʻoga Faale-Tusi Paia a le Olomatamata o Kiliata e toleni ai e avea ma misionare.

I se Oganuu Ese

Sa tofia aʻu i Polivia, i le taulaga o Santa Cruz, lea sa iai se faapotopotoga pe tusa ma le 50 le aofaʻi. E faamanatu mai iā te aʻu e le taulaga lenei ia nuu maotua foʻi nei e faaali mai i ata tifaga a le Hollywood. Pe a ou toe tomānatu i le taimi ua teʻa, ou te lagona lava le loto faafetai i le tulaga na iai laʻu auaunaga e pei lava ona masani ai se misionare. E leʻi osofaʻia lava aʻu e se kolokotaila, pe osofaʻia e ni tagata fasitagata, pe ou te sē foʻi i se toafa, ia pe afātia i se malaga i sami sousou. Peitaʻi, iā te aʻu lava ia, ua matuā faafiafiaina aʻu i le faia o soo.

O se tasi o tamaʻitaʻi muamua lava na ou faia lana suʻesuʻega faale-Tusi Paia i Santa Cruz, o Antonia. Sa lē faigofie ona ou aʻoaʻoina atu le Tusi Paia i le gagana Sepania. I se tasi taimi na faapea atu ai le tama tama laʻitiiti a Antonia iā te ia: “Tinā o le mea ea o taʻu sesē ma le loto i ai e le fafine ana upu ina ia ta taliē ai?” Na iʻu ina avea Antonia ma soo, faapena foʻi lana tama teine o Yolanda. E iai le uō a Yolanda, sa aʻoga faaloia na valaau e tagata i lona igoa fai o Dito, na iʻu foʻi ina ia suʻesuʻeina le Tusi Paia ma auai i sauniga. E iai se mea na ou aʻoaʻoina e faatatau iā Dito i le aʻoaʻoina atu o upu moni o le Tusi Paia: O nisi taimi e na o sina tamaʻi uunaʻiga lava o loo manaʻomia e le tagata.

Ina ua amata ona fai ma misi suʻesuʻega a Dito, na ou faapea atu: “Dito, e lē faamalosia oe e Ieova e lagolagoina lona Malo. E manaʻomia ona e filifili.” Ina ua tali mai e manaʻo e auauna i le Atua, na ou faapea atu: “O loo iā te oe ni ata o se taʻitaʻi o le vaega fouvale. Afai e asiasi mai se tagata ma vaai i nei ata, faamata o le a manatu lenā tagata, o lea ua e filifili e lagolago i le Malo o le Atua?” Na pau lava lenā o sina tamaʻi uunaʻiga na ia manaʻomia.

E tusa o le lua vaiaso mulimuli ane ai, ae tulaʻi mai loa se solo tetee, ma amata ai se taugāfana i le va o tamaiti aʻoga o le iunivesite ma leoleo. Na alaga atu Dito i lana uō: “Ta ō ese vave mai i inei!” “Leai! O le aso sili lenei sa tatou faatalitali i ai,” o le tali mai lenā a lana uō, ma tago atu i le fana ma agaʻi atu i le taualuga o le faleaʻoga o le iunivesite. E toʻavalu iā te ia uō a Dito na maliliu ai i lenā aso. Sa matuā faafiafiaina ai aʻu ona o lenei tama o Dito o lē na semanū e oti i lenā aso pe ana lē filifili e avea ma Kerisiano moni.

Gaoioiga a le Agaga o Ieova

I se tasi o aso na ou lē afe ai i se tasi o fale, ona ua ou manatu ua uma ona asia i la matou galuega  le fale lea, ae teʻi ua valaau mai le fafine o le aiga iā te aʻu. O lona igoa o Ignacia. O le taimi lea ua ia iloa Molimau a Ieova, ae ona o teteega malosi mai lana tane—o se leoleo lapoʻa tino lelei e suafa iā Adalberto—na taofia ai lona agaʻigaʻi i luma faaleagaga. Sa lē mautonu lona mafaufau i le tele o aʻoaʻoga faavae o le Tusi Paia, ona amata loa lea ona ma suʻesuʻeina le Tusi Paia. E ui lava sa maumauaʻi Adalberto e taofia le suʻesuʻeina o le Tusi Paia, na oo ina mafai ona ou talanoa iā te ia mo se taimi umi e faatatau i isi mataupu. Na avea o se uluaʻi laasaga i le mauaina o se faauōga ma ia.

Seʻi manatu i loʻu fiafia ina ua avea Ignacia o se tasi o le faapotopotoga, ma uaʻi atu i le tausia lelei o le tulaga faaletino ma le faaleagaga o le toʻatele o ē sa manaʻomia se faamāfanafanaga. I se taimi mulimuli ane, na avea ai lana tane ma le la fanau e toʻatolu ma Molimau. Ina ua oo ina malamalama lelei lana tane o Adalberto i le uiga moni o le tala lelei, na alu atu i le ofisa o leoleo, ma talanoa atu ma le maumauaʻi ma iʻu ai ina ia faia ni tusiga e 200 a leoleo, i Le Olomatamata ma le Ala Mai!

O Ieova e Faatupuina

Ina ua uma ona ou auauna i Santa Cruz mo le ono tausaga, ona tofia lea o aʻu i le aai autū o Polivia, o La Paz, lea na ou iai mo le isi 25 tausaga. O tausaga amata mai le 1970, e na o le toʻa 12 le ʻaufaigaluega na iai i le lālā o Molimau a Ieova, i La Paz. A o faateleina le galuega talaʻi, sa manaʻomia ni fale tetele, o lea, na fausia ai loa se lālā fou i le aai o loo saosaoa lona faatuputeleina, o Santa Cruz. O le tausaga e 1998 na siitia atu ai le lālā i inā, ma na valaaulia aʻu e avea o se tasi e galue ai i lenā lālā, lea ua sili atu nei i le 50 tausaga o loo oʻu galue ai pea.

O le faapotopotoga e tasi lea na iai i Santa Cruz i tuā i le 1966 ua tulaʻi mai ai faapotopotoga e silia i le 50. E 640 Molimau sa iai i Polivia atoa i le 1966, ae o lea ua toeitiiti lava atoa le 18,000 i le taimi nei!

Ou te lagona le fiafia ona o iʻuga o aʻu galuega i Polivia. Peitaʻi, e faamalosia lava aʻu i taimi uma i le faamaoni o aumea Kerisiano i so o se vaipanoa lava. O loo tatou fiafia uma i le mātauina o le faamanuiaina e Ieova o le talaʻiga o le Malo. Ioe, e mautinoa le maua o le fiafia i le auai i le galuega o le faia o soo.—Mataio 28:19, 20.

[Ata i le itulau 13]

Galue o se paeonia i Sikotilani

[Ata i le itulau 15]

Auauna i le ofisa o le lālā i Polivia; (ata i totonu) i le faauuga o le vasega lona 42 a Kiliata