O le ā se Lesona E te A‘oa‘oina Mai Tamaiti?
O le ā se Lesona E te Aʻoaʻoina Mai Tamaiti?
“E PEI ā oe o se tamaitiiti!” Pe ana faapea o tatou matutua ia na fai mai i ai ia upu, e tatou te ono feita. Auā o tamaiti laiti e lē lava le iloa i le olaga ma le poto o loo i tagata matutua.—Iopu 12:12.
Ae i se tasi taimi na fetalai atu ai Iesu i ona soo: “E moni, ou te fai atu iā te outou, a lē liua outou, ma avea ia pei o tamaiti, tou te lē sao lava i le malo o le lagi.” (Mataio 18:3) O le ā sa uiga i ai Iesu? O ā uiga e iai i tamaiti laiti e manaʻomia ona faaaʻoaʻo i ai tagata matutua?
Ati Aʻe le Loto Maulalo e Pei o le Tamaitiiti
Seʻi tatou iloilo le tulaga na ala ai ona fai e Iesu lea fetalaiga. Ina ua taunuu i Kapanaumi mai se malaga umi, na ia fesili atu i ona soo: “Pe se ā na outou fefinauaʻi ai i le ala?” Na māsiasi ona soo ma leai se isi na tali ane, ona sa latou finau po o ai o i latou e sili. Na iʻu ina latou maua le loto tele ma fesili atu iā Iesu: “O ai ea e sili i le malo o le lagi?”—Mareko 9:33, 34; Mataio 18:1.
O se mea e faateʻia ai le finau o soo i tulaga e ao ona iai, ae ua toeitiiti atoa le tolu tausaga o faatasi ma Iesu. Peitaʻi, na latou ola aʻe i lotu Iutaia, lea e faatāuaina ai tulaga po o tofi. E mautinoa la, na aafia manatu o le ʻausoo ona o o latou talaaga faalotu na ola aʻe ai faatasi ai ma tulaga lē lelei atoatoa.
Na nofo i lalo Iesu, ona valaau lea i ona soo e ō mai, ma fetalai atu: “Afai e fia muamua se tasi, e avea o ia ma Mareko 9:35) O lea fetalaiga na ono faateʻia ai i latou. Na feteenaʻi fetalaiga a Iesu ma talitonuga a tagata Iutaia e faatatau i lē e sili! Ona faatū lea e Iesu se tamaitiiti i ona autafa. Na ia opoina ma le māfana le tamaitiiti, ma faamatilatila atu lona manatu: “E moni, ou te fai atu iā te outou, a lē liua outou, ma avea ia pei o tamaiti, tou te lē sao lava i le malo o le lagi. O lenei o sē faamaulalo o ia iā te ia e pei o le tamaitiiti nei, e sili lea i le malo o le lagi.”—Mataio 18:3, 4.
mulimuli i tagata uma, ma auauna a tagata uma.” (E maoaʻe le mataʻina o le lesona i le loto maulalo! Seʻi faaata i lou mafaufau le faataʻitaʻiga lenei. O ni tane tino laulauā, foliga paū o loo siʻomia lenei tamaitiiti e toʻatasi. Na latou faataupupula atu i le tamaitiiti. Pagā le fefe ma talitonugofie, o lagona o loo iai i le tamaitiiti! E lē faatavā ma e lē loto leaga! E gauaʻi ma e lē faualuga! Ioe, na faataatia e le tamaitiiti se faaaʻoaʻoga lelei o le uiga o le Atua, o le loto maulalo.
E manino le manatu o Iesu. E ao foʻi iā i tatou uma ona ati aʻe le loto maulalo e pei o le tamaitiiti ina ia maua ai le Malo o le Atua. E leai ni uiga tauvā pe faamaualuluga i le ʻauaiga o Ieova lea e iai Kerisiano moni. (Kalatia 5:26) O uiga ia na amata ai ona uunaʻia Satani le Tiapolo e fouvale i le Atua. E lētioa inosia e Ieova i latou!—Faataoto 8:13.
E saʻili e Kerisiano moni avanoa e auauna atu, ae lē o avanoa e pule ai. E tusa po o le ā le faigatā o se galuega pe faatauvaa le tagata tatou te auauna ai, o le loto maulalo moni e uunaʻia ai i tatou e auauna atu i isi. O ia auaunaga o le loto maulalo e aumaia ai faamanuiaga e faamalieina ai. Na fetalai Iesu: “Ai sē talia se tamaitiiti faapenei i loʻu nei igoa, ua talia e ia o aʻu; ai se talia aʻu, e le o aʻu ua ia talia, a o ia na auina mai aʻu.” (Mareko 9:37) O le ati aʻe o le uiga o le limafoaʻi ma le loto maulalo e pei o se tamaitiiti, e autasia ai i tatou ma Lē Silisili i le vateatea ma lona Alo. (Ioane 17:20, 21; 1 Peteru 5:5) E tatou te mauaina le fiafia i le limafoaʻi. (Galuega 20:35) E tatou te mauaina ai le faamalieina i le faia o se sao i le filemu ma le autasi o tagata o le Atua.—Efeso 4:1-3.
E Aʻoaʻo Gofie ma Faatalitonu Gofie
Na faamatilatila foʻi e Iesu se isi lesona e mafai ona aʻoaʻo e tagata matutua mai tamaiti: “Ai sē lē talia le malo o le Atua faapei o se tamaitiiti, e lē sao lava ia i ai.” (Mareko 10:15) E lē gata ina loto maulalo tamaiti, ae aʻoaʻo gofie foʻi. Na faapea mai se tinā: “Ua pei i latou o ni omomi, e latou te mitiia uma faamatalaga.”
Ina ia tatou maua le Malo o le Atua, e ao ona tatou talia ma usiusitai i le feʻau o le Malo. (1 Tesalonia 2:13) E faapei o ni pepe faatoʻā fananau mai, e ao ona tatou ‘naunau i le suāsusu faaleagaga e lē suia, ina ia tatou tutupu ai i le faaolataga.’ (1 Peteru 2:2) Ae faapefea pe a faigatā ona malamalama i se aʻoaʻoga a le Tusi Paia? Na faapea mai sē e vaaia tamaiti: “E fesili pea tamaiti, ‘Aiseā?’ seʻiloga lava e maua ni tali e faamalieina ai a latou fesili.” E lelei pe a tatou faataʻitaʻi i a latou faaaʻoaʻoga. Ia faaauau ona suʻesuʻe. Ia talanoa i Kerisiano matutua faaleagaga, ma ōle atu pea iā Ieova mo le poto. (Iakopo 1:5) E mautinoa o le a tauia au tatalo faatauanau.—Mataio 7:7-11.
O isi e ono tomānatu, ‘Pe lē faigofie ea ona faasesēina tagata e aʻoaʻo gofie?’ E lē faigofie pe a maufaatuatuaina le puna o loo taʻitaʻia ai i latou. E pei o se faataʻitaʻiga, o uiga masani o tamaiti e ō atu i o latou mātua mo se taʻiala. Na faapea mai se tamā: “Ua faamaonia e mātua e mafai ona latou maua le faatuatuaga pe a latou puipuia ma tausia a latou fanau i aso taʻitasi.” E mautinoa e iai foʻi a tatou māfuaaga talitutusa e faatuatuaina ai lo tatou Tamā o i le lagi, o Ieova. (Iakopo 1:17; 1 Ioane 4:9, 10) E aumaia e Ieova taʻiala i taimi uma e ala i lana Afioga. O lona agaga paia ma lana faalapotopotoga e faamāfanafana ma fesoasoani i a tatou. (Mataio 24:45-47; Ioane 14:26) O le faaaogā o ia sauniuniga, o le a puipui malu ai i tatou mai lamatiaga faaleagaga.—Salamo 91:1-16.
O le ati aʻe o le faatuatuaina o le Atua e pei o se tamaitiiti e aumaia ai foʻi le filemu o le mafaufau. Na mātauina e se faitofā o le Tusi Paia e faapea: “A o matou laiti, matou te Isaia 41:10.
malaga ae e lē o iā i matou o tamaiti se tupe e totogi ai o matou pasese. E lē iloa foʻi pe faapefea ona oo i le mea o loo faamoemoe atu i ai, ae lē taitai o matou masalosalo o le a aveina atu i matou ma le saogalemu e o matou mātua i le mea o loo matou ō atu i ai.” Po o faapena lo tatou faatuatuaina o Ieova a o faagasolo le olaga?—O le faalagolago atoatoa i le Atua e fesoasoani iā i tatou e ʻalofia ai uiga ma gaoioiga e lamatia ai faaleagaga. Na i lo lea, tatou te matuā mautinoa atoatoa i fetalaiga a Iesu, e silafia e le Tamā i le lagi a tatou gaoioiga, ma pe a tatou faamuamua pea le Malo ma le amiotonu a le Atua, o le a ia tausia i tatou. O le a fesoasoani lea e teena ai le taulaʻi atu i mea faitino ma lē faia ai tiute tauave faaleagaga.—Mataio 6:19-34.
Ia “Faatamameamea i le Leaga”
E ui ina fananau mai e lē lelei atoatoa, ae e mamā loto ma mafaufau o tamaiti. O le māfuaaga lea o le timaʻi mai o le Tusi Paia i Kerisiano: “Ia faatamameamea i le leaga.”—1 Korinito 14:20.
Seʻi manatu iā Monique e lima ona tausaga, o lē na taʻu atu ma le fiafia i lona tinā e faapea: “O laʻu uō fou o Sera, e migimigi lona lauulu e pei o loʻu lauulu!” E leʻi taʻua le lanu o le tino o Sera ma le atunuu e tupuga mai ai. Na faapea mai se matua: “E lē manatu tamaiti i lanu o tagata. E lē malamalama i lanu pe faailoga lanu.” I lea tulaga, maʻeu le matagofie o le faaatagia e tamaiti o uiga lē faailoga tagata o lo tatou Atua, o lē alofa i tagata o nuu uma.—Galuega 10:34, 35.
E iai foʻi i tamaiti se uiga mataʻina o le loto faamagalo atu. Na faapea mai se tamā: “Pe a fufusu Siaki ma Levi, e ma te fai i ai e faatoese le tasi i le isi, ma e vave lava ona toe taaalo fiafia. E la te lē teuloto, e lē toe manatua mea ua teʻa, pe talosagaina foʻi ni mea e mananaʻo ai a o leʻi faamagalo atu. E toe faaauau le la faauōga ma toe taaalo foʻi.” Maʻeu se faaaʻoaʻoga lelei e faataʻitaʻi i ai ē matutua!—Kolose 3:13.
E faigofie foʻi ona iloa e tamaiti o loo soifua le Atua. (Eperu 11:6) O o latou uiga masani e uunaʻia ai i latou e molimau atu ma le lototetele i isi. (2 Tupu 5:2, 3) O a latou tatalo faigofie e faia ma le loto atoa, e pāʻia ai loto maaa. Pe a faaosoosoina, e latou te faaalia se uiga lelei tau amio e tali atu ai. Maʻeu le tautele o nei meaalofa, o tamaiti!—Salamo 127:3, 4.
Toe Maua Uiga Lelei
E te ono tomānatu, ‘Pe talafeagai ona toe maua e tagata matutua o latou uiga lelei a o laiti?’ O le tali i ai e ioe! E mautinoa e faamaonia i le faatonuga a Iesu e mafai ona ‘liua i tatou, ma avea pei o tamaiti.’—Mataio 18:3.
Seʻi faataʻitaʻi: O se vaega tusi ata o loo toe faaleleia se ata taugatā na faaleagaina. I le faagasologa o le galuega, e latou te aveese vaega ua toʻa ai le palapala ma toe faafoʻi i le tulaga na iai muamua. Ina ua uma ni taumafaiga ma le onosai a le ʻautusiata, ona toe iloa atu lea o le ata matagofie i ona lanu ma vaaiga mananaia mo tagata e maimoa i ai. E faapena foʻi ona tatou toe maua uiga lelei lea na iai a o laiti, pe a faia ni taumafaiga maumauaʻi ma le fesoasoani a le agaga paia o Ieova, ma le lagolagosua alofa a le faapotopotoga Kerisiano.—Efeso 5:1
[Ata i le itulau 9]
O uiga masani o tamaiti e loto maulalo
[Ata i le itulau 10]
E lē faailoga tagata tamaiti, ma e faigofie ona faamagalo ma faagalo