Pe na o Isi e Faatalitalia e Faamaoni?

NA TAʻUA e se teineitiiti e 16 tausaga: “Ou te ita i le pepelo, aemaise pe a pelogia foʻi aʻu!” O le toʻatele o i tatou e iai lagona faapea. E tatou te mananaʻo i faamatalaga e aumai iā i tatou, pe tuugutu pe tusitusia, ia moni ma faamaoni. Ae pe tatou te tautala i le mea moni pe a fai atu ni faamatalaga i isi?

I se suʻesuʻega na faia i Siamani, na manatu le toʻatele o ē na tali mai, “e taga lava le pepelo i mea laiti e puipuia ai le tagata lava ia po o isi mai lamatiaga, ina ia tausia ai le va fealoaʻi ma isi.” Na tusi se tusitala: “O le tautala i le mea moni i taimi uma, o se faiga faatamālii, ae e lē maua ai se fiafia i le olaga.”

Pe tatou te mananaʻo i isi e tautala i le mea moni, ae e iai taimi tatou te lē tautala ai foʻi i le mea moni ona faapea o ni māfuaaga tatau? Pe e tāua le taʻuina o le mea moni pe leai? O ā āuga o le pepelo?

Aafiaga o le Lē Tautala i le Mea Moni

Seʻi manatu i aafiaga o le pepelo. O le pepelo e ati aʻe ai le lē maufaatuatuaina i le va o se ulugalii faapea ma tagata o le aiga. O tala lē faavaea e faaleagaina ai se talaaga lelei o se tasi. O le lē faamaoni o tagata faigaluega e tele ai tupe faaalu a se kamupani, ma iʻu ina taugatā ai oloa. O lafoga o tupe maua e lē saʻo ona faatumu, o le a lē maua ai e le malo tupe manaʻomia e faatino ai auaunaga mo tagata lautele. O ni pepelo a ni tagata suʻesuʻe e faaleagaina ai a latou galuega lelei, ma le igoa o le faalapotopotoga o loo faatupeina le latou suʻesuʻega. O faiga ia mauʻoa vave e ala i faiga lē tonu, ua gaoia ai tupe teu a tagata e faigofie ona ʻolegia, pe ua sili atu foʻi nisi tulaga leaga e oo ai. E lētioa faapea mai le Tusi Paia o loo aofia i mea e matuā inosia e Ieova le Atua, le “laulaufaiva pepelo” ma le “molimau pepelo, na te tautala i mea pepelo”!—Faataoto 6:16-19.

O le taatele o le pepelo, e faaleagaina ai tagata taʻitoʻatasi ma faalapotopotoga. E toetoe o tagata uma e ioe i lea manatu. Aiseā la e fai ai ma le iloa e tagata le pepelo? Ae pe e pepelo uma tala lē saʻo? O le a tatou iloiloina tali o nei fesili ma isi foʻi fesili i le mataupu o loo sosoo mai.

[Ata i le itulau 3]

O le pepelo e ati aʻe ai le lē maufaatuatuaina i le va o se ulugalii