Fesoasoani Faaleagaga i le “Fale e Fai i Maa”

O le uiga o le igoa o lenei atunuu Aferika, o le “Fale e Fai i Maa.” E lauiloa le atunuu lenei ona o le āfu o Victoria Falls ma le tele o ituaiga o meaola e maua ai. O loo iai foʻi i inā fale tetelē na fausia e tagata anamua, i le itu i saute o le toafa o Sahara. E faalava ai i le ogatotonu se laufanua laugatasi maupuʻepuʻe. E fetaui lelei le tau e lauolaola ai mea totō i lenei laufanua laugatasi. O vaaiga na i Zimbabwe lea e nonofo ai le 12 miliona tagata.

AISEĀ ua taʻua ai o le Fale e Fai i Maa? I le tausaga e 1867, na maua ai e se tamāloa e tuli manu toe suʻesuʻe foʻi e suafa iā Adam Renders, ni fausaga e fai i maa e ufitia ai le silia ma le 1,800 eka. Sa ia femalagaaʻi solo i le tele o vaipanoa o Aferika lea e tele ina fausia fale i palapala, pou ae ato i vaovao. Sa ia mauaina ai foʻi maa o toega o se aai tele lea ua faaigoa i le Great Zimbabwe.

O toega o lenei aai o loo i le itu i saute o le nofoaga e taʻua o Masvingo. E silia i le 30 futu (9 mita) le maualuga o nisi pā ma e fatufatu i luga o isi maa e aunoa ma se simā e faamau ai. I nei toega o le aai anamua o loo iai se ʻolo e foliga i se faatumu ma e 35 futu (11 mita) le maualuga ae 20 futu (6 mita) le faataamilo o le lautele o le faavae. E lē o iloa le māfuaaga na fausia ai lenei ʻolo mataʻutia. O nei toega e mai le senituri lona valu T.A., ae o loo iai faamaoniga sa nofoia lenei nofoaga i le faitau selau o tausaga muamua atu.

 O le 1980 na tutoʻatasi ai le malo sa igoa iā Rhodesia mai le pulega a Peretania ma toe faaigoa ai loa iā Zimbabwe. E lua ituaiga o tagata o loo nofoia, o le ʻau Shona lea e pito i toʻatele, ma le ʻau Ndebele. E ese le talimālō o tagata, e pei ona mātauina ai e Molimau a Ieova a o faagasolo la latou galuega faaevagelia mai lea fale i lea fale. O nisi o taimi, e tusa pe lē iloa le tagata lea e tuʻituʻi i le faitotoʻa, e vave lava ona valaaulia atu i le fale i le faapea mai, “Afio mai i totonu” pe “Mapu mai i le ava lea.” O le toʻatele o tagata Zimbabwe e faaaloalo i le Tusi Paia ma o le tele o taimi e mananaʻo ia iai a latou fanau a o faia se talanoaga faale-Tusi Paia.

Se Feʻau Faalaeiau e Atiaʻe Ai

E masani ona faamatala Zimbabwe e le ʻaufaasalalau i nusipepa ma leitio i upu e pei o le “AIDS” ma le “lāmala.” Ua ogaoga aafiaga o le faamaʻi o le AIDS i tagata ma le tamaoaiga o nisi itumalo o Sahara i Aferika. O le toʻatele o i latou e taofia i le falemaʻi ua amata ona iai aafiaga o le siama o le HIV. Ua faaleagaina le tele o aiga ona o le faamaʻi.

O loo fesoasoani malosi Molimau a Ieova i tagata Zimbabwe e ala i le faasino i ai e na o le pau le ala e maua ai se olaga faamalieina, o le ola i taʻiala a le Atua o loo i le Tusi Paia. Mo se faaaʻoaʻoga, e aʻoaʻoina e le Afioga a le Atua o feusuaʻiga faaleulugalii o se meaalofa e patino lava i ulugalii ua uma ona faaipoipo, ae taʻusalaina e le Atua le tauatane ma e faasā foʻi tuiga toto ma le faaaogāina o fualaau faasāina. (Galuega 15:28, 29; Roma 1:24-27; 1 Korinito 7:2-5; 2 Korinito 7:1) O loo faasalalau atu foʻi e Molimau se feʻau o le faamoemoe mautū ma faamamafa le manatu ua na o le Malo o le Atua e mafai ona aveesea faamaʻi.—Isaia 33:24.

Saunia o Fesoasoani

E mataʻutia aafiaga o lāmala i totonu o Zimbabwe talu mai le tele o tausaga ua mavae. Ua paeee meaola i le vao ona o le lē lava o meaʻai ma le vai. E faitau selau afe povi ua mamate ona o nei tulaga mataʻutia. E tele foʻi le vaomatua ua faatamaʻia i le afi. Ua toʻatele tagata matutua ma tamaiti ua maliliu ona o le lē lava o meataumafa. E oo lava i le vaitafe o Zambezi ua amata ona lē lava le suāvai e maua mai e faaauau ona gaosia ai le eletise.

I le tali atu i nei tulaga pagātia, ua faatulaga ai e Molimau a Ieova ni komiti mo fesoasoani laveaʻi i vaega eseese o le atunuu. E asiasi atu ovasia femalagaaʻi i faapotopotoga e fuafua po o le ā le fesoasoani moni o manaʻomia. Ona faaoo atu lea o faamatalaga nei i le komiti tonu e tatau ona ave i ai. Na lipotia mai e se tasi ovasia femalagaaʻi: “I le silia ma le lima tausaga ua mavae ua mafai ona matou tufatufaina atu le silia i le afe tone o le saga, sefulu tone o iʻa faalā ma le tele o le suka. Na saunia e uso le lua tone o mufushwa po o fualaau faisua ua uma ona faamagoina. Sa matou tufaina atu foʻi se aofaʻiga tele o lavalava sa tauofo mai e isi uso faapena foʻi ma tupe.” Na faapea mai se isi ovasia femalagaaʻi: “A ou toe mafaufau i le faigatā ona maua o se pemita e faaulufale mai ai fesoasoani i totonu o Zimbabwe ma Aferika i Saute faapena foʻi ma le lē lava o le suāuu e felaʻuaʻi ai nei fesoasoani moomia tele, ae o lea na mafai ona matou fai, o faamaoniga ia o le faamautinoaga a Iesu e silafia e le Tamā o i le Lagi mea uma tatou te manaʻomia.”—Mataio 6:32.

 E faapefea i ovasia femalagaaʻi ona onosaia āuga o le lāmala i isi vaipanoa? O nisi e malaga ma ave taumafa mo i latou ma aiga e nonofo ai. Sa lipotia mai e se tasi ovasia, na iai ni tuafāfine Kerisiano sa tomānatu pe tatau ona taofia le latou talaʻiga mo lenā aso ae ō e tutū i laina e faatalitali ai le fesoasoani a le malo. Sa latou filifili e faalagolago iā Ieova ma faaauau pea le latou talaʻiga ma faatalitali po o le ā le mea e tupu. E leʻi taunuu mai se fesoasoani mai le malo mo tagata i lenā aso.

Sa faatulaga se sauniga faa-Kerisiano i le aso e sosoo ai, ma sa tatau foʻi i nei tuafāfine ona toe fai se isi filifiliga. Po o le a latou auai atu i le sauniga po o le a ō e faatalitali le taunuu ane o fesoasoani? Ona o le faamuamua o mea e ao ona faamuamua, sa latou auai atu i le sauniga i le Maota mo Sauniga. (Mataio 6:33) A o usuina le pese faaiʻu o le sauniga ae faalogoina loa le taunuu ane o se loli. Ua taunuu ane le fesoasoani mai o latou uso faaleagaga i komiti laveaʻi! O se vaaiga ese le fiafia ma le olioli o Molimau faamaoni ia na auai atu i le sauniga.

E Atiaʻe le Alofa

O gaoioiga agalelei iā i latou e i fafo atu o le faapotopotoga Kerisiano ua maua ai avanoa e avatu ai se molimau lelei. A o auai le ovasia femalagaaʻi i le talaʻiga ma nisi o uso i Masvingo, sa ia iloa atu se teineitiiti o loo taatia i tafā ala. Na mātauina e Molimau o loo gasegase o ia ma ua tau lē mafai ona tautala ma e tete foʻi lona leo. O le igoa o le teineitiiti o Hamunyari ma o le uiga o lona igoa i le gagana Shona “Pe Tou te Lē Māsiasi Ea?” Na iloa aʻe e uso ua tuulafoaʻi o ia e lana ʻaulotu o loo agaʻi atu i ni sauniga faalotu e faia i luga o mauga. Sa fesoasoani Molimau i le teineitiiti ma momoli atu o ia i se aai lata ane.

Sa iloa e nisi o le nuu ia Hamunyari ma faafesootaʻi atu loa ona tauaiga e ō mai e aami o ia. Na faapea mai tagata o lea nuu e faatatau i Molimau: “O le tapuaʻiga moni lea. O le ituaiga alofa lea e tatau ona faaalia e Kerisiano.” (Ioane 13:35) A o leʻi ō ese mai uso sa latou tuuina atu iā Hamunyari le savali Pe E te Manaʻo e Fia Iloa Atili e Faatatau i le Tusi Paia? *

I le vaiaso na sosoo ai na asiasi atu ai le ovasia femalagaaʻi i le faapotopotoga i le aai lea e nofo ai Hamunyari. Ma sa ia asia le teine ma faamautinoa po ua taunuu ma le manuia o ia i le latou aiga. Na talisapaia e le aiga uma le asiasi atu o le ovasia ma le ʻauuso. Na faapea mai ona mātua: “O loo outou auai atu i le tapuaʻiga moni. Na outou laveaʻi i la ma tama lea na tuua e maliu i tafā ala.” Na latou fesili atu i tagata o le ʻaulotu a le teine: “Pe tou te lē māsiasi ea e pei o le uiga o le igoa o Hamunyari, i le tou tuulafoaʻia o ia e oti?” Sa amataina loa e Molimau se talanoaga faale-Tusi Paia ma tuuina atu ni lomiga faale-Tusi Paia i le aiga o Hamunyari. Na latou toe valaaulia le ʻauuso e toe foʻi atu e faia se suʻesuʻega i le Tusi Paia. O nisi o le aiga sa lē fiafia i Molimau ua suia o latou manatu. O se tasi o i latou o le toʻalua o le uso matua o Hamunyari, o le taʻitaʻi lotu i lo latou vaipanoa sa ia talia foʻi se suʻesuʻega faale-Tusi Paia.

Fausia Maota mo le Tapuaʻiga

Na tusi se fatusolo na faagaeeina anamuā lava e faapea: “Le Atua e, . . . ua fia inu loʻu agaga iā te oe, i le nuu naumati, e lailoa ai, e leai ni vai.” (Salamo 63:1) Ua matuā moni  lenei faamatalaga i le toʻatele o tagata i Zimbabwe! I le faaletino e latou te onosaia āuga o le lāmala, ae i le itu faaleagaga o loo galala mo le Atua ma lona agalelei. E atagia mai lenei mea i le lipoti a Molimau a Ieova. Ina ua tutoʻatasi Zimbabwe i le 1980 e pe a ma le 10,000 Molimau sa auauna i faapotopotoga e 476. I le taimi nei ina ua mavae tausaga e 27 ua faatoluina le aofaʻiga o Molimau ae ua toeitiiti faaluaina le aofaʻiga o faapotopotoga.

E toʻaitiiti lava se vaega o nei faapotopotoga e iai se maota e tapuaʻi ai. Iā Ianuari 2001 e silia ma le 800 faapotopotoga i Zimbabawe ae na o le 98 faapotopotoga e iai se maota tapuaʻi po o se Maota o le Malo e faatasitasi i ai. O le tele o faapotopotoga e faia a latou sauniga i lalo o laau po o ni fale e fausia ae i pou, palapala ae ato i vaovao.

Ona o le limafoaʻi o le ʻauuso i le lalolagi aoao ua mafai nei e Molimau i Zimbabwe ona iai se polokalame e faamautinoa ai o le a tofusia le tele o isi faapotopotoga ma se Maota mo Sauniga e talafeagai lelei. E toʻatele Molimau mai isi atunuu e iai tomai faufale ua faatulaga a latou fuafuaga ina ia avanoa ai e malaga i Zimbabwe e galulue faatasi ma uso tauofo o loo galulue ai i inā. Na tusi mai se uso i Zimbabwe e faapea: “E matou te matuā faafetaia lava uso ma tuafafine mai isi atunuu i le malaga mai i inei i Zimbabwe e fesoasoani i le fausiaina o ni Maota mo Sauniga matagofie. Ma matou te talisapaia foʻi la outou foaʻi i le Faaputuga Tupe mo Maota o le Malo lea ua mafai ai ona fausiaina nei maota.”

I le itu i sasaʻe o le atunuu, sa faia ai sauniga i lalo o se laau telē e taʻua o le baobab mo le 50 tausaga. Ina ua logoina toeaina i le faapotopotoga o le a fau se maota e fai ai le tapuaʻiga, e leʻi mafai ona taofia le maligi o loimata o se tasi o i latou. Sa faapea mai se toeaina ua 91 ona tausaga o le faapotopotoga e latalata ane i ai: “Ua leva ona ou augani atu iā Ieova ina ia tupu se mea faapenei!”

E toʻatele tagata e mataʻituina le vave o le fausiaina o nei maota matagofie. Sa faapea mai se tasi o i latou: “E tou te galulue i le ao ae e foliga mai e galue le Atua i le po!” E mātauina foʻi le fiafia ma le autasi o le au faigaluega. E oo mai i le asō ua uma ona fausiaina le silia ma le 350 maota fou mo sauniga. Ua mafai nei e le 534 o faapotopotoga ona fai a latou sauniga i ni maota ua mautū le fausiaina i piliki.

O loo faaauau pea nei faugāfale i totonu o Zimbabwe. A o tatou mafaufau i le tele o mea ua mafai ona faatinoina e ao ai ona tatou faafetaia faamanuiaga a Ieova lea ua mafai ai ona fai nei mea uma. Ioe, “Afai e lē atiina aʻe e Ieova le fale, e galulue fua i latou o ē atiina aʻe.”—Salamo 127:1.

[Faamatalaga pito i lalo]

[Faafanua i le itulau 9]

(Tagaʻi i le lomiga mo le ata atoa)

ZIMBABWE

HARARE

Masvingo

Great Zimbabwe

[Ata i le itulau 9]

ʻOlo e foliga i se faatumu

[Ata i le itulau 12]

Maota fou mo sauniga, Faapotopotoga a Concession

[Ata i le itulau 12]

Sui o le Faapotopotoga a Lyndale i fafo o le latou maota fou mo sauniga

[Faamatalaga i Ata i le itulau 9]

Toega ma faasitepu: ©Chris van der Merwe/AAI Fotostock/age fotostock; tower inset: ©Ingrid van den Berg/AAI Fotostock/age fotostock