Ia ʻAlofia le Soonafai

O IEOVA o le faataʻitaʻiga sili i le paleni i so o se mea. “E sao lava lana galuega,” e tonu ana faamasinoga auā e faia i le alofa mutimutivale. (Teuteronome 32:4) O lona alofa e faavae i mataupu silisili ona e ōgatusa ma ana tulafono lelei atoatoa. (Salamo 89:14; 103:13, 14) Na ia faia o tatou uluaʻi mātua i se tulaga e paleni i vala uma. Ma sa aunoa foʻi i laʻua ma ni faanaunauga e fai ni mea e sili atu i le tulaga e ao ona iai. E leʻi aafia i laʻua i ni faiga soonafai. Peitaʻi o aafiaga o le agasala, o lea la ua iai le “ila”—le lē lelei atoatoa—ma iʻu ai ina lē toe iai le tulaga paleni sa iai.—Teuteronome 32:5.

Seʻi faataʻitaʻi le manatu: Ua e tiʻetiʻe i se taavale po o se uilaafi e patu le paʻu? E mautinoa e osooso ma e lē saogalemu le faigāmalaga ona o le faalētonu o le paʻu. E tatau ona fai ia lelei le paʻu a o leʻi pā pe oo atu i se isi tulaga. E faapena foʻi o tatou uiga lē lelei atoatoa e fai ma iai o tatou faalētonu. A tatou tuu pea la le “patu” seʻi oo ina leaga tele, o le a tatou feagai ma faafitauli po o le oo atu ai lava i ni lamatiaga.

I nisi taimi o o tatou tomai ma uiga lelei, e mafai ona soonafai po o le soona faamamafa. O se faaaʻoaʻoga e ui lava sa manaʻomia i le tulafono a Mose tagata Isaraelu e fai ni tuupao o o latou ofu, ae o Faresaio i le vaitaimi o Iesu sa soona ‘faalautetele i tuupao o o latou ofu,’ ina ia matilatila ai i latou mai tagata. O lo latou fanaunauga ia foliga atu e sili lo latou paia na i lo isi tagata.—Mataio 23:5; Numera 15:38-40.

I aso nei ua taumafai nisi tagata e faauaʻi atu manatu iā i latou e ala i le faia o so o se mea, e oo lava i mea e faateʻia ma lē fiafia ai isi. Ua fai e nisi nei tulaga ina ia: “Amanaʻia ma aloaʻia i latou!” Ae e lē faamalieina ai se Kerisiano i le soonafai o laʻei, uiga ma gaoioiga.

Se Vaaiga Paleni i Galuega

Po o ai lava i tatou po o fea foʻi le vaipanoa tatou te nonofo ai, e mautinoa lava tatou te maua le faamalieina i a tatou galuega lelei. Na faia i tatou ina ia maua le faamalieina i galuega tatou te faia. (Kenese 2:15) O le pogai lea e taʻusalaina ai le paiē i le Tusi Paia. Na faapea mai le aposetolo o Paulo: “Pe afai e lē fia galue se tasi, aua neʻi ʻai foʻi o ia.” (2 Tesalonia 3:10) O lona uiga la, o le faapalapala i galuega e lē gata e mativa ma lē faamalieina ai ae lē maua ai foʻi le finagalo malie o le Atua.

O nisi ua oo i le tulaga o le soona galue ma avea e pei o se pologa i galuega. E tuua le aiga i le taeao pō ae tuai mai i le afiafi, e latou te ono faapea mai o loo latou galulue mo le lelei o o latou aiga. Peitaʻi o loo iai se aafiaga lē lelei i o latou aiga ona o le soona galue. Na faapea mai se tasi o avā lea e tele le taimi o lana tane e faaalu i lana galuega: “E sili atu ai loʻu ola mativa na i lo le tele o mea ae leai se taimi o laʻu tane e matou te mafuta ai ma le ma fanau.” E tatau iā i latou e soona galulue naʻuā ona mafaufau i upu a le tupu o Solomona: “Ona ou vaai lea i galuega uma na faia e oʻu lima, ma le galuega  na ou tigā ai i fai; faauta foʻi, o mea faatauvaa uma lava ia, ma le ʻai i le matagi.”—Failauga 2:11.

Ioe, e tatau ona ʻalofia so o se vala o le soona galue. E mafai ona tatou galulue mamafa, ae i le taimi e tasi aua le avea i tatou ma pologa i galuega auā e lē maua ai le fiafia, ma ono oo atu i se isi tulaga.—Failauga 4:5, 6.

ʻAlofia le Soonafai i Mea Faafiafia

Ua valoia mai e le Tusi Paia: “Auā e avea tagata ma . . . ē ua tele le manaʻo i mea faafiafia a e leai se manaʻo i le Atua.” (2 Timoteo 3:2, 4) O le faamuamuaina o mea faafiafia o se tasi o metotia ua faaaogā e Satani e taaʻina ese ai tagata mai le Atua. Ua faatupulaʻia i latou e auai i faafiafiaga, e pei o taaloga e “lamatia” ai le ola. Ua faasolosolo ina tele ituaiga o faafiafiaga ma taaloga ma atili toʻatele ai i latou e auai. Aiseā ua toʻatele ai e tosina i ia faafiafiaga? O le toʻatele o tagata ua lē faamalieina i mea e fai i o latou olaga, ma ua saʻili loa mo nisi faafiafiaga e sili atu. Ae ina ia maua nei ituaiga o faafiafiaga e faatupulaʻia foʻi le tulaga lamatia o le ola. O Kerisiano magafagafa la, e ʻalofia taaloga e lamatia ai le ola ona o le faaaloalo i le meaalofa o le ola ma Lē na foaʻia mai le ola.—Salamo 36:9.

Ina ua māeʻa ona faia e le Atua le uluaʻi ulugalii o fea na ia tuuina ai i laʻua? I le faatoʻaga o Etena, o lona uiga i le uluaʻi gagana o le “Fiafia” po o le “Olioli.” (Kenese 2:8) E aliali mai la o le fuafuaga a Ieova mo le tagata ia maua se olaga faamalieina.

Na tuuina mai e Iesu se faataʻitaʻiga i le auala e maua ai se vaaiga paleni i mea faafiafia. Na ia uaʻi totoʻa atu i le faia o le finagalo o Ieova ma na ia soifua i taimi uma i tulafono ma mataupu silisili a le Atua. Sa lē lavā i nisi taimi ae sa ia fesoasoani pea iā i latou na pagatia. (Mataio 14:13, 14) Ioe sa talia e Iesu valaaulia e fai ʻaiga faatasi ma isi ma faaavanoa taimi e mālōlō ai ma faafiafia. Na ia silafia le lē fiafia o ona fili iā te ia ma faitio ona o lona faia o mea ia. Ua latou faapea ane: “Faauta, o le tagata ʻai tele ma le inu uaina.” (Luka 7:34; 10:38; 11:37) Peitaʻi, na talitonu Iesu o le tuutoina atoatoa e lē taofia ai le faia o mea faafiafia uma.

E mautinoa o se gaoioiga poto le tatou ʻalofia o faafiafiaga soonafai. E lē mafai ona maua se fiafiaga moni i o tatou olaga pe a tatou faamuamuaina faafiafiaga ma faigamālōlōga. E mafai ona tatou faatalalē i mea tāua aemaise le tatou faiā ma le Atua. O le mea tāua lava la, e lē faapea o le a tatou lē auai i faafiafiaga uma lava, e lē tatau foʻi ona tatou faitioina tagata o loo fiafia i mea faafiafia i se tulaga paleni.—Failauga 2:24; 3:1-4.

Ia Faafiafiaina i se Olaga Paleni

E pei ona tusia e le soo o Iakopo: “Auā o mea e tele e sesē ai i tatou uma.” (Iakopo 3:2) Atonu e faapea lo tatou tulaga a o tatou taumafai e ʻalofia le soonafai. O le ā e fesoasoani iā i tatou e tumau i le paleni? E manaʻomia ona tatou amanaʻia mea e tatou te malolosi ai ma mea tatou te vaivai ai. E lē faigofie lea tulaga. Auā o nisi o taimi tatou te agaʻi atu i tulaga soonafai ma le lē iloa. O se gaoioiga atamai lo tatou pipii ma faalogo i fautuaga a Kerisiano taʻumatuaina. (Kalatia 6:1) Tatou te ono fesili atu i se uō maufaatuatuaina po o se toeaina ua lava le poto masani i le faapotopotoga mo na fautuaga. E lē gata i le Tusi Paia ae o fautuaga o loo iai e mafai ona pei o “se faaata” e siaki ai lo tatou tulaga i luma o Ieova.—Iakopo 1:22-25.

O le mea e tatou te fiafia ai, e lē tau manaʻomia ona faaalu sesē o tatou olaga i faiga soonafai. E mafai ona avea i tatou ma tagata fiafia pe a fai ni taumafaiga maumauaʻi ma faalagolago iā Ieova. E faaleleia atili ai la tatou faiā ma uso ma tuafāfine Kerisiano, ma avea ai i tatou o ni faataʻitaʻiga lelei i tagata tatou te talaʻi atu i ai. Ae sili atu i lenā, o le a lelei ai ona tatou faataʻitaʻia lo tatou Atua alofa ma le paleni, o Ieova.—Efeso 5:1.

[Faamatalaga i Ata i le itulau 28]

©Greg Epperson/age fotostock