Se Faaaʻoaʻoga o le Faamaoni

O NEIMA e faigaluega i se fale ʻoti ulu i totonu o Cruzerio do Sul i Pasili, ma sa iai se mea na tupu taluai nei na tofotofoina ai lona faamaoni o se Kerisiano. Ina ua faaleagaina lo latou nuu i se lologa sa ia maua ni lavalava na foaʻi ane e se fafine e masani ona ʻoti lona ulu iā te ia. A o ia iloiloina nei lavalava sa ia maua ai se tino i tupe e tutusa ma le $1,000 Amerika i taga o nisi o ofu.

O le tupe lea sa maua e Neima e tutusa ma lona totogi i le fitu masina, ma sa ia manaʻomia tele se tupe i lea taimi. Sa faaleagaina lona fale i lologa ma lēiloloa ai mea totino a lona tamā ma nai ona tei. O le tupe sa ia mauaina sa ono mafai ona faauma ai lona fale ma totoe foʻi se tupe e fesoasoani ai i ona tauaiga. Peitai, e leʻi faatagaina e le loto fuatiaifo o Neima lea ua uma ona aʻoaʻoina i le Tusi Paia ona ia taofia lenei tupe.—Eperu 13:18.

I le taeao o le aso na sosoo ai, na vave usu i le galuega ma faafesootaʻi atu loa le fafine faipisinisi lea na foaʻi mai ai lavalava. Sa faafetai atu Neima mo le meaalofa ae na ia faapea atu sa lē mafai ona ia tuua le mea sa maua i totonu. Sa matuā faafiafiaina le fafine ina ua ia toe maua atu le tupe. O le tupe lenei sa ia tuu ese e totogi ai lana ʻaufaigaluega. Na taʻutino mai e lenei fafine faipisinisi “e lē o toe faigofie ona e maua ni tagata faamaoni.”

Peitaʻi fai mai nisi e lē tāua tele le uiga o le faamaoni, ae mautinoa e matuā tāua iā i latou e faia ni taumafaiga malolosi e faafiafia Ieova, le Atua moni. (Efeso 4:25, 28) Fai mai Neima: “E mautinoa loʻu lē moe lelei i pō pe ana ou faia se isi gaoioiga e ese mai i le mea na ou faia.”