Le Auala e Iloa ai le Lotu Moni

E TOEITIITI o lotu uma e faapea mai o a latou aʻoaʻoga e mai i le Atua. O le ala lea e tatau ai ona tatou utagia upu na tusia e le aposetolo o Ioane e faapea: “Le ʻau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toʻatele perofeta pepelo ua ō atu i le lalolagi.” (1 Ioane 4:1) E faapefea ona tatou iloiloina se mea pe e mai i le Atua?

O so o se mea lava e mai i le Atua e tatau ona ʻatagia mai ai ona uiga aemaise lona uiga autū o le alofa. Mo se faaaʻoaʻoga, e iloa le alofa o le Atua i o tatou faalogona e sogisogi ai, lea ua mafai ai ona tatou iloa le mananaia o manogi o lau laau, fugālaau po o se umu falaoa faatoʻā vela. E iloa foʻi le alofa o le Atua iā i tatou i le mafai lea ona tatou vaai atu i le goto ifo o le lā, lanu manaia o se pepe lele, po o le ʻataʻata a se tamaitiiti. E faapena foʻi i le mafai ona tatou faalogo atu i pese mālū, le tagi a se manulele, po o le leo o sē e pele iā i tatou. E oo foʻi i le auala ua faia ai i tatou, e ui ina lē lelei atoatoa ae o loo faaalia ai foʻi le alofa o le Atua. O le ala lenā e tatou te iloa ai le moni o fetalaiga a Iesu: “E sili le manuia o lē na te foaʻi atu, i lo lē talia mai.” (Galuega 20:35) E tatou te fiafia e faaalia le alofa auā na faia i tatou i le “faatusa o le Atua.” (Kenese 1:27) E ui e tele isi uiga o Ieova, ae e silisili ona lālāmua mai lona alofa.

E tatau i tusitusiga mai le Atua ona ʻatagia mai ai lona alofa. E tele tusitusiga mai anamuā a lotu a le lalolagi. Ae faamata o ʻatagia mai ai le alofa o le Atua i na tusitusiga?

O le mea moni, e itiiti lava se vaega o loo faamatalaina mai e le tele o nei tusitusiga e faatatau i le auala o loo alofa mai ai le Atua iā i tatou po o le auala tatou te alolofa ai iā te ia. E faitau miliona tagata e latou te lē o mauaina le tali o le fesili lenei, “Aiseā tatou te vaaia ai le alofa o le Atua i foafoaga ae o loo iai pea mafatiaga ma le leaga?” E na o le Tusi Paia lava le tusitusiga a lotu ua leva, o loo faamatala atoatoa mai ai le alofa o le Atua. O loo aʻoaʻo mai ai foʻi i tatou i le auala e faaalia ai le alofa.

Le Tusi o le Alofa

Ua faaalia mai i le Tusi Paia, o Ieova o “le Atua e ona le alofa.” (2 Korinito 13:11) Ua faamatala mai ai foʻi le auala na uunaʻia ai Ieova e le alofa ina ia aumai i uluaʻi tagata le ola e aunoa ma se maʻi ma le oti. Ae o le fouvale i le pule a le Atua ua oo mai ai mafatiaga i tagata. (Teuteronome 32:4, 5; Roma 5:12) Na gaoioi Ieova e toe faafoʻisia mai mea uma ua lēiloa. Na faapea mai le Afioga a le Atua: “Ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te  ia, a ia maua e ia le ola faavavau.” (Ioane 3:16) Ua faaalia atili mai e le Tusi Paia le alofa o le Atua, ina ua faamatala mai le auala ua saunia ai e le Atua se pulega lelei atoatoa i lalo o le pulega a Iesu, e toe aumaia ai le filemu i tagata usiusitai.—Tanielu 7:13, 14; 2 Peteru 3:13.

Na aotele e le Tusi Paia i upu nei le mea e tatau ona fai e le tagata: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaʻiga muamua lenā ma le sili. E faapena foʻi lona lua, E te alofa atu i lē lua te tuaoi, ia pei o oe lava iā te oe. O na poloaʻiga e lua ua autū ai le tulafono uma.” (Mataio 22:37-40) Ona o le Tusi Paia na faagaeeina e le Atua e pei ona faaalia manino mai ai ona uiga, e mautinoa ai la e mai i “le Atua e ona le alofa.”—2 Timoteo 3:16.

O le faatatauina o lenei vala e tasi, e mafai ona tatou iloa ai po o fea tonu tusitusiga anamuā e mai le Atua. O le alofa foʻi e mātaulia ai auauna moni auā latou te faaaʻoaʻo i le Atua e faaalia le alofa.

Faailoga e Iloa ai Ē e Alolofa i le Atua

O i latou e alolofa moni i le Atua e matilatila ese lava, aemaise e pei ona taʻua e le Tusi Paia le taimi ua tatou ola ai “o aso e gata ai.” Ua tele ina avea tagata ma “ē alolofa i latou iā i latou, o ē mananaʻo i tupe . . . o ē ua tele le manaʻo i mea faafiafia a e leai se manaʻo i le Atua.”—2 Timoteo 3:1-4.

E faapefea ona e iloa tagata e alolofa i le Atua? Ua faapea mai le Tusi Paia: “O lenei lava le alofa i le Atua, ia tatou tausi i ana poloaʻiga.” (1 Ioane 5:3) O le alofa i le Atua e uunaʻia ai tagata e faaaloalo i tapulaa tau amio a le Tusi Paia. E pei o tulafono a le Tusi Paia i feusuaʻiga ma faaipoipoga. O feusuaʻiga e mo na o i latou ua uma ona faaipoipo, ma e tatau ona tumau le faaipoipoga. (Mataio 19:9; Eperu 13:4) Ina ua auai atu se fafine Sepania o loo aʻoga i mataupu faalelotu i se sauniga a Molimau a Ieova, o loo talanoaina ai tulafono tau amio a le Tusi Paia, na ia faapea mai: “Na ou tuua le sauniga ma faalogona ua faalaeiauina, ua lē gata i lauga mai le Tusi Paia a o le autasi o loo i nei tagata, le maualuga o a latou tapulaa tau amio, ma a latou amio lelei.”

E lē gata i le alofa i le Atua, ae e faigofie ona iloa Kerisiano moni i le auala e faaalia ai lo latou alolofa i o latou tuaoi. O le latou galuega e sili ona tāua o le talanoa lea i isi i le faamoemoe sili o tagata, o le Malo lea o le Atua. (Mataio 24:14) E leai se isi mea e sili atu lona aogā na i lo le fesoasoani i tuaoi e maua le poto e faatatau i le Atua. (Ioane 17:3) E latou te faaalia foʻi le alofa i isi auala. E latou te fesoasoani iā i latou o mafatia. O se faataʻitaʻiga, ina ua lūlū se mafuiʻe i Italia, na faapea mai se nusipepa i inā e uiga i Molimau a Ieova, o loo “gaoioi i se tulaga aogā, ua fesoasoani iā i latou ua mafatia, e aunoa ma le fesili po o le ā le lotu e auai ai.”

O Kerisiano moni e alolofa i le Atua, tuaoi ma le tasi i le isi. Na fetalai mai Iesu: “O le poloaʻiga fou ou te tuu atu ai iā te outou, ia outou fealofani; faapei ona ou alofa atu iā te outou, ia fealofani foʻi outou. O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:34, 35.

Po o matuā iloa gofie le alofa e faaalia e Kerisiano moni mo le isi? Ioe, o le manatu lenā o Ema o sē e teufale. E faigaluega i La Paz i Polivia, i se nofoaga e tele ina faaesea ai tagata mauʻoa mai i ē matitiva. Na ia faapea mai: “I le taimi muamua na ou auai ai i le sauniga a Molimau a Ieova, na ou vaaia ai se tamāloa e laʻei i ni ofu taugatā ae o loo nonofo ma talanoa ma se fafine Initia e lē taualoa. Ou te leʻi vaai lava i se tulaga faapea muamua. I lenā taimi, na ou iloa ai o tagata moni ia o le Atua.” Na faapea mai foʻi Miriama o se tamaʻitaʻi talavou mai Pasili: “Ou te leʻi iloa le auala e fiafia ai, e oo lava i totonu o loʻu aiga. O le taimi muamua na ou vaai ai i le faatinoga o le alofa, sa faaalia e tagata Molimau  a Ieova.” I Amerika, na tusi mai se faatonusili o tala fou a se televise: “Pe ana toʻatele tagata e ola e pei o tagata o la outou tapuaʻiga, semanū e lē o le tulaga lenei e oo i ai lenei atunuu. Ua ou iloaina o le tou faalapotopotoga e faavae aʻe i le alofa ma e malosi lo outou faatuatua i Lē na Foafoaina Mea uma.”

Ia Saʻili le Lotu Moni

O le alofa o se vala matilatila e iloa ai le lotu moni. Na faatusa e Iesu le saʻilia o le lotu moni i le suʻeina o le auala saʻo ma filifili e savali ai. E na o le pau lenā o le auala e oo atu ai i le ola e faavavau. Na fetalai Iesu: “Ia outou ulu atu i le faitotoʻa va apiapi; auā e va tele le faitotoʻa, e lautele foʻi le ala e tau atu i le malaia, e toʻatele foʻi i latou o ē ui atu ai. Auā e va apiapi le faitotoʻa, e lauitiiti foʻi le ala e tau atu i le ola, e toʻaitiiti foʻi i latou o ē maua.” (Mataio 7:13, 14) Ua na o le tasi le vaega o Kerisiano moni o loo savavali i le autasi ma le Atua i le ala o le lotu moni. O lea la e tāua tele le lotu e te filifilia. Pe a e maua lenā auala ma filifili e savali ai, ona e iloa lea o le auala sili lenā i le olaga, auā o le ala o le alofa.—Efeso 4:1-4.

Seʻi mafaufau i le fiafia o le a oo iā te oe a o e savali i le ala o le lotu moni! E pei lava o loo lua savavali faatasi ma le Atua. E aʻoaʻo mai e le Atua le poto ma le alofa ina ia e fiafia i le lelei o lau faiā ma isi. E te aʻoaʻo mai ai foʻi iā te Ia le fuafuaga o le olaga, ma mafai ai ona e malamalama i ana folafolaga, ma maua ai sou faamoemoe mo le lumanaʻi. E alu aogā lou tautigā i le saʻilia o le lotu moni.

[Ata i le itulau 5]

I tusitusiga a lotu anamuā, ua na o le Tusi Paia ua faaalia maia le alofa o le Atua

[Ata i le itulau 7]

E iloa gofie Kerisiano moni ona latou te faaalia le alofa