Olioli i le Ola Mataʻu iā Ieova

“O outou na o ona tagata paia, ia outou matataʻu iā Ieova, auā e leai se mea e mativa ai ē ua matataʻu iā te ia.”—SALAMO 34:9.

1, 2. (a) O ā auala tuufaafeagai e lua o manatu ai tagata lotu i le mataʻu i le Atua? (e) O ā fesili o le a tatou talanoaina?

O FAIFEʻAU a lotu o loo faapea mai o Kerisiano, o loo latou aʻoaʻoina tagata ia matataʻu i le Atua, e tele lava ina faavae i le aʻoaʻoga sesē e faapea, e faasala e faavavau e le Atua tagata agasala i le afi i seoli. E feteenaʻi lenei aʻoaʻoga ma le mea o fai mai ai le Tusi Paia e faatatau iā Ieova o se Atua e alofa ma faamasino tonu. (Kenese 3:19; Teuteronome 32:4; Roma 6:23; 1 Ioane 4:8) O isi faifeʻau o atunuu o loo faapea mai o Kerisiano, e tuufaafeagai le mea o latou faia. E latou te matuā lē taʻua lava se tatau ona tatou matataʻu i le Atua. Na i lo lenā, e latou te aʻoaʻoina faapea e lē o manatu mamafa mai le Atua, ma e na te talia toetoe lava o tagata uma po o le ā lava le ituaiga olaga o ola ai. E lē o aʻoaʻoina foʻi e le Tusi Paia lenā talitonuga.—Kalatia 5:19-21.

² O loo faalaeiauina i tatou e le Tusi Paia e matataʻu iā Ieova. (Faaaliga 14:7) O le aʻoaʻoga la lenā a le Tusi Paia ua lāgā ai fesili nei. Aiseā e finagalo ai se Atua alofa ia tatou matataʻu iā te ia? O le ā le ituaiga mataʻu lea e manaʻomia mai e le Atua? E aogā faapefea iā i tatou le mataʻu i le Atua? O le a iloiloina fesili nei a o faaauau ona tatou talanoaina le Salamo e 34.

Le Māfuaaga e Mataʻu ai i le Atua

3. (a) O le ā sou manatu i le faatonuga ia mataʻu i le Atua? (e) Aiseā e fiafia ai i latou e matataʻu iā Ieova?

³ Ona o Ieova na Faia mea uma lava ma o le Pule Silisili Ese i le aoao o mea uma, e talafeagai la ona matataʻu iā te ia. (1 Peteru 2:17) Peitaʻi, o le mataʻu lenei e lē faapea o se mataʻu pe fefe i  se atua sauā. O se mataʻu talafeagai ona o le āva ma le migao lea e na o Ieova lava e tatau i ai. E mafai foʻi ona faaupu o le mataʻu ia aua le faia se mea e lē fiafia ai lona finagalo. O le mataʻu i le Atua e mamalu, na i lo le faanoanoa ma nofo popole ai. E finagalo Ieova, “le Atua manuia [fiafia],” ia ola fiafia le fanau a tagata. (1 Timoteo 1:11) Peitaʻi, ina ia faia faapea, e ao ona tatou ola e tusa ma mea na te faafinagaloina. O lona uiga, e ao i le toʻatele ona suia le auala o loo ola ai. O i latou uma ua faia suiga manaʻomia, ua latou iloa le moni o upu a le faisalamo o Tavita o loo faapea mai: “Inā tofotofo ia outou, ma ia outou iloa e lelei Ieova; amuia lava le tagata o lē faatuatua iā te ia. O outou na o ona tagata paia, ia outou matataʻu iā Ieova, auā e leai se mea e mativa ai ē ua matataʻu iā te ia.” (Salamo 34:8, 9) Ona o le lelei o la latou faiā ma le Atua, e maua e ē matataʻu iā Ieova mea uma e tumau le aogā.

4. O le ā le faamautinoaga na taʻua e Tavita ma Iesu?

⁴ Mātau le auala na faatatauina ai i aso o Tavita, na ia faaalia le faaaloalo i ona tauleleʻa e ala i lona taʻua o i latou o “tagata paia.” Sa avea i latou ma vaega o le nuu paia o le Atua. Sa latou mulimuli foʻi iā Tavita e ui na lamatia ai o latou ola. E ui lava sa latou fesolasolataʻi mai le tupu o Saulo, ae sa mautinoa pea e Tavita o le a faaauau ona saunia e Ieova mea latou te manaʻomia. Na tusi Tavita e faapea: “E oge mea leona taanoa, ma latou fia aai; a e e leai se mea lelei e mativa ai i latou o ē saʻili iā Ieova.” (Salamo 34:10) Na avatu foʻi e Iesu le faamautinoaga faapena i ona soo.—Mataio 6:33.

5. (a) O ā ituaiga o tagata e iai le toʻatele o soo o Iesu? (e) O le ā le fautuaga na avatu e Iesu e faatatau i le mataʻu?

⁵ O le toʻatele o i latou sa faalogo iā Iesu o ni tagata Iutaia lē taualoa ma le faatauvaa. Na silasila atu Iesu: “Ona mutimuti vale ai lea o lona alofa iā te i latou, ona ua lailoa i latou ma tuulafoaʻiina, e pei o mamoe e leai so latou leoleo.” (Mataio 9:36) Po o le a loto tetele ea nei tagata faatauvaa e mulimuli iā Keriso? Ina ia faia faapea, e manaʻomia ona latou ati aʻe le mataʻu iā Ieova a e lē o tagata. Na fetalai Iesu: “A ou te fai atu iā te outou nā aʻu uō, aua tou te matataʻu iā te i latou o ē fasioti le tino; a mavae lea, ua leai se toe mea latou te mafaia. A e ou te faasino atu iā te outou i lē tou te matataʻu i ai; ia outou matataʻu iā te ia, a mavae ona fasioti e ia, e ana le pule e lafo atu i Kēna; e moni, ou te fai atu iā te outou, ia outou matataʻu iā te ia. E lē faataulia ea manu iti e lima gafua i asari e lua? E leai foʻi so latou e tasi ua galo i luma o le Atua. A o outou lauulu lava ua faitaulia uma ia. Aua tou te matataʻu; ua sili outou i manu iti e tele.”—Luka 12:4-7.

6. (a) O ā fetalaiga a Iesu lea o loo faamalosia ai le ʻau Kerisiano? (e) Aiseā ua avea ai Iesu ma faaaʻoaʻoga sili ona lelei i le faaalia o le mataʻu i le Atua?

⁶ Pe a faamalosia ē matataʻu iā Ieova e o latou fili e aua le toe auauna i le Atua, e latou te ono tomānatu i le fautuaga a Iesu: “O sē taʻua aʻu i luma o tagata, e taʻua foʻi o ia e le Atalii o le tagata i luma o agelu a le Atua. A o lē faafiti mai iā te aʻu i luma o tagata, e faafitia o ia i luma o agelu a le Atua.” (Luka 12:8, 9) O fetalaiga na o loo faamalosia ai Kerisiano, aemaise lava i atunuu e faasā ai le tapuaʻiga moni. O loo faaauau  pea ona viia ma le faautauta Ieova e i latou na i sauniga faa-Kerisiano ma la latou faiva i le lautele. (Galuega 5:29) Na faataatia e Iesu le faaaʻoaʻoga sili ona lelei i le faaalia o le “migao” po o le mataʻu i le Atua. (Eperu 5:7) Sa tusia mai faavaloaga e faatatau iā te ia: “E afio mau iā te ia le Agaga o Ieova; o le Agaga o . . . le mataʻu iā Ieova. E fiafia foʻi o ia i le mataʻu iā Ieova.” (Isaia 11:2, 3) E sili atu la ona agavaa Iesu e aʻoaʻoina i tatou i le aogā o le mataʻu i le Atua.

7. (a) E faapefea i Kerisiano ona tali atu i se valaaulia e tai pei o lea na fai mai e Tavita? (e) E mafai faapefea e mātua ona mulimuli i le faaaʻoaʻoga lelei a Tavita?

⁷ O i latou uma o mulimuli i le faaaʻoaʻoga a Iesu ma usiusitai i ana aʻoaʻoga, e mautinoa o loo latou tali atu i se valaaulia e pei o lea na faaleo mai e Tavita: “Le fanau e, inā ō mai ia, inā faalogologo mai ia iā te aʻu; ou te aʻoaʻo atu iā te outou ia matataʻu iā Ieova.” (Salamo 34:11) Sa talafeagai iā Tavita ona taʻua ona tauleleʻa o “fanau” po o atalii auā sa latou manatu iā te ia o lo latou taʻitaʻi. Sa fesoasoani Tavita i ē na mulimuli iā te ia ina ia matataʻu i le Atua ina ia faatumauina ai lo latou autasi ma olioli i lona finagalo malie. O se faaaʻoaʻoga lelei lenei mo mātua Kerisiano! Ua tuuina mai e Ieova iā i latou le pule i a latou fanau ina “ia tausi atu i ai i aʻoaʻiga ma apoapoaʻiga a le Alii.” (Efeso 6:4) O lo latou talanoaina i aso taʻitasi o mea faaleagaga ma le fanau ma le faia o se suʻesuʻega faifai pea ma i latou, o le a fesoasoani ai i a latou fanau e olioli i se olaga e matataʻu iā Ieova.—Teuteronome 6:6, 7.

Le Auala e Faaalia ai le Mataʻu i le Atua

8, 9. (a) Aiseā e lelei ai le ola mataʻu i le Atua? (e) O ā mea e aofia ai i le leoleoina o o tatou laulaufaiva?

⁸ E pei lava ona muaʻi taʻua, e lē faapea a tatou matataʻu iā Ieova ona tatou lē maua ai lea o le fiafia. Na fesili mai Tavita: “O ai ea le tagata ua manaʻo i le ola, ma ua loto ia tele ona aso, ia iloa ai e ia mea lelei?” (Salamo 34:12) E manino lava, o le mataʻu iā Ieova o se vala tāua o le ola tuluʻi ma maua ai le fiafia. Peitaʻi, e faigofie tele le faapea atu, “ou te mataʻu i le Atua,” ae o le faatinoga e lē faigofie i taimi uma ona faamaonia lo tatou matataʻu i le Atua e ala i a tatou amio. Ua fesoasoani mai Tavita i le auala tatou te faaalia ai le mataʻu i le Atua.

⁹ “Aua neʻi tautala lou laulaufaiva i upu leaga, ma ou laugutu neʻi tautala faaʻoleʻole.” (Salamo 34:13) Sa faagaeeina le aposetolo o Peteru e sii mai le vaega lenei o le Salamo 34, ina ua uma ona ia fautuaina Kerisiano e feutagaʻi ma isi i le alofa faaleuso. (1 Peteru 3:8-12) O le aua neʻi tautala po o le leoleoina o o tatou laulaufaiva mai mea leaga, o lona uiga o le ʻalofia lea o le faasalalauina o tala taufaaleaga. Na i lo lea, tatou te taumafai e lē aunoa ia faalaeiau pe a tatou talanoa i isi. E lē gata i lea, tatou te taumafai malosi e loto tetele ma tautatala faamaoni.—Efeso 4:25, 29, 31; Iakopo 5:16.

10. (a) Faamatala le uiga o le ʻalo ese mai mea leaga. (e) O ā mea e aofia ai i le faia o mea lelei?

¹⁰ “Inā ʻalo ese ia i mea leaga, a ia fai mea lelei; inā saʻiliʻili atu ia i le filemu, ma tausisi i ai.” (Salamo 34:14) Tatou te ʻalofia mea e taʻusalaina e le Atua, e pei o amioga lē mamā faaleituaiga, o ata matagā o faiga faaleituaiga, gaoi, faiga faataulāitu, faiga sauā, onā, ma le faaaogā o fualaau faasāina. Tatou te ʻalofia foʻi faafiafiaga e faaalia ai na faiga matagā. (Efeso 5:10-12) Na i lo lea, e faaaogā o tatou taimi e fai ai mea lelei. O le mea lelei silisili e mafai ona tatou faia o le auai e lē aunoa i le talaʻia o le Malo ma le faia o soo, ma fesoasoani i isi ia maua le faaolataga. (Mataio 24:14; 28:19, 20) E aofia foʻi i le faia o mea lelei le sauniuni mo sauniga ma auai atu i ai, lagolagoina tautupe le galuega i le lalolagi aoao, le faamamāina o le Maota mo Sauniga, ma le amanaʻia o manaʻoga o Kerisiano lē tagolima.

11. (a) Na faapefea ona gaoioi Tavita e pei ona ia taʻu mai e uiga i le filemu? (e) O le ā e mafai ona e fai e ‘saʻilia ai le filemu’ i le faapotopotoga?

¹¹ Sa faataatia e Tavita se faaaʻoaʻoga lelei i le tausisi lea i le filemu. E faalua ona ia maua le avanoa e fasioti ai Saulo. I ia taimi uma, na ia ʻalo ese mai le faaalia o le sauā ma mulimuli ane sa ia tautala atu ma le faaaloalo i le tupu, ma le faamoemoe ia maua ai le filemu. (1 Samuelu 24:8-11; 26:17-20) O le ā e ao ona  fai i aso nei pe a tulaʻi mai se mea e ono saveʻu ai le filemu o le faapotopotoga? E ao ona tatou ‘saʻili i le filemu, ma tausisi i ai.’ O lea la, pe a tatou lagona ua tau afāina la tatou faiā ma a tatou aumea talitonu, tatou te usitaia le fautuaga a Iesu: “Ia muaʻi faalelei i lou uso.” Ona faaauau ai lea i isi vala o le tapuaʻiga moni.—Mataio 5:23, 24; Efeso 4:26.

E Tele Aogā o le Mataʻu i le Atua

12, 13. (a) O ā aogā o loo maua i le taimi nei e ē matataʻu i le Atua? (e) O le ā le taui sili ua lē o toe umi ona olioli ai lea o ē tapuaʻi faamaoni?

¹² “O fofoga o Ieova o loo faasaga i ē amiotonu, e liliu mai foʻi ona taliga i a latou alaga.” (Salamo 34:15) O tala i le auala na feutagaʻi ai le Atua ma Tavita ua faamaonia ai le moni o nei upu. I aso nei, o loo iā i tatou le olioli ma le filemu i totonu auā ua tatou iloa o loo sisila mai fofoga o Ieova iā i tatou. Ua tatou mautinoa foʻi e tali mai Ieova i taimi uma lava i o tatou manaʻoga, e tusa lava pe tatou te matuā mafatia. Ua tatou iloa ua toe o se aga ona fetaiaʻi loa lea o tagata tapuaʻi moni uma ma le osofaʻiga na valoia mai a Koku o Makoku faapea ma le “aso tele ma le silisili o Ieova.” (Ioelu 2:11, 31; Esekielu 38:14-18, 21-23) Po o le ā lava la le tulaga o le a tatou fetaiaʻi, o le a moni iā i tatou upu a Tavita: “Ua alalaga ē ua amiotonu, ona faafofoga mai ai lea o Ieova; ua ia laveai mai foʻi iā te i latou ai o latou puapuaga uma.”—Salamo 34:17.

¹³ Maʻeu le faagaeetia o le a iai lenā taimi i le mātauina o le faasilisilia e Ieova o lona lava suafa silisili! O le a faatumuina o tatou loto i le āva ma le migao e tatau ai, ma o ē uma e tetee o le a toʻilalo ma fano e faavavau: “A o fofoga o Ieova, o loo faasaga i ē fai amio leaga, ina ia tineia le faamanatuina o i latou ai le lalolagi.” (Salamo 34:16) Maʻeu se taui tele o le auai lea ma molimauina le faasaoina atu i le lalolagi fou amiotonu a le Atua!

O Folafolaga a Ieova ua Tatou Onosai Ai

14. O le ā se faamatalaga a le Tusi Paia e mafai ona fesoasoani iā i tatou e onosai ai i puapuaga?

¹⁴ I le taimi nei, e fesoasoani le onosai ina ia faaauau ai ona tatou usitai iā Ieova i lenei lalolagi piʻopiʻo ma le sauā. E fesoasoani tele le mataʻu i le Atua i le faatupuina o le usitai. Ona ua tatou ola nei i aso faigatā, ua oo ai ni tulaga sili ona faigatā i nisi ma faapogaia ai lo latou loto momomo ma le loto nutimomoia. Peitaʻi, e mafai ona latou mautinoa atoatoa afai latou te faalagolago atoatoa iā Ieova, e fesoasoani mai Ieova ia latou tumau. O loo momoli mai e upu a Tavita se faamāfanafanaga moni: “Ua latalata mai Ieova i ē ua loto momomo; ua ia faaola foʻi i ē ua loto nutimomoia.” (Salamo 34:18) E faalaeiau upu na sosoo ai a Tavita: “E tele lava mea leaga e oo i lē ua amiotonu; a e laveaʻiina o ia e Ieova ai ia mea uma.” (Salamo 34:19) E tusa lava po o le ā le tele o mea leaga e oo iā i tatou, ae e sili atu le malosi o Ieova e laveaʻi i tatou.

15, 16. (a) O le ā le mala na logotala i ai Tavita a e leʻi leva lava talu ona uma le fatuina o le Salamo 34? (e) O le ā le faamautinoaga e mafai ona fesoasoani mai ia onosaia ai mala?

 ¹⁵ E leʻi leva talu ona uma le fatuina o le Salamo 34, ae logotala loa Tavita i le mala na oo i tagata o Nove, ina ua fasiotia e Saulo i latou ma le toʻatele o ositaulaga. E mautinoa le mafatia o Tavita ina ua ia iloa ane, o lona alu atu i Nove na faapogaia ai le maʻemaʻeā o Saulo! (1 Samuelu 22:13, 18-21) E lē taumate na liliu atu Tavita iā Ieova mo se fesoasoani, ma e mautinoa sa faamāfanafanaina o ia i lona iloa e mafai ona toe tutū mai “ē ua amiotonu.”—Galuega 24:15.

¹⁶ Ua faamalosia foʻi i tatou i aso nei e le faamoemoe o le toe tū. Ua tatou iloa e aunoa ma se mea e faia e o tatou fili e tumau ona faaleagaina ai i tatou. (Mataio 10:28) Na faaleo mai e Tavita lona talitonuga faapena i upu nei: “E leoleoina e ia o ona [lē amiotonu] ivi uma; e lē gau lava se tasi.” (Salamo 34:20) Sa iai moni se faataunuuga o lenei mau iā Iesu. E ui lava i le lē alofa ma le sauā o le auala na fasiotia ai o ia, ae e aunoa ma sona ivi na “gauia.” (Ioane 19:36) Pe a faalautele sona faatatauga, ua faamautinoa mai e le Salamo 34:20 iā i tatou, po o ā lava faigatā e fetaiaʻi ma Kerisiano faauuina ma a latou aumea o “isi mamoe,” ae o le a lē faavavau ona afāina ai i latou. I se gagana faafaatusa, o le a lē gauia so latou ivi.—Ioane 10:16.

17. O ā mala o le a oo iā i latou e lē salamō ma feita i tagata o Ieova?

¹⁷ E ese le tulaga o le a iai tagata amioleaga. Ua toeitiiti nei ona latou seleseleina lea o le leaga na latou lūlūina. “E fasiotia e le malaia lē ua amio leaga; o i latou foʻi ē ua ʻinoʻino i lē ua amiotonu e faasalaina i latou.” (Salamo 34:21) O i latou uma e faaauau ona tetee i tagata o le Atua, o le a fesagaʻi ma le mala sili ona mataʻutia. I le taimi o le faaalia mai o Iesu Keriso, o le a “faasalaina i latou i le fanoga e faavavau.”—2 Tesalonia 1:9.

18. O le ā le uiga o le faapea atu ua laveaʻia le “motu o tagata e toʻatele,” ma o le ā e tupu iā i latou i le lumanaʻi?

¹⁸ Na faaiʻu mai le salamo a Tavita i upu faalaeiau nei: “E laveaʻiina e Ieova o agaga o ana auauna; e lē faasalaina foʻi so latou o ē faatuatua iā te ia.” (Salamo 34:22) Ina ua latalata ina faaiʻu lana nofoaiga mo le 40 tausaga, na faapea mai le tupu o Tavita: “Na faaolaina aʻu [e le Atua] i puapuaga uma lava.” (1 Tupu 1:29) I le pei o Tavita, ua toe o se aga ona mafai lea ona toe tepa i tua ē matataʻu iā Ieova, ma olioli i le mafai ona faasaʻolotoina i latou mai so o se nofosala na iai ona o le agasala ma laveaʻia mai i o latou puapuaga uma. O le toʻatele o Kerisiano faauuina ua maua lo latou taui i le lagi. Ua aufaatasi atu nei le “motu o tagata e toʻatele” mai atunuu uma i ē o totoe o uso o Iesu i le auaunaga i le Atua, ma o le iʻuga ua latou olioli ai i se tulaga mamā i luma o Ieova. Ua māfua lenei mea ona ua latou faatuatua i le mana laveaʻi o le toto maligi o Iesu. A o faagasolo le Pulega a Keriso i le Afe Tausaga i le lumanaʻi, o le a faatatauina atoatoa ai iā i latou aogā o le taulaga togiola, ma siitia ai i latou i le lelei atoatoa faaletagata.—Faaaliga 7:9, 14, 17; 21:3-5.

19. O le ā o loo maumauaʻi le “motu o tagata e toʻatele” e fai?

¹⁹ Aiseā o le a maua ai nei faamanuiaga e le “motu o tagata e toʻatele” o loo tapuaʻi i le Atua? Auā ua latou maumauaʻi e matataʻu pea iā Ieova, ma auauna iā te ia i le āva ma le migao ma usiusitai i le Atua. Ioe, o le mataʻu iā Ieova e maua ai se olaga faamalieina i le taimi nei ma fesoasoani iā i tatou e “fetagofi atu i le ola moni lava”—le ola e faavavau i le lalolagi fou a le Atua.—1 Timoteo 6:12, 18, 19; Faaaliga 15:3, 4.

Pe E te Manatua?

• Aiseā e ao ai ona tatou matataʻu i le Atua, ma o le ā le uiga o le mataʻu i le Atua?

• O ā aafiaga o le mataʻu i le Atua e ao ona iai i a tatou amio?

• O ā aogā o le ola mataʻu i le Atua?

• O ā folafolaga ua fesoasoani iā i tatou e onosai ai?

[Fesili mo le Suʻesuʻega]

[Ata i le itulau 26]

E faaalia e ē matataʻu iā Ieova le faautauta pe a faasā le galuega

[Ata i le itulau 28]

O le mea sili ona lelei e mafai ona tatou faia mo o tatou tuaoi, o le taʻu i ai le tala lelei o le Malo