E Faapefea Ona Tatou Tetee Atu i Temoni?

“O agelu foʻi o ē na lē taofi i lo latou mamalu, a ua tuua e i latou le mea sa latou [nonofo] ai, ua taofia e [le Atua] i noanoataga e faavavau i lalo o le pogisa, seʻia oo i le faamasinoga o le Aso tele.”—IUTA 6.

1, 2. O ā fesili ua lāgā e faatatau iā Satani le Tiapolo ma temoni?

NA LAPATAʻI le aposetolo o Peteru: “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia.” (1 Peteru 5:8) Na faapea mai Paulo e uiga i temoni: “Ou te lē loto foʻi ina ia outou mafuta faatasi ma temoni. Tou te lē mafaia ona inu i le ipu a le Alii atoa ma le ipu a temoni; tou te lē mafaia ona faatofutofusia i le laoai a le Alii atoa ma le laoai a temoni.”—1 Korinito 10:20, 21.

² O ai la Satani le Tiapolo ma temoni? Na faapefea ma o anafea na amata ai ona iai le Tiapolo ma temoni? Pe na faia e le Atua i latou? O le ā le malolosi o a latou taaʻiga i le fanau a tagata? E faapefea ona puipuia i tatou mai i le Tiapolo ma temoni?

Na Faapefea Ona Iai Satani ma Temoni?

3. Na faapefea i se agelu a le Atua ona avea ma Satani le Tiapolo?

³ I le amataga mai o le talafaasolopito o le fanau a tagata i le faatoʻaga i Etena, na fouvale ai se agelu a le Atua. Aiseā? Ona ua lē faamalieina o ia i lana vaega sa fai i le faatulagaga o mea i le faalapotopotoga a Ieova i le lagi. Ina ua faia la Atamu ma Eva, sa ia mātauina ai se avanoa e faapogaia ai i laʻua e usiusitai ma tapuaʻi atu iā te ia na i lo le Atua. E ala i le fouvale agaʻi i le Atua ma e ala i le faapogaia o le uluaʻi ulugalii e saʻilia se ala agasala, na faia ai e lenei agelu ia lava ma Satani le Tiapolo. Na oo mai le taimi na aafia ai foʻi isi agelu i lana fouvale. E faapefea?—Kenese 3:1-6; Roma 5:12; Faaaliga 12:9.

4. O le ā na faia e nisi agelu fouvale a o lumanaʻi ai le Lolo i aso o Noa?

⁴ Ua taʻu mai iā i tatou e le Tusi Paia e faapea i se vaitaimi a o lumanaʻi ai le Lolo tele i aso o Noa, sa iai nisi agelu na amata ona iai se naunau faapitoa e lē masani ai agaʻi mai i fafine i le lalolagi. O loo taʻua i le Tusi Paia, ona o ni māfuaaga lē saʻo ‘na vaavaai mai ai atalii  [i le lagi] o le Atua i afafine o tagata, ua lalelei lava i latou; ona fai avā ai lea o i latou i fafine uma ua latou loto i ai.’ O nei faatasiga e lē o ni tulaga e masani ai, ma na latou fanaua ai ni fanau itu lua sa taʻua o tagata maualuluga (Nefilimi). (Kenese 6:2-4) O foafoaga agaga nei na lē usiusitai i le Atua ua auai i le fouvale a Satani agaʻi iā Ieova.

5. O le ā na tupu i agelu fouvale ina ua aumai e Ieova le faaumatiaga e ala mai i le Lolo tele?

⁵ Ina ua faaoo mai e Ieova le Lolo i le fanau a tagata, na fano ai Nefilimi ma o latou tinā, o fafine o le lalolagi ia na fai avā i ai agelu. Sa toe taumafai agelu fouvale e toe faamataa ese o latou tino tagata ae toe foʻi i le nofoaga agaga. Peitaʻi, sa latou lē toe maua lo “latou mamalu” sa iai ma le Atua. Na i lo lea, sa taofia loa i latou i “le pogisa [faaleagaga] i seoli,” e taʻua o Tartarus.—Iuta 6; 2 Peteru 2:4.

6. O ā auala e faasesē ai e temoni tagata?

⁶ Talu mai lava ona lē toe maua e agelu lo “latou mamalu” sa iai i le amataga, ua avea nei i latou ma aumea temoni a Satani ma o loo latou lagolagoina ona manaʻoga leaga. Mai lava i lenā taimi, ua lē o toe iai i temoni se malosi e liutino tagata ai. Ae ui lava i lea, e mafai ona latou faaosooso i tane ma fafine ina ia auai i le faia o ituaiga feusuaʻiga eseese e lē masani ai. Ua matuā aafia foʻi temoni i le faasesēina o tagata e ala i faiga faataulāitu, lea e ono aofia ai faiga e pei o le faalauatau, ma le fesili i aitu vavalo. (Teuteronome 18:10-13; 2 Nofoaiga a Tupu 33:6) E tasi lava le iʻuga o le a oo i agelu amio leaga ma le Tiapolo, o le a faaumatia e faavavau. (Mataio 25:41; Faaaliga 20:10) Peitaʻi i le taimi nei, e manaʻomia ona tatou tutū mausalī ma tetee atu i le Tiapolo ma temoni. O se gaoioiga atamai lo tatou iloaina po o le ā le tele o le malosi o Satani ma le auala tatou te taulau manuia ai i le teena o ia ma ana temoni.

O le ā le Tele o le Malosi o Satani?

7. O le ā le pule o loo iā Satani i le lalolagi?

⁷ Mai lava i le amataga o le talafaasolopito o le tagata, o loo taufaaleaga pea ma taufaifai Satani iā Ieova. (Faataoto 27:11) Ma ua ia taaʻina se vaega tele o tagata. Ua taʻua i le 1 Ioane 5:19, “o le lalolagi uma o loo nofo toʻilalo i loo leaga.” O le māfuaaga lenā na mafai ai e le Tiapolo ona tofotofo Iesu e ala i le ofo i ai o le pule ma le mamalu i “malo uma o le lalolagi.” (Luka 4:5-7) Na taʻua e le aposetolo o Paulo e faatatau iā Satani: “Afai foʻi ua ufitia la matou tala lelei, ua ufitia ia i ē ua fano; ua faatauasoina manatu o i latou o ē lē faatuatua e le atua o le lalolagi nei, ina neʻi pupula atu iā te i latou le malamalama o le tala lelei i le mamalu o Keriso, o ia foʻi o le faatusa o le Atua.” (2 Korinito 4:3, 4) O Satani “o le pepelo ia, ma le tamā o le pepelo” ae o loo ia faafoliga mai o se “agelu o le malamalama.” (Ioane 8:44; 2 Korinito 11:14) O loo iā te ia le mana ma faiga eseese e manaʻomia ina ia faatauaso ai manatu o taʻitaʻi o le lalolagi ma o latou tagata. E ala i faamatalaga taufaasesē ma uputuu ma pepelo a lotu, ua faasesē ai e Satani tagata.

8. O le ā ua taʻu mai e le Tusi Paia e faatatau i taaʻiga a Satani?

⁸ Sa aliali mai le pule ma taaʻiga a Satani i le taimi o le perofeta o Tanielu, pe tusa o le lima senituri a o lumanaʻi ai o tatou aso. Ina ua auina mai e Ieova se agelu e aumai se feʻau faalaeiau iā Tanielu, na fetaiaʻi le agelu ma le tetee mai “le alii [agaga] o le malo o Peresia.” E 21 aso na taofia ai le agelu seʻia oo ina tulaʻi mai “Mekaeli o so le ʻau alii sili ia,” e fesoasoani iā te ia. O loo taʻua foʻi i le tala lava lenā “le alii [temoni] o Iavana.” (Tanielu 10:12, 13, 20) Ae i le Faaaliga 13:1, 2, o loo taʻua ai Satani o “le tarako” ua ia avatu “lona malosi, ma lona nofoālii, ma le pule tele” i le manu feʻai faapolotiki.

9. O ai o loo tau faasaga i ai Kerisiano?

⁹ E lētioa a tusi le aposetolo o Paulo: “Tatou te lē tau ma tagata, a o alii sili, ma faipule, ma alii o le pōuliuli o lenei lalolagi, atoa ma agaga leaga i mea o i le lagi.” (Efeso 6:12) E oo  lava i aso nei, o le ʻau temoni i lalo o le taʻitaʻiga a Satani le Tiapolo o loo taaʻina taʻitaʻi o malo ma tagata lautele e fai gaoioiga sili ona mataʻutia, e pei o le taumafai e faaumatia atoatoa ni vaega o ni tagata, faiga faatupu faalavelave, ma le fasioti tagata. O le a seʻi o tatou iloiloina nei le auala tatou te taulau ai a o tetee atu i nei agaga malolosi tele.

E Faapefea Ona Tatou Tetee Atu?

10, 11. E faapefea ona tatou tetee atu iā Satani ma ana agelu leaga?

¹⁰ E lē mafai ona tatou tetee atu iā Satani ma ana agelu leaga, i lo tatou lava malosi i le tino po o le malosi faalemafaufau. Na fautua mai Paulo iā i tatou: “Ia outou loto tetele i le Alii, ma le malosi o lona mana.” E manaʻomia ona tatou liliu atu i le Atua mo le puipuiga. Na faaopoopo mai Paulo: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo. O le mea lea ia outou tago ai i ofutau atoatoa mai le Atua, ina ia outou mafaia ona tutū ma tetee atu pe a oo i le aso vale, pe a uma foʻi ona outou faia o mea uma, tou te tutumau ai lava.”—Efeso 6:10, 11, 13.

¹¹ E faalua ona timaʻia e Paulo ana aumea Kerisiano ina ia oofu “i ofutau atoatoa mai le Atua.” O le upu “atoatoa” ua faailoa mai ai e lē manaʻomia ona loto faaʻafaʻafa ina ia tetee atu ai i osofaʻiga a temoni. O ā la vaega tāua o le ofutau faaleagaga lea ua manaʻomia faanatinati e Kerisiano i aso nei ina ia tetee atu ai i temoni?

‘Ia Tutumau’—E Faapefea?

12. E faapefea ona fusia sulugātiti o Kerisiano i le faamaoni?

¹² Fai mai le faamalamalamaga a Paulo: “O lenei, inā tutumau ia outou o fusia o outou sulugātiti i le faamaoni, ia oofu foʻi outou i le ufifatafata o le amiotonu.” (Efeso 6:14) O vaega e lua o le ofutau o loo taʻua i inei o le fusi ma le ufifatafata. E tatau i se tagata tau ona mau lona fusipaʻu ae aua le ʻōʻō ina ia puipuia ai lona sulugātiti (suilapalapa, ʻauāga, ma le ʻona) aemaise e tautau ai lana pelu. E pei lava o le fusi faaletino, e manaʻomia foʻi ona fusi mau i tatou i upu moni o le Tusi Paia ina ia mafai ai ona tatou ola e tusa ma ia mea moni. Pe iai sa tatou faasologa e faitau le Tusi Paia i aso uma? Po o aafia uma ai le aiga? Pe iai se faasologa a lo tatou aiga e iloilo ai le mau o le aso? E lē gata i lea, po o tatou maua faamalamalamaga o loo saunia mai i lomiga e “le auauna faamaoni ma le mafaufau”? (Mataio 24:45) Afai o tatou faia faapea, o loo tatou taumafai malosi la e faatatau le fautuaga a Paulo. O loo iai foʻi a tatou vitiō ma DVD o loo saunia ai taʻiala mai le Tusi Paia. O lo tatou piiama pea i le upu moni e mafai ona fesoasoani iā i tatou i le faia o filifiliga atamai ma puipuia i tatou mai le mulimuli i se ala sesē.

13. E faapefea ona tatou puipuia o tatou loto?

¹³ O le ufifatafata e puipuia ai le fatafata o le fitafita, o lona fatu, ma isi ona totoga tāua. E mafai foʻi e se Kerisiano ona puipuia lona loto—le tagata lilo i totonu—e ala i le ati aʻe o lona naunau i le amiotonu a le Atua ma tausisi i tapulaa amiotonu a Ieova. E puipuia i tatou e le ufifatafata faafaatusa mai le suivaia o le Afioga a le Atua. A o faasolo ina tatou “ʻinoʻino i le leaga,” o le a tatou taofia ai o tatou vae mai le uia o “ala leaga uma lava.”—Amosa 5:15; Salamo 119:101.

14. O le ā le uiga o le faaupuga “ia faaseevaeina o outou vae i le sauniga o le tala lelei o le filemu”?

 ¹⁴ O le tulaga masani lava ia, sa fai faalelei seevae o fitafita Roma ona sa masani ona savavali mo le faitau selau maila i ala tetele o Roma sa felavasaʻi ai i le emepaea. O le ā la le uiga mo Kerisiano o le faaupuga “ia faaseevaeina o outou vae i le sauniga o le tala lelei o le filemu”? (Efeso 6:15) E faauiga faapea ua tatou nofosauni mo gaoioiga. Ua tatou sauniuni e talaʻi atu le tala lelei o le Malo o le Atua i tulaga talafeagai uma. (Roma 10:13-15) O lo tatou maelega la i le faiva faa-Kerisiano o se puipuiga mo i tatou mai i “togafiti” a Satani.—Efeso 6:11.

15. (a) E faapefea ona tatou iloa e tāua tele ona malosi le faatuatua? (e) O ā “ū fanafana mū” lea e mafai ona faaleagaina ai lo tatou faatuatua?

¹⁵ Na faaauau mai le faamatalaga a Paulo: “Ia faaopoopo i na mea uma ona tago atu i le talipupuni o le faatuatua, tou te mafai ai ona tinei o ū fanafana mū uma lava a lē o loo leaga.” (Efeso 6:16) O le fautuaga i inei ia tago atu i le talipupuni telē o le faatuatua o loo faatomua mai i le faaupuga “ia faaopoopo i na mea uma,” e atagia mai ai le tāua tele o le vaega lenei o le ofutau. E manaʻomia ona iai so tatou faatuatua malosi. I le pei o se talipupuni tele mo lo tatou puipuiga, e ao ona puipuia e lo tatou faatuatua i tatou mai “ū fanafana mū” a Satani. O ā mea o faaata mai e ū fanafana i aso nei? E ono aofia ai le taufaifai po o faiga e faalumaina ai, o pepelo, o faamatalaga lē saʻo a ē ita mai ina ia faavaivaia ai lo tatou faatuatua. E ono uiga atu foʻi nei “ū fanafana” i faaosoosoga i le manaʻo i meafaitino, lea e faapogaia ai lo tatou tosina e faatau mai le tele o mea, ia po o le faapogaia ai o i tatou e tauvā ma i latou ua aafia i olaga faalialiavale. Atonu ua tuu atu lo latou faatuatuaga  i ni o latou fale tetele ma ni taavale, ia po o le faalialiavale foʻi i o latou laʻei ma teuga taugatā o āʻega fou ua iai. Po o le ā lava e faia e isi, e ao ona iai so tatou faatuatua e lava le malosi e liliu ese ai nei “ū fanafana mū.” E faapefea ona tatou atiaʻe ma faatumauina se faatuatua malosi?—1 Peteru 3:3-5; 1 Ioane 2:15-17.

16. O le ā e mafai ona fesoasoani iā i tatou e atiaʻe ai se faatuatua malosi?

¹⁶ E mafai ona tatou faalatalata atu i le Atua e ala i le suʻesuʻe e lē aunoa o le Tusi Paia ma e ala i tatalo faatauanau. E mafai ona tatou ole atu iā Ieova e faamalosia lo tatou faatuatua ona savavali lea e tusa ma a tatou tatalo e ala i le faia o gaoioiga talafeagai. Mo se faaaʻoaʻoga, pe tatou te sauniuni lelei mo le Suʻesuʻega faalevaiaso o Le Olomatamata ma faanaunau e fai sou sao i le talanoaga? E faamalosia lo tatou faatuatua pe a tatou suʻesuʻeina le Tusi Paia ma lomiga e faavae i le Tusi Paia.—Eperu 10:38, 39; 11:6.

17. E faapefea ona tatou ‘ave le puloutau o le faaolataga’?

¹⁷ Na faaiʻu le faamatalaina mai e Paulo o le ofutau faaleagaga i le fautua mai: “Ia outou ave foʻi le puloutau o le faaolataga, ma le pelu a le Agaga, o le afioga lea a le Atua.” (Efeso 6:17) O le pulou sa puipuia ai le ulu o se fitafita, lea e iai lona mafaufau, o le malosi mo le faia o filifiliga. E faapena foʻi lo tatou faamoemoe faa-Kerisiano, e mafai ona puipuia ai o tatou tomai faalemafaufau. (1 Tesalonia 5:8) Na i lo le faatumu o o tatou mafaufau i sini faalelalolagi ma faanaunauga i mea faitino, e ao ona taulaʻi atu o tatou mafaufau i lo tatou faamoemoe mai le Atua, e pei ona sa faia e Iesu.—Eperu 12:2.

18. Aiseā e lē tatau ai ona tatou tuulafoaʻia la tatou polokalame o le faitauina e lē aunoa o le Tusi Paia?

¹⁸ O le mea mulimuli lava e puipuia i tatou mai i taaʻiga a Satani ma ana temoni, o le Afioga a le Atua po o le feʻau o loo faamauina i le Tusi Paia. O le tasi lenei o māfuaaga e ao ai ona aua tatou te tuulafoaʻia la tatou polokalame o le faitauina e lē aunoa o le Tusi Paia. O le telē ma le saʻo o lo tatou iloa o le Afioga a le Atua, e mafai ona puipuia ai i tatou mai pepelo a Satani ma faamatalaga lē saʻo e faapogaia e temoni, aemaise o faasalalauga taufaaleaga e fai e tagata ua fulitua mai i le upu moni.

‘Ia Outou Tatalo i Aso Uma Lava’

19, 20. (a) O le ā le mea o le a tupu iā Satani ma ana temoni? (e) E faapefea ona faamalosia lo tatou itu faaleagaga?

¹⁹ Ua toe o se aga ona tafiesea loa lea o Satani, ana temoni, ma le lalolagi amioleaga. Ua iloa e Satani “ua saasaa ona pō.” Ua matuā matauʻa lava ma ua sii taua atu i ē “ua tausi i poloaʻiga a le Atua, ma ua taofi le mau iā Iesu.” (Faaaliga 12:12, 17) E tāua tele la ona tatou tetee atu iā Satani ma ana temoni.

²⁰ E tatou te matuā loto faafetai lava i le timaʻiga ina ia tatou oofu i le ofutau atoatoa mai le Atua! Na faamāeʻa mai e le aposetolo o Paulo lona talanoaina o le ofutau faaleagaga, i lana fautuaga lenei: “Ia outou tatalo i le Agaga i aso foʻi uma lava i talotaloga ma faatoga uma; ia outou mataala pea i lenei lava mea, ma matuā tausisi i le faatoga mo tagata paia uma lava.” (Efeso 6:18) E mafai e tatalo ona faamalosia i tatou faaleagaga ma fesoasoani ia tatou mataala. Tau ina ia tatou ave i fale upu a Paulo ma tatalo e lē aunoa, auā o le faia faapea e fesoasoani iā i tatou e tetee atu ai iā Satani ma ana temoni.

O le ā se Mea sa E Aʻoaʻoina?

• Na faapefea ona iai Satani ma ana temoni?

• O le ā le tele o le pule o loo i le Tiapolo?

• E faapefea ona puipuia i tatou mai iā Satani ma ana temoni?

• E faapefea ona tatou ofuina le ofutau atoatoa mai le Atua?

[Fesili mo le Suʻesuʻega]

[Ata i le itulau 26]

“Ona vaavaai lea o atalii o le Atua i afafine o tagata”

[Ata i le itulau 28]

Pe mafai ona e faamatala mai vaega e ono o lo tatou ofutau faaleagaga?

[Ata i le itulau 29]

E faapefea i le auai i gaoioiga nei ona puipuia ai mai iā Satani ma ana temoni?