Faauta! O le Malamalama e Matuā Ofo Ai!

PE AFAI na iai se taimi na e tau tagotago ai e suʻe sou auala i le pogisa, e te malamalama la i le matuā faigatā o lenā tulaga. E te matuā fiafia pe a iai se malamalama! E lē taumatea foʻi ua e oo i se tulaga na e lē iloa se mea a fai e pei lava ua e i se pogisa. E ono tupu lenā mea pe a e lē iloa foʻia se faafitauli. Ae teʻi ua faasolosolo ona e malamalama, e iai le vaifofō i lou faafitauli. O le mafai ona sao mai i se faafitauli faigatā ona ua e iloa le fofō, o se tulaga matagofie tele e pei lava o le mauaina o le malamalama a o e tau tagotago i le pogisa.

I le uluaʻi senituri, sa toʻatele tagata na i le pōuliuli faaleagaga. I le talanoa atu iā i latou na tuua o latou talitonuga tuai ae talia le Faa-Kerisiano, na tusi Paulo e faapea: “O lē [Atua] na valaau iā te outou nai le pōuliuli e oo i lona lava malamalama e matuā ofo ai.” (1 Peteru 2:9) Iā i latou, e pei o lea ua suia mai le pōuliuli i le malamalama. E ono faatusatusa foʻi i le nofo toʻatasi e leai se faamoemoe ae teʻi ua avea ma se sui o se aiga e iai se faamoemoe mautinoa i le lumanaʻi.—Efeso 2:1, 12.

“Ua E Tuua o Lou Uluaʻi Alofa”

Na maua e uluaʻi Kerisiano le “upu moni,” o le faatuatuaga moni faa-Kerisiano. (Ioane 18:37) Na latou vaaia le malamalama e ofo ai, o le upu moni lea, ma suia mai ai loa i le pogisa faaleagaga i le malamalama. Peitaʻi a o faagasolo le taimi, na mou atu le uluaʻi naunau ma le maelega o nisi Kerisiano. Mo se faaaʻoaʻoga i le faaiʻuga o le uluaʻi senituri, na aliaʻe ai se faafitauli matuiā i le faapotopotoga i Efeso. Na taʻua e Iesu Keriso o lē na toe tū lea faafitauli: “A ua ou lē fiafia iā te oe, ona ua e tuua o lou uluaʻi alofa. O lenei, ia e manatua le mea na e paʻū mai ai, ma ia e salamō, ma e faia au uluaʻi galuega.” (Faaaliga 2:4, 5) Sa tatau i Kerisiano i Efeso ona toe faaolaola lo latou alofa mo le Atua ma le upu moni.

Ae faapefea i tatou? Na tatou olioli foʻi i le iloaina o le malamalama, ina ua tatou iloa le matagofie o upu moni o Afioga a le Atua. Sa tatou matuā fiafia i le upu moni. Peitaʻi o faafitauli masani o tagata ua faaitiitia ai lo tatou naunau mo le upu moni. E lē gata i lea, o faafitauli o “aso e gata ai.” O loo tatou ola i se lalolagi ua mātaulia i “aso faigatā,” se lalolagi ua tumu i tagata o ē “alolofa i latou iā i latou, o ē mananaʻo i tupe, o ē loto vii, o ē faamaualuga, o ē upu leaga, o ē lē faalogo i mātua, o ē lē faafetai, o ē amio leaga.” (2 Timoteo 3:1, 2) O a latou taʻaiga e ono faaitiitia ai lo tatou maelega ma iʻu ai ina maalili lo tatou alofa mo Ieova.

Afai ua mou ese lo tatou uluaʻi alofa, e tatau ona tatou ‘manatua le mea na tatou paʻuʻū mai ai, ma ia tatou salamō.’ E manaʻomia ona tatou toe foʻi i lo tatou tulaga faaleagaga sa iai. E tatau foʻi ona tatou faaeteete ia aua neʻi mou atu lo tatou alofa mo le upu moni. E matuā tāua le tausia pea o le faamoemoe ma le fiafia ma ia tumau ona faaolaola lo tatou alofa mo le Atua ma le upu moni!

‘E Tuu Saʻoloto i Tatou e le Upu Moni’

E matuā matagofie le malamalama o upu moni o le Tusi Paia auā e maua ai tali o fesili tāua sa lē iloa e tagata mo le tele o tausaga. E aofia ai fesili nei: Aiseā ua tatou iai i inei? O le ā  le fuafuaga o le olaga? Aiseā ua oo mai ai mea leaga? Pe e iai se isi olaga pe a mavae le oti? Ua faamalamalamaina i tatou e Ieova i upu moni o aʻoaʻoga matagofie a le Tusi Paia i nei mataupu. Pe tatou te lē talisapaia ea lenei tulaga? Aua lava tatou te manatu faatauvaa i mea ua tatou aʻoaʻoina!

Sa fetalai atu Iesu i ona soo: “E iloa foʻi e outou le mea moni, e tuu saʻoloto foʻi outou e le upu moni.” (Ioane 8:32) O le taulaga togiola a Iesu ua mafai ai ona maua le saʻolotoga mai le agasala ma le oti. Ae o nei upu moni ua mafai ai ona tatou saʻoloto mai tulaga lē mautonu o le lalolagi ua ufitia i le pogisa. O lo tatou mafaufau loloto ma le talisapaia o mea ua tatou aʻoaʻoina, o le a fesoasoani iā i tatou e faamalosia lo tatou alofa mo Ieova ma lana Afioga.

Na tusi Paulo i Kerisiano i Tesalonia: “Na talia e outou le afioga a le Atua na outou faalogo mai ai iā i matou, ua lē talia e outou o le upu a tagata, a e peitaʻi o le upu a le Atua, (e moni lava lea) ua matuā galue foʻi lea i totonu iā te outou o ē faatuatua.” (1 Tesalonia 2:13) Na faalogo tagata Tesalonia ma “talia le upu [a le Atua] ma le olioli.” Ua latou lē toe iai i le “pōuliuli.” Ae ua avea i latou ma “tagata o le malamalama.” (1 Tesalonia 1:4-7; 5:4, 5) Na oo ina iloa e na Kerisiano o Ieova lē na Foafoaina mea uma ma o ia o Lē ou le malosi uma lava, le poto, le alofa ma e alofa mutimutivale. E pei o isi soo o Keriso, na latou iloa foʻi na faia e Ieova se sauniuniga e aveese ai a latou agasala e ala i le taulaga togiola a lona Alo o Iesu Keriso.—Galuega 3:19-21.

E ui e leʻi iloa e tagata Tesalonia mea uma e ao ona latou iloa e uiga i upu moni o le Tusi Paia, ae na latou iloa le mea e maua ai le poto. E mafai e le Tusi Paia ona faia le tagata o le Atua ia ‘atoatoa ona lelei, ia saunia lava ia i galuega lelei uma lava.’ (2 Timoteo 3:16, 17) Na mafai e Kerisiano i Tesalonia ona suʻesuʻe pea ma faaauau ona iloa le malamalama o le Atua e matuā matagofie. Na iai māfuaaga na latou olioli ai i taimi uma. (1 Tesalonia 5:16) E faapena foʻi i tatou.

O le Malamalama i o Tatou Ala

Na pese le faisalamo i le māfuaaga e matagofie ai le malamalama: “O lau afioga o le sulu lea i oʻu vae, ma le malamalama i loʻu ala.” (Salamo 119:105) O taʻiala e maua mai le Afioga a le Atua e mafai ona taʻitaʻia ai o tatou ala ma maua ai se olaga faamalieina. Ia lē pei i tatou o se vaa o loo tafetafea. O le iloaina ma le faatatauina o le upu moni, e puipuia ai i tatou mai le “felafoaʻiina e pei o peau, ma feaveaʻiina i matagi uma lava o mataupu.”—Efeso 4:14.

Ua taʻua i le Tusi Paia: “Aua tou te faatuatua i alii, po o le fanau a tagata, e lē o i ai se olataga.” O loo toe faapea mai foʻi: “Amuia le tagata o i ai le Atua o Iakopo e fai mona fesoasoani; o i ai lona faamoemoe iā Ieova lona Atua.” (Salamo 146:3, 5) E lē gata i lea, e mafai e lo tatou faatuatua iā Ieova ona aveesea le fefe ma le popole. Na tusi mai Paulo: “Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” (Filipi 4:6, 7) E tatou te maua aogā mai le taʻitaʻia e le malamalama o le Afioga a le Atua.

Ia Susulu Faapei o Mea e Faamalamalama Aʻi le Lalolagi

O se isi māfuaaga e matagofie ai le malamalama o le Afioga a le Atua ona e tatala atu ai le  faitotoʻa i se tofiga e sili ona tāua e mafai ona maua e se tasi. Na faatonu e Iesu ona soo: “Ia outou ō atu e fai nuu uma lava ma soo, ma papatiso atu iā te i latou i le suafa o le Tamā, ma le Atalii, ma le Agaga Paia; ia outou aʻoaʻo atu iā te i latou ia tausi i mea uma ua ou fai atu ai iā te outou; faauta foʻi ou te iā te outou i aso uma lava, e oo lava i le gataaga o le lalolagi.” Na amata lana faatonuga i le fetalai atu: “Ua tuuina mai iā te aʻu le pule uma lava i le lagi ma le lalolagi.”—Mataio 28:18-20.

Seʻi manatu mo se faataʻitaʻiga po o ai o loo lagolagoina Kerisiano moni i le talaʻiga o le tala lelei ma le aʻoaʻoina o le upù moni o le Tusi Paia i tagata o nuu uma. Na folafola e Iesu i ona soo o le a faatasi pea ma i latou. Ioe, o loo faaauau pea ona fesoasoani ma lagolago e Iesu i latou i la latou faiva a o latou ‘faapupula atu lo latou malamalama’ ma isi lava ‘galuega lelei.’ (Mataio 5:14-16) O loo aofia ai foʻi agelu i lenei galuega faaevagelia. (Faaaliga 14:6) Ae faapefea Ieova le Atua? Na tusi mai Paulo: “Na ou totōina, na faasūsūina e Apolo; a e peitaʻi o le Atua ua faatupuina.” Maʻeu se faaeaga o le iai i se ‘au faigaluega faatasi ma le Atua’!—1 Korinito 3:6, 9.

Seʻi manatu foʻi i auala ua tauia ai a tatou taumafaiga i lenei auaunaga mai le Atua. E leai se mea e faatusa i ai lo tatou faaeaga mai le Atua o le “susulu atu . . . faapei o mea e faamalamalama aʻi le lalolagi.” E ala i lo tatou faaali atu o le malamalama mai le Afioga a le Atua i a tatou upu ma gaoioiga, ua mafai ai ona tatou avatu se fesoasoani moni i tagata loto faamaoni. (Filipi 2:15) E mafai ona tatou olioli a o tatou talaʻi ma aʻoaʻo atu ma le maelega ‘auā e lē amiolētonu le Atua, na te lē faagalogaloina la tatou galuega ma le alofa ua tatou faaali atu i lona suafa.’—Eperu 6:10.

‘Faatau Mai le Vaimata e Nini ai Ou Mata’

Ina ua avatu se feʻau i le uluaʻi senituri i le faapotopotoga i Laotikaia na fetalai Iesu: “Ia e faatau atu iā te aʻu . . . le vaimata e nini aʻi ou mata, ina ia e pupula ai. Ou te aʻoaʻi atu ma sasa iā i latou uma ou te alofa i ai.” (Faaaliga 3:18, 19) O le vaifofō moni o le tauaso faaleagaga o le “vaimata” o aʻoaʻoga ma aʻoaʻiga a Iesu. Pe afai tatou te mananaʻo e tumau le malosi faaleagaga i le taimi nei ma le lumanaʻi, e tatau ona tatou talia ma gauaʻi i ana fautuaga faapea ma taʻiala o loo i le Tusi Paia. E tatau foʻi ona maua e i tatou uiga faalemafaufau o Keriso ma faataʻitaʻi i ana faaaʻoaʻoga. (Filipi 2:5; 1 Peteru 2:21) E lē maua fua le vaimata. Na fetalai atu Iesu: “Ia e faatau atu iā te aʻu.” O le tau e aofia ai lo tatou taimi ma taumafaiga.

Pe a tatou tuua se nofoaga pogisa ae tatou ō atu i se potu malamalama, e ono alu se taimi o tau faamasani o tatou mata i le malamalama. I se tulaga tutusa, e manaʻomia ona faaalu le taimi e suʻesuʻe ai le Afioga a le Atua ma iloa le malamalama o le upu moni. E manaʻomia foʻi se taimi e mafaufau loloto ai i mea ua tatou aʻoaʻoina ma manatunatu i le tautele o nei upu moni. E lē telē naʻuā lenei tau. Aiseā? Auā e matagofie le malamalama!

[Ata i le itulau 14]

“Ia e faatau atu iā te aʻu . . . le vaimata e nini aʻi ou mata, ina ia e pupula ai”