Fesili Mai le ʻAufaitau

E fia manu vaefā e mamā na ave e Noa i le vaa—e fitu mai le ituaiga pe taʻifitu manu e fai soa mai le ituaiga?

Ina ua māeʻa ona fau e Noa le vaa, na fetalai atu Ieova iā te ia e faapea: “Inā ulu atu ia o oe atoa ma lou aiga uma i le vaa; auā ua ou iloa oe o lē amiotonu i oʻu luma i lenei tupulaga. Ia e ave e taʻifitu i manu vaefā uma e mamā, o le manu poʻa ma le manu fafine; a o manu vaefā e lē mamā e taʻilua ia, o le manu poʻa ma le manu fafine.” (Kenese 7:1, 2) O nisi o faaliliuga e pei o le The New English Bible, The New Jerusalem Bible, ma le Tanakh—The Holy Scriptures, o loo faaaogā ai le faaupuga Eperu, “fitu e fai soa.”

E tusa ai ma le uluaʻi gagana Eperu, o le upu “taʻifitu” e mafai ona faaliliu i le “fitu ma le fitu.” Peitaʻi, e lē faapea a faaaogā faalua se numera i le gagana Eperu, ona faapea ai lea, ua tatau ona faaopoopo faatasi na numera. Mo se faaaʻoaʻoga, i le 2 Samuelu 21:20 o loo taʻua ai, “sa i ai le tagata maualuga” o ona “tamatamaʻi lima ma ona tamatamaʻi vae ua taʻiono.” I le gagana Eperu, e faalua ona taʻu le numera “ono.” Ae e lē faapea ai la, na iai ni tamatamaʻi lima se sefulu lua i le lima e tasi ma ni tamatamaʻi vae se sefulu lua i le vae e tasi, o lenei tagata tino ese. O le taʻua faalua o le numera ono ua na ona faasino atu lava i le aofaʻiga o tamatamaʻi lima i le lima ma tamatamaʻi vae i le vae.

O le taʻua la o le “taʻifitu” i le Kenese 7:2, po o le “fitu fitu” e tusa ai o le uluaʻi gagana Eperu, e lē faasino atu i ni soa po o ni pea taʻifitu, po o le 14 pe a tuu i le aofaʻiga atoa. E faapena foʻi le “taʻilua” lea e taʻu faalua i le Kenese 7:9, 15, e lē o uiga atu i ni pea po o ni soa taʻilua, po o le fā pe a tuufaatasi. O lona uiga, sa ave i totonu o le vaa, e taʻifitu manu mai ituaiga taʻitasi o manu e mamā, ae taʻilua manu mai ituaiga taʻitasi o manu e lē mamā.

Ae faapefea le fasi fuaitau lea e taʻua i le Kenese 7:2 e faapea, “o le manu poʻa ma le manu fafine”? O le fuaitau lenā ua tau mānatu ai nisi e faapea, o le faatonuga iā Noa, ia ave le taʻifitu soa po o pea o manu mai ituaiga taʻitasi o manu mamā. Peitaʻi, e lē faapea na faasaoina patino manu mamā mo le fuafuaga ina ia toe maua pe fananau mai ai nisi manu. Na faapea mai le Kenese 8:20, ina ua tuua e Noa le vaa, “ona faia lea e [ia] o le fata faitaulaga iā Ieova; ua avea foʻi e ia nisi manu i manu vaefā uma e mamā, ma manu felelei uma e mamā, ua ia fai aʻi taulaga mū i le fata.” O le iai la o le manu lona fitu lea e leai sona soa mai ituaiga o manu mamā, sa mafai ai e Noa ona faaaogā lea manu mo le faia o se taulaga mū, ae totoe ai soa e tolu mai le ituaiga, mo le toe faatoʻateleina o o latou ituaiga i le lalolagi.