Le Afio Mai o Keriso—Mea o le a Faataunuu Ai

“UA MATUĀ GATETE SÃO PAULO.” O upu na sa faamatala ai e le mekasini o le Veja aso e fā o Me 2006, ina ua “matuā talepe” e se ʻausolitulafono na fuafuaina lelei, le taulaga aupito i telē ma tamaoaiga o Pasili. Pe tusa ma le 150 alii leoleo, nisi o le ʻausolitulafono, ma tagatānuu na fasiotia a o faagasolo le “silia ma le 100 itula o faiga mataʻutia.”

Ua tele ina faatomua mai i tala fou faiga sauā e toeitiiti i itu uma o le lalolagi. E foliga mai ua lē mafai ona foʻia e pulega a tagata. Ua faasolosolo lava ina lē toe saogalemu lo tatou lalolagi mo le nonofo ai. Atonu e te lotovaivai ona o mea uma e te vaai atu i ai, ua matuā leai se tala fiafia e maua mai ai. Ae peitaʻi, ua lata mai lava le taimi e suia ai le tulaga o mea.

Na aʻoaʻo e Iesu ona soo e tatalo mo le Malo o le Atua ina ia oo mai ma ia faia ai lona finagalo, “i le lalolagi e pei ona faia i le lagi.” (Mataio 6:9, 10) O lea Malo o se faiga malo e avea ai Keriso Iesu ma ona Tupu na tofia e le Atua. E foʻia faafitauli uma o tagata e lea Malo. Ae ina ia aumaia e le Malo o le Atua suiga i le lalolagi, e tatau ona sui le pulega a tagata i le pulega a Keriso. O le mea tonu lava lenā o le a faataunuu i le afio mai o Keriso.

Po o le a Filemu Lenā Suiga?

Po o le a gauaʻi ma le filemu malo i le pulega a Keriso? Na avatu iā Ioane le tali e ala i se faaaliga. Na faapea mai Ioane: “Ona ou iloa lea o le manu feʻai [malo faapolotiki a le lalolagi], ma tupu o le lalolagi, ma a latou ʻau, ua faapotopotoina e tau ai le taua ma lē [Iesu] ua tiʻetiʻe i le solofanua ma lana itu taua.” (Faaaliga 19:19) O le ā o le a oo i tupu o le lalolagi i lea taua? Na faapea mai le Tusi Paia, o le Tupu faauuina a Ieova o le a ia “fasi gaugauina i latou i le tootoo uʻamea; e pei o le ipu a le fai ipu omea [na] te nutililii iā te i latou.” (Salamo 2:9) O le a nutililii faiga malo faapolotiki. O le Malo o le Atua o le a ia “tuʻimomomoina ma faaumatia ia malo [a tagata] uma lava, a o ia e tumau lava e faavavau.”—Tanielu 2:44.

Ae faapefea tagata e tetee i le Malo o le Atua? “Pe a faaalia le Alii o Iesu mai le lagi, faatasi ma agelu o lona malosi i le afi  mumū,” o loo faamatalaina mai Iesu o se tasi, e “na te taui ma sui i ē ua lē iloa le Atua, ma ua lē anaana i le tala lelei.” (2 Tesalonia 1:7, 8) Na faapea mai le Faataoto 2:22: “A e vavaeeseina o ē amio leaga ai le laueleele, e liaʻiina ai foʻi o ē amio pepelo.”

Na taʻua i le Tusi Paia le afio mai o Keriso e faapea: “Faauta, o loo afio mai o ia ma ao, e iloa atu foʻi o ia e mata o tagata uma.” (Faaaliga 1:7) O le a lē vaaia o ia e mata faaletino o tagata. Talu ona afio aʻe Iesu i le lagi, o ia o se tino agaga “o lē afio i le malamalama e lē masao i ai se tasi; e leʻi vaaia o ia e se tasi tagata, e lē mafai foʻi ona vaai i ai.”—1 Timoteo 6:16.

E lē manaʻomia ona iai se tino faaletagata o Iesu ina ia “vaaia” pe iloa ai e tagata o le lalolagi, e pei foʻi o Ieova e leʻi manaʻomia sona tino faaletagata ina ua ia faaoo mai Mala e Sefulu iā Aikupito i aso o Mose. Na mautinoa e tagata o lenā taimi o Ieova na faia ia mala, ma sa faamalosia ai i latou e amanaʻia lona mana. (Esoto 12:31) I se tulaga tutusa, pe a avea Keriso ma Faaoosala a le Atua, o le a faamalosia ē amio leaga e “vaai,” pe iloa o Iesu o loo faaaogā e le Atua e faamasino iā i latou. E latou te iloa lenei mea ona o le a lapataʻia tagata a o leʻi oo mai. Ioe, “e iloa atu foʻi [Iesu] e mata o tagata uma, e taufaitagituʻi foʻi itu aiga uma o le lalolagi ona o ia.”—Faaaliga 1:7.

E tatau ona faaumatia muamua ē amio leaga ma ave ese pulega leaga a o leʻi aumaia le filemu moni ma le manuia i le lalolagi. O le a faataunuuina e Keriso na mea. Ona ia pulea atoatoa lea o mataupufai a le lalolagi, ma le tele o isi suiga o le a oo mai.

O Manuia o le a Maua

Na talanoa Peteru i le taimi “e toe fuataʻi ai mea uma lava, ua fetalaia mai e le Atua i fofoga o ana perofeta paia uma lava talu mai anamuā.” (Galuega 3:21) E aofia ai i lea toe fuataʻiina suiga o le a oo mai i le lalolagi i le taimi o le pulega a Keriso. O se tasi o perofeta na fetalai atu i ai le Atua i le ‘toe fuataʻiga o mea uma’ i le lalolagi, o le perofeta lea o Isaia i le senituri lona valu T.L.M. Na valoia e Isaia e faapea, o le a toe aumaia le filemu i le lalolagi e Iesu Keriso, le “Alii o le filemu.” Na faapea mai Isaia e faatatau i le pulega a Keriso: “E leai se mea e gata mai ai ona tele o lona malo ma le filemu o lona malo.” (Isaia 9:6, 7) O le a aʻoaʻoina e Iesu tagata o le lalolagi i le auala e ola filemu ai. O i latou e nonofo i le lalolagi “e faafiafia foʻi i latou iā te i latou ona o le manuia [filemu] e tele.”—Salamo 37:11.

O le ā o le a tupu i le mativa ma le fia taumafa i le taimi o le pulega a Keriso? Na faapea mai Isaia: “E faia e Ieova o ʻau i lenei mauga mo nuu uma le faigaʻai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu.” (Isaia 25:6) Na pese le faisalamo: ‘E tumutumu taumafa o saito i mauga.’ (Salamo 72:16) E lē gata i lenā ua tatou faitau e faatatau i tagata o le lalolagi: “Latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi; auā e pei o aso o le laau aso o loʻu nuu; e uma lava i ē ua filifilia e aʻu o mea na faia e o latou lima.”—Isaia 65:21, 22.

Na valoia foʻi e Isaia le iʻuga o maʻi ma le oti. Na fetalai le Atua e ala atu iā Isaia: “Ona faapupulaina ai lea mata o ē tauaso, e faalogoa foʻi taliga o ē tutuli; ona osooso ai lea o le pipili e pei o le ʻaila, e pese foʻi le laulaufaiva o le gūgū.” (Isaia 35:5, 6) O le a “lē fai mai foʻi se tasi ua mau ai, Ou te maʻi.” (Isaia 33:24) O le a “faaumatia [e le Atua] le oti e faavavau; e soloiesea foʻi e le Alii o Ieova o loimata i mata uma lava.”—Isaia 25:8.

Ae faapefea i latou ua maliliu o loo i “tuugamau”? (Ioane 5:28, 29) Na valoia e Isaia:  “E toe ola mai ou tagata oti. . . . e toe tutū mai.” (Isaia 26:19) Ioe, e toe tutū mai i le ola ē o momoe i le oti!

E Faavavau le Nofoālii o le Atua

O le afio mai o Keriso o le a toe faaleleia atoatoa ai le lalolagi paneta. O le a suia le lalolagi i se parataiso matagofie, ma tagata o le a autasi e tapuaʻi i le Atua moni. Pe tatou te talitonu o le a mafai ona aveesea atoatoa e Iesu Keriso le amio leaga mai le lalolagi ma aumaia tulaga amiotonu?

Seʻi manatu i Lē na avatua le malosi ma le pule iā Iesu. Na faapea mai le Tusi Paia i le Alo: “O lou nofoālii, le Atua e, e faavavau faavavau lava lea; o le tootoo o lou malo, o le tootoo o le amiotonu lea. Ua e fiafia i le amiotonu, a ua e ʻinoʻino i le amio leaga.” (Eperu 1:8, 9) E mai iā Ieova le nofoālii, le tofiga po o le pule a Iesu. O le Atua o le Puna ma Lē na Avatua lea nofoālii. E mafai la ona foʻia e Iesu so o se faafitauli.

Ina ua mavae lona toe tū, na fetalai atu Iesu i ona soo: “Ua tuuina mai iā te aʻu le pule uma lava i le lagi ma le lalolagi.” (Mataio 28:18) Na faapea mai le 1 Peteru 3:22: “Ua toʻilalo iā te ia o agelu, ma faipule, atoa ma ē malolosi.” E leai se mana po o se pule e taulau manuia pe a tetee atu iā Iesu. E leai se mea na te taofia lona aumaia o aogā tumau i tagata.

O le ā se Aafiaga i Tagata o le Afio Mai o Keriso?

I le tusi a Paulo i Kerisiano i Tesalonia na ia tusi atu ai: “E lē aunoa ona matou manatua i luma o le Atua o lo tatou Tamā lea, la outou galuega i le faatuatua, ma le faamalosi i le alofa, ma le tumau pea i le faamoemoe i lo tatou Alii o Iesu Keriso.” (1 Tesalonia 1:3) Sa amanaʻia e Paulo o le faamoemoe iā Iesu Keriso o le māfuaaga lea o le fua tele mai o galuega ma le tumau pea. O lenā faamoemoe e aofia ai le faatuatua i le afio mai o Keriso lea o le a toe faafoʻisia ai mea uma. O lea faamoemoe e faamalosia ai Kerisiano moni e tutumau pe onosai e ui i tulaga faigatā.

Seʻi fai mo se faaaʻoaʻoga, Carlos, e nofo i São Paulo, i Pasili. Iā Aokuso 2003, na iloa ai e Carlos ua maua o ia i le kanesa. Na faia ni ona taotoga se valu lea e matuā tigā ona āuga. Ae, na avea pea o ia ma faalaeiauga i isi. E pei o se faataʻitaʻiga a o auai i le galuega faaevagelia i luma o se falemaʻi tele, na ia fetaui ai i se isi o Molimau a Ieova, o lana tane o loo faia sona togafitiga (chemotherapy) mo le kanesa. Ona ua ia iloa le tugā o āuga o le kanesa, na mafai ai ona ia faalaeiau ma faamāfanafana atu i le avā ma le tane. Mulimuli ane na la faapea mai o le latou talanoaga na “avea ma faalaeiauga” mo i laʻua. Na iloa ai e Carlos le moni o upu a Paulo: “O lē [Atua] na te faamāfanafanaina mai iā te i matou i lo matou puapuaga uma lava, ina ia matou mafaia ona faamāfanafana atu iā te i latou ua maua i se tasi lava puapuaga, i le faamāfanafanaga ua faamāfanafanaina ai i matou e le Atua.”—2 Korinito 1:4.

O le ā na fesoasoani iā Carlos e maua ai le malosi e faaauau ai pea ona faalaeiau i isi e ui i lona maʻi? O le faamoemoe i le afio mai o Keriso ma mea uma o le a faataunuuina ai, na uunaʻia ai Carlos e faia pea le “amio lelei.”—Kalatia 6:9.

Seʻi manatu foʻi i le tulaga o Samuelu, o lona uso sa fasiotia i le na o le 150 futu (50 mita) le va mai le fale o lo la tāma. Na faasefulu ona fana lona uso. Na taatia ai pea lona tino i le auala mo le valu itula a o faia suʻesuʻega a leoleo. E lē mafai ona galo iā Samuelu lenā aso. Peitaʻi o loo faamalosia o ia ona o le faamoemoe o le a aveesea e Keriso le amioleaga mai le lalolagi ae aumaia faamanuiaga i tagata e lana pulega amiotonu. E masani ona faaata e Samuelu le taimi e na te toe fusi mai ai lona uso ua toe tū mai i le lalolagi parataiso.—Galuega 24:15.

 O le ā e Ao Ona E Faia?

E te maua le faamāfanafanaloto i le faamoemoe atu i le afio mai o Keriso, ma mea o le a faataunuuina ai. E mautinoa o le a foʻia e Iesu Keriso pogai uma o faafitauli o tagata, faapea ma mea leaga uma o loo faavaivaia ai i tatou.

O le ā e tatau ona e faia ina ia e maua ai faamanuiaga o le pulega a Keriso lea o le a sasaa mai i tagata? Ia faia ni au suʻesuʻega lelei i le Afioga a le Atua, le Tusi Paia. Na fetalai atu Iesu i se tatalo i lona Tāma: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Ia avea ma ou sini le suʻesuʻeina o aʻoaʻoga a le Tusi Paia. E fiafia lava Molimau a Ieova o i lou vaipanoa e fesoasoani atu iā te oe i lea tulaga. E matou te valaaulia ma le māfana oe ina ia e faafesootaʻia i latou, pe tusi atu iā i latou na lomiaina lenei mekasini.

[Ata i le itulau 7]

O le afio mai o Keriso o le a toe faaleleia atoatoa ai le lalolagi

[Faamatalaga i Ata]

Tamaʻi ata: Rhino and Lion Park, Gauteng, Aferika i Saute