Le Afio Mai o Keriso—Pe Tatau Ona Tatou Fefefe Ai?

O LE ā sou manatu, e faapefea ona afio mai Keriso? Pe e te manatu o se taimi e oo mai ai ni mala, se faaumatiaga po o se faasalaga mo tagata? Pe e te faatalitalia e aveese uma ai o tatou faafitauli? Pe e tatau ona tatou fefefe i le afio mai o Keriso? Po o se taimi e faatalitali atu i ai ma le naunau tele?

Na faapea mai le Tusi Paia i le afio mai o Keriso: “Faauta, o loo afio mai o ia ma ao, e iloa atu foʻi o ia e mata o tagata uma, . . . e taufaitagituʻi foʻi itu aiga uma o le lalolagi ona o ia.” (Faaaliga 1:7) E faasino atu lea afio mai o Iesu i le lumanaʻi, ina ia faamanuia ē amiotonu ae faasala ē amioleaga.

Na i lo le fefe, na naunautaʻi le aposetolo o Ioane i le afio mai o Keriso. Ina ua mavae le mauaina e Ioane o le faaaliga i lenei afio mai ma lona uiga mo le lalolagi, ona ia tatalo faatauanau lea: “O lea lava, le Alii e Iesu, ia e afio mai!” (Faaaliga 22:20) Ae aiseā “e taufaitagituʻi [ai] foʻi itu aiga uma o le lalolagi ona o ia”? O le a faapefea ona ‘iloa e mata uma’ o ia? O le ā o le a faataunuuina e le afio mai o Keriso? E faapefea ona tatou maua aogā i le taimi nei i le faatuatua atu i le afio mai o Keriso? O le a taliina nei fesili i le mataupu o loo sosoo mai.