O Loo Ola le Afioga a Ieova

Manatu Tāua Mai le Tusi o Ieremia

NA FAATEʻIA tagata i le feʻau na faailoa atu e Ieremia e faatatau i mala mataʻutia o le a oo ane. O le malumalu mataʻina lea sa fai ma nofoaga autū mo tapuaʻiga i le silia ma le tolu senituri o le a faaumatia i le afi. O le a faatafuna ma lē mafai ona toe nofoia le aai o Ierusalema ma laueleele o Iuta, ae o le a ave faatagataotauaina i latou. O loo iai faamaumauga o nei mea na tutupu ma isi faalauiloaga o faamasinoga i le tusi e lona lua lona telē i le Tusi Paia, le tusi o Ieremia. O loo faamatala mai ai foʻi mea na oo i le olaga o Ieremia a o ia auauna o se perofeta faamaoni mo le 67 tausaga. O faamatalaga o lenei tusi, e lē o aumaia i le faasologa o taimi o mea na tutupu, ae o loo aumai e faatatau i mataupu.

Aiseā tatou te naunau ai i le tusi o Ieremia? O valoaga ua faataunuuina e faamalosia ai lo tatou faatuatua iā Ieova o ia o Lē faataunuuina ana folafolaga. (Isaia 55:10, 11) O galuega a Ieremia o se perofeta ma le tali ane o tagata i lana feʻau e talitutusa i o tatou aso. (1 Korinito 10:11) E lē gata i lea, o le auala na feutagaʻi ai Ieova ma ona tagata ua matilatila mai ai ona uiga ma e tatau ona i ai sona aafiaga iā i tatou.—Eperu 4:12.

“E LUA MEA LEAGA UA FAIA E LOʻU NUU”

(Ieremia 1:1–20:18)

I le lona 13 o tausaga o le nofoaiga a Iosia, le tupu o Iuta, na tofia ai Ieremia e avea ma perofeta i le toe 40 tausaga faaumatia Ierusalema i le 607 T.L.M. (Ieremia 1:1, 2) O faalauiloaga sa tele ina fai i tausaga mulimuli e 18 o le nofoaiga a Iosia, na latou faaalialia ai le leaga o Iuta, ae faalauiloa le faamasinoga a Ieova e faasaga iā te ia. Ua folafola e Ieova: “Ou te faia foʻi Ierusalema ma faupuʻegamaa, o le mea e fale ai tanimo; ou te faatafunaina lava aai o Iuta, e lē nofo ai se tasi.” (Ieremia 9:11) Aiseā? Ua fetalai o ia: “Auā e lua mea leaga ua faia e loʻu nuu.”—Ieremia 2:13.

O le isi vala o le feʻau o le toe faafoʻisia o le vaega totoe na salamō. (Ieremia 3:14-18; 12:14, 15; 16:14-21) Sa lē talileleia Ieremia ma lana feʻau. ‘O le matai sili i le fale o Ieova’ ua na taia le perofeta o Ieremia ma tuuina Ieremia i laau faamau i le pō atoa.—Ieremia 20:1-3.

Taliina o Fesili Faale-Tusi Paia:

1:11, 12—Aiseā e mataala ai pea Ieova i ana fetalaiga lea e fesootaʻi atu i le “laau o le sekati”? Na ala pea Ieova i se tulaga faafaatusa ina ia aauina atu ana perofeta e lapataʻi  ona tagata e faatatau i ana faamasinoga ma o loo ia “mataala pea” seʻia faataunuuina.—Ieremia 7:25.

2:10, 11—O le ā le mea e ese ai gaoioiga a tagata Isaraelu lē faamaoni? Ona o nuu faapaupau i le itu i sisifo o Kitimo ma le itu i sasaʻe o Kitara atonu na latou aumaia ni atua o isi atunuu e faaopoopo i o latou atua, e leʻi iai se fuafuaga e suia o latou atua i atua ese. Peitaʻi, na tuulafoaʻia e le ʻau Isaraelu le Atua soifua o Ieova ae avatu le viiga i tupua e leai ni ola.

3:11-22; 11:10-12, 17—Aiseā na faaaofia ai e Ieremia le malo i mātū o ituaiga e sefulu o Isaraelu i ana valoaga, e ui ua uma ona faaumatia Samaria i le 740 T.L.M.? Ona o le faaumatiaga o Ierusalema i le 607 T.L.M. o loo faaalia ai faamasinoga a Ieova i Isaraelu atoa, ae lē na o Iuta. (Esekielu 9:9, 10) E lē gata i lea, ina ua uma ona faatoʻilaloina le malo o ituaiga e sefulu sa faaauau pea ona faailoa atu o latou manaʻoga i Ierusalema, auā sa faaauau pea ona faaaofia e le perofeta a le Atua le ʻau Isaraelu.

4:3, 4—O le ā le uiga o lenei faatonuga? Sa tatau i tagata Iutaia lē faamaoni ona saunia ma faamamā o latou loto. Sa tatau ona aveesea “le paʻu” o o latou loto, o lona uiga, ia aveesea uma mafaufauga, faalogona ma uunaʻiga lē mamā. (Ieremia 9:25, 26; Galuega 7:51) E manaʻomia ai la ona faia ni suiga i o tatou olaga mai le faia o mea leaga i le faia o mea e maua ai faamanuiaga a le Atua.

4:10; 15:18—I le ā le itu na faasesē ai e Ieova ona tagata fouvale? I le vaitaimi o Ieremia na iai perofeta o ē na “vavalo i mea pepelo.” (Ieremia 5:31; 20:6; 23:16, 17, 25-28, 32) E leʻi taofia e Ieova nei perofeta i le faalauiloa atu o feʻau taufaasesē.

16:16—O le ā e uiga i ai le “aauina atu [o] tagata fai faiva e toʻatele” ma “tagata tuli manu e toʻatele” e Ieova? Atonu o loo faasino i le auina atu o vaegaau a o latou fili e saʻilia tagata Iutaia lē faamaoni o le a fai i ai le faasalaga a Ieova. Peitaʻi e tusa ai ma le mea o fai mai ai le Ieremia 16:15, atonu e faasino atu foʻi lenei mau i le saʻilia o tagata Isaraelu ua salamō.

20:7—O le ā le auala na faaaogā ai e Ieova ‘lona malosi’ e faasagatau ma faaʻoleʻole ai Ieremia? Auā na lē amanaʻia ma na iai faasāsāga a o faalauiloa atu le feʻau a Ieova, atonu na lagona ai e Ieremia ua lē lava lona malosi e faaauau ai. Peitaʻi na faaaogā e Ieova lona malosi e teena ai nei uiga lē lelei, ma faamalosia ai Ieremia e faaauau. Sa faaʻoleʻole e Ieova Ieremia i le faaaogāina o ia e faataunuu ai mea sa manatu le perofeta e na te lē mafaia.

Lesona mo i Tatou:

1:8. I nisi o taimi e laveaʻi ai e Ieova ona tagata mai sauāga, atonu i lona faaaogāina o ni faamasino e iai le tofā mamao, e ala i le suia o tagata loto ita o le malo i ni tagata e iai le utaga, ia po o le tuuina atu o le malosi i ona tagata tapuaʻi e onosaia ai nei tulaga.—1 Korinito 10:13.

2:13, 18. E lua mea leaga na faia e tagata Isaraelu lē faamaoni. Sa latou tuulafoaʻia Ieova, o le puna o faamanuiaga, taʻitaʻiga, ma puipuiga. Na latou faia mo i latou ni a latou  vaieli faafaatusa e ala i le saʻilia o se sootaga faafitafita ma Aikupito ma Asuria. I o tatou aso, o le tuua o le Atua moni ae faalagolago i filosofia faaletagata ma aʻoaʻoga ma faiga faapolotiki, e tusa lenā ua suia le “puna o le vai ola” i “vaieli māvaevae.”

6:16. Ua timaʻi mai Ieova i ona tagata fouvale ina ia sema se taimi ma toe iloilo o latou tulaga, ma toe foʻi “i ala” na savavali ai o latou augātamā. Pe e lē tatau ea foʻi ona iloilo i tatou mai lea taimi i lea taimi po o tatou savavali moni lava i le ala lea e manaʻo Ieova tatou te ui ai?

7:1-15. O le tuuina o lo latou faatuatuaga i le malumalu, ma manatu i ai e maua ai le puipuiga, e leʻi faasaoina ai tagata Iutaia. E ao ona tatou savavali i le faatuatua, ae lē o le tino mai o mea.—2 Korinito 5:7.

15:16, 17. I le pei o Ieremia, e mafai ona tatou tetee atu i faafitauli. E mafai nei mea pe a tatou fiafia i suʻesuʻega uigā o le Tusi Paia, e ala i le faasilisilia o le suafa o Ieova i la tatou faiva, ma ʻalofia aumea leaga.

17:1, 2. Sa lē taliaina e Ieova taulaga a tagata Iuta ona o a latou agasala. O amioga lē mamā e mafai ona faalavelaveina ai a tatou taulaga o viiga.

17:5-8. E mafai ona maufaatuatuaina tagata ma faalapotopotoga, pe a ōgatusa a latou gaoioiga ma le finagalo o le Atua ma taʻiala a le Tusi Paia. A oo loa i mataupu e pei o le faaolataga ma le mauaina o le filemu ma le saogalemu moni, o se gaoioiga poto lo tatou faatuatua tau lava o Ieova.—Salamo 146:3.

20:8-11. E lē tatau ona tatou faatagaina le lē ano mai o tagata, teteega po o sauāga e faavaivaia ai lo tatou maelega i le galuega talaʻi o le Malo.—Iakopo 5:10, 11.

“IA OUTOU TUUINA O OUTOU UA I LE AMO A LE TUPU O PAPELONIA”

(Ieremia 21:1–51:64)

Na faalauiloa e Ieremia faasalaga faafaamasinoga faasaga i tupu mulimuli e toʻafā o Iuta atoa ai ma perofeta pepelo, leoleo mamoe leaga ma faitaulaga faimea lē tonu. I le faasino atu i le vaega totoe faamaoni o ni mati lelei, na fetalai Ieova: “Ou te faasaga atu oʻu mata iā te i latou ia lelei ai.” (Ieremia 24:5, 6) E tolu valoaga i le mataupu e 25 lea e otooto mai ai sala faamasinoga o le a auʻiliʻiliina i isi mataupu e sosoo mai.

Sa fuafua e faitaulaga ma perofeta e fasiotia Ieremia. O lana feʻau na avatu e tatau ona latou auauna i le tupu o Papelonia. Na faapea atu Ieremia i le tupu o Setekaia: “Ia outou tuuina o outou ua i le amo a le tupu o Papelonia.” (Ieremia 27:12) Peitaʻi, “o lē na faataapeapeina Isaraelu, na te faapotopotoina i latou [Isaraelu].” (Ieremia 31:10) E iai se māfuaaga lelei na fai ai se folafolaga i tagata sa Rakapā. Ua tuuina Ieremia “i le lotoā o le fale puipui.” (Ieremia 37:21) Ua faaumatia Ierusalema, ma o le toʻatele o ona tagata ua ave faatagataotauaina. Sa aofia ai Ieremia ma lana failautusi o Paruka, iā i latou toʻaitiiti na totoe. E ui i lapataʻiga a Ieremia e aua le ō i Aikupito, ae sa ō lava i latou na fefefe. I le mataupu e 46 e oo i le 51 o loo maua ai le feʻau na faalauiloa e Ieremia e faatatau i nuu.

Taliina o Fesili Faale-Tusi Paia:

22:30—Pe na mafai e lenei faalauiloaga ona faalēaogāina le aiā a Iesu e nofo ai i le nofoālii o Tavita? (Mataio 1:1, 11) E leai. Na taofia e le faalauiloaga suli o Iekonia mai le  “tiʻetiʻe i le nofoālii o Tavita . . . i Iuta.” O le a pule mai Iesu i le lagi, ae lē o se nofoālii i Iuta.

23:33—O le ā “le avega mai iā Ieova”? I aso o Ieremia, o le feʻau tāua na avatu e le perofeta e faatatau i le faaumatiaga o Ierusalema sa avea ma avega mamafa mo ona tagatānuu. I le isi itu, o i latou na lē faalogo i le feʻau na avea ma avega mamafa iā Ieova ma iʻu ai ina ia tuulafoaʻia i latou. I se tulaga talitutusa, ua avea le feʻau a le Tusi Paia i le faaumatiaga o lotu sesē ma se avega mamafa i lotu sesē, ma o ē lē faalogo ua avea i latou ma avega mamafa i le Atua.

31:33—E faapefea ona tusia tulafono a le Atua i loto? Pe a naunau moni se tasi i tulafono a le Atua ma ua ia matuā faanaunau e faia le finagalo o Ieova, e mafai la ona faapea o loo tusia tulafono a le Atua i lona loto.

32:10-15—O le ā le māfuaaga na faia ai ni tusi se lua o le maliega e tasi? O le tusi lea na tatala pe na lē faamauina na faaaogā mo talanoaga. O le isi tusi lea e leʻi tatalaina pe sa faamaufaailogaina sa faaaogā e faamaonia ai le saʻo aʻiaʻi o le tusi lea ua tatalaina pe a manaʻomia. Ua faataatia e Ieremia se faataʻitaʻiga o le manaʻomia ona uia taʻiala faaletulafono e tusa lava po o tatou tauaiga po o se uso talitonu.

33:23, 24—O ai “aiga e lua” o loo taʻua i inei? O le aiga tautupu e ala mai le gafa o le tupu o Tavita, a o le isi, o le aiga o ositaulaga o suli o Arona. Ina ua faaumatia Ierusalema ma le malumalu o Ieova, na foliga mai ai ua teena e Ieova nei aiga e lua ma o le a lē toe iai lona malo i le lalolagi pe toe atiaʻe ai lana tapuaʻiga.

46:22—Aiseā ua faatusa ai le leo o Aikupito i le leo o se gata? Atonu o loo faasino atu lenei leo po o le paū o le leo ona ua latou iloa mala. O loo faaalia ai foʻi i lenei manatu le lē aogā i Farao o Aikupito ona latou faalialia nei gata paia i le pito i luma o o latou ufiulu ona o le manatu e puipuia ai i latou e le atua gata fafine o Uatchit.

Lesona mo i Tatou:

21:8, 9; 38:19. E oo lava i le taimi ua toetoe lava faaumatia Ierusalema, sa tuuina atu pea e Ieova le avanoa i tagata Ierusalema lē salamo ua tatau i ai le oti, e filifili ai. Ioe, e ese le ‘tele o lona alofa mutimutivale.’—2 Samuelu 24:14; Salamo 119:156.

31:34. E faamāfanafana loto lo tatou iloa e lē toe manatua e Ieova agasala ua uma ona ia faamagaloina, ma toe faasalaina ai i tatou i le lumanaʻi!

38:7-13; 39:15-18. E lē galo iā Ieova la tatou auaunaga faamaoni, lea e aofia ai le “auauna i le ʻau paia.”—Eperu 6:10.

45:4, 5. I le pei o le tulaga na iai aso o le iʻuga i Iuta, i “aso e gata ai” i lenei faiga o mea e lē o se taimi e saʻilia ai ni “mea e sili atu” e pei o le tamaoaiga, tulaga maualuluga, po o le mautū faaletino.—2 Timoteo 3:1; 1 Ioane 2:17.

UA SUSUNUINA IERUSALEMA

(Ieremia 52:1-34)

O le tausaga e 607 T.L.M. i le lona 11 o tausaga o le nofoaiga a Setekaia. Ua 18 masina talu ona siʻomia Ierusalema e Nepukanesa le tupu o Papelonia. O le lima o masina, o le aso fitu o le masina, o le 19 o tausaga o le nofoaiga a le tupu o Nepukanesa na ‘sau ai,’ pe na taunuu ai i Ierusalema, Nepusatana lē e pule i ʻau e faafeao. (2 Tupu 25:8) Atonu na fuafua mai e Nepusatana i lo latou nofoaga i fafo atu o pā o le aai, se auala o la latou osofaʻiga. I aso e tolu mulimuli ane, i le aso e sefulu o le masina, na “sau ai,” pe na ulu ai i Ierusalema. Ma amata loa ona ia susunuina le aai.—Ieremia 52:12, 13.

Na faamatala auʻiliʻili e Ieremia le faatafunaga o Ierusalema. O ana faamatalaga na māfua ai auēga. O loo maua nei fatuga i le tusi o Auega.

[Ata i le itulau 8]

Na aofia i faalauiloaga a Ieremia sala faafaamasinoga a Ieova iā Ierusalema

[Ata i le itulau 9]

Na faapefea ona ‘faaaogā e Ieova lona malosi’ e faasagatau ai iā Ieremia?

[Ata i le itulau 10]

“E pei o ia mati lelei, e faapea ona ou manatu i le tafeaga a Iuta.”—Ieremia 24:5