Na Maua e Hana le Filemu o le Mafaufau

O LOO tatalo leotele se fafine e vivii atu iā Ieova. Ua ia lagona ua faatulaʻi mai o ia e le Atua nai le eleele, ma ua suia ona faalogona tigā ma faanoanoa i ni faalogona matuā fiafia.

O lenei fafine o lona igoa o Hana. O le ā na māfua ai nei suiga tetele i ona faalogona? Aiseā ua ia matuā olioli ai nei? E faapefea ona aogā iā i tatou le mea na tupu iā te ia? Seʻi o tatou iloiloina le tala iā Hana ina ia maua tali o na fesili.

Se Aiga na Pagatia i Mafatiaga

O Hana o le isi lea o avā e toʻalua a Elekana, o se sa Levī mai le nuu o Efaraima. (1 Samuelu 1:1, 2a; 1 Nofoaiga a Tupu 6:33, 34) E ui lava sa lē o se vaega o le fuafuaga a le Atua i le amataga le faia o ni ʻautaunonofo po o le tele o avā, ae na faatagaina i lalo o aiaiga a le Tulafono faa-Mose. Na tapuaʻi iā Ieova le aiga o Elekana, peitaʻi e tulaʻi lava faafitauli ma feteenaʻiga i le tele o taimi ona o le tele o avā, e pei ona aliali mai i le mea na tupu i le aiga o Elekana.

O Hana sa pā e lē fanau, ae o le isi avā a Elekana, o Penina, sa iai sana fanau. O le pogai lenā o le faatavā o Penina iā Hana.—1 Samuelu 1:2e.

Na manatu tagata o se luma mo fafine Isaraelu pe a lē fanau ma o se faailoga foʻi o le lē tāua i le silafaga a le Atua. Peitaʻi e leai se faailoga e faapea ai na avea le lē fanau o Hana ma faamaoniga o le lē finagalo malie mai i ai o le Atua. Na i lo le faamāfanafana atu la o Penina iā Hana, na ia faaaogā lona tulaga o le mafai ona fanau mai o ni fanau, ma pogai o lona faatavā atu ma le lē alofa iā Hana.

Ni Faigāmalaga i le Malumalu

E ui lava i nei feteenaʻiga, ae i tausaga uma sa malaga ai le aiga o Elekana ina ia ofo atu taulaga i le malumalu o Ieova i Sailo. * O lenei malaga e savavali, ma pe ā ma le 40 maila le ō ma le toe foʻi mai. E mautinoa le matuā faigatā o nei taimi mo Hana, ona e tele vaega o le taulaga faafetai e ave iā Penina ma lana fanau, ae e na o le tasi le vaega na te mauaina. Sa faaaogā foʻi e Penina avanoa nei e faalili ai Hana, ma faaita ai iā te ia ona e foliga mai ua ala ona ia lē fanau ona “o le pule a Ieova.” Sa tupu pea lenei taufaifaiga mai lea tausaga i lea tausaga, lea e iʻu ai lava ina tagi Hana ma lē ʻai ai. Na tatau ona avea nei malaga ma taimi fiafia mo ia, ae na i lo lea ua avea ma taimi e sili ona mafatia ai. Ae ui i lea, sa faaauau ona malaga Hana i le malumalu o Ieova.—1 Samuelu 1:3-7.

Pe e te iloa ua faapefea ona faataatia e Hana se faaaʻoaʻoga lelei mo i tatou? Pe a lagona le lotovaivai, o le ā lau mea o le a fai? Po o le a e tūtūmatāvao ea ma lē toe auaufaatasi ma uso ma tuafāfine? E lē o le mea lenā na fai e Hana. Sa fai ma ana masani le faatasitasi ma tagata tapuaʻi o Ieova. E tusa lava la pe tatou te feagai ma tulaga faigatā, e tatau ona tatou faia le mea lava lea e tasi na fai e Hana.—Salamo 26:12; 122:1; Faataoto 18:1; Eperu 10:24, 25.

 Sa taumafai Elekana e faamāfanafana iā Hana ma faalaeiau atu ina ia talanoa mai e faatatau i ona mafatiaga. Na fesili atu Elekana: “Hana e, se ā le mea e te tagi ai? Se ā le mea e te lē ʻai ai? Se ā foʻi le mea e tigā ai lou loto? E lē ua sili ea ona lelei o aʻu iā te oe i tama tane e toʻatinoagafulu?” (1 Samuelu 1:8) Atonu e leʻi iloa e Elekana faiga lē alofa a Penina, ma atonu foʻi na manatu Hana e sili ai pe a onosaʻi e aunoa ma le fai atu o se tala na i lo le faitio pe faaleo atu ona lagona lē fiafia. Po o le ā lava le tulaga na iai, ae na faaalia e Hana le faatuatua iā Ieova ina ua ia saʻili atu i ai e ala i le tatalo.

Ua Faia e Hana se Tautōga

O taulaga faafetai, e aai ai lava tagata i totonu o le malumalu o Ieova. Ina ua tuua le potuʻai, ona tatalo atu lea o Hana i le Atua. (1 Samuelu 1:9, 10) Na ia ʻaiʻoi atu: “Ieova o ʻau e, afai e te silasila mai i le puapuaga o lau auauna fafine, ma e manatu mai iā te aʻu, a e lē faagalogalo mai i lau auauna fafine, ma e foaʻi mai i lau auauna fafine se tama tane, ona ou foaʻi atu lea o ia iā Ieova i aso uma o lona ola; e lē oo foʻi se tafi i lona ulu.”—1 Samuelu 1:11.

Sa patino le tatalo a Hana. Sa ia talosaga mo se tama tama ma tautō o le a fai lenā tama ma Naseri iā Ieova i le olaga atoa. (Numera 6:1-5) O se tautōga sa tatau ona malie i ai lana tane, ma na faaalia i gaoioiga mulimuli ane a Elekana lona taliaina o le mea ua tautō i ai lana avā pele.—Numera 30:6-8.

Ona o le auala na fai ai le tatalo a Hana, na manatu ai le faitaulaga sili o Eli ua onā o ia. Auā sa na ona memu o ona laugutu, ae lē lagona sona leo, auā sa tautala Hana mai lona loto. O se tatalo sa faia faapitoa lava ma le faatauanau. (1 Samuelu 1:12-14) Seʻi manatu i faalogona o Hana na iai ina ua tuuaʻia mamafa e Eli, ua faapea atu o ia ua onā! Ae ui i lea, sa ia tali atu ma le faaaloalo i le faitaulaga sili. Ina ua iloa e Eli o lea sa tatalo Hana ona “o le tele o [lona] mafaufau ma [lona] tigā,” ona ia faapea atu lea: “Ia foaʻi mai foʻi e le Atua o Isaraelu le mea na e faatoga atu ai.” (1 Samuelu 1:15-17) Ina ua uma, ona alu ai loa lea o Hana ua ʻai, ma “ua lē toe mata faanoanoa.”—1 Samuelu 1:18.

O le ā se mea tatou te aʻoaʻoina mai i lenei mea na tupu? Pe a tatou tatalo atu iā Ieova i ni o tatou popolega, e mafai ona tatou faailoa atu iā te ia o tatou faalogona ma talosaga faatauanau atu. Pe afai ua leai lava se isi mea tatou te mafai e foʻia ai le faafitauli, e sili ona tuu atu iā Ieova le mataupu. E leai se isi auala sili tatou te uia.—Faataoto 3:5, 6.

Pe a uma ona tatalo faatauanau, e masani ona lagona e auauna a Ieova le filemu e pei foʻi o Hana. Ona o le faatāua o le tatalo, na tusi ai Paulo: “Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” (Filipi 4:6, 7) O le taimi lava e lafo atu ai o tatou popolega iā Ieova, ua tatau loa ona tatou faataga o ia na te taulimaina na popolega. Ona lē toe manaʻomia loa lea ona tatou popole, e pei foʻi o Hana.—Salamo 55:22.

Ua Tuuina Atu le Tama iā Ieova

Ua tali mai le Atua iā Hana; ua maʻitaga o ia ma fanau mai se tama tama. (1 Samuelu 1:19, 20) O se tasi lenei o nai faataʻitaʻiga o taimi na faapogaia ai e le Atua le fanau mai o sē o le a avea ma ana auauna. O le a avea Samuelu le tama a Elekana ma Hana ma perofeta a Ieova, o se tasi o le a iai sana vaega tāua i le faavaeina o le pulega tautupu i Isaraelu.

E leai se faalētonu na amata aʻoaʻo e Hana Samuelu e uiga iā Ieova mai lava i lona laʻitiiti. Ae pe na galo ai iā te ia lana tautōga na fai? E mautinoa e leai! Ua ia faapea mai: “Seʻia teʻa le tama ma le susu, ona ou molia ai lea o ia, ia iloa o ia i luma o Ieova, ma ia nofo ai pea lava.” Ina ua teʻa Samuelu ma le susu, ina ua pe tusa ma le tolu ona tausaga pe matua teisi atu foʻi, ona ave loa lea o ia e Hana e nofo i le malumalu o Ieova e pei ona sa ia tautō ai.—1 Samuelu 1:21-24; 2 Nofoaiga a Tupu 31:16.

 Ina ua uma ona ofo atu le taulaga iā Ieova, ona tuu atu loa lea e Hana ma Elekana o le la tama iā Eli. E lē taumatea na uʻu mau e Hana le lima o si ana tama a o ia faapea atu iā Eli: “Le alii e, ua soifua oe le alii e, o aʻu lava le fafine sa tā iinei ma oe; sa ou faatoga atu ai iā Ieova; o le tama nei na ou tatalo atu ai; ua foaʻi mai e Ieova le mea na ou faatoga atu ai iā te ia. O aʻu foʻi ua ou tuuina atu o ia iā Ieova; ua tuuina atu o ia iā Ieova i aso uma e ola ai o ia.” O le aso lava lenā na amata ai loa le auaunaga faapitoa a Samuelu i le Atua mo le olaga atoa.—1 Samuelu 1:25-28; 2:11.

E leʻi galo iā Hana si ana tama a o faagasolo tausaga. Ua taʻua i le Tusi Paia: “Na faia e lona tinā se ofu itiiti mona, na avea ai iā te ia i lea tausaga ma lea tausaga, pe a la ō aʻe ma lana tane e avatu ai le taulaga e fai i tausaga.” (1 Samuelu 2:19) E lē taumatea na tatalo pea Hana mo Samuelu. E oo foʻi i taimi o ana asiasiga faaletausaga, e lē taumatea na ia faalaeiau atu pea iā te ia ina ia tumau ma le faamaoni i lana auaunaga i le Atua.

I se tasi taimi, na faamanuia atu ai Eli i mātua o Samuelu ma fai atu iā Elekana: “Ia foaʻi mai e Ieova iā te oe fanau i lenei fafine e sui aʻi lana na ia tuu mai iā Ieova.” E tusa ai la ma na upu, na faamanuiaina Hana ma Elekana i nisi atalii e toʻatolu ma afafine e toʻalua.—1 Samuelu 2:20, 21.

Maʻeu se faaaʻoaʻoga lelei ua faataatia e Elekana ma Hana mo mātua Kerisiano! E toʻatele mātua ua faamoemoe e tuuina atu a latou fanau iā Ieova, e ala i le faalaeiau o i latou ia tuliloa ni sini faaleagaga i le auaunaga. Ua talafeagai ona faamālō atu i na mātua ona o le faataulaga ua latou faia. Ma o le a faamanuia Ieova iā i latou.

Le Tatalo Fiafia a Hana

Maʻeu ni lagona fiafia na oo i lenei tinā na lē fanau! E seāseā lava ona tatou faitau i ni tatalo a fafine o faamauina i le Tusi Paia. Peitaʻi i le tulaga o Hana, e lua ana tatalo ua tatou iloa. O le isi na tatalo ai ina ua tigā ma mafatia, ae o le isi o le tatalo faafetai. Na amata i lona faapea atu: “Ua olioli lava loʻu loto iā Ieova.” Sa ia olioli ona “o lē na pā ua iʻu ina fanau,” ma na ia viiviia Ieova o sē na te “faamaualugaina; na te faatulaʻiina le tagatalautele nai le eleele.” O le mea moni, “na te faaeaina foʻi le tagata mativa nai le faatafuna.”—1 Samuelu 2:1-10.

O lenei tala faagaeeina o loo aofia ai Hana ua faaalia ai, e iai taimi tatou te tigā ai ona o vaivaiga po o uiga lē alofa o isi. Ae ui i lea, e lē tatau ona avea na tofotofoga ma itu e faaitiitia ai lo tatou olioli i le auaunaga iā Ieova. Auā o ia o le Faafofoga tatalo sili, o lē tali mai i le valaau atu a ona tagata, e na te faasaoina i latou mai puapuaga ma aumaia iā i latou le tele o le filemu ma isi faamanuiaga.—Salamo 22:23-26; 34:6-8; 65:2.

[Faamatalaga pito i lalo]

[Ata i le itulau 17]

Na tuuina atu e Hana Samuelu iā Ieova