O Taaʻiga a Agelu i Olaga o Tagata

“Ua mavae ia mea, ona ou iloa atu lea o le agelu o loo alu ifo i le lagi, ua iā te ia le pule sili . . . Ua matuā alaga foʻi o ia ma le leo tele, ua faapea ane, ‘Ua paʻū, ua paʻū Papelonia le aai tele!’”—FAAALIGA 18:1, 2.

1, 2. O le ā ua faaalia ai e faaaogā e Ieova agelu e faia lona finagalo?

A O FAAAUNUUA le aposetolo ua afu le soifua o Ioane i le motu o Patamo, sa faaeaina o ia i le tuu mai i ai o ni vaaiga faavaloaga. I le faagaeeina e “le Agaga” na faapogaia ai o ia e iai i “le aso o le Alii” ma ia iloa ai ni mea tutupu e maofa ai. Na amata lenā aso i le faanofotupu o Iesu Keriso i le 1914 T.A. ma faaauau ai lava e oo i le iʻuga o lana Pulega i le Afe o Tausaga.—Faaaliga 1:10.

² E leʻi tauaao tuusaʻo mai e Ieova nei faaaliga iā Ioane. Sa Ia faaaogā le auala o loo taʻua i le Faaaliga 1:1: “O le faaaliga a Iesu Keriso, na tuuina atu e le Atua iā te ia ina ia faaali mai i ana auauna o mea e tusa ona vave oo mai, ua auina mai foʻi e ia lana agelu e faailoa mai ai i lana auauna o Ioane.” E ala mai iā Iesu, na faaaogā ai e Ieova se agelu e faailoa iā Ioane mea matagofie o “le aso o le Alii.” I se tasi taimi, na ‘iloa atu e Ioane le agelu o loo alu ifo i le lagi, ua iā te ia le pule sili.’ O le ā le tofiga o lenei agelu? “Ua matuā alaga foʻi o ia ma le leo tele, ua faapea ane, ‘Ua paʻū, ua paʻū Papelonia le aai tele!’” (Faaaliga 18:1, 2) Na maua e lenei agelu malosi le faaeaga e faalauiloa atu le paʻū o Papelonia le Aai Tele, le emepaea o lotu sesē a le lalolagi. E aunoa lava la ma se faalētonu, e faaaogā e Ieova agelu i vala tāua o le faataunuuina o lona finagalo. A o tatou leʻi vaʻiliʻiliina le matafaioi a agelu i le fuafuaga a le Atua, ma le auala e tatou te aafia ai i agelu, seʻi o tatou vaai muamua pe na faapefea ona iai nei foafoaga agaga.

Na Faapefea Ona Iai Agelu?

3. O le ā le vaaiga sesē o loo i le tele o tagata e faatatau i agelu?

³ E faitau miliona tagata i aso nei e talitonu e iai agelu. Peitaʻi e toʻatele foʻi e sesē o latou manatu e uiga i agelu ma lo latou amataga mai. Mo se faaaʻoaʻoga, e manatu nisi tagata lotu pe a maliu sē e pele iā i latou, ua valaaulia lenā tagata e faatasi ma le Atua ma avea ai ma agelu. Po o le mea lenā o loo aʻoaʻo e le Afioga a le Atua e faatatau i le foafoaga, le māfuaaga ma le fuafuaga o le iai o agelu?

4. O le ā se faamatalaga a le Tusi Paia e uiga i le amataga mai o agelu?

⁴ E sili atu le malolosi o agelu ma e tele foʻi la latou pule—o le agelu sili—e suafa iā Mikaele. (Iuta 9) E aunoa ma se faaluafesasi o loo faasino atu iā Iesu Keriso. (1 Tesalonia 4:16) Mai anamuā lava, ina ua fuafua Ieova o le a ia faia le foafoaga, o le uluaʻi lava o mea uma na ia faia o lona Alo agelu. (Faaaliga 3:14) Mulimuli ane, e ala i lona Alo ulumatua, na faia ai e Ieova isi foafoaga agaga uma. (Kolose 1:15-17) I le faasino atu i nei agelu agaga o ni atalii iā te ia, na fesili ai Ieova i le augātamā o Iopu e faapea: “O ifea sa e i ai ina o oʻu faavaeina le lalolagi? Inā faaali mai ia pe afai ua e iloa mafaufau. Ina o pepese faatasi fetu o le taeao, ma alalaga fiafia atalii uma o le Atua.” (Iopu 38:4, 7) E manino lava la, na faia e le Atua agelu ma ua leva ona iai a o leʻi faia le tagata.

5. E faapefea ona faamaopoopo agelu?

⁵ O loo taʻua i le 1 Korinito 14:33: “O le Atua, e lē o le Atua ia o le faasoesa, a o le  filemu [maopoopo].” I le ōgatusa ma lenei manatu, o loo lelei ona faamaopoopoina atalii agaga o Ieova i vaega autū e tolu: (1) serafi, o loo auauna i le nofoālii o Ieova, e faalauiloa atu lona paia, ma tausia le mamā faaleagaga o ona tagata. (2) kerupi, o loo faafeaoina le nofoālii o le Atua, ma lagolagoina lana pule silisili ese, ma le (3) o isi agelu o ē e faataunuuina lona finagalo. (Salamo 103:20; Isaia 6:1-3; Esekielu 10:3-5; Tanielu 7:10) O ā nisi o auala e mafai ona aafia ai tagata i nei foafoaga agaga?—Faaaliga 5:11.

Le Matafaioi a Agelu

6. Na faapefea ona faaaogā e Ieova kerupi i le faatoʻaga i Etena?

⁶ O le taimi muamua lava na aliaʻi mai ai se faamatalaga e faatatau i foafoaga agaga o loo i le Kenese 3:24, lea tatou te faitau ai e faapea: “Ua ia [Ieova] tuli atu lava iā Atamu; ua ia tofia foʻi kerupi e nonofo i le itu i sasaʻe o le faatoʻaga o Etena, ma le pelu afi mumū, o loo feliuliuaʻi e leoleo ai le ala i le laau o le ola.” Ona o kerupi e pei ona taʻua na lē mafai ai e Atamu ma Eva ona toe ulu atu i le faatoʻaga na avea ma o la aiga. O le amataga mai lenā o le talafaasolopito o le tagata. O le ā le matafaioi a agelu talu mai lenā taimi?

7. Pe a fua i le uiga o upu o le uluaʻi gagana lea e faaliliu mai ai le “agelu,” o le ā se tasi o a latou galuega?

⁷ Atonu o nisi taimi e lē o taʻu saʻo maia le upu “agelu” ae o atalii o le Atua, peitaʻi o loo faasino atu foʻi i agelu. O le upu Eperu ma le upu Eleni mo le “agelu” e mafai ona faaliliu i le “avefeʻau.” E tele ina galulue agelu o ni auala o fesootaʻiga i le va o le Atua ma tagata. E pei ona taʻua i uluaʻi palakalafa e lua o lenei mataupu, sa faaaogā e Ieova se agelu e faaoo mai ai ana feʻau i le aposetolo o Ioane.

8, 9. (a) Sa faapefea ona aafia Manoa ma lana avā i le asiasi mai i ai a se agelu? (e) O le ā e mafai ona aʻoaʻoina e mātua mai feutagaʻiga a Manoa ma le agelu a le Atua?

⁸ Sa faaaogā foʻi agelu e lagolago ma aumai faalaeiauga i auauna a le Atua i le lalolagi. O se faaaʻoaʻoga o le taimi o pulea Isaraelu e Faamasino, sa faanaunau lava Manoa ma lana avā o lē sa pā, ia maua sa la tama. Na auina mai e Ieova lana agelu e taʻu i le avā a Manoa o le a fanau sana tama. Fai mai le faamatalaga: “Faauta, o le a tō oe, e te fanau foʻi se tama tane; e lē oo se tafi i lona ulu, auā e faia le tama ma naseri i le Atua, e afua mai ina fanau; o ia foʻi e afua mai ona faaola iā Isaraelu ai lima o Filisitia.”—Faamasino 13:1-5.

⁹ Na oo mai le taimi na fanau ai se tama tama a le avā a Manoa. O Samasoni le igoa o le tama, o lē na oo ina taʻutaʻua i le talafaasolopito o le Tusi Paia. (Faamasino 13:24) A o leʻi fanau mai Samasoni, na talosaga atu Manoa ina ia toe foʻi mai le agelu e faatonu atu i laʻua i le auala e tausi aʻe ai le tama. Na talosaga atu Manoa e faapea: “Se ā se mea e tatau ai i le tama, ma se mea e faia iā te ia?” Na toe taʻua e le agelu a Ieova faatonuga na ia taʻu atu muamua i le avā a Manoa. (Faamasino 13:6-14) E mautinoa le faalaeiauina ai o Manoa i lenei mea! E lē o toe asiasi mai agelu i tagata taʻitoʻatasi i se tulaga faapea i aso nei, ae e mafai e mātua, e pei ona faia e Manoa,  ona saʻilia faatonuga mai iā Ieova e faatatau i le toleniga o fanau.—Efeso 6:4.

10, 11. (a) O le ā le aafiaga na iai iā Elisaia ma lana auauna ona o ʻautau a Suria? (e) E faapefea ona aogā iā i tatou le manatunatu i lenei mea na tupu?

¹⁰ I aso o le perofeta o Elisaia sa iai se faaaʻoaʻoga matilatila o le lagolago a agelu. Sa mau Elisaia i Totana, o se tasi o aai i Isaraelu. I se tasi aso, ina ua ala aʻe le auauna a Elisaia i le taeao ma tilotilo atu i fafo, na ia vaaia ai ua siʻomia le aai e ni solofanua ma kariota tau. O se ʻautau malosi na auina mai e le tupu o Suria e puʻe Elisaia. O le ā le gaoioiga na fai e le auauna a Elisaia? I le mataʻu tele, atonu ua lē mautonu, na ia alaga atu ai: “Auē! le alii e, pe faapefea se mea tatou te fai aʻi?” I le manatu o le auauna, ua leai se faamoemoe. Peitaʻi na tali atu Elisaia: “Aua e te fefe, auā e toʻatele ua iā te i tatou i ē ua iā te i latou.” O le ā na uiga i ai le tala a Elisaia?—2 Tupu 6:11-16.

¹¹ Sa iloa lelei e Elisaia o loo faatasi atu agelu e lagolago iā te ia. Peitaʻi e leʻi iloa atu e lana auauna ni agelu. “Ona tatalo ai lea o Elisaia, ua faapea atu, Ieova e, ia e faapupula i ona mata ina ia na iloa. Ona faapupulaina lea e Ieova o mata o le tauleʻaleʻa, ona iloa ai lea e ia, faauta foʻi, ua tumu le mauga i solofanua ma kariota afi, ua latou vagavagai iā Elisaia.” (2 Tupu 6:17) O le taimi lenā na faatoʻā iloa atu ai agelu e le auauna. E mafai foʻi ona tatou iloa atu agelu i o tatou mata faaleagaga, a o latou galulue uma i lalo o le taʻitaʻiga a Ieova ma Keriso, e lagolagoina ma puipuia tagata o Ieova.

Le Lagolago a Agelu i le Taimi o Keriso

12. O le ā le fesoasoani na maua e Maria mai le agelu o Kaperielu?

¹² Seʻi manatu i le fesoasoani na maua e le taupou Iutaia o Maria ina ua ia maua le tala: “O le a tō oe, ma e fanauina se tama tane, e te faaigoa iā te ia o Iesu.” A o leʻi faamatalaina atu lenei feʻau e ofo tele ai, na fai atu muamua le agelu o Kaperielu lea na auina mai e le Atua: “Maria e, aua e te fefe; auā ua alofaina mai oe e le Atua.” (Luka 1:26, 27, 30, 31) E mautinoa lava le faalaeiauina ma faalototeleina ai o Maria, i le faalogo atu i nei upu a o faamautinoa mai le alofagia o ia e le Atua!

13. Sa faapefea ona fesoasoani agelu iā Iesu?

¹³ O se tasi faaaʻoaʻoga o le fesoasoani a agelu na tupu ina ua uma ona teena e Iesu tofotofoga e tolu na tuu atu e Satani iā te Ia a o iai i le vao. Ua taʻu mai iā i tatou le mea na tupu ina ua uma tofotofoga: “Ona tuua ai lea o ia e le tiapolo, faauta foʻi, ua ō mai agelu ma auauna mai iā te ia.” (Mataio 4:1-11) E tai faapena foʻi le mea na tupu i le pō a o lumanaʻi ai le maliu o Iesu. Ona o le ogaoga o  mafatiaga, na tootuli ai Iesu ma tatalo atu e faapea: “ʻLoʻu Tamā e, a e finagalo i ai, ia e ave ese lenei ipu iā te aʻu; a e aua le faia loʻu loto, a o lou finagalo.’ Ona faaali mai ai lea iā te ia o le agelu mai le lagi, ua faamalosi iā te ia.” (Luka 22:42, 43) Peitaʻi, o le ā le fesoasoani o tatou maua mai agelu i aso nei?

Le Lagolago a Agelu i Aso Nei

14. O ā sauāga e manaʻomia ona onosaia e Molimau a Ieova i aso nei, ma o le ā le iʻuga ua oo i ai?

¹⁴ Pe a tatou manatunatu i le talaaga o le galuega talaʻi a Molimau a Ieova i ona pō nei, pe o tatou mātauina ai ea ni faamaoniga o le fesoasoani a agelu? Mo se faaaʻoaʻoga, na mafai e tagata o Ieova ona onosaia osofaʻiga ogaoga a le fitafita (ʻau Nasi) i Siamani ma Europa i Sisifo a o lumanaʻi ai ma a o faagasolo le Taua Lona Lua a le Lalolagi (1939-1945). Sa umi foʻi se taimi na latou onosaia ai sauāga i le tulaʻi mai o Vaega Tetee Katoliko i Italia, Sepania, ma Potukali. Ma sa latou onosaia foʻi sauāga i Rusia ma atunuu sa i lalo o lana pulega. E lē faagaloina foʻi sauāga sa onosaia e Molimau i nisi o atunuu i Aferika. * Talu ai nei lava e leʻi mamao tele atu, sa mafatia ai foʻi auauna a Ieova i sauāga faamoʻamoʻa i le atunuu o Georgia. Ua matuā sulu ma le ulu Satani e fai so o se mea lava i lona malosi e taofia ai gaoioiga a Molimau a Ieova. Peitaʻi, i le avea ai o se faalapotopotoga, ua faasaoina mai Molimau a Ieova i so o se teteega ma ua faatuputeleina lo latou faitau aofaʻi. O se tasi o māfuaaga o lenei taulau manuia, ona o le puipuiga malu o loo saunia mai e agelu.—Salamo 34:7; Tanielu 3:28; 6:22.

15, 16. O le ā le fesoasoani o loo maua e Molimau a Ieova mai agelu i le latou talaʻiga i le lalolagi aoao?

¹⁵ E manatu mamafa Molimau a Ieova i lo latou tofiga e talaʻi le tala lelei o le Malo i le lalolagi atoa ma faia ni soo, e ala i le aʻoaʻo o  upu moni i tagata e faaalia le fiafia po o fea lava o iai. (Mataio 28:19, 20) Ae ua latou iloa foʻi e lē mafai ona faataunuuina lenei tofiga e aunoa ma le fesoasoani mai a agelu. O le ala lea o le avea e lē aunoa o upu o loo taʻua i le Faaaliga 14:6, 7 ma puna o faalaeiauga mo i latou. Fai mai le Faaaliga: “Na aʻu [le aposetolo o Ioane] iloa foʻi le tasi agelu ua lele i le taulotoaʻiga o le lagi, ua iā te ia le tala lelei [e] faavavau e folafola atu i ē nonofo i le lalolagi, i atunuu uma, ma ituaiga, ma gagana eseese, ma nuu, ua faapea atu ma le leo tele, ‘Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga; ma ia outou ifo i lē na faia le lagi, ma le fanua, ma le sami, atoa ma puna o vai.’”

¹⁶ Ua faaalia manino i nei upu le iai o le lagolago ma le taʻitaʻiga a agelu i le galuega tele faaevagelia a Molimau a Ieova i le lalolagi aoao. O loo faaaogā e Ieova ana agelu e tataʻi tagata fiafia i ana Molimau. O loo taʻitaʻia foʻi e agelu Molimau i ē ua tatau i ai. O le māfuaaga lea e ala ai ona tutupu mea i nisi taimi, lea e tau atu ai se Molimau a Ieova i se tagata i le taimi o loo ia manaʻomia moni ai lava se fesoasoani faaleagaga.

Ua Toe o se Aga Faataunuu se Matafaioi Mataʻina

17. O le ā na tupu i ʻau a Asuria ina ua osofaʻia e se agelu e toʻatasi?

¹⁷ E ese mai i le auauna o ni ave feʻau ma faamatalaloto i tagata tapuaʻi o Ieova, e iai se isi matafaioi o loo faatino e agelu. I aso anamua, sa latou faaoo maia faasalaga faafaamasinoga a le Atua. Mo se faataʻitaʻiga, i tuā i le senituri lona valu T.L.M., na faamataʻuina ai Ierusalema e se ʻautau tele o fitafita Asuria. Na faapefea ona tali mai Ieova? Na ia fetalai: “Ou te faamamaluina le aai nei ia ola ona o aʻu nei lava, ona o Tavita foʻi laʻu auauna.” Ua taʻu mai e le Tusi Paia iā i tatou le mea na tupu: “O lea lava pō na alu atu ai le agelu a Ieova, ua fasi i le togālauapi o Asuria o tagata e selau afe ma afe e valu sefulu ma afe e lima. Ua ala o latou na totoe i le taeao lava, faauta, o tagata oti i latou uma.” (2 Tupu 19:34, 35) O se mea noa lava ʻautau a tagata pe a faatusatusa i le malosi o se agelu e toʻatasi!

18, 19. O le ā le matafaioi mataʻina a agelu i le lumanaʻi lata mai, ma o le a faapefea ona aafia ai le fanau a tagata?

¹⁸ Ua lē o toe mamao nei ona gaoioi loa lea o agelu o ni faaoosala a le Atua. Ua toe lava o se aga, ona afio mai loa lea o Iesu ma ‘agelu o lona malosi, i le afi mumū.’ O la latou matafaioi o le aumaia lea o le “taui ma sui i ē ua lē iloa le Atua, ma ua lē anaana i le tala lelei a lo tatou Alii o Iesu.” (2 Tesalonia 1:7, 8) O le a matuā ogaoga aafiaga o lenei gaoioiga i le fanau a tagata! O i latou e lē tali mai i le tala lelei o le Malo o le Atua o loo talaʻia i le lalolagi aoao o le a faaumatia. E na o i latou e saʻilia le amiotonu a Ieova, le faamasino tonu, ma le agamalu o le a “lilo . . . i le aso o le toʻasā o Ieova” ma o le a lē afāina.—Sefanaia 2:3.

¹⁹ E tatou te matuā loto faafetai ona o le faaaogā e Ieova o ana agelu malolosi e fesoasoani ma faamalosia ona tagata tapuaʻi i le lalolagi. Ua faapitoa foʻi ona faamāfanafanaina i tatou i lo tatou iloa o le vaega o loo fai e agelu i fuafuaga a le Atua, talu ai e iai agelu na fouvale iā Ieova ma ua i lalo nei o le taʻitaʻiga a Satani. O le a talanoaina i le mataupu o sosoo mai laasaga e ao ona uia e Kerisiano moni e puipuia ai i latou mai taaʻiga malolosi a Satani le Tiapolo ma ana temoni.

[Faamatalaga pito i lalo]

O le ā se Mea sa E Aʻoaʻoina?

• Na faapefea ona iai agelu?

• Sa faapefea ona faaaogā agelu i taimi o le Tusi Paia?

• O le ā ua faaalia i le Faaaliga 14:6, 7 e faatatau i gaoioiga a agelu i aso nei?

• O le ā le matafaioi mataʻina ua lē o toe umi ona faatino loa lea e agelu?

[Fesili mo le Suʻesuʻega]

[Ata i le itulau 22]

Sa faalaeiauina Manoa ma lana avā e se agelu

[Ata i le itulau 23]

“E toʻatele ua iā te i tatou i ē ua iā te i latou”