Avatu Taulaga e Fiafia i ai le Atua

UA FAAPEA mai le tusi The Mighty Aztecs: “O le ola e maua mai i le oti, o le talitonuga lenā o tagata Aztecs o ē na tele ina faia taulaga i tagata ola i se tulaga e leʻi faapea ona faia muamua i Mesoamerica.” Na faapea atili mai le tusi: “A o faasolo ina malosi le malo, na faaaogā taulaga e fai i tagata e ati aʻe ai le faatuatuaina o le malo.” E tusa ai ma se isi lomifefiloi, na oo atu i le 20,000 taulaga o tagata ola na faia e tagata Aztecs i le tausaga.

I le talafaasolopito, na ofoina atu e tagata ni ituaiga o taulaga i o latou atua ona o le fefefe, lē mautonu, pe na uunaʻia e faalogona nofosala ma le faanoanoa. Peitaʻi o loo taʻua i le Tusi Paia ni taulaga na faavaeina e Ieova le Atua e ou le malosi uma lava. E tatau ai ona tatou fesili: O ā ituaiga o taulaga e fiafia i ai le Atua? Pe e tatau ona avea taulaga o se vaega o la tatou tapuaʻiga i aso nei?

Taulaga i le Tapuaʻiga Moni

Ina ua faia aʻe le nuu o Isaraelu, na avatu e Ieova faatonuga manino iā i latou e tusa ai o le auala na ia finagalo latou te tapuaʻi atu ai iā te Ia, ma na aofia ai le ofoina atu o taulaga. (Numera, mataupu e 28 ma le 29) O isi o ia taulaga na faia mai i fua o faaeleeleaga; o taulaga e faia i manu e pei o povi, mamoe, oti, lupe ma manutagi. (Levitiko 1:3, 5, 10, 14; 23:10-18; Numera 15:1-7; 28:7) O isi taulaga na tatau ona mū uma i le afi. (Esoto 29:38-42) Na iai foʻi taulaga faafetai, lea e faia ai se vaega a i latou na avatua, e ala i le ʻaina o taulaga na avatu i le Atua.—Levitiko 19:5-8.

O taulaga uma na avatu i le Atua i lalo o le tulafono a Mose, o se auala lea na tapuaʻi atu ai tagata i le Atua ma amanaʻia o ia o le Pule Silisili aoao. Na faailoa atu e tagata Isaraelu lo latou loto faafetai iā Ieova i ana faamanuiaga, lana puipuiga ma le faamagaloina o a latou agasala e ala i ia taulaga. E matuā faamanuiaina tagata Isaraelu, pe a faamaoni pea e usitaia faatulagaga a Ieova mo le tapuaʻiga.—Faataoto 3:9, 10.

O le mea e sili ona tāua iā Ieova, o uiga o i latou na avatua taulaga. Na fetalai mai  Ieova e ala i lana perofeta o Hosea: “O le alofa ou te loto i ai, a e lē o le taulaga; ia iloa foʻi le Atua e sili lea i loʻu manatu i taulaga mū.” (Hosea 6:6) Na leai se aogā o taulaga na avatu i le fata faitaulaga a Ieova, ina ua liliu ese tagata mai le tapuaʻiga moni, ma faia amioga leaga ma faamasaa toto o ē lē sala. O le ala lenā na fetalai atu ai Ieova i le nuu o Isaraelu e ala iā Isaia: “Se ā le aogā iā te aʻu o a outou taulaga e tele? Ua ou fiu i taulaga mū e fai i mamoe poʻa, ma le gaʻo o manu pepeti; ou te lē fiafia lava i toto o povi poʻa taanoa, ma tamaʻi mamoe, atoa ma ʻoti poʻa.”—Isaia 1:11.

“O le Mea Ou te Leʻi Poloaʻi Atu Ai”

E telē le eseesega o tagata Isaraelu ma tagata Kanana o ē na avatua a latou fanau o ni taulaga i o latou atua, e aofia ai le atua Amonī o Moloka po o Melekoma. Na taʻua e le tusi Halleyʻs Bible Handbook: “O se vaega o le tapuaʻiga a tagata Kanana le feusuaʻi i luma o o latou atua; ma fasiotia a latou fanau ulumatua o se taulaga i o latou atua.”

Pe na fiafia Ieova le Atua i ia faiga? E leai. A o toeitiiti lava ulu atu tagata Isaraelu i Kanana, na avatu e Ieova le faatonuga o loo faamauina i le Levitiko 20:2, 3: “Ia e fai atu i le fanauga a Isaraelu, Ai se tagata o le fanauga a Isaraelu, po o se tagata ese e āumau iā Isaraelu, na te avatua so ana fanau iā Moloka; e fasiotia lava o ia; e fetogi lava e tagata o le nuu iā te ia i maa. Ou te faia foʻi lea tagata moʻu fili, ma ou vavaeeseina o ia i lona nuu; auā ua ia avatu lana fanau iā Moloka, e faaleaga ai loʻu malumalu, ma faaleaga ai loʻu igoa paia.”

E ui sa faapea e lē tupu, ae na liliu ese nisi tagata Isaraelu mai le tapuaʻiga moni, ma faia lenei faiga faatemoni o le avatu o latou fanau i atua sesē. Na taʻua e le Salamo 106:35-38 lenei mea: “A ua latou nofo fefiloi ma nuu ese, ona aʻoaʻoina ai lea o i latou i a latou amioga. Ua latou auauna foʻi i o latou tupua; ua fai foʻi ia mea ma mailei iā i latou. Ua latou fai foʻi o latou atalii ma o latou afafine ma taulaga i temoni; ma latou sasaa le toto o ē lē sala, o toto o latou atalii ma o latou afafine, ē na latou fai ma taulaga i tupua o Kanana; ona leaga ai lea o le laueleele i le toto.”

Na faaali atu e Ieova lona matuā inosia o lea tulaga, ma fetalai atu e ala i lana perofeta o Ieremia e faatatau i atalii o Iuta: “Ua tuuina e i latou a latou mea e inosia i le fale ua taʻua ai loʻu igoa, ina ia latou faaleagaina ai. Ua faia foʻi e i latou mea maualuluga i Tofeta, ua i le vanu o le atalii o Hinoma, e susunu ai o latou atalii ma o  latou afafine i le afi; o le mea ou te leʻi poloaʻi atu ai, ou te leʻi manatu foʻi i ai.”—Ieremia 7:30, 31.

Na lē toe maua e tagata Isaraelu le finagalo malie o Ieova ona o le auai i ia faiga matagā. Na faatamaʻia lona aai o Ierusalema ma ave faatagataotaua ona tagata i Papelonia. (Ieremia 7:32-34) E manino mai ai la, e lē mai le Atua ma e lē o se vaega o le tapuaʻiga mamā taulaga e faia i tagata ola. E faatemoni so o se ituaiga o taulaga e faia i tagata, ma e teena e tagata tapuaʻi moni o le Atua so o se mea e fesootaʻi atu i ia faiga.

Le Taulaga Togiola a Iesu Keriso

O nisi atonu e fesili, ‘Aiseā na manaʻomia ai ni taulaga o manu i le tulafono a Ieova na avatu i tagata Isaraelu?’ Na manatunatu Paulo i lea lava fesili ma ua ia faapea mai: “O lenei, se ā le aogā o le tulafono? Na faaopoopo mai lea ona o solitulafono, ina seʻia maliu mai le fanau na folafola i ai, . . . O lenei, ua fai mo tatou taʻitaʻitama le tulafono, na te taʻitaʻiina i tatou iā Keriso.” (Kalatia 3:19-24) O taulaga o manu na faia i le tulafono a Mose na faaatagia mai ai le taulaga sili na saunia e Ieova le Atua mo tagata, o lona Alo lea o Iesu Keriso. Na taʻua e Iesu lea gaoioiga alofa ina ua ia fetalai: “Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.”—Ioane 3:16.

O le alofa o Iesu i le Atua ma tagata, na ia finagalo malie ai e ofoina atu lona soifua lelei atoatoa o se taulaga togiola mo le fanau a Atamu. (Roma 5:12, 15) Na fetalai Iesu: “E pei o le Atalii o le tagata e leʻi sau ia ina ia auauna mai tagata iā te ia, a ia auauna atu ia, ma foaʻiina atu lona ola e fai ma togiola e sui aʻi tagata e toʻatele.” (Mataio 20:28) E lē mafaia lava e se isi tagata ona faasaʻoloto tagata mai le agasala ma le oti, lea na oo iā i latou ona o Atamu. (Salamo 49:7, 8) Na faamatala e Paulo, o Iesu na ‘ulu faatasi lava o ia i totonu o le mea paia, e lē ma le toto o ʻoti ma tamaʻi povi, a o lona lava toto, ua na maua le togiola faavavau mo i tatou.’ (Eperu 9:12) O le taliaina e le Atua o le toto faataulaga o Iesu, na ia ‘sōloia ai le tusi o la tatou aitalafu na nofosala ai i tatou.’ Na saunia e Ieova le feagaiga o le Tulafono, ma mea e manaʻomia mo taulaga lea e maua ai le “ola faavauvau, o le mea foaʻifuaina.”—Kolose 2:14; Roma 6:23.

Taulaga Faaleagaga

Talu ai ua lē o toe manaʻomia ona faia ni taulaga i manu ma isi mea e ofoina atu iā Ieova i le tapuaʻiga moni, po o manaʻomia pea la so o se taulaga mai iā i tatou i aso nei? Ioe. Na soifua Iesu i se soifuaga na ia faamuamua ai le auaunaga i le Atua i taimi uma, ma iʻu ina tuuina atu ia lava e maliu mo tagata. Na ia fetalai: “Ai se tasi e fia mulimuli mai iā te aʻu, ia faafiti o ia iā te ia, ma ave lona satauro, i le mulimuli mai iā te aʻu.” (Mataio 16:24) O lona uiga o so o se tasi e fia mulimuli iā Iesu, e tatau ona ia tuua nisi mea. O ā ia mea?

O se tasi o ia mea, e lē o toe ola mo ia sē e mulimuli moni iā Keriso ae ola ina ia faia  le finagalo o le Atua. O ona manaʻoga ma ona faanaunauga e lona lua i le faia o le finagalo o le Atua. Mātau le auala na faaupu ai e Paulo: “Le ʻau uso e, ou te ʻaiʻoi atu iā te outou, ona o le alofa mutimutivale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia. Aua foʻi tou te amio faatasi ma lenei lalolagi, a e peitaʻi ia liliuina i le toe fuataʻiina o outou loto, ina ia outou suʻesuʻe pe se ā le finagalo o le Atua, o mea ua lelei, ma le mālie, ma le atoatoa.”—Roma 12:1, 2.

Na faapea atili mai le Tusi Paia, o a tatou viiga ua avea ma taulaga iā Ieova. Na faaaogā e le perofeta o Hosea le faaupuga, “taulaga o matou laugutu” e faailoa mai ai, e manatu le Atua o se tasi o taulaga sili, o taulaga o o tatou laugutu. (Hosea 14:2) Na timaʻi atu Paulo i Kerisiano i Eperu: “O ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.” (Eperu 13:15) I aso nei, o loo talaʻia pea e Molimau a Ieova le tala lelei ma le faia o soo i nuu uma lava. (Mataio 24:14; 28:19, 20) O loo latou avatu le taulaga o viiga i le Atua i le ao ma le pō i le lalolagi atoa.—Faaaliga 7:15.

O le talaʻiga faatasi ai ma le agalelei i isi, o nisi ia o taulaga e fiafia i ai le Atua. Na faapea mai Paulo: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.” (Eperu13:16) E manaʻomia ona amio lelei ē o loo avatuina le taulaga o viiga, pe a fia mananaʻo e fiafia mai le Atua. Na apoapoaʻi mai Paulo: “Tau ina ia tusa la outou amio ma le tala lelei iā Keriso.”—Filipi 1:27; Isaia 52:11.

E pei o tausaga ua mavae, o taulaga uma na faia e lagolago ai le tapuaʻiga moni, e iʻu i le olioli tele ma faamanuiaga mai iā Ieova. O lea ia tatou faia mea sili e avatu ai taulaga e fiafia i ai le Atua!

[Ata i le itulau 18]

ʻO o latou atalii ma o latou afafine, na latou fai ma taulaga i tupua o Kanana’

[Ata i le itulau 20]

O loo avatu e Kerisiano moni taulaga e fiafia i ai le Atua, e ala i le talaʻi atu o le tala lelei ma fesoasoani atu i isi vala