Fautuaga e Aogā!

O LE tele o fautuaga e maua mai i tusi i aso nei, e taulaʻi atu i fesoasoani mo tagata o loo tele faafitauli i o latou olaga. Ae ese mai le Tusi Paia. E ui e aogā iā i latou o loo iai faafitauli, ae e tele atu nisi aogā o le Tusi Paia. E fesoasoani le Tusi Paia i tagata e ʻalofia le faia o mea sesē lea e mafai ona faapogaia ai faafitauli sa lē tatau ona iai.

E mafai e le Tusi Paia ona “avatu . . . le faautauta i ē faigofie; o le poto ma le mafaufau i le tauleʻaleʻa.” (Faataoto 1:4) A tatou faatatauina fautuaga a le Tusi Paia, o le a “faafeao le mafaufau iā te oe; e leoleo iā te oe le faautauta; ina ia laveaʻi iā te oe ai le ala leaga.” (Faataoto 2:11, 12) Seʻi tagaʻi i ni vala patino o loo maua i le Tusi Paia, lea e mafai ona puipuia ai o tatou soifua mālōlōina, faamalosia ai le liʻo o le aiga ma faaleleia ai lau galue o se tagata faigaluega po o se pule o se galuega.

Ia Faautauta i le Faaaogāina o le ʻAva Malosi

E lē faasā i le Tusi Paia le faaaogā tatau o le ʻava malosi. Na taʻua e Paulo le aogā tau togafitiga o le uaina i lana fautuaga i le talavou o Timoteo: “Ia e inu sina uaina itiiti, ona o lou manava ma lou maʻi e tupu soo.” (1 Timoteo 5:23) O loo faasino atu nisi fuaitau o le Tusi Paia i le vaaiga a le Atua i le uaina e lē na o se togafitiga faafomaʻi e aogā ai. O loo faamatalaina le uaina e “faafiafia ai loto o tagata.” (Salamo 104:15) Peitaʻi, o loo lapataʻi mai le Tusi Paia i le avea o i tatou ma ē ‘faapologaina i le uaina.’ (Tito 2:3) Ua faapea mai: “Aua neʻi fai oe ma so latou o ē inu tele i uaina; ma ē ua aai tetele i manu; auā o lē inu tele ma ʻai tele e faamativaina o ia.” (Faataoto 23:20, 21) O ā ni āuga e oo i ai pe a lē amanaʻia nei fautuaga? Seʻi mātau lipoti mai nisi o atunuu.

O se lipoti mai le Faalapotopotoga o le Soifua Mālōlōina i le Lalolagi lea ua faaigoaina o le Global Status Report on Alcohol 2004 ua faapea mai: “O faafitauli e pogai mai i le ʻava malosi ua faaaluina ai e tagata Aialani se tupe pe ā ma le €2.4 piliona [$3 piliona, Amerika] i le tausaga.” Na taʻua i le lipoti e faapea, e aofia ai i lenei tupe tele o le tau mo le “tausia o le soifua mālōlōina (€279 miliona [$350 miliona Amerika]), tau o faalavelave  i ala tetele (€315 miliona [$380 miliona Amerika]), tau o soligatulafono ona o le ʻava malosi (€100 miliona [$126 miliona Amerika]), ma tupe ua lē maua mai i galuega ona o le lē faigaluega e māfua mai le ʻava malosi (€1034 miliona [$1300 miliona Amerika]).”

E sili atu puapuaga ua oo i olaga o tagata, na i lo tupe faaalu i le faaaogā sesē o le ʻava malosi. O se faaaʻoaʻoga i le na o le 12 masina i Ausetalia, e silia ma le ʻafa miliona tagata ua pagatia i le faaoolima i ai o tagata o loo aafia i le ʻava malosi. I Falani, o le faaaogā sesē o le ʻava malosi ua faapogaia ai le 30 pasene o sauāga i aiga. E ui i le tele o nei faafitauli, ae faamata e aogā le fautuaga a le Tusi Paia e faatatau i le ʻava malosi iā te oe?

ʻAlofia Masaniga e Faaleagaina ai le Tino

I le 1942, a o avea le ulaula ma āʻega, na fesoasoani Le Olomatamata i lana ʻaufaitau ina latou iloa o le tagofia o le tapaa e solia ai taʻiala o le Tusi Paia ma e tatau ona ʻalofia. Na faapea mai se faamatalaga a se mataupu na lomia i lenā tausaga, o i latou uma e mananaʻo e faafiafia le Atua e tatau ona mulimuli i le faatonuga a le Tusi Paia ia “faamamā iā te i [latou] i mea uma e leaga ai le tino atoa ma le agaga.” (2 Korinito 7:1) I le pe tusa ma le 65 tausaga mulimuli ane, pe leʻi talafeagai ea la lenei fautuaga a le Tusi Paia?

I le 2006 na faapea mai ai le Faalapotopotoga o le Soifua Mālōlōina i le Lalolagi, o le tapaa o le māfuaaga “lona lua lea e tele ina maliliu ai tagata i le lalolagi.” I tausaga taʻitasi pe ā ma le lima miliona tagata e maliliu ona o le tagofia o le tapaa. I le faatusa atu i le HIV/AIDS lea e tolu miliona tagata e maliliu ai i tausaga taʻitasi. I le senituri lona 20, pe tusa ma le 100 miliona tagata na maliliu ona o le ulaula, ua toeitiiti tutusa ma le aofaʻiga o i latou na maliliu i taua o lenā senituri. Ioe, ua talia e le toʻatele o tagata le atamai o le ʻalofia o le tapaa.

‘Sola Ese i le Faitaaga’

E toʻatele tagata e lē taliaina faamatalaga a le Tusi Paia e faatatau i feusuaʻiga. E tuufaafeagai le mea e talitonu ai le toʻatele o tagata ma le Tusi Paia, lea e lē taʻusalaina faanaunauga uma i feusuaʻiga. Ae e tele fautuaga aogā o loo aumaia i le auala e gaoioi ai e tusa ma faanaunauga tau feusuaʻiga. O loo aʻoaʻoina e le Tusi Paia o feusuaʻiga ua na o tagata ua uma ona faaipoipoina e tatau i ai. (Kenese 2:24; Mataio 19:4-6; Eperu 13:4) O feusuaʻiga o se tasi lea o auala e faaalia ma maua ai le alofa ma le faapelepele i totonu o le faaipoipoga. (1 Korinito 7:1-5) O fanau e maua mai i ulugalii faaipoipo e faamanuiaina i le iai o ni mātua e alofa le isi i le isi.—Kolose 3:18-21.

E tusa ai ma le feusuaʻi solo, ua faapea mai le Tusi Paia: “Sosola ese ia outou i le faitaaga.”  (1 Korinito 6:18) O le ā se māfuaaga mo lenei mea? Ua faapea atili mai le mau: “Ua auuliuligia le tino i nisi agasala uma e faia e tagata; a o le faitaaga, e agasala ia i lona lava tino.” O ā ni iʻuga pe a lē usitaia fautuaga a le Tusi Paia e faatatau i feusuaʻiga?

Seʻi mātau le mea o loo tupu i Amerika. Ua avea nei Amerika ma atunuu e aupito i toʻatele talavou ua maʻitaga pe ā ma le 850,000 i tausaga taʻitasi. O le tele o pepe e leʻi faapaʻūina, e fananau mai i tinā e leʻi faaipoipo. E mautinoa e toʻatele ni tinā talavou e taumafai e tausia aʻe a latou fanau i le alofa ma aʻoaʻiga lelei, ma taulau manuia ai nisi. Peitaʻi, o le mea moni o tama tama e fananau mai i tinā talavou, e ono iʻu atu i le falepuipui, a o fanau teine e ono fai foʻi ni a latou pepe a o talavou lava e iʻu lava ina avea foʻi i latou ma tinā talavou. Ina ua uma ona tilofaʻia e Robert Lerman o ia o se tagata suʻesuʻe ia faamaumauga mo le faitau sefulu o tausaga ua mavae ona ia faapea mai lea: “O le faatupulaʻia o aiga e toʻatasi le matua, o le pogai lea i le tele o faafitauli i le lautele, e pei o le tiaʻi aʻoga ma iʻu ai ina lē toe aʻoʻoga, faaaogāina o le ʻava malosi ma fualaau faasāina, maʻitaga ma le tausia o fanau a o talavou ma soligatulafono a le fanau.”

O i latou e feusuaʻi solo e tele ni lamatiaga i o latou tino ma mafaufau. Mo se faataʻitaʻiga, ua lipotia mai e le tusi o le Pediatrics faapea: “O talavou ua avea ma masaniga le faia o feusuaʻiga e faigofie ona maua i le loto mafatia, ma mananaʻo e pule i o latou ola.” E tusa ai ma isi lamatiaga i le soifua mālōlōina, ua faapea mai le Faalapotopotoga o le Soifua Mālōlōina i Amerika: “E silia ma le ʻafa o tagata Amerika o le a aafia i faamaʻi pipisi mai feusuaʻiga i se taimi o latou olaga.” Seʻi tomānatu i faafitauli ma le tulaga pagatia sa mafai ona ʻalofia pe ana usitaia fautuaga a le Tusi Paia e faatatau i feusuaʻiga!

Ia Faamalosia le Sootaga o le Aiga

E tele atu nisi vala e aafia i le Tusi Paia na i lo le lapataʻi mai i masaniga leaga. Mātau fautuaga aogā i le auala e faaleleia ai tulaga o o tatou aiga.

Ua faapea mai le Tusi Paia: “O loo faapea ona tatau ona alolofa o tane i a latou lava avā, faapei o latou lava tino.” (Efeso 5:28) Na i lo le lē amanaʻia e tane o a latou avā, a ua pulunaunauina tane e nonofo ma i latou ma le “poto, ia faautauta i le tino vaivai o le fafine.” (1 Peteru 3:7) Pe afai e tulaʻi mai ni feeseeseaʻiga, o loo fautuaina tane: “Ia outou alolofa atu i a outou avā, aua foʻi neʻi faaonoono iā te i latou.” (Kolose 3:19) Pe e te lē ioe faapea, a mulimuli le tane i nei fautuaga o le a ia mauaina le faaaloalo ma le alofa mai lana avā?

O loo fautua mai le Tusi Paia i avā: “O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foʻi o le ulu ia o le ekalesia . . . O le fafine foʻi ia āva o ia i lana tane.” (Efeso 5:22, 23, 33) Pe e te lē ioe faapea a mulimuli le avā i nei fautuaga pe a talanoa atu—pe faatatau foʻi—i lana tane atonu o le a matuā alofagia o ia e lana tane?

E tusa ai ma le aʻoaʻoina o le fanau, ua fautuaina e le Tusi Paia outou mātua e talanoa ma a outou fanau “pe a ē nofo i lou fale, pe a ē savali foʻi i le ala, pe a ē taoto, pe a ē tulaʻi foʻi.” (Teuteronome 6:7) Ma o loo patino foʻi i tamā ina ia aʻoaʻoina le fanau i se auala alofa. “O outou tamā foʻi, aua neʻi tou faaonoono atu i a outou fanau, a ia tausi atu i ai i aʻoaʻiga ma apoapoaʻiga a le Alii,” ua apoapoaʻi mai ai le Tusi Paia. (Efeso 6:4) I le isi itu, o loo faatonuina le fanau: ‘Ia faalogo i mātua’ ma ia “āva i lou tamā ma lou tinā.” *—Efeso 6:1, 2.

O le ā sou lagona, faamata e manuia aiga pe a faatatauina nei fautuaga? Atonu e te tali mai ioe, ae faamata e aogā pe a faatinoina nei fautuaga? E matou te valaaulia outou e asiasi ane i se Maota mo Sauniga a Molimau a Ieova e lata ane. O le a e feiloaʻi ai i aiga o loo taumafai e faatatauina fautuaga a le Tusi Paia. Talanoa iā i  latou. Mātau le auala e talatalanoa ai le tasi i le isi. O le a e vaai tino lava i faamaoniga o aiga fiafia ona o le ola e tusa ai ma taʻiala a le Tusi Paia!

Se Tagata Galue Malosi ma se Pule Faamaoni

O le ā o loo faamatala e le Tusi Paia e faatatau i le taumafai e tumau i se galuega? O se tagata faigaluega e talenia i lana galuega atonu e amanaʻia ma tauia o ia. Na fesili le tupu o Solomona: “Ua e iloa le tagata ua faataalise i ana galuega? e tū o ia i luma o tupu, a e lē tū i luma o tagatānuu.” (Faataoto 22:29) I le isi itu, o le “tagata paiē” e faatigā e pei o le ‘asu i mata’ o lona pule. (Faataoto 10:26) E faalaeiauina e le Tusi Paia tagata faigaluega e tōʻaaga ma faamaoni i galuega. “O lē gaoi aua neʻi toe gaoi, a e lelei ina faamalosi o ia i galuega a ona lima i mea aogā.” (Efeso 4:28) E aogā foʻi lenei fautuaga e tusa lava pe lē o iai le pule. “Ia outou faalogo i mea uma i o outou matai i la le tino, aua neʻi faatagā auauna, faapei o ē faafiafia i tagata, a ia faia ma le loto faamaoni, o loo matataʻu i le Atua.” (Kolose 3:22) Pe lē faatāuaina ea e le pule se tagata faigaluega e faatatauina lenei fautuaga?

Mo pule o galuega, e lelei ona utagia le fautuaga a le Tusi Paia: “E tatau ona avatu i lē faigaluega o lona taui.” (1 Timoteo 5:18) Na tuuina e le Atua le tulafono i tagata Isaraelu o loo faafaigaluegaina isi tagata, ina ia vave ona avatu o latou totogi ma ia talafeagai. Na tusi Mose: “Aua e te faasauā i lē lua te tuaoi, pe fāoa ana mea; aua neʻi tuu pea iā te oe seʻia taeao o le taui o lē ua faia lau galuega.” (Levitiko 19:13) Pe e te lē fia faigaluega mo se tagata e mulimuli i taʻiala a le Tusi Paia ma vave ona avatu lou totogi ma ia talafeagai le auala e taui ai lou tautigā?

O se Poto e Sili Atu

Pe e te lē maofa i le autausagā o le Tusi Paia ae o loo aogā lava ona taʻiala i aso nei? O le māfuaaga ua autausagā ai le aogā o le Tusi Paia na i lo isi tusi ona o “le upu a le Atua” ae lē o upu a tagata.—1 Tesalonia 2:13.

E matou te faalaeiauina oe e faaalu se taimi e faamasani lelei ai i le Afioga a le Atua. Afai e te faia faapea, o le a amata ona e māfana i le tusitala o le Tusi Paia, o Ieova le Atua. A e faatatauina ana taʻiala o le a e iloa ai lana puipuiga ma fesoasoani i le faaleleia o lou olaga. A e faia faapea o le a e “faalatalata atu i le Atua, ona faalatalata mai lea o ia iā te [oe].” (Iakopo 4:8) E leai ma se isi tusi e mafai ona fesoasoani iā te oe e pei o le Tusi Paia.

[Faamatalaga pito i lalo]

[Ata i le itulau 4]

Pe e te lagolagoina le aogā o fautuaga a le Tusi Paia e faatatau i le ʻava malosi?

[Ata i le itulau 5]

Pe e te ioe i le fautuaga a le Tusi Paia e ʻalofia le faaaogāina o le tapaa?

[Ata i le itulau 7]

O le mulimuli i taʻiala a le Tusi Paia e faaleleia atili ai aiga

[Faamatalaga i Ata i le itulau 5]

Kelope: E mai le ata a le NASA