Fesili Mai le ʻAufaitau

E faapefea ona tatou malamalama i upu a Paulo, e ao i se fafine ua oti lana tane ona iai i se tulaga e faapea sa “toʻatasi foʻi lana tane” ina ia mafai ai ona maua le fesoasoani mai le faapotopotoga Kerisiano?—1 Timoteo 5:9.

Talu ai sa talanoa Paulo e uiga i se fafine ua oti lana tane, o le faaupuga la e “toʻatasi foʻi lana tane,” e manino mai e faasino atu i le tulaga o le fafine sa iai a o leʻi maliu lana tane. Po o uiga atu lenei faaupuga faapea, e tatau i le fafine ua oti lana tane ona tasi le taimi e faaipoipo ai? Pe atonu e ese le uiga o upu a Paulo? *

Na manatu nisi sa talanoa Paulo e uiga i fafine ua maliliu a latou tane ma e na o le faatasi lava ona faaipoipo. I le tele o aganuu ma atunuu, e manatu i se fafine ua oti lana tane ae o loo nofo fua pea o sē e amio lelei. Peitaʻi, e lē ōgatusa lenā manatu ma upu a Paulo i isi ana tusi. O se faaaʻoaʻoga, na ia faamanino i Kerisiano i Korinito, e ui o lona manatu o le a sili atu ona fiafia se fafine ua oti lana tane pe a nofo fua pea, ae “ua saʻoloto o ia e faaipoipo ma lē ua loto i ai, tau lava i lē ua i le Alii.” (1 Korinito 7:39, 40; Roma 7:2, 3) I le tusi foʻi a Paulo iā Timoteo, na ia faapea atu: “Ou te loto ia nofotane o fafine muli ua oti a latou tane.” (1 Timoteo 5:14) O lea la, e leai se mea e ono lapelapea ai se fafine ua oti lana tane pe a filifili e toe faaipoipo.

E faapefea la ona tatou malamalama i upu a Paulo iā Timoteo? E na o le faatasi lava ona aliaʻe le faaupuga, e “toʻatasi foʻi lana tane” ma o loo i lenei fuaiupu. I le uluaʻi gagana Eleni, e faauiga atu i le “avā e toʻatasi le tane.” O le itu e mataʻina ai, e taitutusa lenei faaupuga i le faaupuga lea sa faaaogā e Paulo i le tele o taimi i ana tusitusiga e faapea, “o lē faiavā i le fafine e toʻatasi,” po o le “tane a le avā e toʻatasi” i le uluaʻi gagana. (1 Timoteo 3:2, 12; Tito 1:6) Na faaaogā e Paulo le faaupuga “o lē faiavā i le fafine e toʻatasi,” ina ua lisiina agavaa mo ovasia Kerisiano ma auauna o le faiva. I lenā mataupu atoa, o loo patino le uiga atu i le agavaa o se tane mo tiute tauave i le faapotopotoga Kerisiano, pe afai ua faaipoipo, e ao ona faamaoni i lana avā ma ia lē mataʻuleagaina i tulaga tau amio. * Pe afai o le tulaga lenā, o le faaupuga la i le 1 Timoteo 5:9, o le a faauaʻi atu foʻi i le manatu lava lea e tasi: Ina ia mafai e se fafine ua oti lana tane ona maua le fesoasoani mai le faapotopotoga, e ao ona avea o se avā sa alofa ma faamaoni i lana tane a o soifua pea, ma ia lē mataʻuleagaina i lona tulaga tau amio. Ina ia maua fesoasoani mai le faapotopotoga e pei ona taʻua e Paulo i le fuaiupu o loo sosoo ai, o loo faasino uma atu i le na o le ituaiga fafine faapena ua oti lana tane.—1 Timoteo 5:10.

[Faamatalaga pito i lalo]