Ia Faamaoni iā Keriso ma Lana Auauna

‘O le a tofia o ia e lona alii e pule i ana mea uma.’—MATAIO 24:45-47.

1, 2. (a) O ai o loo taʻua e le Tusi Paia faapea o lo tatou Taʻitaʻi lenā? (e) O le ā e faaalia ai o Keriso moni lava o loo taʻitaʻia le faapotopotoga?

“E LĒ tatau ona outou faataga tagata e taʻua outou o ‘taʻitaʻi’—auā e toʻatasi lo outou taʻitaʻi, o Keriso lea!” (Mataio 23:10, The New Testament in Modern English) Ua manino mai i nei fetalaiga a Iesu i ona soo, e leai se tagata i le lalolagi lenei e tatau ona avea ma o latou taʻitaʻi. E toʻatasi lo latou Taʻitaʻi o loo i le lagi, o Iesu Keriso lea. O Ieova na tofiaina Iesu i lenei tulaga. O Ieova na “toe faatūina mai o ia nai ē ua oti, ma . . . tuuina atu o ia e fai ma ulu o mea uma lava mo le ekalesia, o lona tino lea.”—Efeso 1:20-23.

² Ona o Keriso o le “ulu o mea uma” i le faapotopotoga Kerisiano, o lona uiga o ia e pule i mea uma lava o loo faatinoina i totonu o le faapotopotoga. Na te silafia mai mea uma o loo tutupu i le faapotopotoga. E naunau o ia e fia iloa po o ola Kerisiano, po o faapotopotoga taʻitasi, e ōgatusa ma taʻiala faa-Kerisiano, ma iai se faiā malosi ma le Atua. Ua manino mai lenā mea i le faaaliga na tuuina i le aposetolo o Ioane, i le iʻuga o le uluaʻi senituri T.A. E faalima ona taʻu atu e Iesu i ekalesia e fitu, o loo ia silafia a latou galuega, itu o loo lelei ai, faapea ma o latou vaivaiga. Ona ia tuuina atu lea o ni fautuaga ma faalaeiauga i na tulaga. (Faaaliga 2:2, 9, 13, 19; 3:1, 8, 15) E tatou te mautinoa, sa malamalama lelei Keriso i le tulaga faaleagaga o ekalesia i Asia Itiiti, i Palesitina, Suria, Papelonia, Eleni, Italia, ma isi uma vaipanoa. (Galuega 1:8) Ae faapefea i aso nei?

 Se Auauna Faamaoni

3. Aiseā ua talafeagai ai le faatusa o Keriso i se ulu, a o lana faapotopotoga i se tino?

³ Ina ua mavae lona toe tū a o toeitiiti oo i le taimi na toe afio aʻe ai i le lagi i lona Tamā, na fetalai atu ai Iesu i ona soo: “Ua tuuina mai iā te aʻu le pule uma lava i le lagi ma le lalolagi.” Na ia fetalai foʻi: “Faauta foʻi, ou te iā te outou i aso uma lava, e oo lava i le gataaga o le lalolagi.” (Mataio 28:18-20) O le a iai pea o ia ma i latou e avea ma o latou Ulu. Ina ua tusi atu Paulo i Kerisiano i Efeso ma Kolose, sa ia faatusa ai le faapotopotoga Kerisiano i se “tino,” o loo avea ai Keriso ma Ulu. (Efeso 1:22, 23; Kolose 1:18) E taʻua e le The Cambridge Bible for Schools and Colleges, o lenei faatusatusaga “ua aumaia ai se manatu, e lē gata ina tāua le autasi o le Ulu ma isi vaega uma o le tino, ae o le Ulu foʻi, na te faatonutonua gaoioiga a vaega uma o le tino. O nei vaega, o Ana meafaigaluega.” O ai ua faaaogā e Keriso e avea ma ana meafaigaluega talu mai ona tuu atu iā te ia le pule o le Malo i le 1914?—Tanielu 7:13, 14.

4. E pei ona valoia e le valoaga a Malaki, o le ā na maua mai e Ieova ma Keriso Iesu ina ua la asiasia le malumalu faaleagaga?

⁴ Na taʻu mai e le valoaga a Malaki e faapea, o le a afio mai Ieova “le Alii [moni],” faatasi ma lana ‘Agelu o le feagaiga,’ o lona Alo o Keriso Iesu, o lē ua avea ma tupu, ina ia faamasino ma asiasia Lona “malumalu,” po o le fale faafaatusa mo le tapuaʻiga. “O ona pō” na tuupōina e amata ai le “faamasinoga i le aiga o le Atua” e foliga na taunuu i le 1918. * (Malaki 3:1; 1 Peteru 4:17) Na matuā iloiloina lelei i latou na faapea mai o loo fai ma sui o le Atua ma lana tapuaʻiga i le lalolagi. Sa teena lotu na faapea mai o Kerisiano, ae ua tele tausaga o latou aʻoaʻoina talitonuga e faalumaina ai le Atua, ma faia sa latou vaega i fasiotiga tagata faataugā i le Taua Muamua a le Lalolagi. Na tofotofoina se vaega totoe faamaoni o Kerisiano na faauuina e le agaga. Sa faamamāina e pei na faamamā i le afi, sa faamaonia, ma avea ai i latou iā Ieova e pei o se “taulaga e fai i le amiotonu.”—Malaki 3:3.

5. I le ōgatusa ma le valoaga a Iesu e faatatau i lona “faatasi” mai, o ai na faamaonia le avea ma “auauna” faamaoni?

⁵ Ina ia ōgatusa ai ma le valoaga a Malaki, o le faailoga e tele ona vala lea sa taʻu e Iesu i ona soo e iloa ai le taimi o lona “maliu [pe faatasi] mai, ma le gataaga o le lalolagi” sa aofia ai ma le vala e mātaulia ai se “auauna” o loo faia aʻe i se vaega o ni tagata. Na fetalai Iesu: “O ai foʻi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu iā te outou, e tofia o ia e pule i ana mea uma.” (Mataio 24:3, 45-47) Ina ua “sau” Keriso e asiasia le “auauna” i le 1918, na ia maua mai ai se vaega totoe o soo faamaoni ua faauuina e le agaga, ma e talu mai le 1879, o loo latou faaaogāina pea lenei lomiga ma isi lomiga faale-Tusi Paia, e saunia ai ‘meaʻai faaleagaga i ona itu aso.’ O inā na talia ai i latou e Iesu e fai ma ana meafaigaluega po o lana “auauna,” ma i le 1919 na tofia ai loa i latou e pulea ana mea i le lalolagi.

Puleaina o Mea a Keriso i le Lalolagi

6, 7. (a) O ā isi taʻu na faaaogā e Iesu e faasino atu i lana “auauna” faamaoni? (e) O le ā ua faaalia mai e le faaaogāina e Iesu o le faaupuga o le “auauna e pule”?

⁶ I nai masina a o leʻi taʻua e Iesu lana valoaga i le faailoga o lona faatasi mai, e aofia ai ma le iai o se “auauna” e fai mona sui i le lalolagi, sa fai sina ese o le taʻu na faaaogā e Iesu e taʻua ai lenei “auauna,” e faaalia ai le tiute o le a faatino e le auauna. Na fetalai Iesu: “O ai foʻi le auauna e pule, ua faamaoni ma le mafaufau, ua tofia e lona alii e pule i ana auauna, ia avatu mea e ʻai iā te i latou i ona itu aso? E moni, ou te fai atu iā te outou, na te tofia o ia e pule i ana mea uma.”—Luka 12:42, 44.

 ⁷ O loo taʻua le auauna i inei, o le auauna e pule. O se faaupuga e faaliliu mai le upu Eleni e faasino atu i “se tasi o loo ia pulea se ʻauaiga po o ni meatotino.” O le vasega la o le auauna, ua lē na o ni tagata atamamai o loo faamalamalama maia manatu tāua o i le Tusi Paia. E lē gata ina latou saunia mai taumafa lelei faaleagaga “i ona itu aso” talafeagai, ae o le a tofia foʻi “le auauna e pule, ua faamaoni,” e vaavaaia isi auauna uma a Keriso, ma pulea ekalesia po o faapotopotoga uma a Keriso o i le lalolagi, i nisi faaupuga, o “ana mea uma.” O ā nei mea uma a Keriso?

8, 9. O ā “mea” ua tofia le auauna na te pulea?

⁸ O tiutefai a le auauna e aofia ai le vaavaaia o mea faaletino o loo faaaogā e soo o Keriso e faatino ai a latou gaoioiga faa-Kerisiano. E pei o ofisaulu ma ofisa o lālā, faapea o latou nofoaga o le tapuaʻiga, e pei o Maota mo Sauniga ma Maota mo Fonotaga i le lalolagi aoao. Ae e sili atu foʻi ona tāua le auala o loo vaavaaia ai e lenei auauna, polokalame mo le atiina aʻe faaleagaga, e pei o le suʻesuʻeina o le Tusi Paia i sauniga i vaiaso taʻitasi, ma fonotaga ma tauaofiaga i nisi o taimi o le tausaga. O faatasiga nei o loo aumaia ai faamatalaga i le faataunuuga o valoaga o le Tusi Paia, aemaise foʻi faatonuga talafeagai i le auala e faatatauina ai taʻiala a le Tusi Paia i le olaga i aso taʻitasi.

⁹ O tiute foʻi a le auauna e pule, e aofia ai le vaavaaia o le galuega sili ona tāua, o le talaʻia o “lenei tala lelei o le malo” ma “fai nuu uma lava ma soo.” O lona uiga e aofia ai le aʻoaʻo atu o tagata ina ia latou usitaia mea uma o loo poloaʻi mai ai Keriso, o le Ulu o le faapotopotoga, ina ia faia a o faagasolo lenei taimi o le iʻuga. (Mataio 24:14; 28:19, 20; Faaaliga 12:17) Ua avea le galuega o le talaʻi ma aʻoaʻo atu, ua maua mai ai “se motu o tagata e toʻatele” o uō faamaoni a le vaega totoe faauuina. O nei “mea ua manaʻomia e nuu uma” e mautinoa le aofia ai i “mea” a Keriso lea o loo vaavaaia ma tausia e le auauna faamaoni.—Faaaliga 7:9; Hakai 2:7.

Le Vaega Pule ua Fai ma Sui o le Auauna

10. O le ā le vaega na faia faaiʻuga sa iai i le uluaʻi senituri, ma o le ā le iʻuga na oo ai i faapotopotoga?

¹⁰ Ona o le tele o tiute tauave o le auauna faamaoni, e mautinoa ai le tele o ni filifiliga latou te faia. I le faapotopotoga a uluaʻi Kerisiano, sa galulue aposetolo ma toeaina na iai i Ierusalema e avea ma sui o le vasega a le auauna, i le faia o faaiʻuga mo le faapotopotoga atoa o Kerisiano. (Galuega 15:1, 2) Sa faaoo atu faaiʻuga a lenei vaega pule o le uluaʻi senituri i faapotopotoga, e ala i tusi ma ni sui femalagaaʻi. Sa fiafia uluaʻi Kerisiano ona o lo latou maua o lenei taʻitaʻiga manino, ma na avea lo latou naunau e felagolagomaʻi ma le vaega pule, ma pogai o le faateleina o le filemu ma le autasi.—Galuega 15:22-31; 16:4, 5; Filipi 2:2.

11. O ai o loo faaaogā e Keriso i aso nei e faatonutonuina lana faapotopotoga, ma e tatau faapefea ona tatou manatu i nei Kerisiano faauuina?

 ¹¹ Ua faapena foʻi i aso nei, ona iai se vaega toʻaitiiti o ovasia ua faauuina i le agaga, o loo faia aʻe ai le Vaega Pule o soo o Keriso i le lalolagi. E ala i lona “aao taumatau” po o le faatinoga o lana pule, ua faatonutonu ai e Keriso, o le Ulu o le faapotopotoga, nei tane faamaoni a o latou vaavaaia le galuega o le Malo. (Faaaliga 1:16, 20) O Albert Schroeder, o se tasi o sui ua leva o le Vaega Pule, e leʻi mamao tele atu talu ona māeʻa lana faiva i le lalolagi. Ina ua faamatala le talaaga o lona soifuaga, na ia tusi ai e faapea: “E fono le Vaega Pule i Aso Lulu uma, e tatalaina le fono i le tatalo ma ōle atu mo le taʻitaʻiga a le agaga o Ieova. E matuā faia ni taumafaiga sili ina ia iloa ai, ua taulimaina mea uma ma faia uma filifiliga ina ia talafeagai ma le Afioga a le Atua, le Tusi Paia.” * E tatou te maufaatuatuaina nei Kerisiano faamaoni ua faauuina. Ua tatau ona tatou utagia le poloaʻiga a Paulo, aemaise lava i le faasino atu i nei auauna, e faapea: “Ia outou usiusitai i o outou taʻitaʻi ma outou gauaʻi i ai; auā o loo leoleo i latou mo o outou agaga.”—Eperu 13:17.

Ia Faaaloalo i le Auauna Faamaoni

12, 13. O ā ni māfuaaga faale-Tusi Paia e tatau ai ona faaaloalo i le vasega o le auauna?

¹² O le māfuaaga autū ua tatau ai le faaaloalo mo le vasega o le auauna faamaoni, auā o le faia faapea ua tatou faaaloalo ai i le Matai, o Iesu Keriso. Na tusi mai Paulo e uiga i le ʻaufaauuina: ‘O lē ua valaauina ina o saʻoloto, o le pologa ia o Keriso. Ua faatauina outou i le tau.’ (1 Korinito 7:22, 23; Efeso 6:6) O lea, o lo tatou gauaʻi i le auauna faamaoni ma lana Vaega Pule, o lo tatou gauaʻi foʻi lenā iā Keriso, le Matai o le auauna. O lo tatou faaaloalo i ē ua faaaogā e Keriso e pulea pe tausia ana mea i le lalolagi, o se isi lea auala tatou te ‘taʻutaʻu atu ai, o Iesu Keriso, o le Alii lava ia, ua iʻu ina viia ai le Atua le Tamā.’—Filipi 2:11.

¹³ O le isi māfuaaga faale-Tusi Paia e tatau ai ona faaaloalo i le auauna faamaoni, ona o Kerisiano faauuina o loo i le lalolagi, o loo taʻua faafaatusa i latou o se “malumalu” o loo afio ai Ieova e ala i lona “agaga.” Ma o lea ua “paia” ai i latou. (1 Korinito 3:16, 17; Efeso 2:19-22) O le vasega lenei ua taʻua o le malumalu paia, lea ua faamatuu mai i ai e Iesu le tausiga o ana mea o i le lalolagi. O lona uiga, ua iai i lenei vasega le pule aʻiaʻi i nisi o aiā ma matafaioi i totonu o le faapotopotoga Kerisiano. O le pogai lenā e tatau ai i tagata uma o le faapotopotoga, ona manatu o so latou tofiga paia le usiusitai ma lagolagosua i taʻitaʻiga o loo aumaia e le auauna faamaoni ma lana Vaega Pule. O le mea moni, e manatu “isi mamoe” o se faaeaga moni le fesoasoani atu i le vasega o le auauna, i le tausia o manaʻoga o le Matai.—Ioane 10:16.

Ia Lagolagosua Faamaoni iā i Latou

14. E pei ona valoia mai e Isaia, ua faapefea ona mulimuli atu isi mamoe i le vasega o le auauna faauuina, ma auauna o ni tagata galulue e lē totogia?

¹⁴ O le gauaʻi atu o isi mamoe i sui faauuina o le Isaraelu faaleagaga, sa muaʻi valoia mai e le valoaga a Isaia: “O loo faapea ona fetalai mai o Ieova, O le ʻoa [po o tagata e galulue e lē totogia] o Aikupito, ma mea faatau a Aitiope atoa ma Sepa, o tagata tino eese, latou te ō ane iā te oe, e fai foʻi i latou mou tagata; latou te mulimuli atu iā te oe, latou te ō ane ma maea uʻamea, latou te ifo atu iā te oe, ma latou ōle atu iā te oe, e faapea, Ua na o oe ua i ai le Atua, a e leai se tasi, ua leai se tasi Atua.” (Isaia 45:14) E faafaatusa le mulimuli atu o isi mamoe i le vasega o le auauna faauuina ma lana Vaega Pule, i se uiga faapea, o loo usiusitai pe gauaʻi atu i la latou taʻitaʻiga. Ua faapei isi mamoe o ni ʻoa po o ni tagata galulue e lē totogia, i le lotomalilie e faaalu lo latou malosi ma a latou alagaʻoa e lagolagoina ai le galuega talaʻi i le lalolagi aoao, lea ua tofia mai e Keriso  i ona soo faauuina o loo i le lalolagi.—Galuega 1:8; Faaaliga 12:17.

15. Ua faapefea ona valoia mai e le Isaia 61:5, 6 le faiā o loo iai i le va o isi mamoe ma le Isaraelu faaleagaga?

¹⁵ O loo naunau isi mamoe e auauna atu iā Ieova i lalo o le taʻitaʻiga a le vasega o le auauna ma lana Vaega Pule. Latou te amanaʻia le ʻaufaauuina o sui o ‘le Isaraelu a le Atua.’ (Kalatia 6:16) A o avea i latou i se uiga faafaatusa, o ni “tagata ese” ma ni “tagata o nuu ese” o loo auaumea faatasi ma le Isaraelu faaleagaga. Ua latou fiafia e galulue o ni ē “galuefanua” ma “galuevine,” i lalo o le faatonutonuga a le ʻaufaauuina lea ua avea ma “faitaulaga a Ieova” ma o ‘auauna a le Atua.’ (Isaia 61:5, 6) O loo latou maelega i le talaʻia o lenei tala lelei o le Malo, ma faia tagata o nuu uma ma soo. Latou te fesoasoani atu i le vasega o le auauna i le leoleoina ma le tausia o ē fou ua pei ni mamoe.

16. O le ā se uunaʻiga ua lagolago faamaoni atu ai isi mamoe, i le vasega o le auauna faamaoni ma le mafaufau?

¹⁶ Ua iloa e isi mamoe le matuā aogā iā i latou o taumafaiga filigā a le auauna faamaoni, i le saunia mai pea o taumafa talafeagai faaleagaga mo i latou. Ua latou matuā ioeina, pe ana lē seanoa le auauna faamaoni ma le mafaufau, semanū e itiiti pe leai foʻi so latou malamalama i upu moni tautele a le Tusi Paia, e pei o le pule silisili ese a Ieova, le faapaiaina o lona suafa, le Malo, le lagi fou ma le lalolagi fou, le tulaga o ē ua maliliu, ma le faailoaga manino mai o Ieova, lona Alo, ma le agaga paia. I le agaga talisapaia ma le alofa faamaoni, ua lagolagosua ai isi mamoe i “uso” faauuina o Keriso o loo i le lalolagi i lenei taimi o le iʻuga.—Mataio 25:40.

17. O le ā na iloa e le Vaega Pule ua tatau ona fai, ma o le ā le fesili o le a talanoaina i le mataupu o sosoo mai?

¹⁷ E lē o toe toʻatele le vasega faauuina o soifua pea, ma ua lē mafai ai ona auai i latou i faapotopotoga uma ina ia faamautinoa le pulea ma le tausia o mea a Keriso. O lea, ua tofia ai e le Vaega Pule ni tane mai le vasega o isi mamoe, ina ia latou vaaia ofisa o lālā, o itumalo, o matagaluega, ma faapotopotoga o Molimau a Ieova. Po o iai se aafiaga o o tatou uiga faaalia i nei leoleo mamoe lagolago, e tusa ai o lo tatou faamaoni iā Keriso ma lana auauna faamaoni? O le a talanoaina i le mataupu o loo sosoo mai lenā fesili.

[Faamatalaga pito i lalo]

O se Autaluga

• O ai lo tatou Taʻitaʻi ma o le ā e faaalia ai o loo ia silafia mai mea o loo tutupu i totonu o faapotopotoga?

• Ina ua asiasia le “malumalu,” o ai na maua mai o loo galue o se auauna faamaoni, ma o ā mea na tuuina mai latou te tausia?

• O ā ni māfuaaga faale-Tusi Paia mo le lagolagoina o le auauna faamaoni?

[Fesili mo le Suʻesuʻega]

[Ata i le itulau 23]

O “mea” o loo vaavaaia e le “auauna ua pule” e aofia ai meatotino, polokalame faaleagaga, ma le galuega talaʻi

[Ata i le itulau 25]

E lagolago e sui o isi mamoe le auauna faamaoni e ala i lo latou maelega i le galuega talaʻi