Ia Gauaʻi ma le Loto Maulalo i Leoleo Mamoe Alolofa

“Ia outou usiusitai i o outou taʻitaʻi ma outou gauaʻi i ai.”—EPERU 13:17.

1, 2. O ā mau ua faaalia ai, o Ieova ma Iesu o ni Leoleo mamoe alolofa?

O IEOVA le Atua ma lona Alo, o Iesu Keriso, o i laʻua o ni Leoleo mamoe alolofa. Na valoia mai e Isaia e faapea: “Faauta, e afio mai le Alii o Ieova ma le malosi, e pule lona aao mo ia; . . . Na te leoleoina lona lafu e pei o le leoleo mamoe; na te sapaia tamaʻi mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.”—Isaia 40:10, 11.

² Na uluaʻi faataunuu lenā valoaga o le toe faafoʻisiaga, ina ua toe taliu se vaega totoe o sa Iutā i lo latou nuu moni i le 537 T.L.M. (2 Nofoaiga a Tupu 36:22, 23) Ona toe faataunuu lea i le 1919, ina ua laveaʻia mai “Papelonia le aai tele” le vaega totoe faauuina, e le Kuresa Sili, o Iesu Keriso. (Faaaliga 18:2; Isaia 44:28) Ua avea o ia ma “aao” o Ieova e tauaao atu ai lana pule, e aoaoina ai mamoe ma leoleoina i latou ma le alofa. Na fetalai Iesu lava ia: “O aʻu nei o le leoleo mamoe lelei; ua ou iloa aʻu mamoe, ua iloa foʻi aʻu e aʻu mamoe.”—Ioane 10:14.

3. Ua faapefea ona faaalia e Ieova lona manatu mamafa i le auala o loo tausia ai ana mamoe?

³ O loo faatāua mai i le valoaga a le Isaia 40:10, 11 le uiga alofa o loo leoleoina ai e Ieova ona tagata. (Salamo 23:1-6) O lagona foʻi na sa faaalia e Iesu mo ona soo ma le lautele o tagata, a o faatino lana faiva i le lalolagi. (Mataio 11:28-30; Mareko 6:34) Sa ʻinoʻino ma teena e Ieova ma Iesu, uiga lē alolofa o leoleo mamoe, po o taʻitaʻi sa iai i Isaraelu, o ē na leai se māsiasi e tuulafoaʻi ma faileagaina a latou lafu mamoe. (Esekielu 34:2-10; Mataio 23:3, 4, 15) Na folafola mai e Ieova: “Ou te faaolaina . . . laʻu lafu, e lē toe fai lava i latou ma mea e saeia; ou te faamasino foʻi i lea manu ma lea manu. Ou te faatūina foʻi le leoleo mamoe e tasi iā te i latou, na te fāgaina i latou, o laʻu auauna o Tavita; o ia na te fāgaina i latou, e fai foʻi o ia ma leoleo mamoe iā te i latou.” (Esekielu 34:22, 23) I lenei taimi o le iʻuga, o Iesu Keriso, le Tavita Sili, o ia lea o le “leoleo mamoe e toʻatasi” ua tofia e Ieova e leoleoina Ana auauna uma o i lalolagi, o Kerisiano faauuina ma “isi mamoe.”—Ioane 10:16.

 O Meaalofa a Ieova mo le Faapotopotoga

4, 5. (a) O le ā le meaalofa tautele na foaʻi mai e Ieova i ona tagata o i le lalolagi? (e) O le ā le meaalofa ua foaʻi mai e Iesu i lana faapotopotoga?

⁴ O le faasilisilia o le “leoleo mamoe e toʻatasi” o Iesu Keriso i Ana auauna o i le lalolagi, ua foaʻi mai ai e Ieova se meaalofa tautele i le faapotopotoga Kerisiano. O lenei meaalofa, o le Taʻitaʻi mai le lagi, sa valoia mai i le Isaia 55:4: “Faauta, ua ou avatua o ia e fai ma molimau i le nuu, o le taʻimua ma le pule i le nuu.” Ua aoaoina mai Kerisiano faauuina, ma le “motu o tagata e toʻatele” mai atunuu uma, o ituaiga, o lanu, ma gagana eseese. (Faaaliga 5:9, 10; 7:9) Ua faia aʻe ai se faapotopotoga faava-o-malo, o le ‘lafu mamoe e tasi,’ i lalo o le taʻitaʻiga a le “leoleo mamoe e toʻatasi,” o Keriso Iesu.

⁵ Ua foaʻi mai foʻi e Iesu se meaalofa tautele i lana faapotopotoga o i le lalolagi. Ua ia saunia mai leoleo mamoe lagolago, ma o loo faataʻitaʻi atu i latou nei iā Ieova ma Iesu, i le auala alofa o loo latou leoleoina ai ma tausia le lafu mamoe. Na taʻua e Paulo lenei meaalofa i lana tusi atu i Kerisiano i Efeso, e faapea: “Na afio aʻe o ia i luga, ma na taʻitaʻi faatagataotaua i le tafeaga; ua na foaʻiina foʻi mea alofa i tagata. O ana mea alofa foʻi, ia fai nisi ma aposetolo, o isi foʻi e fai ma perofeta, o isi foʻi e folafola le tala lelei, o isi foʻi e fai ma leoleo atoa ma aʻoaʻo; ina ia faaatoatoaina ai le ʻau paia, latou te fai ai le galuega a auauna, ia atiina aʻe ai le tino o Keriso.”—Efeso 4:8, 11, 12.

6. Na faamatalaina faapefea i le Faaaliga 1:16, 20, ovasia faauuina o loo auauna o ni toeaina, ma o le ā se faamatalaga e tusa ai o toeaina tofia o loo i le vasega o isi mamoe?

⁶ O nei “mea alofa i tagata” o ovasia, po o toeaina, ua tofia mai e Ieova ma lona Alo, e ala i le agaga paia, ina ia latou leoleoina ma le alofa le lafu mamoe. (Galuega 20:28, 29) Ina ua faatoʻā amata lenei faatulagaga, sa avea uma nei ovasia o ni tane Kerisiano faauuina. I le Faaaliga 1:16, 20, o i latou sa auauna o ni toeaina i le faapotopotoga sa taʻua faafaatusa o ni “fetu” po o “agelu” i le aao taumatau o Keriso, o lona uiga, o loo i lalo o lana taʻitaʻiga. Ae peitaʻi, i lenei taimi o le iʻuga, o loo faaauau pea ona faaitiitia le aofaʻi o ovasia faauuina o loo totoe i le lalolagi, ae o le vaega toʻatele o toeaina Kerisiano o loo iai i faapotopotoga, e mai le vasega o isi mamoe. Ma o i latou nei, ua tofia e nisi ua fai ma sui o le Vaega Pule, e ala i le taʻitaʻiga a le agaga paia. Ona o lea māfuaaga, ua mafai ai foʻi ona faapea atu, o loo iai i latou i lalo o le aao taumatau (pe o loo i lalo o le taʻitaʻiga) a le Leoleo mamoe Lelei, o Iesu Keriso. (Isaia 61:5, 6) Talu ai o loo gauaʻi atu toeaina o loo i a tatou faapotopotoga iā Keriso, o le Ulu o le faapotopotoga, ua tatau ai la ona tatou lagolagosua atoatoa atu iā i latou.—Kolose 1:18.

 Ia Usiusitai ma Gauaʻi i Ai

7. O le ā le fautuaga na aumai e le aposetolo o Paulo e tusa ai o o tatou uiga e faaalia i ovasia Kerisiano?

⁷ E finagalo o tatou Leoleo mamoe o i le lagi, o Ieova le Atua, ma Iesu Keriso, ina ia tatou usiusitai ma gauaʻi atu i leoleo mamoe lagolago, ua la tofia e faatinoina matafaioi i totonu o le faapotopotoga. (1 Peteru 5:5) Na tusi e le aposetolo o Paulo upu faagaeeina nei: “Ia outou manatua o outou taʻitaʻi, o ē ua folafola atu le afioga a le Atua ia te outou; ia outou faaaʻoaʻo i lo latou faatuatua, ma ia mafaufau i le iʻuga o a latou amio. Ia outou usiusitai i o outou taʻitaʻi ma outou gauaʻi i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tigā; auā e lē aogā lea iā te outou.”—Eperu 13:7, 17.

8. O le ā ua valaaulia i tatou e Paulo ina ia “mafaufau” i ai, ma e faapefea ona tatou “usiusitai”?

⁸ Ua valaaulia i latou e Paulo, ina ia “mafaufau,” pe mātau ma le faaeteete iʻuga o amio faamaoni a toeaina, ma faataʻitaʻi i na faaaʻoaʻoga lelei o le faatuatua. E lē gata i lea, ua ia fautua mai ina ia tatou usiusitai ma gauaʻi i taʻitaʻiga a nei uso tofia. O loo faamatala mai e se tagata faitofā o le Tusi Paia, o R. T. France e faapea, o le upu sa faaaogā i le uluaʻi gagana Eleni, lea e faaliliuina i le “usiusitai,” e lē “o le upu masani mo le usiusitai, ae o le upu o lona uluaʻi uiga e faapea, ‘ua faatalitonuina,’ o loo iai se uiga o le loto malie e talia la latou taʻitaʻiga.” E tatou te usiusitai i toeaina e lē ona ua faatonuina i tatou i le Afioga a le Atua ina ia faia faapea, ae ona ua faatalitonuina i tatou ia iloa, o loo mananaʻo toeaina e faia mea silisili mo le Malo, ma mea silisili mo i tatou. E mautinoa la, o le a tatou matuā fiafia pe tatou te lotomalilie e talia la latou taʻitaʻiga.

9. E lē gata ina usiusitai, ae aiseā e talafeagai ai foʻi ona tatou “gauaʻi”?

⁹ Ae faapefea pe afai e iai se mea ua tatou manatu, atonu e lē o faatino ai e toeaina la latou taʻitaʻiga i le auala e sili ona lelei? O inā la e faaalia ai le gauaʻi. E faigofie ona usiusitai pe a manino uma mea ma e tatou te ioe i ai. Ae o le a iloa lo tatou gauaʻi moni, pe afai tatou te lolo atu, e tusa lava pe tatou te lē o matuā manino atoatoa i le taʻiala ua aumai. O le ituaiga o gauaʻi lenā sa faaalia e Peteru, lea na mulimuli ane avea ma aposetolo.—Luka 5:4, 5.

E Fā Māfuaaga mo le Loto Malie e Lagolagosua

10, 11. O le ā le auala na folafola mai ai e ovasia le afioga a le Atua i o latou uso Kerisiano i le uluaʻi senituri, ma i aso nei?

¹⁰ I le Eperu 13:7, 17 lea na muaʻi sii mai, o loo aumai ai e Paulo ni māfuaaga se fā, e tatau ai ona tatou usiusitai ma gauaʻi i ovasia Kerisiano. Muamua lava, o i latou nei o loo ‘folafola maia le afioga a le Atua’ iā i tatou. Ia manatua, na foaʻi mai e Iesu i le faapotopotoga “mea alofa i tagata” ina ia “faaatoatoaina ai le ʻau paia.” (Efeso 4:11, 12) Sa ia faaatoatoa pe toe faasaʻosaʻo manatu ma amioga a Kerisiano i le uluaʻi senituri, a ala mai i leoleo mamoe lagolago faamaoni, o nisi o i latou sa faagaeeina e tusi atu ni tusi i faapotopotoga. Sa ia faaaogā na ovasia ua tofia e le agaga, ina ia taʻitaʻi ma ati aʻe faaleagaga uluaʻi Kerisiano.—1 Korinito 16:15-18; 2 Timoteo 2:2; Tito 1:5.

¹¹ O loo taʻitaʻia i tatou e Iesu i aso nei e ala mai i le “auauna faamaoni ma le mafaufau,” lea o loo fai ai ma sui lana Vaega Pule ma toeaina tofia. (Mataio 24:45) O lo tatou faaaloalo mo “le Leoleo mamoe silisili,” o Iesu Keriso, ua tatou utagia ai le fautuaga a Paulo: “Ia outou iloa ē o galulue iā te outou, ma pule iā te outou i la le Alii, ma latou apoapoaʻi atu iā te outou.”—1 Peteru 5:4; 1 Tesalonia 5:12; 1 Timoteo 5:17.

12. Ua faapefea i ovasia ona “leoleo i latou mo o [tatou] agaga”?

¹² O le māfuaaga lona lua, ona o ovasia Kerisiano, o loo “leoleo i latou mo o [tatou] agaga.” Pe afai latou te tau mātauina i o tatou uiga po o amioga sina mea e ono lamatia ai lo tatou tulaga faaleagaga, e vave ona latou aumai iā i tatou le fautuaga talafeagai, ina ia  toe faaatoatoaina i tatou. (Kalatia 6:1) O le upu Eleni lea ua faaliliu i ai le upu “leoleo” o lona uiga moni, sa faasino atu i le “lē moe.” Fai mai se tasi tagata faitofā o le Tusi Paia, “o loo faaalia ai se uiga e mataala i taimi uma o le leoleo mamoe.” E lē gata ina tumau lo latou mataala faaleagaga i taimi uma, ae e ono lē momoe foʻi toeaina i le pō, ona e mamafa i o latou mafaufau lo tatou lelei faaleagaga. Ua matuā tatau ai ona tatou lotomalilie e lagolagosua i na leoleo mamoe lagolago alolofa, o loo latou faia le mea silisili ina ia faataʻitaʻi atu i le tausiga alofa ua aumaia e Iesu Keriso, “le Leoleo mamoe sili.”—Eperu 13:20.

13. Iā te ai ma i ā auala, e faamasinoina ai ovasia ma Kerisiano uma lava?

¹³ O le māfuaaga lona tolu, auā o loo latou leoleoina pea i tatou ma “latou te tala atu le tala.” E manatua e ovasia o i latou o leoleo mamoe lagolago, o loo auauna i lalo o le taʻitaʻiga a Leoleo mamoe o i le lagi, o Ieova le Atua ma Iesu Keriso. (Esekielu 34:22-24) O Ieova e Ana mamoe, sa ia faatauina i le toto o lona lava Alo, ma e tali atu iā te Ia ovasia ua ia tofia, i le auala o loo latou tausia ai Ana mamoe, lea e tatau ona tausia ma le faapelepele. (Galuega 20:28, 29) O lona uiga la, e faamasinoina i tatou uma lava e Ieova, i le auala o loo tatou tali atu ai i lana taʻitaʻiga. (Roma 14:10-12) O lo tatou usiusitai i toeaina tofia o se faamaoniga foʻi lea o lo tatou gauaʻi iā Keriso le Ulu o le faapotopotoga.—Kolose 2:19.

14. Aiseā e ono auauna atu ai ovasia Kerisiano “ma le tigā,” faatasi ai ma ā iʻuga?

¹⁴ Ua taʻua e Paulo le māfuaaga lona fā e tatau ai ona tatou gauaʻi ma le loto maulalo i ovasia Kerisiano. Na ia tusi: “Ina ia faia ma le olioli, a e aua ma le tigā; auā e lē aogā lea iā te outou.” (Eperu 13:17) E mamafa le avega a nai toeaina Kerisiano. E aofia ai le aʻoaʻo atu, le leoleoina o le lafu, le taʻimua i le galuega talaʻi, le tausia o o latou aiga, ma le taulimaina o faafitauli i totonu o le faapotopotoga. (2 Korinito 11:28, 29) Afai tatou te lē lagolagosua iā i latou, o le a atili ai ona mamafa la latou avega. Ona iʻu ai lea i lo latou “tigā.” Pe a tatou lē faaalia se uiga lagolagosua, e lē fiafia le finagalo o Ieova iā i tatou, ma e lē aogā lea iā i tatou. Peitaʻi, pe a tatou faaalia le faaaloalo talafeagai ma le lagolagosua, o le a olioli foʻi toeaina e  faatino o latou tiute, ma atili ai ona autasi ma auai ma le fiafia i le galuega talaʻi o le Malo.—Roma 15:5, 6.

Ia Faaalia lo Tatou Gauaʻi

15. E faapefea ona faaalia lo tatou usiusitai ma le gauaʻi?

¹⁵ E tele auala aogā tatou te lagolagosua ai i ovasia. Ina ia fetuutuunaʻi atu i ni tulaga fou ua iai i le oganuu, po ua fai e toeaina faatulagaga mo faatasiga mo le auaunaga i le fanua, i aso ma taimi e manaʻomia ai ni suiga i a tatou faasologa? Seʻi o tatou taumafai e lagolago atu i na faatulagaga fou. Tatou te ono maua ai ni faamanuiaga sa leʻi faatalitalia. Po o asiasi mai le ovasia o le auaunaga i la tatou Vaega o Suʻesuʻega Tautusi a le Faapotopotoga? Seʻi fai so tatou sao tele i le galuega talaʻi i lenā vaiaso. Po ua tatou maua se tofiga i le Aʻoga o le Faiva Faatiokarate? Ia faamautinoa e tatou te auai atu ma faataunuu lo tatou tofiga. Po ua faasilasila mai e le ovasia o la tatou suʻesuʻega tautusi, o lea ua oo mai le taimi e faamamā ai e la tatou vaega le Maota mo Sauniga? Seʻi o tatou lagolagosua atu iā te ia, pe afai o talafeagai ma lo tatou soifua mālōlōina. O auala uma nei ma le tele o isi auala, e faaali atu ai lo tatou gauaʻi i tane ua tofia mai e Ieova ma lona Alo e tausia le lafu mamoe.

16. Pe afai e lē faia e se toeaina mea i le auala ua faatonu mai, aiseā o le a lē avea ai lenā ma faamolemolega o ni o tatou uiga fouvale?

¹⁶ I nisi taimi, e ono lē faia ai e se toeaina mea i le auala ua faatonu mai e le vasega o le auauna faamaoni ma lana Vaega Pule. Afai e faaauau ona ia faia faapea, o le a tali atu lava o ia iā Ieova, o “Lē na te leoleoina ma tausia o [tatou] agaga.” (1 Peteru 2:25) Ae po o ā lava ni lape po o ni masei i nisi o toeaina, o le a lē avea lenā ma faamolemolega tatou te faaalia ai ni uiga tetee pe lē usiusitai ai iā i latou. E lē faamanuia mai Ieova i se tasi e iai uiga lē usiusitai ma fouvale.—Numera 12:1, 2, 9-11.

E Faamanuia Mai Ieova pe a Loto Malie e Lagolagosua

17. O le ā le uiga e tatau ona tatou faaalia i o tatou ovasia?

¹⁷ O loo silafia lava e Ieova le Atua, e lē lelei atoatoa tane ua ia tofia e avea ma ovasia. Ae peitaʻi o loo ia faaaogā pea i latou, ma e ala mai i lona agaga, o loo ia leoleoina ai ona tagata o iai i le lalolagi. Ua moni lenei manatu i toeaina, faapea foʻi i tatou uma, ua iai “i le Atua le matuā tele o le mana, a e lē mai iā te i [tatou].” (2 Korinito 4:7) Ua tatau ai ona tatou faafetaia Ieova ona o mea ua ia faataunuu e ala mai i o tatou ovasia faamaoni, ma ua tatau ona tatou lotomalilie e avatu le lagolagosua iā i latou.

18. O le ā moni lava ua tatou faia, pe a tatou gauaʻi i o tatou ovasia?

¹⁸ E taumafai malosi ovasia ina ia latou ola e tusa ma mea o loo faatalitalia mai e Ieova mo leoleo mamoe ua ia tofia e leoleoina lana lafu mamoe i aso e gata ai, e pei ona taʻua i le Ieremia 3:15 e faapea: “Ou te avatu foʻi iā te outou leoleo mamoe e tatau ma loʻu loto, latou te fafaga iā te outou i le poto ma le faautauta.” Ua tatau ona avatu le faamālō i toeaina mo le galuega matagofie o loo latou faia i le aʻoaʻoina ma le puipuia o mamoe a Ieova. O lea, seʻi o tatou talisapaia a latou galuega fitā, e ala i lo tatou lotomalilie e lagolagosua, e usiusitai, ma gauaʻi atu iā i latou. O le faia faapea, o le a faaalia ai lo tatou talisapaia o o tatou Leoleo mamoe o i le lagi, o Ieova le Atua ma Iesu Keriso.

O se Autaluga

• Ua faapefea ona faaalia mai e Ieova ma Iesu o i laʻua o ni Leoleo mamoe alolofa?

• E lē gata i le usiusitai, ae aiseā e manaʻomia ai foʻi le gauaʻi?

• O ā auala aogā e faaalia ai lo tatou gauaʻi?

[Fesili mo le Suʻesuʻega]

[Ata i le itulau 27]

E gauaʻi toeaina Kerisiano i le taʻitaʻiga a Keriso

[Ata i le itulau 29]

E tele auala e faaalia ai lo tatou gauaʻi i leoleo mamoe ua tofia mai e Ieova