Le Saʻiliga mo Tali Saʻo

E faapefea ona ou puipuia loʻu ola mālōlōina?

O le ā saʻu mea e fai ina ia maua ai le fiafia e loʻu aiga?

E faapefea ona ou faaleleia oʻu tomai mo le faatumauina o se galuega?

PO UA e fesiligia se tasi o na fesili? Pe na e mauaina ni tali e sili ona aogā? I tausaga taʻitasi, pe ā ma le 2,000 tusi eseese e lomia e aumai ai fautuaga mo nei mataupu ma isi foʻi mataupu aogā. I Peretania lava ia, e faaalu e tagata faitautusi le pe ā ma le 80 miliona pauni (pe ā ma le $150 miliona Amerika) i le tausaga, e faatau ai tusi o loo iai fautuaga i le auala e faafoe ai faafitauli o le olaga. I le Iunaite Setete, na oo atu le aofaʻi o le tupe na faaalu i le faatauina mai o tusi e saʻili i ai le tagata lava ia mo ni fautuaga o faafitauli, i le pe ā ma le $600 miliona i le tausaga. O lona uiga, e lē na o oe o loo saʻilia ni fautuaga aogā i le auala e feagai ai ma faafitauli masani o le olaga.

E tusa ai ma fautuaga mai le anoanoaʻi o nei tusitusiga, na taʻua e se tusitala: “O le tele o tusi fou nei, ua na ona toe taʻua ai o faamatalaga na tusia muamua foʻi.” E mautinoa o le tele o fautuaga o loo i nei tusi ua toe taʻua ai le poto lea e faamauina i se tasi o tusi ua sili ona leva i le lalolagi. E mautinoa lava o lenei tusi o se tusi ua sili ona tele lona faasalalauina i le lalolagi. Ua mafai ona faaliliuina le tusi atoa pe i ni vaega i gagana pe ā ma le 2,400. Pe a tuufaatasi, e silia i le 4.6 piliona kopi ua uma ona lomia i le lalolagi aoao. Ioe, e leai se isi tusi e sili atu na i lo le Tusi Paia.

Ua taʻua manino e le Tusi Paia: “O tusi paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu.” (2 Timoteo 3:16) Ae ui i lea, e leʻi tusia le Tusi Paia e tau ina avea ma tusi e te faitau i ai, ona pule lea o oe i le faatatauga. O lona fuafuaga autū, ia faailoa mai ai le finagalo o le Atua i tagata. O loo tele foʻi fautuaga aogā i le Tusi Paia i auala e faafoe ai faafitauli masani o le olaga o loo tatou fesagaʻia, ma ua folafola mai ai o le a manuia olaga o i latou e mulimuli i taʻitaʻiga a le Tusi Paia. (Isaia 48:17, 18) E tusa lava po o le ā le lanu o le tagata, le aganuu, po o lona tulaga tau aʻoaʻoga, ae a faatatauina fautuaga a le Tusi Paia, e mautinoa o le a aogā iā te ia. Aiseā e te lē iloilo ai le mataupu o loo mulimuli mai, ma e suʻesuʻe ane lava oe ia pe faamata o aogā i aso nei fautuaga a le Tusi Paia e faatatau i mataupu e pei o le soifua mālōlōina, aiga, faapea ma galuega?