Faiga Sauā i Aso Nei

E 64 tausaga o María ma sa nofo toʻatasi o ia. Ae na maua atu o ia i lona fale ua maliu, na sasa ma nonoa lona ua i se uaea.

Na sasa faamoʻamoʻa e ni tagata ni leoleo se toʻatolu na tuuaʻia e faapea ua latou ave faamalosia ni talavou se toʻalua. Na latou sasaa penisini i luga o leoleo e toʻalua ma tutu i ai le afi, ma iʻu ina maliliu ai i le aasa o le afi. Ae na mafai ona sola ese le isi leoleo.

Na vili mai se tagata, lea na taʻitaʻia ai i se mea na faateʻia ai. Na maua i se togālaau ni tōega o tino o ni tamāloloa se toʻafā, na asiasi atu mo ni faiga mālōlōga i lenā aai. Sa tafusi o latou mata ma saisai o latou lima. Na faia ni o latou taotoga e suʻesuʻe ai le māfuaaga o le maliliu, ma faaalia ai na tanu ola lava nei tamāloloa.

O nei faiga sauā faamanu, e lē o ni vaaiga mai ni ata tifaga. Peitaʻi, o nei lipoti uma o ni tala moni o mea na tutupu, lea sa faaulutala ai nusipepa e leʻi leva talu ai nei i se tasi o atunuu i le itu i saute o Amerika. Peitaʻi, e lē na o le pau lenā o le atunuu o loo tutupu ai na mea mataʻutia.

Ua tutupu faiga sauā i aso uma. O le pomuina o ni nofoaga, osofaʻiga a tagata faatupu faalavelave, fasioti tagata, fasi tagata, taugā fana, ma le tosoteine, ua na o sina numera itiiti na mai le tele o isi faiga sauā o loo tutupu i aso nei. O le tele foʻi o taimi, e faaalia ai i tala fou lipoti o faiga sili ona leaga, ma o le toʻatele lava o tagata ua lē o toe faateʻia pe a vāai pe faalogo i na amioga sauā.

Atonu e te tau mānatu: ‘O le ā ua tupu i le lalolagi i aso nei? Po ua matuā leai lava se manatu mamafa o tagata i faalogona o isi, ma se faaaloalo i le ola?’ Aiseā ua tatou ola ai i se lalolagi faapenei?

Seʻi manatu iā Harry, o se tamāloa ua 69 ona tausaga, e maua i le kanesa. O lana avā e maʻi i le multiple sclerosis, o se maʻi e aafia ai vaega o loo puleaina neula o le tino, peitaʻi na ō atu o lā tuaoi ma uō e fesoasoani iā i laʻua. Fai mai Harry: “Ou te lē iloa po o le ā le mea o le a mafai ona ma fai pe a aunoa ma nei tagata uma o loo fesoasoani mai. I Kanata i le mea o loo ia nofo ai nei, ua faaalia ai i se lipoti e faapea, e silia i le 50 pasene o tagata o loo fesoasoani i le tausia o tagata matutua, o loo fesoasoani i se tasi e latou te lē aiga. E mautinoa e te iloa foʻi tagata i le lautele o ē masani ona agalelei ma alolofa i tuaoi. Ioe, e mafai ona avea tagata ma ē alolofa ma agalelei na i lo o le avea ma ē faasauā.

Afai o le tulaga moni lenā o loo iai, ae aiseā ua taatele ai faiga leaga? Aiseā ua fai ai e tagata faiga sauā? Pe mafai ona suia tagata o loo faasauā i isi tagata? Po o le a iai ea se iʻuga o faiga sauā? Afai e iai se iʻuga, e faapefea ona iai ma o afea e oo mai ai?

[Faamatalaga i Ata i le itulau 3]

Nofoaafi: CORDON PRESS