Lē Atoatoa le Malosi—Ae Naunau e Galue
Lē Atoatoa le Malosi—Ae Naunau e Galue
PE AFAI faatoʻā e fetaui iā Leonardo, atonu e te manatu e lē galue i faugāfale. Ua mumutu uma ona tapulima e lua i se faalavelave i lana galuega. E ui e lē atoatoa lona malosi, ae sa galue mamafa Leonardo i le fauina o le Maota mo Sauniga i Acajutla i El Salvador, e pei ona e tagaʻi atu ai i le ata.
Ina ia mafai ona galue Leonardo i le faugāfale, na ia fausia ni ana lava meafaigaluega. E na te tuu lona atelima taumatau i totonu o se uʻamea lapotopoto ua faapipii i le pito i tua o le suō, ma asu ai palapala i totonu o le uilipaelo. Na te faapipii i ʻau o le uilipaelo ni liʻo lapotopoto se lua, ina ia mafai ai ona tulei le uilipaelo. O le ā se mea na uunaʻia ai o ia e auai i le faugāfale?
Na manaʻo Leonardo e fai sona sao i le fauina o le Maota mo Sauniga, po o le nofoaga o tapuaʻiga mo le faapotopotoga o Molimau a Ieova. E tele ni māfuaaga e lē mafai ai ona ia auai i le galuega. Sa iai lana galuega totogi tumau, e lē atoatoa lona malosi, ma sa avea foʻi o se auauna o le faiva i lana faapotopotoga. Peitaʻi, na ia manaʻo e fai le mea na te mafai e auauna ai i le Atua i le fauina o le Maota mo Sauniga.
Po o iā te oe lea lava faanaunauga e auauna i le Atua? Na i lo le avea o le lē atoatoa o le malosi o Leonardo e fai ma faamolemolega, na ia faaaogā lona tomai faalemafaufau e fausia ai ana meafaigaluega, ina ia mafai ai ona faia le galuega lea semanū e lē mafai ona ia faatino. Na ia auauna i le Atua ma lona “manatu atoa.” (Mataio 22:37) E tusa pe lē atoatoa le malosi pe atoatoa foʻi, ae o loo iai pea le agaga tauofo iā i latou o loo galulue i le fauina o Maota mo Sauniga a Molimau a Ieova i le lalolagi aoao. E tatala le avanoa mo so o se tasi i a latou sauniga, ma e talia ma le fiafia oe e auai ai.