Moomooga o Adryana

O ADRYANA o se teineitiiti e ono tausaga sa nofo i Tulsa i Oklahoma i le Iunaite Setete o Amerika, ma sa iai sona moomooga. Sa talitutusa lelei ma le faisalamo o Tavita o lē na pese e faapea: “E tasi le mea ua ou ole atu ai iā Ieova, o le mea lava lea ou te saʻili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou saʻili i lona malumalu.”—Salamo 27:4.

Ina ua faatoʻā ono masina le matua o Adryana, sa maua o ia i le maʻi e taʻua o le neuroblastoma, o se tuma e vave lona sosolo i neula o le tino. O le mataʻutia o āuga o lenei maʻi, na iʻu ai ina pepē uma ona vae. E tele ni togafitiga faafomaʻi sa togafitia ai e fomaʻi lona tulaga, atoa ai ma se isi togafitiga e taʻua o le chemotherapy na faia mo se tausaga.

Na faafesootaʻi e le tamā o Adryana, lea e lē tutusa o latou talitonuga faalotu ma Adryana ma lona tinā, se faalapotopotoga ma talosaga atu e ave lona afafine e asiasi i se paka mataʻina e lauiloa i le lalolagi. A o leʻi taliaina le talosaga, na faatalanoa muamua e le faalapotopotoga ia Adryana. Sa ia faaalia lona talisapaia mo le amanaʻia o lona tulaga, ae na ia taʻu atu iā i latou e sili atu iā te ia le asiasi i le Peteli, le nofoaga autū o galuega a Molimau a Ieova i le lalolagi aoao i Niu Ioka. Ina ua iloa e Adryana le talosaga a lona tamā, sa ia tatalo iā Ieova e aumai se avanoa mo ia e asiasi ai i le Peteli. E ui sa manatu le faalapotopotoga i le taimi muamua e faapea, o le asiasi atu i se nofoaga faalelotu e pei o le Peteli e lē maua ai se fiafia o tamaiti e pei o Adryana, ae na latou taliaina lava lona moomooga ina ua lē teena e lona tamā lana filifiliga.

Na faimalaga faatasi Adryana ma lona tinā, o lona uso, ma lana uō teine i Niu Ioka e asiasi i le Peteli mo le taimi muamua. Na faapea mai Adryana: “Na tali mai Ieova iā te aʻu. Na ou iloa o le a ia faia se avanoa mo i matou i le Peteli. Ua ou vaai i le auala e fai ai tusi, mekasini, ma Tusi Paia. E sili mamao atu lenā i se paka mataʻina.”

Sa mafai e Adryana ona ‘iloa atu le matagofie o Ieova,’ ma vaai ma le loto faafetai i le faagaoioiga o galuega i le nofoaga autū o tagata o Ieova i aso nei. E talia ma le fiafia foʻi oe e asiasi atu i le Peteli. E faaopoopo atu i le ofisa ulu o Molimau a Ieova i le lalolagi i Niu Ioka, o loo iai foʻi isi ofisa o lālā i isi vaipanoa o le lalolagi.