Mulimuli i le Ala o Paulo Agaʻi i Perea

Sa taulau manuia galuega a ni misionare se toʻalua, ma na avea ai le toʻatele o tagata ma ē talitonu. Ona tulaʻi mai lea o se teteega a ni tagata iā i laʻua. Ona faia lea o se filifiliga. Mo le lelei o le faapotopotoga fou faatoʻā faatū faapea ma le saogalemu o misionare, sa tatau ai ona ō ese vave i laʻua i le tulua o lenā lava pō. O lea la, na sosola ese ai Paulo ma Sila mai Tesalonia, o se taulaga o Maketonia i le pe tusa o le 50 T.A. Sa malaga atu i laʻua i le isi nofoaga mo le la talaʻiga e sosoo ai—Perea.

I ASO nei, e mafai ona iloa atu e se tagata faimalaga asiasi, e pei lava o se tagata malaga anamua, ia le taoto mai o Perea (Véroia) i auvae mauga o Mount Bermios. O Perea, e pe tusa ma le 40 maila (65 kilomita) i saute i sisifo o Tesalonia ma e tusa ma le 25 maila (40 kilomita) le mamao mai le Aegean Sea. Ae e taatia mai Mount Olympus, i le itu i saute ma o le nofoaga lenā o atua autū o Eleni anamua.

O Perea o se nofoaga e fiafia i ai tagata aʻoga o le Tusi Paia, ona o inā na talaʻi ai Paulo ma liliu ai le toʻatele o tagata i le Faa-Kerisiano. (Galuega 17:10-15) Seʻi o tatou toe tepa atu i laasaga o Paulo ma iloiloina le talaaga o le aai.

Talaaga Mai Anamua

E leai se tasi e mautinoa po o anafea na faavaeina ai Perea. Atonu o tagata muamua na ʻaināina Perea o tagata Ferukia, lea na tutuli ese e tagata Maketonia pe tusa o le senituri lona fitu T.L.M. I senituri e tolu mulimuli ane, na faatamaoaigaina ai Maketonia ona o manumalo na faia e Alesana le Sili. Sa fausia fale mananaia faapea ma pā, faapena foʻi ma malumalu mo le atua o Seu, Tiana, Apolo, Athena, ma isi atua o tagata Eleni.

Ua taʻua e se tasi o tusi o talafaasolopito e faapea, mo le faitau senituri, o tagata Perea sa “telē se sao tāua na latou faia i lo latou lava vaipanoa faapea ma le vaega i mātū o Eleni.” Na oo atu le aai i se tulaga taʻutaʻua i le vaitaimi o le pulega o le ʻau Antigonid (306-168 T.L.M.), lea na oo ina faatoʻilaloina e Roma.

Ina ua faatoʻilaloina e Roma le tupu o Filipo V i le 197 T.L.M., na taʻua i le Encyclopædia Britannica: “Na faalētonu le pulega na iai ma avea ai loa Roma ma malo malosi i le itu i sasaʻe o le Metitirani.” I le 168 T.L.M., i Pydna (o se tasi o aai anamua o Maketonia), pe tusa o  ni nai maila i le itu i saute o Perea, na mālō aʻiaʻi ai le taʻitaʻiʻau Roma i le tupu mulimuli o Maketonia e suafa iā Perseus. E pei lava ona valoia i le Tusi Paia, na suia le malo malosi o Eleni e le malo o Roma. (Tanielu 7:6, 7, 23) Ina ua uma le taua, na avea Perea ma se tasi o aai o Maketonia muamua na siilima atu iā Roma.

I le uluaʻi senituri T.L.M., na avea Maketonia ma ogāeleele na fai ai feteenaʻiga i le va o Pomepei ma Kaisara Iulio. O le mea moni, na faatulaga e Pomepei lona nofoaga autū ma lana vaegaʻau e lata i Perea.

Manuia i Lalo o le Pulega a Roma

I le taimi o le Pax Romana po o le taimi o le tausia o le filemu e ʻautau a Roma, e vaaia e tagata faimalaga atu i Perea ni auala e faia i maa faapea ma pou e laina i autafa o auala. Sa iai vai tāʻele mo tagata lautele, o falematamata, o faletusi, ma fale sa faaaogā i tausinioga mataʻutia. Sa faafetafeaʻi vaiinu i paipa, ma sa iai ni alāvai i lalo o le eleele o le aai. Na oo ina taʻutaʻua Perea o se nofoaga autū mo fefaatauaʻiga e ō atu i ai tagata faioloa, o tagata tusiata, ma tagata taaalo, ae e ō atu i ai tagata matamata e maimoaina isi tausinioga. E mafai ona maua e tagata ese e ō atu i ai, nofoaga mo a latou lava tapuaʻiga e auai atu i ai. Ioe, o le aai lenei e feiloaʻi ai tagata Roma o so o se tapuaʻiga ma miomiō faatasi ai.

Sa avea emeperoa Roma ua maliliu ma atua na tapuaʻia i Perea. Sa lē foliga ese lenā mea i tagata Perea ona sa faia faapena iā Alesana le Sili, lea sa faamamaluina o se atua. Na faapea mai se tusitala Eleni: “E latou te masani e avatu  se faaaloalo tele i se tupu i lona olaga atoa, e avatu foʻi la e tagata Eleni o le emepaea i sasaʻe le faaaloalo faatapuaʻiga faapaupau i emeperoa Roma . . . E maua i a latou tupe siliva se ata o se emeperoa faamamaluina, o loo pale i se palealii pupula. E latou te viiviia o ia i tatalo e pei lava ona fai i se atua, faatasi ai ma pese faalelotu ma pese faaletino.” Sa iai ni fatafaitaulaga ma ni malumalu, sa ofo atu ai taulaga iā te ia. E oo lava i emeperoa e ō mai e auai i fiafia faaletapuaʻiga ia e aofia ai taaloga, tusiga ata, ma tauvaga o mea tau tusitusiga.

Aiseā na avea ai Perea ma nofoaga ogatotonu o tapuaʻiga faapaupau? Ona o Perea o le nofoaga autū e fetaui ai sui usufono mai aai o Maketonia. E feiloaʻi pea e lē aunoa nei sui i Perea e talanoaina mataupu e faatatau i le aai ma ona itumalo, ma e taulimaina i lalo o le vaavaaiga a Roma. O se tasi o tiute tauave autū a sui usufono, o le vaaia lea o faamanatuga mamalu faalotu faapaupau.

O le tulaga lenā na iai le aai lea na malaga i ai Paulo ma Sila ina ua sosola ese mai Tesalonia. E oo ane i lenā taimi, ua pulea Perea e Roma mo senituri e lua.

Ua Oo Atu le Tala Lelei i Perea

Na amata le talaʻiga a Paulo i Perea i le sunako o le aai. Na taliaina faapefea o ia i inā? Ua taʻu mai e le mau e faatatau i tagata Iutaia i inā, “ua sili ona amio lelei o i latou nei i tagata Tesalonia; auā ua latou talia le upu ma le fiafia tele, ua saʻili i Tusi i lea aso ma lea aso, pe moni ia mea.” (Galuega 17:10, 11) Ona o lo latou “amio lelei,” sa latou lē pipii atu ai ma le loto maaa i a latou tū ma aga. E ui lava na latou faalogo i se mea e fou, ae latou te leʻi masalomia i laʻua pe feita. Na i lo le teena o le feʻau na avatu e Paulo, na latou uaʻi atu ma faalogologo lelei i mea o loo talaʻia e Paulo, e aunoa ma se faaituʻau.

Na faapefea ona iloa e na tagata Iutaia le moni o aʻoaʻoga a Paulo? Na latou suʻesuʻeina mea na latou faalogo ai, i le faaaogā o taʻiala e sili ona maufaatuatuaina. Na latou saʻiliʻili i Tusitusiga Paia ma le faaeteete ma le filigā. Na faapea mai se tagata atamai o le Tusi Paia e suafa iā Matthew Henry: “Ona na fefulifulisaʻi Paulo e ala i le Tusi Paia, ma toe faasino atu i tusitusiga Eperu mo faamaoniga o mea na ia talaʻi atu, na latou suʻe atu ai i a latou Tusi Paia i itulau na ia faasino atu i ai, ma faitau manatu o loo siʻomia ai. Na latou iloiloina le mataupu ma le uiga o na faaupuga, faatusatusa i isi mau o le Tusi Paia, iloilo po o talafeagai ma moni  faaiʻuga ua fai e Paulo ma fai faatatau a latou faaiʻuga.”

E lē o se suʻesuʻega e na o le tau ina vaai atu e aunoa ma le manatu mamafa i ai. Na faaalu e tagata Perea le taimi e suʻesuʻe ai ma le filigā, na faia e lē aunoa, e lē faapea sa na o le Sapati na faia ai.

Ae seʻi mafaufau i iʻuga na maua mai ai. E toʻatele tagata Iutaia na taliaina le feʻau ma avea ma tagata talitonu. E toʻatele tagata Eleni, atonu na aofia ai ma ni tagata na liliu i le faa-Iutaia na avea foʻi ma tagata talitonu. Ae e leʻi faapea na lilo lenā tulaga. Ina ua logotala i ai tagata Iutaia i Tesalonia, na latou faanatinati atu i Perea “ua faaoso ma faavevesi le motu o tagata i lea mea.”—Galuega 17:4, 12, 13.

Na faamalosia ona alu ese Paulo mai Perea, ae na faaauau pea lana talaʻiga i se isi mea. Ma o le taimi lea na ia tuuvaa atu ai loa i Atenai. (Galuega 17:14, 15) E ui i lea, na olioli o ia ona o iʻuga o lana galuega i Perea, lea na faavaeina ai le Faa-Kerisiano i inā. Ma o loo fua mai pea i aso nei.

Ioe, o loo iai pea tagata i Perea (Véroia) o loo latou iloiloina ma le faaeteete le Tusi Paia ina ia “tofotofo i mea uma” ma “taofi mau” i faamatalaga saʻo ma mea e faavae mai ai. (1 Tesalonia 5:21) O faapotopotoga e lua o Molimau a Ieova o loo olaola i le aai, o loo auai i le galuega talaʻi e pei ona sa faia e Paulo, o le tufa atu o le feʻau a le Tusi Paia i isi. E latou te saʻilia tagata loto faamaoni ma fefulifulisaʻi ma i latou i le Tusi Paia ma tuu atu i le mana o le Tusi Paia e uunaʻia ma fesoasoani i tagata uma o loo mananaʻo e iloa Ieova, o le Atua moni e toʻatasi.—Eperu 4:12.

[Faafanua i le itulau 13]

(Tagaʻi i le lomiga mo le ata atoa)

Se vaega o le malaga faamisionare lona lua a Paulo

MUSIA

Teroa

Neapoli

Filipi

MAKETONIA

Amefipoli

Tesalonia

Perea

ELENI

Atenai

Korinito

AKAIA

ASIA

Efeso

ROTO

[Ata i le itulau 13]

Tupe siliva e iai le ata o Alesana le Sili o loo taʻua o se atua Eleni

[Faamatalaga i Ata]

Tupe siliva: Pictorial Archive (Near Eastern History) Est.

[Ata i le itulau 14]

Se faitotoʻa e agaʻi i le maota o tagata Iutaia i Perea (Véroia)

[Ata i le itulau 15]

Se sunako tuai i Perea i aso nei (Véroia)