Pe E te Manatua?

Pe na e fiafia e faitau lomiga talu ai nei o Le Olomatamata? Ia, seʻi vaai pe mafai ona e taliina fesili o loo mulimuli mai:

• O le ā se mea tatou te aʻoaʻoina mai le talafaatusa a Iesu i le tagata talimālō faatauanau? (Luka 11:5-10)

Ua faailoa mai i lenei talafaatusa o tatou uiga e ao ona iai pe a tatalo. E ao ona tatou ōle faatauanau, pe talosaga atu pea, aemaise lava mo le agaga paia o le Atua. (Luka 11:11-13)—12/15, itulau 20-22.

• O le ā le lesona mo i tatou o loo i le talafaatusa a Iesu i se fafine ua oti lana tane ma se faamasino? (Luka 18:1-8)

O loo faamamafa ai le manaʻoga ia tatalo. E lē pei o le faamasino, e amiotonu Ieova ma e finagalo e fesoasoani mai iā i tatou. E ao foʻi la ona iā i tatou le faatuatua pei o lea sa i le fafine ua oti lana tane i le talafaatusa.—12/15, itulau 26-28.

• Aiseā na fai atu ai le aposetolo o Paulo i Kerisiano i Korinito e ‘tatala o latou loto’ pe faalautele atu? (2 Korinito 6:11-13)

E foliga mai na lē talisapaia e nisi i Korinito o latou uso talitonu, na lē tatala pe faalautele atu lo latou alofa. E ao ona tatou faia ni taumafaiga e ati aʻe se lagona talisapaia mo o tatou uso talitonu, e aofia ai le faia o ni uō fou.—1/1, itulau 9-11.

• O le ā le faamaufaailogaina lea e taʻua i le Faaaliga 7:3?

Ina ua faauuina e le Atua Kerisiano i le agaga paia, o lenā ua uluaʻi faamaufaailogaina i latou. Ae o loo faasino le Faaaliga 7:3 i se faamaufaailogaina faaiʻu, pe a faamaonia le faaalia atoatoa e nei Kerisiano faauuina o lo latou faamaoni.—1/1, itulau 30-31.

• O le ā se mea e aʻoaʻoina e mātua mai le tala i le Tusi Paia iā Samuelu?

O se tasi o mea, e ao ona latou aʻoaʻo le fanau i le Afioga a le Atua e pei ona aʻoaʻo ai Samuelu e ona mātua. E ao foʻi ona latou faalaeiau le fanau ina ia avea le auaunaga iā Ieova ma a latou galuega.—1/15, itulau 16.

• E faaalia faapefea o loo tatou fiafia e faatalitali iā Ieova?

O loo tatou “faatalitali . . . [i] le aso o le Atua,” ma taulaʻi atu i le mapusaga pe a ia aveesea tagata faalēmataʻu uma. (2 Peteru 3:7, 12) E ui e naunau Ieova e faamuta mea leaga uma, ae o loo ia faatali e aumai le faaolataga i Kerisiano i se auala e faamamaluina ai lona suafa. E ao ona tatou talitonu e silafia e Ieova le taimi talafeagai e gaoioi ai, ma o le taimi la lenei e ao ai ona tatou maelega e vivii atu iā te ia. (Salamo 71:14, 15)—3/1, itulau 17-18.

• Pe na ave e Noa i totonu o le vaa manu mamā e taʻifitu mai le ituaiga, pe taʻifitu manu e fai soa mai le ituaiga?

Na taʻu atu iā Noa e “ave e taʻifitu” i manu vaefā taʻitasi uma e mamā. (Kenese 7:1, 2) I le gagana Eperu, o le upu “taʻifitu” e mafai ona faaliliu i le “fitu ma le fitu.” E lē uiga atu lenā faaupuga i le fitu o ni pea, e pei ona taʻua i nisi mau o le Tusi Paia. E manino mai sa ave e Noa e taʻifitu mai ituaiga taʻitasi, e tolu pea ma se isi manu se tasi sa faaopoopo atu i ai, lea sa mafai ona ia faaaogā i taulaga i se taimi mulimuli ane. (Kenese 8:20)—3/15, itulau 31.

• Aiseā e ao ai i Kerisiano ona “mafaufau” i le iʻuga o le faatuatua o toeaina, o ē e taʻimua?

Ua valaaulia i tatou e le aposetolo o Paulo e “mafaufau” pe iloilo totoʻa iʻuga o amioga faamaoni a toeaina, ma ia mulimuli i na faaaʻoaʻoga o le faatuatua. (Eperu 13:7) E tatou te faia lenei mea auā ua faatonuina ai i tatou i le Afioga a le Atua. E lē gata i lea, ua tatou iloa e manatu mamafa toeaina mo manaʻoga o le Malo atoa ai foʻi ma lo tatou lelei.—4/1, itulau 28.