Po o le a Iai ea se Iʻuga o Faiga Sauā?

O LE a vave lava ona faapea mai le toʻatele o tagata o le manatu faapito, o le pogai autū lea o faiga sauā i le lalolagi i aso nei. Ona o le faatuputupulaʻia pea o le ituaiga olaga lea na taʻua i le tele o tausaga ua mavae o le olaga fia mata muamua, ua iʻu ai i se lalolagi ua manatu ifo lava le tagata ia iā te ia lava. O le toʻatele o tagata o le a fai lava le mea e latou te mananaʻo ai, ma e masani ona iʻu ai i faiga sauā. E faamaonia le moni o lenei manatu e lē gata i tulaga o tagata taʻitoʻatasi ae faapea foʻi ma atunuu uma.

E foliga mai ua lē o toe faatāua e tagata ola o isi tagata. O isi ua fiafia i le faasauā. Ua avea ma a latou mea fiafia, ua pei lava o tagata solitulafono o loo taʻutino mai, e ala ona latou faileagaina isi tagata ona ia tau ina ia faamalie ai lenā faanaunauga. Ae faapefea le faitau miliona o tagata e fiafia e matamata i ata sauā, lea o loo faamalosia atili ai pisinisi fai ata tifaga ina ia maua mai ai polōfiti mai na ituaiga ata? O le vaai e lē aunoa i gaoioiga sauā i ata tifaga ma le faitau i tala faapena ua māfua ai ona mou atu le alofa o le toʻatele o tagata.

E masani lava ona faaleagaina e faiga sauā le tulaga faalemafaufau ma tau faalogona o tagata, ma amata ai foʻi ona latou feagai ma isi i le auala lava lenā e tasi. Ua faapea mai Noemí Díaz Marroquín o se faiaʻoga i le National Autonomous University i Mekisikō, e faatatau i sauāga e māfua mai i faiga sauā: “O faiga sauā o se mea e aʻoaʻoina e se tasi, ma ua avea o se vaega o la matou aganuu . . . Ua aʻoaʻoina i matou ina ia tali atu i auala sauā pe a faataga ma uunaʻia i matou e fai.” O lea la, o i latou na aafia i faiga leaga e ono iʻu foʻi ina latou faileagaina isi, atonu i le auala lava e tasi lea na faileagaina ai i latou.

I isi tulaga, e ono iʻu foʻi ina gaoioi ma le lē alolofa i latou o loo faaaogā sesē isi mea e pei o le ʻava malosi ma fualaau. Aua foʻi neʻi galo i latou ua lē faamalieina i pulega a o latou faigāmalo ona o le lē faataunuuina o manaʻoga o tagata. O nisi o i latou, ua filifili e faailoa atu o latou lagona, e ala i le taumafai e fai gaoioiga sauā ma faaauiluma faiga faatupu faalavelave, lea e masani ona oo ai mafatiaga i tagata lē sala.

Atonu o loo e tau mānatu e faapea: ʻPe na teʻiteʻi lava iloa e tagata fai faiga sauā? O le ā ua māfua ai lenei tulaga?’

O Ai Moni o Loo i Tua o Faiga Sauā?

Ua taʻu mai e le Tusi Paia iā i tatou, ua faatino e Satani le Tiapolo se taaʻiga malosi i lenei lalolagi, ma ua taʻua ai o ia ‘o le atua o le lalolagi nei.’ (2 Korinito 4:4) O ia o lē sili ona manatu faapito ma sauā i le aoao o mea. Ua fetaui lelei  le faamatala e Iesu o ia o se “fasioti tagata” ma o “le tamā o le pepelo.”—Ioane 8:44.

Na pulea le fanau a tagata e taaʻiga malolosi a Satani talu mai le taimi na lē usiusitai ai Atamu ma Eva. (Kenese 3:1-7, 16-19) Ae pe tusa o le 15 senituri mulimuli ane, ina ua uma ona fulitua le uluaʻi ulugalii iā Ieova, na liutino tagata ai agelu fouvale ma faiavā i fafine o le lalolagi, ma na latou fanaua mai ai ni ituaiga tagata tino eese e itu lua lea e taʻua i le gagana Eperu o Nefelimi. O le ā le mea na mātaulia ai i latou? E maua le tali i o latou igoa. O lona uiga “o tagata fasi tagata” po o “ē e māfua ai ona paʻūʻū isi i lalo.” E manino mai, o i latou o ni tagata sauā na faia faiga sauā ma amioga lē mamā, lea sa na o le Lolo na faapogaia e le Atua na mafai ona faaumatia ai. (Kenese 6:4, 5, 17) Ae e ui lava na faaumatia tagata tinoeese i le Lolo, peitaʻi na toe foʻi atu o latou tamā i le nofoaga o agaga o ni temoni e lē vaaia.—1 Peteru 3:19, 20.

E faamaonia le iai i agelu fouvale o uiga sauā ina ua uluitinoina e temoni se tama i le taimi o Iesu. Na faaauau pea ona faapogai e le temoni le tama e faaoso lona maʻilili, ma lafo i totonu o le afi ma le vai ina ia fano ai o ia. (Mareko 9:17-22) E manino lava, ua faaatagia mai e na “agaga leaga” le uiga lē alofa o lo latou taʻitaʻi sauā o Satani le Tiapolo.—Efeso 6:12.

I aso nei, o loo faaauau pea taaʻiga a temoni ina ia faaauiluma faiga sauā a tagata, e pei lava ona sa valoia e le Tusi Paia: “O ona aso e gata ai e oo mai ai aso faigatā. Auā e avea tagata ma ē alolofa i latou iā i latou, . . . o ē loto vii, o ē faamaualuga, . . . o ē lē faafetai, o ē amio leaga, o ē lē lotoaiga, o ē lē ma faaleleia, o ē faatuaupua, o ē lē taofi manaʻo o le tino, o ē faasauā, o ē ʻinoʻino i le amio lelei, o ē faalata, o ē soona fai, o ē ua faafefeteina, o ē ua tele le manaʻo i mea faafiafia ae leai se manaʻo i le Atua; o ē ua peiseaʻī ua toʻaga i lotu, a o le mana ua i lea mea ua latou teena.”—2 Timoteo 3:1-5.

Ua faaalia i valoaga o le Tusi Paia e faapea o o tatou taimi, o taimi sili ia ona faigatā, auā ina ua uma ona faavaeina le Malo o le Atua e Iesu i le 1914, ona lafo mai loa lea o Satani ma ana ʻau o temoni mai le lagi. Ua faalauiloa mai e le Tusi Paia e faapea: “Oi talofa iā te oulua le fanua ma le sami, auā ua alu ifo iā te oulua le tiapolo ua lotoa tele, auā ua na iloa ua saasaa ona pō.”—Faaaliga 12:5-9, 12.

Po o lona uiga o lenei manatu e lē mafai ona toe faaleleia lenei tulaga? Ua faapea mai Díaz Marroquín, lea na taʻua muamua atu “e mafai lava e tagata ona faasolosolo mālie ona aʻoaʻo ina ia foʻia” amioga lē lelei. Ae peitaʻi, ona ua faatumulia le lalolagi i taaʻiga a Satani i aso nei, e foliga mai ua lē mafai ai e se tagata ona aʻoaʻo e fai faapena, seʻi vaganā ua ia faataga se isi malosi e sili aʻe e taaʻina ai ona mafaufauga ma gaoioiga. O le ā lenei malosi?

E Mafai Ona Fai Suiga—Ae Faapefea?

O le mea e fiafia ai, ona o loo iai le agaga paia o le Atua o le fesoasoani aupito i malosi lea, e mafai ona faatoʻilaloina so o se taaʻiga a temoni. E mafai ona uunaʻia ai le alofa ma le manatu mamafa mo le lelei o tagata. Ina ia faatumuina i le agaga paia o le Atua, e tatau iā i latou uma o ē mananaʻo e faafiafia Ieova ona ʻalofia amioga e faaatagia ai faiga sauā. E manaʻomia ai le suia o uiga o se tasi ina ia ōgatusa ma le finagalo o le Atua. O le ā lenā finagalo? Ia tatou faaaʻoaʻo i le ala a le Atua i le tele tatou te mafai ai. E aofia ai le tatou manatu i isi tagata e pei ona manatu i ai le Atua.—Efeso 5:1, 2; Kolose 3:7-10.

O le iloiloina o le auala e taulima ai e le Atua mea, o le a faamautinoa atu ai iā te oe, e leʻi faaalia lava e Ieova se lē naunau i isi. E na te leʻi feagai foʻi ma le lē tonu ma so o se tagata, e faapena foʻi i meaola. * (Teuteronome 22:10; Salamo 36:7; Faataoto 12:10) E na te inosia faiga sauā ma i latou uma o ē faia na faiga. (Faataoto 3:31, 32) O le a fesoasoani le tagata fou lea e finagalo Ieova i Kerisiano ina ia atiina aʻe, e manatu ai i isi e sili atu iā i latou ma faaaloalo iā i latou. (Filipi 2:2-4) E aofia ai i lenā tagata fou faa-Kerisiano le “alofa mutimuti vale, ma le agalelei, ma le loto maulalo, ma le agamalu, ma le onosai.” Ma e lē tatau foʻi ona tatou  manatu māmā i le alofa, “o le fusi lea e atoatoa ona lelei.” (Kolose 3:12-14) Pe e te lē ioe ea o le a suia le lalolagi i se tulaga lelei pe afai e faateleina na uiga?

Peitaʻi, atonu e te ono tomānatu pe faamata e mafai ona tumau suiga i olaga o tagata. Seʻi manatu i se faaaʻoaʻoga o se mea moni na tupu. Sa masani ona ʻeʻē atu Matini * i lana avā i luma o le la fanau, ma matuā fasi iā te ia. I se tasi taimi, na matuā faigatā le tulaga o mea na oo i ai ma na tatau ai ona taufetuli atu nai tamaiti i lo latou tuaoi mo se fesoasoani. Ina ua mavae ni nai tausaga, ona amata loa lea ona suʻesuʻe e le aiga le Tusi Paia ma Molimau a Ieova. Na aʻoaʻoina e Matini le ituaiga tagata e tatau ona iai o ia ma le auala e feutagaʻi ai ma isi. Pe na mafai ona sui o ia? Ua tali mai lana avā: “I taimi ua teʻa, na ese le tulaga o laʻu tane pe a oo ina lē mafai ona taofia lona ita. Ona o lenei tulaga, na matuā faalētonu ai lo ma aiga mo se taimi umi. Peitaʻi, e lē lava aʻu upu e faamatala ai loʻu lotofaafetai iā Ieova ona o lona fesoasoani iā Matini ina ia sui. Ua avea nei o ia ma tamā lelei ma o se tane sili ona lelei.”

Ua na o se faaaʻoaʻoga lenā e tasi o lenei tulaga. Ae i le lalolagi aoao, e faitau miliona tagata ua latou suʻesuʻeina le Tusi Paia ma Molimau a Ieova ua lē o toe faasauā. Ioe, e mafai ona fai suiga.

Ua Lata le Iʻuga o Faiga Sauā Uma

I le lumanaʻi lata mai, o le a faatino ai i le lalolagi le pulega atoatoa a le Malo o le Atua—o se pulega ua faavaeina nei i le lagi faatasi ma se Tupu agaalofa, o Iesu Keriso. Ua uma ona ia faamamāina le lagi a Satani ma ana temoni, le faapogai o faiga sauā uma. E lē o toe umi, ae faamalieina loa e le Malo o le Atua manaʻoga o i latou uma o ē tausisi i le filemu i luga o le lalolagi. (Salamo 37:10, 11; Isaia 11:2-5) E na o le pau lenā o le vaifofō moni i faafitauli o le lalolagi. Ae faapefea pe afai o loo e aafia ona o faiga sauā, a o e faatalitali atu mo lenei Malo?

E leai so tatou fesoasoani e maua mai i le toe taui ma sui atu i faiga sauā. O le a na ona atili ai ona faateteleina faiga sauā. Ua valaaulia i tatou  e le Tusi Paia ina ia faalagolago iā Ieova, o lē o le a ia “tuuina atu i tagata taʻitasi e tusa ma ona ala, e tusa foʻi ma le fua o ana amioga” i lana taimi talafeagai. (Ieremia 17:10) (Tagaʻi i le pusa o loo iai, “Le Auala e Tali Atu ai i Faiga Sauā.”) E moni, e te ono mafatia ona o loo e aafia i se faiga sauā faasolitulafono. (Failauga 9:11) Peitaʻi, e mafai e le Atua ona aveesea āuga o so o se faiga sauā, e oo lava i le oti. E tusa ai ma lana folafolaga, o le a toe tutū mai i latou o loo i lona finagalo o ē ua maliliu ona o gaoioiga sauā.—Ioane 5:28, 29.

E ui lava e tatou te ono aafia pea i faiga sauā, peitaʻi e mafai ona tatou maua le faamāfanafanaga i le iai o se faiā vavalalata ma le Atua ma faatuatua atoatoa i ana folafolaga. Seʻi manatu iā Sara o lē na ia tausia toʻatasi lana fanau tama e toʻalua e aunoa ma le fesoasoani a lana tane, ma na ia taumafai foʻi e faamautinoa ua maua e lana fanau ni aʻoaʻoga lelei. Ae ina ua oo ina matua, na tuulafoaʻia o ia e lana fanau tama, e la te leʻi avatu iā te ia se tausiga faaletino pe tausia lelei i taimi na maʻi ai. Peitaʻi, ua avea nei Sara ma Kerisiano, ma ua ia faapea mai: “E ui lava ou te lagona le faanoanoa, ae e lē o tuulafoaʻia aʻu e Ieova. O loo oʻu mauaina pea lana tausiga e ala mai i oʻu uso ma tuafāfine faaleagaga, o loo latou tausia pea aʻu. Ou te matuā mautinoa e lē o toe umi ona foʻia lea e Ieova e lē gata o oʻu faafitauli ae o faafitauli foʻi o ē o loo faalagolago i lona mana ma fai lona finagalo.”

O ai uso ma tuafāfine faaleagaga sa faasino i ai Sara? O i latou o ana aumea Kerisiano, o Molimau a Ieova. Ua latou faavaeina se ʻauuso o ni tagata agaalofa i le lalolagi aoao, o ē ua talitonu e lē o toe umi ona aumaia lea o le iʻuga o faiga sauā. (1 Peteru 2:17) O le a leai se isi e totoe e aofia ai lē na faapogaia faiga sauā, o Satani le Tiapolo, po o so o se tasi o loo gaoioi e pei o ia. O le a lē toe iai lenei “vaitaimi o faiga sauā” e pei ona taʻua ai e se tasi o tusitala. Aiseā e te lē aʻoaʻo ai i lenei faamoemoe e ala i le faafesootaʻia o se Molimau a Ieova?

[Faamatalaga pito i lalo]

[Pusa i le itulau 6]

Le Auala e Tali Atu ai i Faiga Sauā

Ua aumaia e le Afioga a le Atua ni fautuaga aogā i le auala e fesagaʻia ai faiga sauā. Seʻi iloilo pe faapefea ona e faatatauina nei upu atamai o loo mulimuli mai:

“Aua e te faapea ane, Ou te taui atu i le leaga; ia e faa talitali iā Ieova, ona faaolaina lea o oe e ia.”—Faataoto 20:22.

“Afai ua e iloa atu ona sauāina o lē ua mativa, ma le fao mea i le faamasinoga ma le faatonuga . . . aua e te ofo i lea mea; auā o loo vaai o lē ua sili i lea tagata sili.” —Failauga 5:8.

“Amuia ē agamalu; auā e fai mo latou tofi le nuu.”—Mataio 5:5.

“O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.”—Mataio 7:12.

“Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia iā te outou, ia outou nofo lelei ma tagata uma lava. Le ʻau pele e, aua le taui atu ma sui, a ia outou tuu atu i le toʻasā; auā ua tusia, Ua faapea mai le Alii, O iā te aʻu le taui ma sui, ou te taui atu.”—Roma 12:17-19.

“Na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao. . . . o lē sa agateleina, a e leʻi toe agatele atu, na faatigāina o ia, a e leʻi faamataʻu atu, a ua tuuina atu o ia e ia i lē na te faamasino tonu.”—1 Peteru 2:21-23.

[Ata i le itulau 7]

Ua aʻoaʻoina e Ieova tagata ina ia lafoaʻi faiga sauā