Se Fanua ua ‘Sinasina mo le Seleselega’

I le faatausiʻusiʻu i mātū o Amerika i Saute, o loo iai le penisula o Guajira. E tū i mātū o Kolomepia ae i mātū i sisifo o Venesuela. E aasa le lā auā e seāseā timu lenei vaipanoa, ma e oo le fua o le vevela i le 110 tikeri Fahrenheit. Peitaʻi e galulue malolosi tagata ma lelei a latou faatoʻaga. O le agi mālū o le savili mai le fogātai ma le vaitoʻelau mai mātū i sasaʻe, ua mafai ai e tagata asiasi ona tafafao fiafia i laufanua ma matafaga matagofie.

AFIO maia i laufanua o tagata Initia o le ituaiga o Wayuu. Pe ā ma le 305,000 tagata Wayuu, ma o le 135,000 ua nonofo nei i Kolomepia. Na latou nonofo i inei a o leʻi taitai avea Kolomepia ma kolone o Sepania.

O mea autū mo le tausiga o le soifua o tagata Wayuu, o faatoʻaga ma lafumanu. E fagogota foʻi ma fai a latou fefaatauaʻiga ma nuu tuaoi. E atamamai fafine e lalaga so o se mea e faaaogā ai lanu sesega, ma e alumia tele i turisi.

E lauiloa tagata Wayuu i uiga faamaoni ma talimālō. Peitaʻi, ua ola foʻi i latou i “aso faigatā.” (2 Timoteo 3:1) Ua avea le mativa ma faafitauli autū, ua pogai ai isi faafitauli, e pei o le lē iloa faitau ma tusitusi, le maʻi paee i fanau, leai o se tausiga faasoifua mālōlōina, ae o nisi vaipanoa ua tele soligatulafono.

Ua leva ona auina atu e lotu a atunuu Kerisiano a latou misionare e galulue i Wayuu. O le māfuaaga lenā e pulea ai e le lotu le tele o aʻoga faafaiaʻoga ma aʻoga nofotumau. E toʻatele tagata Wayuu e talia tū ua latou taʻua o tū faa-Kerisiano, e pei o le tapuaʻi i faatusa ma le papatisoina o pepe. Ae latou te lē lafoaʻia foʻi talitonuga ma sauniga masani faalotu na tupuga mai i a latou talafatu ma tala faanuupō.

E talitonu tagata Wayuu i le Atua, ma talia lelei upu moni o le Tusi Paia o loo aʻoaʻo atu e Molimau a Ieova. I le amataga o vaitausaga e sefulu mai le 1980, e na o le toʻafitu Molimau Wayuu sa iai i Guajira. O le toʻatolu o i latou sa nonofo i Ríohacha, le aai laumua. E lē gata i Molimau mai le atunuu lava ia, ae toʻa 20 isi tagata talaʻi sa talaʻia le tala lelei o le Malo i inā i le gagana Sepania.

Le Feʻau i la Latou Lava Gagana

O le toʻatele o tagata Wayuu o loo i Ríohacha e itiiti se faa-Sepania e tautatala ai, faatasi ma le latou lava gagana e taʻu o le Wayuunaiki. I taimi muamua e leʻi telē se taulau manuia o le talaʻiga i inā. E pei e matamumuli tagata moni o Wayuu e talanoa mai i arijunas; o le latou taʻu lenā i tagata e lē o ni Wayuu. Pe a asiasi atu Molimau i o latou fale, e tele ina tali mai tagata Wayuu i la latou lava gagana, ae lē faa-Sepania. Ona toe agaʻi ese atu lea o le ʻautalaʻi i se isi fale.

Ae i le iʻuga o le 1994, na tofia ai e le ofisa o le lālā o Molimau a Ieova ni paeonia faapito po o ni faiaʻoga faataimi atoa o le Tusi Paia, e galulue ma le faapotopotoga i Ríohacha. Sa talosaga e paeonia se Molimau Wayuu ia aʻoaʻo i latou i le gagana Wayuunaiki. Ina ua mafai ona aʻo faatauloto  ni taulimaga faigofie, ona ō lea o na faifeʻau i le oganuu, ma e leʻi umi ae vaaia se suiga tele i le tali ane a tagata. E leʻi saʻo atoatoa le tautatala a faiaʻoga o le Tusi Paia i le gagana a le atunuu, ae sa maofa tagata ma naunau ai e faalogo. O nisi taimi ua fai se talanoaga manaia i le latou foʻi faa-Sepania lea sa leʻi atoatoa!

Ua ‘Sinasina mo le Seleselega’

Na faatusa e Paulo le galuega o le faia o tagata ma soo, i le seleseleina o se fanua, o se faatusa e faigofie ona malamalama ai tagata Wayuu auā o ni tagata faifaatoʻaga. (1 Korinito 3:5-9) I se uiga faafaatusa, ua matuā ‘sinasina mo le seleselega’ le fanua o Wayuu.—Ioane 4:35.

O Nili, o se Initia Wayuu e nofo i Manaure, na fanau mai lava e faalētonu se vaega o lona tino. Sa ia tuuaʻia le Atua, ma mafatia ai lava seʻia oo ina mafaufau e pule i lona ola. Peitaʻi a o asiasi solo i aai se Molimau ona o lana galuega, sa ia talaʻi atu ai foʻi mai lea fale i lea fale, ma feiloaʻi ai loa ma Nili ma talanoa e uiga i le Malo o Ieova. E na o le 14 tausaga o Nili i lea taimi. Sa iloa e le Molimau le fiafia o Nili, ona amata lea o se la suʻesuʻega faale-Tusi Paia. Na fiafia Nili ina ua ia iloa uiga alofa o Ieova, ma iloa ai e lē o le Atua na māfua ai lona mafatiaga. Sa ootia lona loto ina ua faitau i le folafolaga a le Atua i se lalolagi parataiso, lea o le a lē toe iai se maʻi!—Isaia 33:24; Mataio 6:9, 10.

Ae sa masesei le aiga o Nili ma se isi aiga i lea taimi. Sa taumafai le aiga o Nili e faatino ni sauniga faalotu a lo latou ituaiga, mo so latou puipuiga. Fai mai Nili: “I le taimi muamua, sa ou fefe e taʻu laʻu lotu fou i loʻu aiga, aemaise i tagata matutua, o i latou na e tatau ona matuā faaaloalo i ai.” Sa matuā feita mātua o Nili ina ua la iloa, e lē gata o le a lē toe talitonu Nili i o latou talitonuga lē faale-Tusi Paia, ae sa ia lē toe faatinoina foʻi nisi o a latou tū masani faataulāitu. Ona alu ai lea o Nili ua nofo i Ríohacha ma auai atu i le faapotopotoga i inā. Mulimuli ane na papatiso o ia. I le 1993 sa tofia o ia e avea ma auauna o le faiva, ma i le tolu tausaga mulimuli ane, sa avea ai loa ma paeonia sauatoa. Ma i le 1997, sa tofia o ia e avea o se toeaina i le faapotopotoga. I le tausaga e 2000, sa faalautele atu lana auaunaga e avea o se paeonia faapito.

Seʻi manatu foʻi iā Terisa, o se teine mai Wayuu na amata lana suʻesuʻega faale-Tusi Paia ma Molimau a Ieova. Sa ula i ai Tanielu, o le tamāloa sa la nonofo faapouliuli, ma na oo lava ina fasi o ia ma le la fanau e toʻatolu sa iai. Mulimuli ane sa malie Tanielu e fai faatasi le la suʻesuʻega ma Terisa, peitaʻi sa masani pea ona auai lenei tamāloa i inugapia ma ana uō, ma o nisi taimi e taʻi fā pe taʻi lima aso o fai. Na oo ina matitiva ai lona aiga. Sa faaauau pea Terisa i lana suʻesuʻega ma auai i sauniga a le faapotopotoga. O inā na iloa ai e Tanielu le tāua o le suʻesuʻeina o le Tusi Paia. Na tupu se faalavelave mataʻutia, ina ua masua se tipoti vaivevela i se tasi o le la fanau, ma oti ai i ni mū ogaoga. E lē gata ina onosaia e Terisa lona faavauvau i le maliu o si ana tama, ae sa fesagaʻi foʻi ma omiga mai uō ma ona tuaoi, a o latou uunaʻia o ia e faatino nisi o aganuu mo le maliu, e lē faale-Tusi Paia.

 I lenā taimi faigatā, sa ō ane uso ma tuafāfine o faapotopotoga tau lalata ane, e faamāfanafana i lenei ulugalii. Ua uma le maliu, ae asiasi ane pea uso ma tuafāfine o le faapotopotoga i lenā aai, lea e tautatala i le gagana Wayuu. O le vaaia e Tanielu o lenei faatinoga o le alofa faa-Kerisiano, na amata ai ona agaʻigaʻi i luma faaleagaga. Sa tuu lana inuʻava ma le faasaunoa iā Terisa. Na la faaipoipo loa ma amata ona galue malosi e tausi lona aiga. Sa tuputupu lo la malosi faaleagaga, ma papatiso ai i le 2003. E tele ni la suʻesuʻega faale-Tusi Paia o loo fai. Sa avatu foʻi e Terisa se molimau lelei i lona aiga, ma i le taimi nei, e naunau ona tauaiga e faalogologo pe a talanoa i ai le ʻautalaʻi. O se tasi o tama tama a le tuafafine matua o Tanielu ua avea nei ma tagata talaʻi e leʻi papatisoina, ae toʻalua le fanau teine o loo fai a la suʻesuʻega ma auai i sauniga. O le tuafafine lea o Tanielu na maliu lana tama tama i se faalavelave faafuaseʻi, ua fiafia uma ma lona aiga e fai sa latou suʻesuʻega faale-Tusi Paia.

O Taumafa Faaleagaga i le Gagana Wayuunaiki

I le 1998 na tatala ai le tamaʻitusi Olioli i Le Ola i Le Lalolagi e Faavavau! * i le gagana Wayuunaiki. Sa aogā lenei meafaigaluega i le totōina o le fatu o le upu moni i Wayuu, ma faia ai suʻesuʻega faale-Tusi Paia. I le 2003 na faatulaga ai ni aʻoga e aʻoaʻo ai ni uso mo le faaliliuina o lomiga a Molimau a Ieova i le gagana Wayuunaiki. O le galulue maelega o se vaega o le ʻaufaaliliu i Ríohacha, na mafai ai ona maua nisi polosiua, ma atili ai ona malolosi faaleagaga i latou sa avea ma soo, o ē tautatala i le gagana Wayuunaiki.

Talu mai le 2001, ua iai nisi vaega o le polokalame o le tauaofiaga itumalo e faaliliu i le Wayuunaiki. E matuā faagaeetia ai lava tagata aʻoga o le Tusi Paia a o faalogologo atu i le polokalame i la latou lava gagana. O loo faatalitali pea mo le aso e mafai ai ona latou faalogologo atu i tala faale-Tusi Paia, a o faatino mai i le gagana Wayuunaiki.

Se Fanua Lauusiusi

O Uribia o se taulaga e tū i le tusa ma le 60 maila [100 kilomita] i mātū sasaʻe o Ríohacha. E toʻa 16 tagata talaʻi o loo iai i le faapotopotoga a Uribia Wayuu, ma o loo taumafai e talaʻi i tagata Initia o loo nonofo i nofoaga maotua. O le faamatalaga lenei a se toeaina o le faapotopotoga e faatatau i na talaʻiga: “Sa matou asiasi atu i se nofoaga e tausi ai lafumanu, e iai ni fale pe ā ma le sefululua, e maulalo o latou taualuga ma tamaʻi faamalama. I le vaega pito i luma o fale, e iai se faapaologa e mafola lona atoina i yotojolo, o le vaega malō pito i totonu o le ogālaau o le cactus. O inā e puipuia ai le aiga ma ni tagata asiasi mai le aasa o le lā. Sa matou fiafia e vaai atu i le toʻatele o tagata sa faaalia mai le naunau, ona fai lea o a matou fuafuaga e toe foʻi atu e amata suʻesuʻega faale-Tusi Paia. Ina ua matou toe foʻi, sa matou iloa ai le toʻatele o i latou e lē iloa tusitusi ma faitau. Na latou taʻu mai sa iai se faleaʻoga, ae ua lē toe faaaogāina ona o le lē lava o le seleni. Na faataga i matou e le tagata e vaaia le faleaʻoga, e faaaogā se potu aʻoga e fai ai ni vasega mo le aʻoaʻoina o le faitau ma tusitusi, ma fai ai matou suʻesuʻega faale-Tusi Paia. E toʻaono tagata Wayuu ua mafai ona faitau ma tusitusi, ma o loo agaʻigaʻi pea i luma a latou suʻesuʻega faale-Tusi Paia. E faagaeetia o matou loto i lo latou agaga talisapaia e faaali mai, ona fai ai lea o sa matou fuafuaga, o le a faia ni sauniga i lenā vaipanoa.”

E iai foʻi nisi Molimau e lē o ni tagata Wayuu, ua latou aʻoaʻoina le gagana, ma ua matuā talisapaia ai le latou fesoasoani. I le penisula i Guajira, o loo iai faapotopotoga e valu ma ni vaega se lua, e tautatala i lenei gagana.

Ua matuā faamanuia Ieova i taumafaiga a nei auauna. E tele nisi mea e mafai ona faataunuu i le talaʻia o le tala lelei i tagata o Wayuu. E tele nisi mea lelei o loo fotuaʻi mai, a o faasolosolo ina avea ma soo Kerisiano i latou e mataala i o latou manaʻoga faaleagaga. Tau ina ia foaʻi mai pea e Ieova nisi auauna e galulue i lenei fanua, lea ua ‘sinasina mo le seleselega.’—Mataio 9:37, 38.

[Faamatalaga pito i lalo]

[Faafanua i le itulau 16]

VENESUELA

KOLOMEPIA

LA GUAJIRA

Manaure

Ríohacha

Uribia

[Faamatalaga i Ata i le itulau 16]

Le nuu o Wayuu: Victor Englebert