E Sili Atu Ona Tāua na i lo le Tala o le Tau

E TOETOE o atunuu uma e iai a latou alagāupu e faatatau i le tau. A mūmū mai le lagi i le afiafi, ua fiafia le ʻauvaa. Ae a mūmū mai le lagi i le taeao, ua nofouta le ʻauvaa. Ua faamatalaina e le ʻauvāai tau māfuaaga tau tekinisi e oo ai le tau i lea tulaga e pei ona taʻua i le alagāupu.

I aso o Iesu, sa masani ona suʻesuʻe e tagata le vanimonimo ma faamatala ona foliga. Na fetalai atu Iesu i nisi o tagata Iutaia: “A oo i le afiafi ua outou fai ane, E laofie; auā ua mūmū mai le lagi. O le taeao foʻi ua outou fai ane, E uaga le asō; auā ua mūmū mai, ma faamalumalu ifo le lagi. Ua outou iloa ona mātauina amio a le lagi, a o . . . ” A o le ā? Na toe fetalai atili atu Iesu i se faaupuga mataʻina: “O faailoga o tausaga tou te lē mafaia ea?”—Mataio 16:2, 3.

O ā nei “faailoga o tausaga”? O faamaoniga manino e iloa ai o Iesu o le Mesia moni na auina mai e le Atua. O ana gaoioiga na manino mai e pei o le mūmū o le lagi. Peitaʻi, o le toʻatele o tagata Iutaia na lē amanaʻia faailoga e iloa ai ua afio mai le Mesia, o se suiga e sili atu ona tāua na i lo tala o le tau.

I aso foʻi nei, o loo iai se faailoga e matuā sili atu ona tāua ona malamalama i ai na i lo le lanu o le lagi. Na valoia e Iesu o le a tafiesea lenei lalolagi amioleaga ae amata se lalolagi e sili atu ona lelei. Na ia taʻua ni tulaga o mea e tutupu e iloa ai le taimi e oo mai ai lea suiga. O nisi o nei mea e aofia ai taua ma oge. Na fetalai Iesu pe a vaaia nei mea, ona iloa lea ua lata le taimi e faalaa mai ai le Atua.—Mataio 24:3-21.