E te Fefe i le Lumanaʻi?

E TELE māfuaaga e fefe ai. O se faaaʻoaʻoga, e fefefe nisi tagata i le mea e tupu i le lalolagi i le lumanaʻi. Ua taʻua i le mekasini o le Time o Aperila 3, 2006: “O suiga mataʻutia o mea ua tutupu e pei o le vevela o le tau, afā, lologa, mū, ma le liusuavai o ni aisa tetele, ua faaalia ai le matuā faaleagaina o le tau i le lalolagi atoa.”

Iā Me 2002, na tatala ai e le Faalapotopotoga Tau Siʻosiʻomaga a Malo Aufaatasi se lipoti e faaulutalaina, “Le Vaaiga i le Siʻosiʻomaga i le Lalolagi Atoa-3.” Na saunia lenei lipoti e le silia ma le 1,000 tagata. Ua taʻua i se lipoti: “E ao ona faia se fuafuaga i le lalolagi auā ua aafia i mea ua faia i aso nei le vaomatua, sami, vaitafe, mauga, meaola, ma isi mea ia e faalagolago i ai le ola mo tupulaga i aso nei ma aso o i luma.”

O se tasi o pogai o popolega, o le tulaga ua iai le siʻosiʻomaga i aso nei. Ua ola fefefe tagata i le lalolagi ona o osofaʻiga a le ʻaufaataupu faalavelave. Na taʻua e le sui faatonusili o le faalapotopotoga o sipai o Kanata: “E matou te feala i le pō ma popole i ni faamataʻuga e lē iloa le taimi e oo mai ai.” E oo lava i le matamata i tala fou i le televise i afiafi, ua māfua ai foʻi popolega!

Ua popole le toʻatele o tagata matutua o ē galulue mamafa ina neʻi lē toe iai ni a latou galuega. O le vāea mai le galuega, tapunia o fale faigaluega, tauvaga i galuega, ma le tele o mea e mananaʻo ai pule e fai, ua māfua ai le lē saogalemu i galuega. Ua popole le ʻautalavou ina neʻi teena e a latou uō. E popole le fanau ina neʻi lē alolofa moni o latou mātua iā i latou. Ae o ā ni o latou manatu i tulaga o le lalolagi ua iai nei? Na taʻua e se tinā popole: “I le ʻautalavou ma ē e  lē lava le poto masani, e pei ua avea le lalolagi po o le siʻomaga i fafo atu o le aiga ma nofoaga e matuā fefefe ai i nisi o taimi.” Ua popole le tele o mātua i aafiaga o amioga leaga a le lalolagi i ē latou te alolofa i ai, aemaise lava i a latou fanau.

E masani ona popole ē matutua neʻi paʻūū i se sitepu pe faaoolima i ai se tasi i le alatele. Ioe, “e fefefe ai foʻi i latou i mea maualuluga, ma matataʻu ai i le ala.” (Failauga 12:5) Ua fefefe foʻi tagata i maʻi tigā. O tala i siama o fulū e feoti ai, kanesa, ma faamaʻi pipisi, ua tatou fefefe ai ina neʻi aafia i maʻi fou ia e ono mamaʻi ma feoti ai ma o tatou aiga. O lona uiga, pe a mamaʻi ma vaivai ē o loo malaulau ma ola mālōlōina lelei, e tatou te popole foʻi la auā o le a oo iā i tatou ma ē pele le tulaga lava lea. Pagā le faanoanoa pe a vaai atu i se tagata maʻi ua matuā leai sona faamoemoe!

Ona o le tele o māfuaaga e fefefe ai, pe e iai la se pogai lelei e tatou te mautinoa ai i se tulaga lelei i le lumanaʻi? Pe e iai se mea e fesoasoani iā i tatou e tausisia ai pea se vaaiga saʻo? O le a tali nei fesili i le mataupu o sosoo mai.

[Faamatalaga i Ata i le itulau 3]

© Jeroen Oerlemans/Panos Pictures