Fesoasoani i Lau Fanau Ina ia Maua Aʻoaʻoga Moni

O LE aʻoaʻoina o se tamaitiiti ua tai pei o se faigāmalaga fiafia ae e iai ni luʻi. O se faigāmalaga e faia e le aiga atoa. E te lua avatu iā i latou faalaeiauga ma taʻiala i se auala alofa, ma fesoasoani iā i latou e agaʻigaʻi i luma i le olaga. E tele mea aogā e ao ona latou aʻoaʻoina!

Ina ia maua e le fanau se olaga manuia ma fiafia, e tatau ona latou ati aʻe ni mea latou te faatāuaina lea e pulea e amioga talafeagai ma le latou faiā ma le Atua, ina ia iloa le mea lelei mai le leaga. O le a tele ni aogā o aʻoaʻoga ma tumau fautuaga ua latou maua pe a latou iloa Ieova ma alolofa iā te ia. O le avea o oe o se matua, e telē sau vaegafai i mea e aʻoaʻo e lau fanau, ma e fesoasoani lenei vala i le auala latou te faatāua ma malamalama ai i mea o loo latou aʻoaʻoina.

O le a iai ni luʻi e tatau ona manumalo mai ai mātua i lenei faigāmalaga. E faigofie tele ona puʻea pe aʻoaʻoina e le fanau mea, ma e tele ni mea lē talafeagai e mafai ona latou aʻoaʻoina mai fafo atu o le liʻo o le aiga. O loo tatou nonofo i se lalolagi o loo pulea e Satani le Tiapolo. (1 Ioane 5:19) Ma e matuā ese lava māfuaaga e naunau ai Satani i le aʻoaʻoina o le fanau. O Satani o se faiaʻoga tomai tele ma iai le poto masani ae matuā leaga lava. E ui e faatagā “liua o ia e ia ma agelu o le malamalama,” ae e lē moni ma e tuufaafeagai ana aʻoaʻoga ma le Afioga a le Atua ma lona finagalo. (2 Korinito 4:4; 11:14; Ieremia 8:9) O Satani ma ana temoni e matuā popoto lava i le taufaasesē, faaauilumaina manatu faamaualuga, lē faamaoni ma le faaleagaina o tulaga tau amio.—1 Timoteo 4:1.

O le ā e ao ona e faia e puipuia ai lau fanau mai le faasesēina? E faapefea ona e aʻoaʻo le fanau e taofi mau i mea moni ma mea aogā? E tāua ai le toe iloilo o au gaoioiga. E manaʻomia ona e faataatia se faaaʻoaʻoga lelei. E tāua tele le taliaina o ou tiute tauave i le aʻoaʻoina o lau fanau, ma faaalu le taimi e faataunuu ai nei tiute tauave. A o leʻi tilofaʻia nei vala, seʻi o tatou iloiloina le faavae o aʻoaʻoga moni.

Le Faavae o Aʻoaʻoga Moni

E mafai ona tatou aʻoaʻoina se lesona tāua mai se tasi o tane e sili ona poto, o le tupu o Isaraelu o Solomona. Ua faapea mai le Tusi Paia: “Ua foaʻiina mai e le Atua iā Solomona le poto ma le loto matala e matuā tele lava, ma le loto e oo i mea e tele, e faapei o le oneone o i le matafaga. Ua sili lava le poto o Solomona i le poto o tagata uma i sasaʻe, ma le poto uma o Aikupito.” Sa mafai e Solomona ona manatua ma faamatala “faataoto na ia faia e tolu afe ia; o ana pese foʻi ua tasi le afe ma le lima.” Sa telē lona malamalama i laau ma manu. (1 Tupu 4:29-34) Na faatonutonuina foʻi e le tupu o Solomona le fausiaina o le tele o fale i Isaraelu, e aofia ai ma le malumalu mataʻina o Ieova i Ierusalema.

O tusitusiga a Solomona e pei o le tusi o Failauga, o loo faaalia ai le telē o lona malamalamaga i uiga masani o tagata. Sa faagaeeina o ia e le Atua e faailoa mai le faavae o aʻoaʻoga moni. Na faapea mai Solomona: “O le mataʻu iā Ieova, o le amataga lea o le poto.” Na ia taʻua foʻi: “O le mataʻu iā Ieova, o le amataga o le poto lea; ia iloa foʻi le Paia, o le atamai lava lea.”—Faataoto 1:7; 9:10.

 Pe a tatou matataʻu i le Atua, e tatou te faaalia le migao ma faaeteete ina neʻi o tatou faia se gaoioiga e lē fiafia ai o ia. E tatou te amanaʻia o ia o le Silisili Ese ma e tatou te tali atu iā te ia. O i latou e lē amanaʻia Lē e faalagolago i ai o tatou ola, atonu e manatu tagata e popoto, ae “o le valea lea i luma o le Atua.” (1 Korinito 3:19) E manaʻomia e lau fanau le poto e faavaeina i le “poto mai lugā.”—Iakopo 3:15, 17.

E fesootaʻi le alofa mo Ieova ma le mataʻu e aua neʻi faia se mea e toʻasā ai o ia. E finagalo Ieova ia matataʻu ma alolofa ana auauna iā te ia. Na faapea mai Mose: “Isaraelu e, se ā se mea e finagalo i ai Ieova lou Atua iā te oe, na ona ia e mataʻu iā Ieova lou Atua, ina ia e savali i ona ala uma lava, ma ia e alofa atu iā te ia, ma ia e auauna iā Ieova lou Atua ma lou loto atoa ma lou agaga atoa, ina ia e tausiusi i poloaʻiga a Ieova ma ana tulafono ou te fai atu ai iā te oe i le aso nei, ina ia manuia ai oe?”—Teuteronome 10:12, 13.

O le faavae sili mo aʻoaʻoga e faapotoina ai le fanau, o le tāmau lea i o latou loto le mataʻu iā Ieova. A o faateleina le malamalama o le fanau i nei aʻoaʻoga faavae, o le a faatupulaʻia lo latou talisapaia mo Lē na Faia i latou, o ia foʻi o le Puna o aʻoaʻoga moni. O le a fesoasoani lea i le fanau e faaaogā tatau mea ua latou aʻoaʻoina, ma lē faia ai ni faaiʻuga sesē. O le a latou ati aʻe le tomai “e iloa ai le lelei ma le leaga.” (Eperu 5:14) O lea faavae o le a fesoasoani i le fanau e faaauau ona loto maulalo ma ʻalofia le faia o mea e leaga.—Faataoto 8:13; 16:6.

O Loo Tulimataʻi Outou e le Fanau!

Ae faapefea ona fesoasoani i a tatou fanau ina ia latou alolofa ma matataʻu iā Ieova? E maua le tali i lenā fesili i le Tulafono na tuuina atu e Ieova i tagata Isaraelu e ala iā Mose. Sa faatonuina mātua Isaraelu: “Ia e alofa atu iā Ieova lou Atua ma lou loto atoa, ma lou agaga atoa, ma lou malosi atoa. Ia i ai foʻi i lou loto o upu nei ou te fai atu ai iā te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a e nofo i lou fale, pe a e savali foʻi i le ala, pe a e taoto, pe a e tulaʻi foʻi.”—Teuteronome 6:5-7.

E tele ni aogā e maua e mātua mai lenei mau. Muamua: I le avea o se matua, e tatau ona e faia se faaaʻoaʻoga lelei. Ina ia aʻoaʻo lau fanau e alolofa iā Ieova, e tatau ona e muaʻi alofa oe i le Atua, ma e tatau ona iai ana afioga i lou loto. Aiseā e tāua ai lea tulaga? Auā o oe lava le uluaʻi faiaʻoga a lau fanau. E telē le aafiaga o o latou olaga ona o au faaaʻoaʻoga. E leai se isi auala e sili atu ona malosi e aafia ai olaga o le fanau na i lo faaaʻoaʻoga a mātua.

O ou faanaunauga, o mea e te faatāua ma mea e te fiafia ai, o le a atagia i lau talanoa ma au gaoioiga. (Roma 2:21, 22) A o laiti le fanau, latou te aʻoaʻoina mea e ala i le mātau o mea e fai e o latou mātua. E lagona e le  fanau mea e faatāua e o latou mātua, ma latou faatāuaina foʻi ia mea. Pe afai e moni lou alofa mo Ieova, o le a mātauina e lau fanau. O se faataʻitaʻiga, latou te mātauina e tāua tele iā te oe le faitau ma le suʻesuʻeina o le Tusi Paia. O le a latou iloa ai e te faamuamua manaʻoga o le Malo i lou olaga. (Mataio 6:33) O lou auai e lē aunoa i sauniga faa-Kerisiano ma le talaʻia o le Malo, latou te iloa ai e sili ona tāua iā te oe le auaunaga paia iā Ieova.—Mataio 28:19, 20; Eperu 10:24, 25.

Ia Faatino Lau Tiute Tauave

O se isi lesona e mafai e mātua ona maua i le Teuteronome 6:5-7: E iā te oe le tiute tauave o le aʻoaʻoina o lau fanau. Sa avea mātua ma faiaʻoga o a latou fanau i uluaʻi tagata o Ieova. I vaitaimi o Kerisiano i le uluaʻi senituri, sa faaauau e mātua le tiute tauave o le aʻoaʻoina o le fanau. (2 Timoteo 1:5; 3:14, 15) Na tusi atu Paulo i Kerisiano ma faamanatu i tamā ina “ia tausi atu [i a latou fanau] i aʻoaʻiga ma apoapoaʻiga a le Alii.”—Efeso 6:4.

Ona o le tele o omiga mai galuega ma isi vala e faaaluina ai lou taimi, atonu e manatu ai mātua e tuuina le aʻoaʻoina o le fanau i isi, e pei o faiaʻoga i aʻoga ma nofoaga e vaaia ai tamaiti. Ae e lē mafai e se isi ona suia le tulaga o se matua alofa. Aua neʻi e manatu faatauvaa i le tāua o lou sao. Afai e te manaʻomia le fesoasoani, ia filifili lelei, ae aua e te tuulafoaʻia lou tiute paia.

Faaalu se Taimi e Aʻoaʻo ai Lau Fanau

Peitaʻi o le isi lesona e aʻoaʻoina e mātua mai le Teuteronome 6:5-7: E manaʻomia le taimi ma ni taumafaiga e aʻoaʻoina ai le fanau. Sa tatau i mātua Isaraelu ona latou “aʻoaʻo soo” le fanau i upu moni a le Atua. O le upu Eperu mo le “aʻoaʻo soo” o lona uiga ia “toe fai ma saga fai,” pe “toe taʻua ma toe taʻua.” E faia lea tulaga i le aso atoa, e amata mai lava i le taeao seʻia oo i le afiafi, “pe a e nofo i lou fale, pe a e savali foʻi i le ala.” E tele se taimi ma ni taumafaiga e moomia i le aʻoaʻoina o le fanau, ina ia mafai ona faafiafiaina le finagalo o le Atua i o latou uiga ma amioga.

O le ā la e mafai ona e faia ina ia fesoasoani i lau fanau e maua aʻoaʻoga moni? E tele ni taumafaiga e manaʻomia. Ia e aʻoaʻo i latou ina ia alolofa ma matataʻu iā Ieova. Ia e faataatia se faaaʻoaʻoga lelei. Ia faatino lau tiute tauave o le aʻoaʻoina o lau fanau, ma faaalu se taimi tele e aʻoaʻo ai i latou. E lē o oe o se matua lelei atoatoa ma e iai ai ni faaiʻuga sesē e te ono faia a o aʻoaʻoina i latou. Ae afai e moni au taumafaiga e fai le finagalo o le Atua, o le a talisapaia e lau fanau au taumafaiga ma latou maua ai aogā. Na faapea mai le Faataoto 22:6: “Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.” O le taʻiala lava lea e tasi mo le fanau teine.

O le aʻoaʻoina o le fanau o se faigāmalaga e faagasolo i le olaga atoa. O le a faavavau ona outou olioli ai, pe afai e alolofa uma oe faapea foʻi ma lau fanau iā Ieova. Talu ai e tele mea e tatau ona aʻoaʻoina pea lava pea e faatatau iā Ieova, ma le faataunuuina o lona finagalo.—Failauga 3:10, 11.

[Ata i le itulau 15]

Pe e te faitauina le Tusi Paia i lau fanau?

[Ata i le itulau 16]

Ia faaalu se taimi e aʻoaʻo ai lau fanau e uiga i Lē na Foafoaina mea uma