“Le Alii e, Aiseā na E Lē Gaoioi Ai?”

O UPU na a Pope Benedict XVI, ina ua asiasi atu i le nofoaga o faasalaga mamafa na iai muamua i Auschwitz, i Polani, iā Me 28, 2006. I le mea tonu lava na fasiotia ai e fitafita a Siamani le faitau selau afe o tagata Iutaia faapea ma isi, ona ia toe faapea mai lea: “E tele ni fesili na tulaʻi mai i lenei nofoaga! E tulaʻi mai pea le fesili: O fea na iai le Atua i na aso? Aiseā na ia lē gaoioi ai? E faapefea ona ia faataga lenei fasiotiga tagata tele e tupu, ua manumalo ai le leaga? . . . E ao ona tatou faaauau ona tagi atu ma le loto maulalo, ma ia maumauaʻi i le Atua: Ia gaoioi mai! Aua neʻi faagaloina tagata, o au foafoaga na fai!”

O le saunoaga a le pope na tulaʻi mai ai ni talanoaga aasa. Na iloa e nisi faapea, sa taumafai le pope e ʻalofia le talanoa i ni mataupu patino e pei o gaoioiga tetee faasaga i tagata Iutaia lea na fesootaʻi atu i le fasiotiga tagata lē alolofa i Auschwitz. Na faauiga e nisi ana upu faapea, o ni faaupuga e taʻufaatauvaaina ai le talosaga a Pope Ioane Paulo II mo le faamagaloga o agasala na faia e le lotu. Na mātauina e se tagata tusitala Katoliko e suafa iā Filipo Gentiloni e faapea: “E talafeagai ona faapea mai le toʻatele o le ʻaufaasalalau i le fesili faigatā, po o fea sa iai le Atua—o se fesili taligatā—na i lo le tali o lea fesili e latou te talosagaina se tali i se fesili faigofie: Po o fea sa iai Pius XII?” Sa faasino atu le ʻaufaasalalau iā Pope Pius XII i le leai o sona leo na faia, i le taimi o le fasiotiga tagata a fitafita a Siamani.

O fasiotiga tagata na faia e fitafita Siamani ma isi uma fasiotiga tagata mataʻutia na faia i le talafaasolopito o le tagata, ua faamaonia ai faapea, a ‘pule le tasi tagata i le tasi, e leaga ai o ia lava.’ (Failauga 8:9) E lē gata i lea, e lē o fifilemu Lē na Foafoaina mea i le tele o mea mataʻutia o loo tutupu. Ua ia faaalia mai i le Tusi Paia māfuaaga ua ia faataga ai tagata amio leaga. Ua faamautinoa mai foʻi e le Atua e na te lē o faagaloina tagata. O le mea moni o le taimi lea o loo faataga e le Atua e pule ai tagata ua toeitiiti lava ona muta loa lea. (Ieremia 10:23) Pe e te fia silafia isi mea e faatatau i fuafuaga a le Atua mo i tatou? E fiafia Molimau a Ieova e fesoasoani iā te oe e iloa le tali a le Tusi Paia i le fesili na iso ai Pope Benedict XVI.

[Faamatalaga i Ata i le itulau 32]

Fale Mataaga i Oświęcim