Le Māfuaaga ua Toeitiiti ai Mou Atu Puapuaga
Le Māfuaaga ua Toeitiiti ai Mou Atu Puapuaga
“O le Papa, e sao lava lana galuega.”—TEUTERONOME 32:4.
1, 2. (a) Aiseā e te faapelepele ai i le faamoemoe o le ola e faavavau? (e) Aiseā e lē talitonu ai le toʻatele i le Atua o lē na faia ni folafolaga matagofie mo le lumanaʻi?
PE E te fiafia e faaata i lou mafaufau le olaga i le Parataiso? Atonu e te mafaufau o loo e suʻesuʻeina nofoaga matagofie uma o lenei paneta, ma iloa ai le anoanoaʻi o mea ola eseese. Pe e te ono mafaufau foʻi i le faamalieina o le a e maua i le galulue faatasi ma isi tagata e tausia lelei le laueleele ma fesoasoani ina ia avea le lalolagi atoa o se parataiso. Pe e te manatunatu e ati aʻe tomai e pei o le tusi ata, tusia o ata o fale, musika po o isi mea, lea e leai sou taimi e fai ai ona o le pisi o lenei olaga. Po o le ā lava le tulaga ae e mautinoa e te faapelepele i le faamoemoe lea e taʻua e le Tusi Paia o le “ola moni,” o le ola lea e finagalo Ieova tatou te ola ai, o le ola e faavavau.—1 Timoteo 6:19.
2 O se fiafiaga ma se faaeaga le taʻu i isi o lea faamoemoe mai le Tusi Paia. Ae toʻatele ua teena lea faamoemoe. Ua latou faapea mai o se manatu e taufaasesē, ua na o se miti mo tagata e faaseegofie. E ono faigatā iā i latou ona talitonu i le Atua o lē na folafola mai le ola e faavavau i le parataiso. Aiseā? O le toʻatugā i nisi o le faafitauli o le iai o le leaga. Latou te manatu pe afai o soifua le Atua ma o ia e ou le malosi uma lava ma alofa, ua lē malamalama la pe aiseā ua iai le leaga ma mafatiaga i le lalolagi. E latou te manatu, e lē tatau ona soifua se Atua e na te faatagaina pea le leaga—ma pe afai o soifua, o lona uiga e lē o ia e ona le malosi uma, po o le lē manatu mai foʻi iā i tatou. O isi ua talitonu e saʻo ia māfuaaga. E mautinoa e tomai tele Satani e faatauaso manatu o tagata.—2 Korinito 4:4.
3. O le ā le fesili faigatā e mafai ona tatou fesoasoani i tagata e tali, ma aiseā ua mafai ai ona taliina lea fesili?
3 O i tatou o Molimau a Ieova, ua iā i tatou se faaeaga tāua e fesoasoani i tagata o loo faasesēina e Satani ma le poto o lenei lalolagi. (1 Korinito 1:20; 3:19) Tatou te malamalama i le māfuaaga e lē talitonu ai le toʻatele i le folafolaga a le Tusi Paia. E latou te lē iloa Ieova. Atonu latou te lē iloa lona suafa po o le tāua o lona suafa, ma e itiiti so latou iloa o ona uiga, ma lona talaaga i le faataunuuina o ana folafolaga. Ua faamanuiaina i tatou i le poto ua maua e faatatau i le Atua. Mai lea taimi i lea taimi e lelei pe a tatou iloilo pe faapefea ona tatou fesoasoani i tagata ua “faapouliuligia o latou mafaufau” ina ia tali se fesili e aupito faigatā lea e fesiligia soo e tagata, “Aiseā e faataga ai e le Atua le leaga ma mafatiaga?” (Efeso 4:18) O le a tatou iloiloina muamua pe faapefea ona maua se tali faamalie loto. Ona tatou talanoa lea, pe faapefea ona manino mai uiga o Ieova i le auala o loo ia taulimaina ai lea mataupu.
Le Auala Saʻo e Tali ai le Fesili
4, 5. O le ā e ao ona tatou faia muamua pe a fesili mai se isi pe aiseā ua faataga ai e le Atua mafatiaga? Faamatala.
4 Pe a fesili se tasi pe aiseā e faataga ai e le Atua mafatiaga, e faapefea ona tatou tali atu? E ono vave ona tatou avatu iā i latou ni faamalamalamaga auʻiliʻili e amata mai i le mea na tupu i Etena. I nisi taimi, atonu e lelei lenā tali. Ae ao ona avatu se tali talafeagai. Atonu e manaʻomia ona iai se faavae lelei o le talanoaga. (Faataoto 25:11; Kolose 4:6) Seʻi o tatou iloiloina ni manatu se tolu mai le Tusi Paia tatou te ono mananaʻo e faamatala manino puupuu a o leʻi avatuina le tali i le fesili.
5 Muamua pe afai e popole le tagata i le faateteleina o le amio leaga i le lalolagi, atonu na aafia o ia po o nisi o lona aiga i faiga leaga. E lelei la le amata e ala i le faaalia o le tigā alofa moni i le tagata. Na fautua le aposetolo o Paulo i Kerisiano i Korinito: “Ia outou tagi foʻi faatasi ma ē ua fetagisi.” (Roma 12:15) O le faaalia o le alofa po o le “fealofani” e ono uunaʻia ai le tagata e faalogo. (1 Peteru 3:8) Pe a ia iloa tatou te manatu mamafa iā te ia, o le a ia ono faalogo mai la i mea tatou te fai atu ai.
6, 7. Aiseā e ao ai ona tatou faamālō i se tagata loto faamaoni o loo fesili i se fesili loloto e faatatau i se mataupu o le Tusi Paia?
6 O lona lua tatou te faamālō i le tagata loto faamaoni ona o le lāgā o lea fesili. O isi tagata ua manatu a latou faia ia fesili e iloa ai e leai so latou faatuatua ma lē faaaloalo i le Atua. Atonu o manatu foʻi ia o loo taʻu atu i ai e le ʻaufailotu. Peitaʻi e lē o le tulaga lenā. Auā na faia foʻi ni fesili faapea e tagata faatuatua i taimi o le Tusi Paia. O se faaaʻoaʻoga na fesili le faisalamo o Tavita: “Ieova e, se ā le mea e te tūtūmamao ai, ma e liliu ese ai i ona pō e iai le puapuaga?” (Salamo 10:1) Na fesili foʻi le perofeta o Sapakuka: “Ieova e, ou te valaau seʻia afea, a e te lē faafofoga mai; ou te alaga atu iā te oe ona o le sauāga, a e te lē faaola mai? Se ā ea le mea ua e faaali mai ai iā te aʻu le amio leaga, ma e silasila i le puapuaga? e i oʻu luma le faatafunaina ma le sauā, e i ai foʻi le fefinauaʻiga ma le faatupuina o le misa.”—Sapakuka 1:2, 3.
7 O ia tane faamaoni na matuā faaaloalo i le Atua. Pe na aʻoaʻia i laʻua mo le faia o ia fesili? Na finagalo Ieova e tusia a laʻua fesili i lana Afioga. I aso nei, o se tasi o loo popole i le faateteleina o le leaga atonu o galala faaleagaga, o loo manaʻo i ni tali e na o le Tusi Paia e mafai ona aumaia. Manatua, na taʻuleleia e Iesu i latou ua galala faaleagaga po o ē “manatu mamafa i o latou manaʻoga faaleagaga.” (Mataio 5:3, NW) Maʻeu se faaeaga o le fesoasoani iā i latou e maua le fiafia lea na folafola mai e Iesu!
8. O ā aʻoaʻoga sesē ua talitonu ai tagata faapea, o le Atua ua pogai ai puapuaga, ma e faapefea ona tatou fesoasoani iā i latou?
8 O lona tolu, e ono manaʻomia ona tatou fesoasoani i le tagata ia iloa e lē o le Atua e pogai mai ai le leaga ua faateteleina i lenei lalolagi. E toʻatele tagata o loo aʻoaʻoina o le Atua o loo pulea lenei lalolagi o loo tatou ola ai. Ua manatu foʻi ua leva ona faatulaga e le Atua mea uma e tutupu iā i tatou ma e lē mafai ona malamalama i māfuaaga o lona faaoo mai o puapuaga i tagata. E pepelo ia aʻoaʻoga. E lē faamamaluina le Atua e nei aʻoaʻoga, o loo faapea o Ia ua māfua ai le leaga ma mafatiaga i le lalolagi. E tatou te faaaogā la le Afioga a le Atua e faasaʻo ai ia manatu. (2 Timoteo 3:16) E lē o Ieova o loo puleaina lenei faiga leaga o mea ae o Satani le Tiapolo. (1 Ioane 5:19) E lē tuupōina e Ieova olaga o ana foafoaga atamamai, e na te tuu iā i latou taʻitoʻatasi le saʻolotoga ma avanoa e filifili ai le lelei ma le leaga, saʻo ma le sesē. (Teuteronome 30:19) E lē pogai mai iā Ieova le leaga; e inosia e Ieova le leaga ma e manatu mamafa mo i latou e puapuagatia i faiga lē tonu.—Iopu 34:10; Faataoto 6:16-19; 1 Peteru 5:7.
9. O ā lomiga ua saunia e le “auauna faamaoni ma le mafaufau” e fesoasoani ai i tagata ia malamalama i le māfuaaga ua faataga ai e Ieova mafatiaga?
9 Pe a uma ona e talanoaina na manatu, e te ono mātauina le sauni o le tagata o loo faalogologo mai e fia malamalama i le māfuaaga ua faataga ai e le Atua mafatiaga e faaauau. Ua saunia e le “auauna faamaoni ma le mafaufau” le tele o lomiga ina ia fesoasoani iā te oe. (Mataio 24:45-47) Mo se faataʻitaʻiga i le Tauaofiaga Itumalo o le 2005-2006, “Usiusitai i le Atua” na tatala ai se sāvali fou e faaulutalaina Ua Toeitiiti Mou Atu Puapuaga! Pe afai e maua lea sāvali i lau gagana, aiseā e te lē faamasani ai i le feʻau o loo iai? E talitutusa ma le tusi O ā Aʻoaʻoga Moni a le Tusi Paia?, lea ua 157 gagana ua faaliliuina ai. E iai sona mataupu atoa e faatatau i le fesili, O ā Aʻoaʻoga Moni a le Tusi Paia? Ia faaaogā lenei lomiga i le tele e te mafai ai. O loo faamatala manino mai ai le talaaga o le finauga e faatatau i le pule silisili ese lea na lāgā i Etena, ma le pogai na faaaogā ai e Ieova lana lava auala e foʻia ai lea mataupu. Ae ia manatua a o e talanoaina lea mataupu, o loo e faailoaina atu le poto e sili ona tāua i le tagata o loo faafofoga mai. O le poto e faatatau iā Ieova ma ona uiga matagofie.
Taulaʻi Atu i Uiga o Ieova
10. Aiseā e faigatā ai i le toʻatele ona malamalama i le māfuaaga e faataga ai e le Atua mafatiaga, ma o le ā o le a fesoasoani iā i latou?
10 Ia taulaʻi atu i uiga matagofie o Ieova a o e fesoasoani i tagata ia malamalama i le māfuaaga ua faataga ai e Ieova tagata e pulea i latou lava e ala i taaʻiga a Satani. E toʻatele tagata e iloa o le Atua e malosi, ma ua masani ona latou faalogo o taʻu o ia e tagata, o le Atua e ou le malosi uma. Peitaʻi e ono faigatā iā i latou ona malamalama i le māfuaaga e na te lē faaaogāina ai lona malosi e aveesea ai i le taimi nei faiga lē tonu ma mafatiaga. Atonu e lē lava so latou malamalama i isi uiga o Ieova, e pei o le paia, faamasinotonu, poto ma le alofa. E faaalia e Ieova ona uiga i se auala lelei atoatoa ma paleni. Ua taʻua i le Tusi Paia: “E sao lava lana galuega.” (Teuteronome 32:4) E faapefea ona e faamatilatila nei uiga a o e taliina fesili e faatatau i lea mataupu? Seʻi o tatou iloiloina ni faataʻitaʻiga.
11, 12. (a) Aiseā na lē faamagaloina ai Atamu ma Eva ina ua agasala? (e) Aiseā e lē faatagaina ai e Ieova le agasala e faaauau pea?
11 Pe na mafai ona faamagaloina e Ieova Atamu ma Eva? I lea tulaga e leai. I le avea ai o Atamu ma Eva o ni tagata lelei atoatoa, na la faia ma le iloa se filifiliga e fulitua i le pule silisili a Ieova ae talia le taʻitaʻiga a Satani. E la te leʻi faaalia le salamō. Ae ina ua fesili tagata pe aiseā na lē faamagalo ai e Ieova i laʻua, e latou te ono mafaufau pe aiseā na lē faafaigofie ai e Ieova ana tapulaa ma faataga le iai o le agasala ma le lē usiusitai. O le tali e aofia ai le uiga tāua o Ieova—o le paia.—Esoto 28:36; 39:30.
12 O loo faamatilatila mai e le Tusi Paia le paia o Ieova i le faitau selau taimi. E faanoanoa ona e toʻaitiiti tagata i lenei lalolagi amio piʻopiʻo e malamalama i lea uiga. O Ieova e mamā ma e vavaeese mai le agasala. (Isaia 6:3; 59:2) E lē faatagaina e Ieova le agasala e faaauau ai pea, o lea na ia saunia ai se taulaga e aveesea aʻiaʻi ai le agasala. Pe ana finagalo Ieova e iai pea le agasala e faavavau, o le a leai la so tatou faamoemoe mo le lumanaʻi. (Faataoto 14:12) I le taimi atofaina a Ieova o le a ia toe faafoʻisia ana foafoaga uma i lo latou tulaga paia. E mautinoa e faataunuuina ona o le finagalo lea o Lē Paia.
13, 14. Aiseā na lē filifili ai Ieova e faaumatia le ʻaufouvale i Etena?
13 Pe na mafai ona faaumatia e Ieova ē na fouvale i Etena ma toe amata? Na iā Ieova le mana e faia ai lea tulaga, ma e lē o toe mamao ae ia faaaogāina lea mana e faaumatia ai ē leaga. E ono manatu nisi, ‘Pe aiseā na te leʻi faia ai faapea i le taimi na o le toʻatolu ai ē na agasala i le lalolagi? Pe ana ia faia faapea semanū e leai se agasala ma mafatiaga o le lalolagi.’ Aiseā na lē filifili ai Ieova e faaumatia i latou e toʻatolu? Ua taʻua i le Teuteronome 32:4: “E tonu ona ala uma lava.” E sili ona manatu mamafa Ieova i mea tonu. “E fiafia Ieova i le faamasinoga,” po o le mea tonu. (Salamo 37:28) Ona o lona naunau i le faamasinotonu, o lea na ia lē faaumatia ai le ʻaufouvale i Etena. Aiseā?
14 O le fouvalega a Satani na lāgā ai se fesili e faatatau i le tonu o le pule silisili ese a le Atua. O le faamasinotonu o Ieova e manaʻomia ai se tali e tonu i le luʻi a Satani. E ui na alagatatau ona faaumatia vave le ʻaufouvale, ae peitaʻi e lē avatua ai se tali e faavae i le faamasinotonu i le faia faapea. O le a fai ma faamaoniga atili o le silisili ese o lona malosi, ae e lē o le malosi o Ieova lea na fesiligia. E lē gata i lea, ua uma ona faailoa atu e Ieova lona finagalo iā Atamu ma Eva. Sa tatau ona la fanafanau ma ia uluola ma ia tumu ai le lalolagi, ia la pulea, ma ia gauaʻi atu i ai foafoaga uma i le lalolagi. (Kenese 1:28) Pe ana faaumatia Atamu ma Eva i le amataga, o le a lē faataunuuina lona finagalo mo tagata. E lē mafai e le faamasinotonu o Ieova ona faatagaina lenā tulaga e tupu auā e faataunuuina lava lona finagalo.—Isaia 55:10, 11.
15, 16. Pe a faatū mai e tagata ni a latou lava “tali” i le luʻi na lāgā i Etena, e mafai faapefea ona tatou fesoasoani iā i latou?
15 Pe e iai se isi i le vateatea aoao e mafai ona foʻia le fouvalega i se poto e sili atu iā Ieova? Atonu e faatū mai e nisi tagata a latou lava “tali” i le fouvalega i Etena. Ae i le faia faapea, po ua latou manatu ai e iai a latou auala e sili atu e foʻia ai lea mataupu? E latou te lē faia ona o se uunaʻiga leaga ae latou te lē o malamalama iā Ieova ma lona poto uiga ese. Ina ua tusi atu le aposetolo o Paulo i Kerisiano i Roma, na ia matuā saʻiliʻili i le poto o le Atua e aofia ai “mea lilo” i le finagalo o Ieova e faaaogā le Malo faa-Mesia e aumaia le togiola mo tagata faamaoni ma faapaiaina ai Lona suafa paia. O ā lagona o Paulo i le poto o le Atua o lē na faia lea fuafuaga? Na faapea mai le aposetolo i lana tusi: “O le Atua poto ia e toʻatasi, ia iā te ia le viiga iā Iesu Keriso e faavavau, faavavau lava, Amene.”—Roma 11:25; 16:25-27.
16 Na malamalama lelei Paulo, o Ieova o le Atua “poto ia e toʻatasi,” o Lē silisili lona poto i le vateatea aoao. O ai la se tagata lē lelei atoatoa e mafai ona ia iloa se auala e sili atu e foʻia ai so o se faafitauli, e ese mai i le luʻi a Satani i le pule silisili ese a le Atua? E manaʻomia ai la ona tatou fesoasoani i tagata ina ia latou lagona le migao tatau e ao ona avatu i le Atua o lē “poto lona finagalo.” (Iopu 9:4) O le tele tatou te malamalama ai i le poto o Ieova, o le tele foʻi lenā o lo tatou faatuatuaina o le auala na te taulimaina ai mea.—Faataoto 3:5, 6.
Talisapaia Uiga Autū o Ieova
17. E faapefea i le iai o se malamalamaga i le alofa o Ieova, ona fesoasoani iā i latou o loo atuatuvale i le faatagaina e le Atua o mafatiaga?
17 “O le Atua, o le alofa lava ia.” (1 Ioane 4:8) Ua faamatilatila mai e le Tusi Paia i ia upu le uiga autū o Ieova, o le uiga e mataʻina ma faamāfanafana loto i ē ua atuatuvale i le faateleina o le amio leaga. Ua faaalia e Ieova le alofa i vala eseese i le auala ua ia taulimaina ai le agasala ua aafia ai tagata. O le alofa na uunaʻia ai Ieova e tuuina atu le faamoemoe i le fanau agasala a Atamu ma Eva, e ala i le saunia o se auala e faalatalata atu ai iā te ia ma maua se faiā lelei ma ia. O le alofa na uunaʻia ai le Atua e saunia le taulaga togiola e faamagalo ai agasala ma toe faafoʻisia ai i le olaga lelei atoatoa, le ola e faavavau. (Ioane 3:16) O le alofa foʻi ua ia onosaia ai tagata ma tuu le avanoa iā i latou e teena ai Satani ae filifili Ieova e avea ma o latou Pule Silisili Ese.—2 Peteru 3:9.
18. O le ā le malamalamaga ua faamanuiaina ai i tatou, ma o le ā o le a tatou iloiloina i le mataupu o loo sosoo mai?
18 Ina ua faia e se faifeʻau se lauga e faamanatu ai se osofaʻiga faatupu faalavelave mataʻutia na ia faapea mai: “E tatou te lē iloa le māfuaaga e faataga ai e le Atua le leaga ma mafatiaga e faaauau pea.” E ese le faanoanoa o lea tulaga. Pe tatou te lē fiafia ea ua tatou malamalama i lea mataupu? (Teuteronome 29:29) Ona o Ieova e atamai, faimeatonu, ma alofa, e tatou te iloa e lē o toe umi ona leai lea o mafatiaga. Auā ua ia folafola mai o le a ia faia faapea. (Faaaliga 21:3, 4) Ae faapefea i latou uma ua maliliu i le tele o tausaga ua mavae? Po ua leai ea so latou faamoemoe ona o le auala ua taulima ai e Ieova le luʻi na tulaʻi i Etena. E leai. O le alofa ua uunaʻia ai foʻi o ia e saunia le faamoemoe mo i latou e ala i le toe tū. O le mataupu lenā o le a talanoaina i le mataupu o loo sosoo mai.
O le a Faapefea Ona E Tali?
• O le ā se tala e mafai ona fai atu i se tagata e fesili pe aiseā ua faataga ai e le Atua mafatiaga?
• E faapefea ona faaalia le paia ma le faamasinotonu o Ieova i auala na ia taulimaina ai le ʻaufouvale i Etena?
• Aiseā e tatau ai ona tatou fesoasoani i tagata ia iai se malamalamaga e sili atu, e faatatau i le alofa o Ieova?
[Fesili mo le Suʻesuʻega]
[Ata i le itulau 21]
Ia fesoasoani iā i latou o loo atuatuvale ona o tulaga mafatia o le olaga
[Ata i le itulau 23]
Na faia e Tavita ma Sapakuka ni fesili faamaoni i le Atua