Le Tāua o le Auai i Sauniga

UA ATOA le 20 tausaga talu ona faaipoipo Kilisitina ma lona toʻalua, ae faafuaseʻi ona alu ese le tamāloa ae tiaʻi na o ia ma si a la fanau. E toʻafitu tama ma le teine e toʻatasi, e mai le 7 i le 18 tausaga le matutua. Fai mai Kilisitina: “Ua paʻū nei iā te aʻu le faia o faaiʻuga tāua uma. Sa ou mafatia i le tele o oʻu tiute tauave, ma na ou matuā manaʻomia lava se lagolagosua ma se taʻitaʻiga.” O fea na ia maua mai ai le fesoasoani?

Fai mai Kilisitina: “Na avea sauniga faa-Kerisiano ma olataga iā te aʻu ma si aʻu fanau. Pe a matou auai i sauniga, sa faalaeiau mai uso ma tuafāfine, aemaise taʻiala a le Afioga a le Atua. O le auai e lē aunoa i sauniga sa matuā aogā i so o se vala tāua o lo matou olaga.”

Ua tatou fesagaʻi uma lava ma puapuaga eseese i nei “aso faigatā.” (2 Timoteo 3:1) Atonu o lou manatu foʻi lenā i sauniga a Molimau a Ieova, o se fesoasoani i le faamalosia atili o lo tatou faatuatua, ma o se vaega tāua o la tatou tapuaʻiga iā Ieova. E mautinoa, o sauniga e lima a le faapotopotoga i vaiaso taʻitasi, ua atili uunaʻia ai lou alofa mo Ieova, ua atili mausalī ai lou faamoemoe mo le lumanaʻi, ma maua ai foʻi taʻiala faale-Tusi Paia i le auala e te feutagaʻi ai ma tofotofoga.

Ae e iai lava foʻi nisi o loo faigatā ona auai e lē aunoa i sauniga. E uma ane le aso ua matuā lē lavavā lava, ma ua leai se lagona e toe fia fai ni teuga lelei ma malaga ese atu mo le sauniga. O nisi ua avea a latou galuega e faalavelavea ai pea le auai i sauniga. Afai o le a taumafai e auai i sauniga uma, o lona uiga e ono lē maua ai se tupe mo le aiga, po o le oo ai lava ina faamālōlō mai galuega. E iai foʻi i latou ua lē auai i sauniga ona e manatu e sili atu ona faafouina lo latou malosi pe a auai i nisi o faafiafiaga ma mālōlōga, na i lo le potopoto faatasi ma le faapotopotoga.

O ā la ni māfuaaga ua talafeagai ai ona auai i sauniga faa-Kerisiano? E faapefea ona faafouina tonu oe i nei faatasitasiga? Ina ia tali nei fesili, seʻi tatou talanoa i le valaaulia māfana a Iesu o loo i le Mataio 11:28-30. Na ia fetalai: “Ia outou ō mai iā te aʻu, o outou uma o ē tigāina ma mafatia i avega, o aʻu foʻi e mālōlō ai outou. Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga. Auā e avegofie laʻu amo, o laʻu avega foʻi e māmā ia.”

“Ia Outou Ō Mai iā te Aʻu”

Na fetalai Iesu: “Ia outou ō mai iā te aʻu.” O se tasi o auala e tali atu ai i  lenā valaaulia, o le auai i sauniga uma. E telē le tāua o le auai i sauniga, auā na iai se tasi taimi na fetalai ai Iesu: “O le mea ua faapotopoto ai se toʻalua, po o se toʻatolu i loʻu igoa, ou te i ai faatasi ma i latou.”—Mataio 18:20.

I le uluaʻi senituri, sa valaaulia ai e Iesu nisi tagata ina ia mulimuli mai iā te ia. Ma na ia avatu iā i latou le avanoa e ati aʻe ai se faiā māfana ma ia. Na talia vave e nisi lenā valaaulia. (Mataio 4:18-22) O nisi na avea le naunau i meafaitino, ma itu na latou lē talia ai lenā valaaulia. (Mareko 10:21, 22; Luka 9:57-62) Ae mo i latou na mulimuli iā Iesu, na ia avatu i ai lenei faamautinoaga: “Ua lē filifilia aʻu e outou, a ua filifilia outou e aʻu.”—Ioane 15:16.

Ina ua maliu Keriso ma toe tū aʻe, sa lē toe auaufaatasi o ia ma ona soo i le tino. Ae sa latou auai faatasi pea i le uiga faapea, sa ia taʻitaʻia a latou galuega ma mātauina le latou tali mai i ana fautuaga. Mo se faaaʻoaʻoga, pe tusa ma le 70 tausaga talu ona toe faatūina Iesu, na ia avatu ai fautuaga ma faalaeiauga i ekalesia e fitu i Asia Itiiti. E taʻu mai i ana fetalaiga lona matuā malamalama lelei i vala o loo lelei ma faalētonu ai tagata taʻitoʻatasi i na faapotopotoga.—Faaaliga 2:1–3:22.

E matuā naunau Iesu i ona soo taʻitoʻatasi. Ua ia folafola mai: “Faauta foʻi, ou te iā te outou i aso uma lava, e oo lava i le gataaga o le lalolagi.” (Mataio 28:20) O loo tatou ola nei i taimi o le iʻuga, ma ua tatau ai ona tatou talia le valaaulia a Iesu ina ia mulimuli atu iā te ia. O se tasi o auala e tali atu ai i lenā valaaulia, o le auai e lē aunoa i sauniga. E finagalo Iesu ina ia tatou faalogo atu iā te ia, ma ia ‘aʻoaʻoina i tatou e ia’ e ala i suʻesuʻega ma lauga faale-Tusi Paia o loo faatulaga mai i sauniga. (Efeso 4:20, 21) Po o e talia ea le valaaulia a Iesu: “Ia outou ō mai iā te aʻu”?

“O Outou Uma o Ē Tigāina ma Mafatia i Avega”

O le isi māfuaaga tāua mo le auai i sauniga faa-Kerisiano, e maua ai faalaeiauga. (Eperu 10:24, 25) E mautinoa o le toʻatele o i tatou, e eseese māfuaaga e “tigāina ma mafatia” ai. Atonu o loo e mafatia i ni ou lava popolega, e pei o ni maʻi o le tino. Ae o lou auai i sauniga, e faafouina ai oe a o fefaasoaaʻi faalaeiauga. (Roma 1:11, 12) Mo se faataʻitaʻiga, o le a e faalogo atu i ni manatu e faamalosia ai oe faaleagaga, e toe faamanatu mai ai lou faamoemoe mai le Tusi Paia, aemaise le mātauina o le faatuatua o isi a o latou onosaia foʻi puapuaga. O nei mea uma e mafai ai ona e onosaia ma fesagaʻia i le tulaga paleni ou faafitauli.

Seʻi manatu i le faamatalaga a se tuafafine Kerisiano sa faataotolia i se maʻi faaumiumi. “Sa tatau ona umi se taimi ou te taoto ai i le falemaʻi ona o loʻu maʻi. Talu ai ua fai si umi o oʻu nofo i le falemaʻi, na tau faigatā ai le toe alu i sauniga. Peitaʻi na ou iloa e na o le pau lea o le nofoaga e talafeagai lelei mo aʻu. O faauōga māfana ma le alofa o uso ma tuafāfine ua toe faafouina ai loʻu olioli, ma o aʻoaʻoga ma taʻiala mai iā Ieova ma Iesu, ua ou toe maua ai se olaga e aogā.”

“E Avegofie Laʻu Amo, o Laʻu Avega Foʻi e Māmā Ia”

I le fuaitau o loo tatou iloiloina, na fetalai ai Iesu: “Ia outou faaaʻoaʻo iā te aʻu.” O le faaaʻoaʻo iā Iesu, ua avea ai i tatou ma ona soo, ma tatou te amoina lana amo pe a tuuina atu o tatou ola iā Ieova ma papatisoina. (Mataio 28:19, 20) E tāua tele lo tatou auai e lē aunoa i sauniga pe a fia avea pea i tatou ma soo o Iesu. Aiseā? Auā o na sauniga o loo aʻoaʻoina ai i tatou e uiga iā Iesu, i ana aʻoaʻoga, ma auala o loo ia aʻoaʻo atu ai.

O le ā le avega lea e finagalo Keriso tatou te amoina? E tutusapau ma le avega o loo ia amoina, o le faaeaga e fai le finagalo o Ieova. (Ioane 4:34; 15:8) E manaʻomia taumafaiga ina ia usitai i faatonuga a le Atua, peitaʻi e lē mamafa le amoina o lenei avega. E ono mamafa pe a tatou taumafai e amo i lo tatou lava malosi. Ae afai tatou te tatalo mo le fesoasoani  a le agaga o le Atua, ma fafagaina i tatou i taumafa faaleagaga o loo laulau mai i sauniga, ona tatou maua ai lea mai le Atua o “le matuā tele o le mana.” (2 Korinito 4:7) O le sauniuni mo sauniga ma faia se sao, o le a atili ai ona malosi lo tatou alofa mo Ieova. Ma afai e uunaʻia a tatou gaoioiga e le alofa, ona ‘lē mamafa’ lea o poloaʻiga a le Atua.—1 Ioane 5:3.

I le tulaga masani, e fesagaʻi tagata ma luʻi e pei o le saʻilia o seleni e ola ai, pe faalētonu foʻi le soifua mālōlōina, ma tau foʻia o latou lava faafitauli. Ae tatou te lē faalagolago i le na o le poto faaletagata e foʻia ai na faafitauli. E fesoasoani sauniga faa-Kerisiano ia ‘aua ai neʻi o tatou popole,’ auā o Ieova na te foaʻi mai mea tatou te manaʻomia, ma fesoasoani mai ina ia tatou manumalo i faafitauli. (Mataio 6:25-33) Ioe, o sauniga faa-Kerisiano o se faailoaga lea o le alofa o le Atua iā i tatou.

“O Aʻu Lē Agamalu ma le Loto Maulalo”

Sa fai ma masani a Iesu le asiasi atu i le sunako, o inā sa talanoaina ai le Afioga a le Atua. I se tasi o na asiasiga, na faitau ai e Iesu le tusi tāʻai a Isaia: “Ua i oʻu luga le Agaga o le Alii, auā ua na faauu mai iā te aʻu e folafola le tala lelei i ē matitiva; ua auina mai aʻu e ia e faamālōlō i ē loto momomo, e talaʻi le saʻolotoga i le tafeaga, ma ia pupula mata o ē tauaso, e tuu saʻoloto i ē ua faasauāina, e talaʻi le tausaga e finagalo malie mai ai le Alii.” (Luka 4:16, 18, 19) Maʻeu se olioli pe ana faapea e faalogo atu ua faapea mai Iesu: “O le aso nei ua taunuu ai lenei Tusi, o outou o faalogologo ai”!—Luka 4:21.

O loo leoleoina pea e le “Leoleo mamoe silisili” o Iesu ona soo. (1 Peteru 5:1-4) E ala i lana faatonutonuga, ua tofia ai e “le auauna faamaoni ma le mafaufau” ni tane latou te leoleoina faapotopotoga a Molimau a Ieova i le lalolagi aoao. (Mataio 24:45-47; Tito 1:5-9) O tane nei o loo “leoleo atu i le ekalesia a le Atua” i se uiga agamalu, ma avea ma faaaʻoaʻoga lelei i lo latou auai e lē aunoa i sauniga. O lou auai atu la i sauniga, e faaalia ai lou talisapaia o le auaunaga a nei “mea alofa i tagata,” lea e te faalaeiauina ai isi e ala i lou auai ma fai ai sou sao.—Galuega 15:30-33; 20:28; Efeso 4:8, 11, 12.

“Ona Maua Lea e Outou o le Mālōlōga mo Outou Agaga”

E faapefea ona mautinoa le faafouina o i tatou a o auai atu i nei sauniga faa-Kerisiano? O se tasi o auala, o le utagia o le fautuaga a Iesu ina ia uaʻi lelei atu la tatou faalogologo. (Luka 8:18) O tagata sa naunau e aʻoaʻoina mea, sa matuā usi lelei le faalogologo iā Iesu. Sa latou talosaga iā te ia ina ia faamalamalama mai le uiga o ana talafaatusa. O le iʻuga, na atili ai ona latou malamalama i ana aʻoaʻoga.—Mataio 13:10-16.

Ia faapena foʻi lou galala mo meaʻai faaleagaga, e ala i lou naunau e faalogologo i lauga o loo fai i sauniga. (Mataio 5:3, 6) Ina ia mafai ona uaʻi lelei atu lou mafaufau, taumafai e faalogo lelei ma mulimuli i le auala o loo faamatala mai ai e le failauga manatu o lana lauga. Tuufesili ifo lou mafaufau i fesili nei: ‘E faapefea ona ou faatatauina nei manatu i loʻu olaga? E faapefea ona ou faaaogā e fesoasoani ai i isi? O le ā se talafaatusa e mafai ona ou faamatala ai lenei manatu?’ Taumafai e suʻe lau Tusi Paia i mau o loo faaaogā e le failauga e lagolago ai ona manatu autū. Afai e lelei lau faalogologo, o le a telē foʻi le faafouina o oe i mea o loo e aʻoaʻoina mai sauniga.

Pe a tuua le sauniga, talatalanoa ma isi i le polokalame o le sauniga. Taulaʻi i mataupu sa fai ma le auala e mafai ona tou faatatauina ai. O ni talanoaga faalaeiau e atili ai ona faafouina outou i sauniga.

E tele māfuaaga lelei e tatau ai ona tatou faatasitasi i sauniga. Pe a uma ona e toe tilofaʻia aogā na faatoʻā uma ona talanoaina, seʻi e toe fesili ifo lava iā te oe, ‘O faapeʻī laʻu tali atu i le valaaulia a Iesu: “Ia outou ō mai iā te aʻu”?’

[Ata i le itulau 11]

Po o iai nisi mea o faalavelave atu i lou auai i le sauniga?