Maua le Faamoemoe i se Lalolagi ua Tumu i Puapuaga

“UA SILI atu le tomai ma le malosi o tagata e fai ai mea mo le lelei o isi ma foʻia faafitauli masani, na i lo se isi lava taimi.” O le manatu lenā o lē sa avea ma peresitene o le Iunaite Setete, o Bill Clinton i se fonotaga i Ottawa, i Kanata iā Mati 2006. Na ia taʻua, na amata ona iai se uiga alofa ma le fetausiaʻi o tagata o le lalolagi talu mai le galulolo i le 2004. E foliga mai, o se vaaiga mautinoa lea mo le lumanaʻi lelei, ua iai nei le lalolagi i se tulaga ua “fetausiaʻi tagata ma iai le uiga fia fesoasoani.”

Pe tatou te faatalitalia ea mala faalenatura e uunaʻia ai tagata e galulue mo se lumanaʻi e sili atu ona lelei? Po o le ola fetausiaʻi ea o se faavae maufaatuatuaina lea mo le faamoemoe i le lumanaʻi, i le filemu moni ma le saogalemu tumau?

Puna o le Faamoemoe Moni

Ua faaalia i faamaumauga o taumafaiga a tagata i le silia ma le ono afe tausaga, le mafatia pea o tagata ona o gaoioiga  a isi foʻi tagata. Ua talafeagai ai la le fautua mai o le Tusi Paia: “Aua tou te faatuatua i alii, po o le fanau a tagata, e lē o i ai se olataga.” (Salamo 146:3) O lo tatou faamoemoe atu i faalapotopotoga a lenei lalolagi, o meafaitino ma ona moomooga, e na o faanoanoaga e iʻu i ai. Aiseā? Auā “o le a mavae atu foʻi le lalolagi, atoa ma lona tuʻinanau.”—1 Ioane 2:17.

A o faagasolo senituri, ua avea pea le Atua ma faamoemoe mautinoa o ē amiotonu. Ua taʻua o ia i le Tusi Paia o “le faamoemoega o Isaraelu [anamua]” ma ‘le faamoemoe o tamā o Isaraelu,’ ma o le tele o nei taʻu e faasino atu i le faamoemoe, faatuatua, ma le mautinoa iā te ia. (Ieremia 14:8; 17:13; 50:7) Ua faalaeiau i tatou e le Tusi Paia ina ia ‘faatalitali iā Ieova.’—Salamo 27:14.

Ua faalaeiau i tatou e le Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” E tele māfuaaga e ao ai ona matuā faatuatua i lenei folafolaga, auā e lē liliu Ieova, e maufaatuatuaina, ma e tausisi foʻi i ana afioga. (Malaki 3:6; Iakopo 1:17) E finagalo o ia e te maua le mea e sili ona lelei, ma o le utagia i taimi uma o mea o i lana Afioga le Tusi Paia, o le a taʻitaʻia ai ma le manuia oe i nei taimi o popolega.—Isaia 48:17, 18.

O sē e mulimuli ma le loto atoa i le taʻitaʻiga a le Atua, e faatuatua i le folafolaga lenei: “Aua e te fefe, auā ou te iā te oe; aua le fetepatepaʻi, auā o aʻu o lou Atua; ou te faamalosia oe; e moni, ou te fesoasoani iā te oe; e moni, ou te taofia oe i loʻu lima taumatau e i ai le amiotonu.” (Isaia 41:10) O le tatalo faatauanau ma le manatunatu loloto i lenei faamautinoaga, e faamāfanafana ai ē e alolofa moni iā Ieova, auā e mafai ai ona fesagaʻia faigatā ma popolega.

Seʻi manatu iā Andrea, o se Molimau a Ieova ma o se tinā e toʻalua le fanau. Ua ia taʻua: “E na o le tatalo ma le manatunatu loloto i folafolaga a Ieova, na ou malosi ai e tali atu i taimi e lē mautonu ai loʻu olaga. A ou faamuamua pea Ieova i loʻu olaga, o le a faigofie atu la ona tumau ai pea.”

Ia Faamalosia Lou Faamoemoe iā Ieova

Na faamatilatila e se faisalamo le tāua o le faamoemoe iā Ieova: “Ua tele le filemu o ē naunau i lau tulafono; e leai foʻi se mea e tausuai ai i latou.” (Salamo 119:165) O le suʻesuʻe faamaoni o le Afioga a le Atua, e fesoasoani e faatumu ai lou mafaufau ma le loto i mea aogā faaleagaga, o ‘mea uma ua moni, taʻuleleia, tonu, mamā, matagofie, logoleleia, lelei, ma viia ai.’ A e taumafai faamaoni e faalogo, aʻoaʻoina se mea, talia, ma faia nei mea, ‘ona iā te oe lea o le Atua e ona le manuia.’—Filipi 4:8, 9.

Ua taʻua e Ioane e tusa ai o mea na oo iā te ia i le tele o tausaga: “Ina ia suia loʻu manatu i le lumanaʻi, e tāua ona iloa e manaʻomia se suiga tele i oʻu uiga ma mafaufauga a o leʻi oʻu ati aʻe se faiā ma se Atua e lelei atoatoa. E na o le pau le auala ou te ati aʻe ai lea faiā, o le avea ma se tagata faaleagaga. E aofia ai le avea o le Atua ma taulaʻiga i loʻu olaga ma iloa lona finagalo i mataupu, i le faitau o lana Afioga ma manatunatu loloto i ai.”

Afai e te inu i vai o le ola e faafouina ai o le upu moni o i le Tusi Paia, ona e maua lea o le vaifofō ua faamaonia lona aogā e tetee ai le tele o mea leaga ua saputu mai i faasalalauga i aso taʻitasi. O le faatatauina o mea o i le Tusi Paia, e faamalosia ai foʻi faiā a lou aiga ma faaitiitia ai popolega. Ua folafola mai foʻi e le Atua, ua ia nofo sauni e “fesoasoani iā te i latou o ē ua sao o latou loto iā te ia.” (2 Nofoaiga a Tupu 16:9) O le a ia tauaaoina mea i se auala e te lē toe popolevale ai.

Ua taʻua e Fineaso o lē na ola i taimi o taua ma fasiotiga tagata: “Na ou iloa e ao ona tuu atu loʻu ola i aao alofa o Ieova. O le piiama i taʻiala o le Tusi Paia na faasaoina ai aʻu mai le  tele o faafitauli.” O le a fesoasoani Ieova e ave ese ou mafatiaga pe a e matuā faatuatua iā te ia. (Salamo 18:29) O se tamaitiiti e māfana lana faiā ma ona mātua, e na te matuā talitonuina i laʻua ma e na te lagona le saogalemu i la laʻua tausiga e oo lava i taimi ua maʻi pe aafia ai i se faafitauli. E faapena foʻi ou faalogona pe a e talia le valaaulia e faatalitali pe faamoemoe atu iā Ieova.—Salamo 37:34.

Se Faavae Mautinoa o le Faamoemoe

Na fetalai Iesu i ona soo: “Ia faapea outou ona tatalo, Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:9, 10) O lenā Malo i le lagi lea ua pulea e Iesu Keriso, o le a faailoa mai ai le tonu o le pule silisili ese a le Atua i le lalolagi.—Salamo 2:7-12; Tanielu 7:13, 14.

O le tele o māfuaaga e fefefe ai lea ua aafia ai vala uma o le olaga i aso nei, o se faailoaga manino lea o le manaʻomia ona faalaa mai o le Atua. O se mea e fiafia ai, ua lata mai lenā taimi! Ua tuuina atu le pule iā Iesu lea ua faanofotupu e le Atua o se Tupu ma o le Mesia, e faamaonia ai le tonu o le pule silisili ese a Ieova ma faapaiaina Lona suafa. (Mataio 28:18) O le a lē pine ae pule mai le Malo i le lalolagi e aveesea pogai uma o le fefefe ma le popole o tagata. Ua taʻua i le Isaia 9:6 agavaa e faaalia ai le talafeagai ona avea o Iesu ma Pule e aveesea o tatou popolega. O se faaaʻoaʻoga, ua taʻua o ia o le “Tamā o le faavavau,” ‘Faipule [po o le Faufautua] silisili,’ ma le “Alii o le filemu.”

Seʻi manatu i le faaupuga logomālie o le “Tamā o le faavavau.” E taʻu mai ai, ua iai le mana ma le pule iā Iesu, ma lona naunautaʻiga e avatu i ē usiusitai le faamoemoe o le ola e faavavau i le lalolagi, e ala i aogā o lana taulaga togiola. O lona uiga, o le a tuusaʻoloto i latou mai le agasala ma le lē lelei atoatoa lea na tuufaasolo mai iā Atamu lē na uluaʻi agasala. (Mataio 20:28; Roma 5:12; 6:23) O le a faaaogā foʻi e Keriso lana pule mai i le Atua e toe faatutū ai ē na maliliu.—Ioane 11:25, 26.

Na faamaonia le avea o Iesu ma ‘Faipule [po o le Faufautua] silisili’ a o iai i le lalolagi. O lona atamai i le Afioga a le Atua ma lona malamalama e sili atu e uiga i tagata, na ia silafia ai le auala e foʻia ai faafitauli o le olaga. Talu mai le taimi na ia nofotupu ai i le lagi, ua avea pea Keriso ma Faipule po o le Faufautua silisili, e galue o se faufautua i fesootaʻiga a Ieova i tagata. E atamai ma lelei atoatoa fautuaga a Iesu o i le Tusi Paia. O lou iloa ma lou talitonu i lenei manatu, o le a saʻoloto mai ai lou olaga i popolega ma mea e mataʻu ai.

Ua taʻua foʻi i le Isaia 9:6 Iesu o le “Alii o le filemu.” I lea tulaga, ua toe o se aga ona faaaogā lea e Keriso lona mana e aveesea ai mea lē tonu uma, i faiga faapolotiki, i le vafealoaʻi, ma le tamaoaiga. E faapefea? E ala i le ola o tagata i lalo o le pulega filemu a le Malo o le Mesia.—Tanielu 2:44.

O le a filemu e faavavau le lalolagi i le pulega a le Malo. Aiseā ua e mautinoa ai i lenei mea? E tatou te faitau i le pogai o i le Isaia 11:9: “Latou [tagatanuu o le Malo] te lē faia se mea leaga, latou te lē faaumatia foʻi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” O le a maua e tagata uma le poto saʻo e uiga i le Atua ma usiusitai iā te ia. Pe faafiafiaina oe e lenā faamoemoe? Afai o lea, aua le faatalatū e ave i fale le “malamalama o Ieova.”

E te maua le poto o le Atua lea e ati aʻe ai le faatuatua ma ola ai, i le iloilo o mea ua aʻoaʻo e le Tusi Paia e uiga i mea o tutupu i o tatou aso, ma le faamoemoe pupula ua folafola i le Tusi Paia. E matou te faalaeiauina la le faia o sau suʻesuʻega faale-Tusi Paia e lē totogia, lea ua ofoina atu e Molimau a Ieova o i lou vaipanoa. O se auala lenei e faaitiitia ai le fefe ma maua ai le faamoemoe moni i se lalolagi ua tumu i puapuaga.

 [Pusa/Ata i le itulau 7]

Ua Aumaia e le Pulega o le Malo le Faamoemoe

Ua tuuina atu iā Iesu Keriso, o le Tupu o le Malo o le Atua le mana ma le aiā e pule ai i le lalolagi uma. (Mataio 28:18) O le a ia faafoʻisia mai le tulaga lelei atoatoa o le siʻosiʻomaga. O le a ia aveesea foʻi maʻi ma faamaʻi. O galuega mamana na ia faia i le lalolagi, na faaatagia ai faamanuiaga e sili atu ona matagofie o lana pulega o se Tupu e lelei atoatoa ma maufaatuatuaina. O ā ni uiga o lenei Tupu ua fai ma Mesia ua taʻua i lalo e sili ona e fiafia i ai?

▪ Faigofie ona talanoa i ai.—Mareko 10:13-16.

▪ Fetuutuunaʻi ma lē faailoga tagata.—Mareko 10:35-45.

▪ Maufaatuatuaina ma lē manatu faapito.—Mataio 4:5-7; Luka 6:19.

▪ Amiotonu ma faimea tonu.—Isaia 11:3-5; Ioane 5:30; 8:16.

▪ Mafaufau loloto, magafagafa, ma loto maulalo.—Ioane 13:3-15.

[Ata i le itulau 4]

O le faitau o le Tusi Paia ma manatunatu loloto i ai, e tāmau ai iā i tatou le faamoemoe iā Ieova