“Ona Faamauina ai Lea o Ou Manatunatuga”

O SE tasi o fātuga a le faisalamo o Tavita na ia tatalo ai: “Le Atua e, ia e faia se loto mamā mo aʻu; ma ia e faafouina se loto mau i totonu iā te aʻu. Ia e faafoʻisia mai iā te aʻu le olioli o le olataga mai iā te oe; ia e taofimauina foʻi o aʻu ma le loto fiafia.” (Salamo 51:10, 12) Ina ua agasala o ia ma Patesepa, sa salamō Tavita ma ʻaiʻoi atu iā Ieova le Atua e faamamā lona loto ma tuuina i totonu o ia se loto lelei e fai le mea saʻo.

Pe e faia e Ieova se loto fou mo i tatou, e oo lava i le tulaga o le tuuina mai o se loto fiafia po o le faafouina? Po o le loto mamā e tatau ona tatou finafinau e maua ma puipuia? “O Ieova, na te tofotofoina loto,” ae o le ā le tele e fesoasoani mai ai o ia i mea e tutupu i o tatou loto? (Faataoto 17:3; Ieremia 17:10) O le ā le tele na te taaʻina ai o tatou olaga, uunaʻiga ma gaoioiga?

E faavalu ona faaaogā le suafa o le Atua i uluaʻi fuaiupu e iva o le Faataoto mataupu e 16, ua faaalia ai le auala e mafai ona taʻitaʻi ai e le Atua o tatou olaga ina ia ‘faamauina ai o tatou manatunatuga.’ (Faataoto 16:3) O loo taulaʻi atu i tiute tauave o se tupu po o se taʻitaʻi i fuaiupu e 10 e oo i le 15.

“Sauniga o le Loto”​—Matafaioi a Ai?

Ua faapea mai le Faataoto 16:1a: “O loo i le tagata sauniga o le loto.” E manino lava, o “sauniga o le loto” e patino lava i le tagata lava ia. E lē faavavega ona aumaia e Ieova se loto fiafia. E manaʻomia ni taumafaiga ina ia maua ai le poto saʻo i le Afioga a le Atua le Tusi Paia, ma mafaufau loloto i mea ua tatou aʻoaʻoina, ma ia ōgatusa o tatou manatunatuga ma Ieova.—Faataoto 2:10, 11.

Na faatoga atu Tavita mo se “loto mamā” ma se ‘loto ua faafouina,’ e faailoa mai ai lona amanaʻia o ona faanaunauga agasala ma e manaʻomia se fesoasoani mai le Atua e faamamā ai lona loto. Ona tatou te lē lelei atoatoa e iai taimi e faaosoosoina ai i tatou e faia “galuega a le tino.” (Kalatia 5:19-21) E manaʻomia le fesoasoani a Ieova ina ia “fasiotia o [tatou] itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeʻapeʻa.” (Kolose 3:5) E tāua tele le tatou tatalo mo le fesoasoani e ʻalofia ai le lolo atu i faaosoosoga ma aveesea ni faanaunauga leaga i o tatou loto.

Pe mafai ona tatou fesoasoani i isi i le ‘saunia’ o o latou loto? “O i ai lē soona tautala, e pei o tutuʻi i le pelu; a o laulaufaiva o ē popoto e mālōlō ai.” (Faataoto 12:18) E faapefea ona iā i tatou se laulaufaiva e mālōlō ai? Seʻi vaganā ua “mai iā Ieova le tali a le laulaufaiva” pe a tatou tautatala i upu moni faaleagaga.—Faataoto 16:1e

Ua faapea mai le Tusi Paia: “E sili le faaʻoleʻole o le loto i mea uma, ma ua matuā leaga lava.” (Ieremia 17:9) O o tatou loto faafaatusa e lologofie i le taʻuamiotonuina pe faasesēina foʻi i tatou lava. Na lapataʻi mai le tupu o Solomona: “O ala uma o le tagata, e lelei ia i lona lava manatu; a o Ieova, na te fuatia loto.”—Faataoto 16:2.

 O le alofa o le tagata iā te ia lava e mafai ona fai ai ni faamolemolega e ufiufi ai mea sesē, uiga faalētonu, ma lē iloa ai a tatou mea leaga. E lē mafai ona faasesēina Ieova. O loo ia fuatia loto. O le loto, o ou mafaufauga ma ou faanaunauga. E aafia o tatou loto faafaatusa i mea tatou te mafaufau ai, o tatou faalogona ma uunaʻiga. O o tatou loto e “tofotofoina” e Lē fuatiaina loto, ma na te iloiloina e aunoa ma le faapito. O se gaoioiga poto pe a tatou puipuia o tatou loto.

“Ia E Tuuina Atu iā Ieova o Au Galuega”

O le faia o ni fuafuaga e aofia ai mafaufauga o se gaoioiga o o tatou loto. E iai gaoioiga pe a uma ni manatunatuga. Po o le a taulau ea a tatou taumafaiga? Na faapea mai Solomona: “Ia e tuuina atu iā Ieova o au galuega; ona faamauina ai lea o ou manatunatuga.” (Faataoto 16:3) O le tuuina atu o a tatou galuega iā Ieova, o lona uiga tatou te talitonuina o ia, faalagolago iā te ia, ma mulimuli i lana taʻitaʻiga; ua pei ua faamatuu le tatou avega e amo e Ieova. Na pese le faisalamo: “Ia e tuuina atu lou ala iā Ieova, ma faatuatua iā te ia, ona faia lava lea e ia.”—Salamo 37:5.

Pe afai tatou te mananaʻo e faamauina a tatou galuega po o fuafuaga, e tatau ona saʻo le uunaʻiga ma ōgatusa ma le Afioga a le Atua. E lē gata i lea, e tatau ona tatou tatalo iā Ieova mo le fesoasoani ma lana lagolagosua, ma taumafai e fai le mea e gata mai ai lo tatou mafai i le mulimuli i taʻiala a le Tusi Paia. E tāua tele le ‘tuuina atu iā Ieova o mea tatou te popole vale ai’ pe a tatou fesagaʻi ma faafitauli auā ‘o ia lava na te tausia i tatou.’ ‘E na te lē tuuna e faavavau lē amiotonu ia faagaeetia.’—Salamo 55:22.

Ua Faia Mea Uma e Ieova mo Lona Finagalo

O le ā se isi mea e tupu pe a tuuina atu iā Ieova a tatou galuega? Ua faapea mai le tupu atamai: “Ua faia mea uma e Ieova, e iʻu ai lona lava finagalo.” (Faataoto 16:4a) O lē na foafoaina le vateatea o ia o se Atua o fuafuaga. Pe a tuuina atu a tatou galuega iā Ieova, o le a uigā ai o tatou olaga i galuega lelei e aunoa ma le iʻuvale. O le finagalo lea o Ieova mo le lalolagi ma tagata e faavavau. (Efeso 3:11) Sa ia fuafua ma foafoaina le lalolagi “ina ia ʻainā.” (Isaia 45:18) O lana uluaʻi fuafuaga mo le lalolagi ma tagata e mautinoa o le a faataunuuina. (Kenese 1:28) O se olaga e tuutoina i le Atua moni e toʻatasi e lē gata e faavavau ae uigā.

Ua fai e Ieova “o lē ua amio leaga foʻi mo le aso vale.” (Faataoto 16:4e) Na te leʻi foafoaina le leaga auā “e sao lava lana galuega.” (Teuteronome 32:4) Peitaʻi, ua ia faatagaina le latou soifua pea ma faaauau ona ola seʻia oo i lana taimi atofaina e faaoo mai ai le faasalaga. Mo se faaaʻoaʻoga na fetalai atu Ieova iā Farao o Aikupito: “O le mea lava lea  ua ou faatūina ai oe, ina ia ou faaali ai loʻu mana iā te oe, ma ia taʻua loʻu igoa i le lalolagi uma lava.” (Esoto 9:16) O mala e sefulu ma le faaumatiaga o Farao ma lana vaegaʻau i totonu o le Sami Ulaula ua faaalia ai le malosi e lē mafaatusalia o le Atua.

E mafai e Ieova ona faataunuuina ana fuafuaga i se auala e lē o iloa e tagata amioleaga o lana fuafuaga lenā. Na faapea mai le faisalamo: “Auā o le ita tele o tagata e viia ai oe; e te [Ieova] taofia foʻi le toe ita.” (Salamo 76:10) E faatagaina e Ieova ona fili e sauāina ana auauna, i le mea e tatau ai auā le aʻoaʻoina ma le toleniga o i latou. O le ā le mea e sili i nei mea, e tauaveina e le Atua.

E fesoasoani Ieova i ana auauna loto maulalo, ae faapefea i latou e faamaualuga ma loto maaa? Na faapea mai le tupu o Isaraelu: “E inosia e Ieova atoa uma ē ua loto faamaualuga; e tago lea lima i lea lima, a e lē faasaoina i latou.” (Faataoto 16:5) O ē “loto faamaualuga” e faatasitasi mo se felagolagomaʻi ae o le a lē faasaoina i latou mai le faasalaga. O se gaoioiga atamai le ati aʻe o le loto maulalo e tusa lava po o le ā le tele o mea e tatou te iloa, po o agavaa po o faaeaga ua tatou maua.

“O le Mataʻu Foʻi iā Ieova”

Ona o le tino augavale, e fai ai ma tatou faia mea sesē. (Roma 3:23; 5:12) O le ā o le a fesoasoani iā i tatou e ʻalofia ai le faia o ni fuafuaga e ono iai ni āuga lē lelei? Ua faapea mai le Faataoto 16:6: “Ua togiolaina le amiolētonu i le alofa ma le faamaoni; o le mataʻu foʻi iā Ieova, ua ʻalo ese ai tagata i le leaga.” E ui o le alofa ma le faamaoni o Ieova lea e faamagalo ai a tatou agasala, ae o le mataʻu iā te ia o le a tatou ʻalofia ai le faia o agasala. E tāua tele le ō faatasi o le alofa ma le talisapaia o le agaalofa o le Atua, ma ati aʻe le mataʻu ina ia aua le faia se mea e lē fiafia mai ai o ia!

E pāʻia o tatou loto i le mataʻu i le Atua pe a ati aʻe le migao ma le faaaloalo mo le malosi lē mafaatusalia o le Atua. Seʻi mafaufau i lona malosi o loo atagia i ana foafoaga! Na mafai ona fefulifulisaʻi manatunatuga o le tamā matua o Iopu i le tomānatu i foafoaga mataʻina a le Atua. (Iopu 42:1-6) Pe e lē faasaʻoa foʻi o tatou manatu pe a tatou faitau ma manatunatu i feutagaʻiga a Ieova ma ona tagata, lea o loo faamauina i le Tusi Paia? Na pese le faisalamo: “Ō mai ia, ia outou matamata i galuega a le Atua; e mataʻutia ia i mea na na faia i le fanau a tagata.” (Salamo 66:5) Aua neʻi o tatou manatu māmā i le agalelei o Ieova. Ina ua ‘fouvale Isaraelu, ma latou faatigā i lona Agaga Paia; ona liliu ai lea o Ieova ua toʻasā iā i latou, o ia lava na tau ma i latou.’ (Isaia 63:10) I le isi itu “a fiafia Ieova i ala o le tagata, ona faatupuina lea e ia o le leleiga ma ia o ē ita iā te ia.” (Faataoto 16:7) E mataʻina le puipuiga pe a mataʻu iā Ieova!

Na faapea mai le tupu atamai: “E sili ona lelei o se mea itiiti, a o i ai le amiotonu, i mea e tele pe a lē o i ai le tonu.” (Faataoto 16:8) Ua taʻua i le Faataoto 15:16: “E sili ona lelei o se mea itiiti, a o i ai le mataʻu iā Ieova, i le oloa tele, a o i ai le atuatuvale.” E ao ona tatou faaaloalo i le Atua ina ia tatou tumau ai i ala o le amiotonu.

“E Filifilia i le Loto o le Tagata Lona Ala”

Na faia le tagata ma tuuina i ai le filifiliga saʻoloto e filifili ai le mea saʻo ma le sesē. (Teuteronome 30:19, 20) E mafai e tatou loto faafaatusa ona iloiloina nei tulaga ma filifilia na o le tasi pe sili atu foʻi. Na faailoa mai e Solomona o le faia o filifiliga e patino i le tagata lava ia, i lona faapea mai: “E filifili i le loto o le tagata lona ala.” A uma “o Ieova na te faatonuina le mea e ui ai o ia.” (Faataoto 16:9) Ona e mafai e Ieova ona faatonutonu o tatou ala, o se gaoioiga poto la lo tatou saʻili atu i lana fesoasoani ina ia ‘faamauina ai o tatou manatunatuga.’

 Ua tatou iloa, o le loto e taufaaʻoleʻole ma e mafai ona faasesēina i tatou i manatunatuga sesē. Mo se faaaʻoaʻoga, e mafai e se tagata ua agasala ona taʻuamiotonuina ia lava. Na i lo le fulitua i ana agasala, e mafai ona faapea se tasi e alofa le Atua, e agalelei, e mutimutivale lona alofa ma loto faamagalo. “Ua fai ifo o ia i lona loto, Ua galo i le Atua; ua ʻalo ese ona fofoga; na te lē silafia e faavavau.” (Salamo 10:11) Peitaʻi, e lē tatau ma e iai lamatiaga pe a faauiga sesē le alofa mutimutivale o le Atua.

“O le Fua ma le Fua Faatautau ua Tonu, o ā Ieova Ia”

Na faapea mai Solomona ina ua suia mataupu e talanoa ai mai le loto ma gaoioiga a tagata i tupu: “Ua se upu a lē iite poto le upu ua i laugutu o le tupu; e lē tautala faapiʻopiʻo lona fofoga i le faamasinoga.” (Faataoto 16:10) E moni lenei manatu i le nofotupu o Iesu Keriso. O le a faavaeina lana pulega e ōgatusa ma le finagalo o le Atua.

Na faapea mai le tupu poto e faatatau i le puna o le faamasinotonu ma le amiotonu: “O le fua ma le fua faatautau ua tonu, o ā Ieova ia; o lana lava galuega o maa uma e fua aʻi o i le taga.” (Faataoto 16:11) E saunia e Ieova le fua ma le fua faatautau. O nei tapulaa e leʻi faia ina ia tutusa ma mea e manaʻo ai le tupu. A o iai Iesu i le lalolagi, na ia fetalai mai: “Ou te lē mafaia ona fai o se mea e tasi, na o aʻu; e faatatau laʻu faamasinoga i loʻu faalogo; ua tonu lava laʻu faamasinoga, auā ou te lē usiusitai i loʻu lava loto, a o le finagalo o lē na auina mai aʻu.” E mafai ona tatou faatalitalia le faia o le faamasinogatonu e le Atalii, o ia lea na tuuina i ai e le Tamā “le faamasinoga uma lava.”—Ioane 5:22, 30.

O le ā se isi mea e faatalitalia mai se tupu e sui tulaga iā Ieova? “O le mea e ʻinoʻino i ai tupu, e fai amio leaga; auā e faatumauina le nofoālii i le amiotonu.” (Faataoto 16:12) O le Malo faa-Mesia e pulea i taʻiala amiotonu a le Atua. E leai ni sootaga ma le “nofoālii o i ai amio leaga.”—Salamo 94:20; Ioane 18:36; 1 Ioane 5:19.

Mauaina o le Finagalo Malie o se Tupu

E faapefea ona tali atu tagatānuu i se tupu aloaʻia? Na faapea mai Solomona: “O le mea e fiafia ai tupu, o laugutu e tautala i upu tonu; ma lē ua tautala i upu saʻo, e alofagia lea e i latou. O le toʻasā o le tupu, o le sāvali o le oti lea; a o le tagata poto na te faalaulelei i ai.” (Faataoto 16:13, 14) Ua utagia ma teuloto e auauna a Ieova nei upu ma faaaluina le tele o lo latou taimi i le talaʻiga ma le faia o soo. (Mataio 24:14; 28:19, 20) Ua latou iloa o le faaaogāina o o latou fofoga i lea auala o le a faafiafiaina ai le Tupu faa-Mesia, o Iesu Keriso. O se gaoioiga poto le ʻalofia o mea e lē fiafia ai se tupu malosi faaletagata, ae ia faafiafia o ia. O se gaoioiga poto le saʻili i vala e taliaina ai i tatou e le Tupu faa-Mesia!

Na faapea atili mai Solomona: “O loo i ai le ola i le malamalama o fofoga o le tupu; o lona alofa mai, e tusa lea ma le ao o le uaga mulimuli.” (Faataoto 16:15) O “le malamalama o fofoga o le tupu” o lona uiga o lona finagalo malie, e pei lava o le ‘malamalama o fofoga o Ieova’ e faauiga atu i lona finagalo malie. (Salamo 44:3; 89:15) E pei lava ona avea ao ma faamautinoaga o le a maua ni vai mo meatotō, e faapena foʻi le alofa tunoa o se tupu, o se faamautinoaga lea o ni mea lelei o le a iai. O le a tele ni faamanuiaga o le a maua i o tatou olaga i le pulega a le Tupu faa-Mesia, e pei o faamanuiaga na maua i le pulega a le tupu o Solomona.—Salamo 72:1-17.

A o tatou faatalitalia le Malo o le Atua e pulea le lalolagi, ia tatou saʻili atu mo lana fesoasoani e faamamā o tatou loto. Ia tuuina atu lo tatou faatuatuaga iā Ieova ma ati aʻe le mataʻu mo ia. Ona tatou mautinoa lea o le a ‘faamauina o tatou manatunatuga.’—Faataoto 16:3.

[Ata i le itulau 18]

I le ā le itu ua fai ai e Ieova ʻo lē ua amio leaga mo le aso vale’?