Pe e Moni iā te Oe le Toe Tū?
Pe e Moni iā te Oe le Toe Tū?
“O le a toe tutū mai ē ua oti.”—GALUEGA 24:15, LT.
1. Aiseā e lē mafai ai ona ʻalofia le oti?
“I LENEI lalolagi e leai se mea e mautinoa seʻi vaganā ai le oti ma le faia o lafoga.” O le faamatalaga lenā na faia e le faipule Amerika o Benjamin Franklin i le 1789 lea na ofo ai nisi i lona poto. Peitaʻi e toʻatele tagata e lē faamaoni i le totogia o a latou lafoga. Ae o le oti e mautinoa e lē mafai ona ʻalofia e se tasi. Pe a leai se fesoasoani e iʻu ina tatou feoti uma. Ona e peiseaʻī e lē maʻona Seoli po o le tuugamau, o lea la e lē mataofia ai le feoti o tagata e oo lava i ē pele iā i tatou. (Faataoto 27:20) Peitaʻi, seʻi mafaufau i se manatu faamāfanafanaloto.
2, 3. (a) Aiseā e mafai ai e nisi tagata ona ʻalofia le oti? (e) O ā fesili o le a iloiloina i lenei mataupu?
2 Ua aumaia i le Tusi Paia le faamoemoe mautinoa o le toe tū i le ola. E lē na o ni moomooga, ma e leai se malosi i lenei lalolagi e mafai ona taofia le faataunuuina e Ieova o lea faamoemoe. E mautinoa e mafai e nisi tagata ona ʻalofia le oti. Aiseā? Ona o le “motu o tagata e toʻatele” e lē mafaitaulia o le a faasao mai “le puapuaga tele” lea ua matuā lata mai lava. (Faaaliga 7:9, 10, 14) O le a latou ola pea mulimuli ane ai, ma le faamoemoe e ola e faavavau. E mafai ona latou ʻalofia le oti. E lē gata i lenā, ‘o le a faaumatia le oti.’—1 Korinito 15:26.
3 E tatau ona tatou mautinoa i le toe tū e pei o le aposetolo o Paulo o lē na faapea mai: “O le a toe tutū mai ē ua amiotonu atoa ma ē ua amiolētonu.” (Galuega 24:15) Seʻi tatou iloiloina fesili e tolu e faatatau i le toe tū. Muamua, aiseā ua mautinoa ai lea faamoemoe? O lona lua, e faapefea ona faamāfanafanaina oe i le faamoemoe o le toe tū? O lona tolu, e faapefea ona aafia le auala o loo e ola ai i le taimi nei ona o lea faamoemoe?
O se Faamoemoe Mautinoa le Toe Tū
4. Ua faapefea ona tāua le toe tū i le finagalo o Ieova?
4 E iai ni vala e mautinoa ai le faamoemoe o le toe tū. Muamua, e tāua i le faataunuuina o mea o loo finagalo i ai Ieova. Manatua, na agasala tagata ona o Satani ma e lē mafai ona ʻalofia āuga o le oti. Na fetalai Iesu e faatatau iā Satani: “O le fasioti tagata ia talu le amataga.” (Ioane 8:44) Ae na folafola mai e Ieova lana “fafine” po o le faalapotopotoga faalelagi e pei o se faletua, o le a fanaua mai se “fanau” e tuʻimomomoina le ulu o le “gata tuai” ma faaumatia Satani. (Kenese 3:1-6, 15; Faaaliga 12:9, 10; 20:10) A o faasolosolo ona faailoa mai e Ieova lona finagalo lea e aofia ai le Fanau Faa-Mesia, na iloa ai e iai isi mea e faia e le fanau e ese mai le faaumatiaina o Satani. Ua faapea mai le Afioga a le Atua: “O le mea lava lea na faaalia mai ai le Alo o le Atua, ina ia faaumatia e ia galuega a le tiapolo.” (1 Ioane 3:8) O le oti ua māfua ona o le agasala tuufaasolo mai iā Atamu, o le galuega sili lea a Satani, lea e finagalo Ieova e aveesea e ala iā Iesu Keriso. O le mea lea, e tāua ai le taulaga togiola a Iesu ma le toe tū.—Galuega 2:22-24; Roma 6:23.
5. Aiseā o le a faamamaluina ai le suafa o Ieova e le toe tū?
5 E finagalo Ieova e faamamaluina lona suafa paia. Na taʻuleagaina e Satani le suafa o le Atua ma faia ni tala pepelo. Na ia faapea mai ma le pepelo, e “lē oti lava” Atamu ma Eva pe a la ʻaia le fua o le laau na faasā e le Atua. (Kenese 2:16, 17; 3:4) Talu mai lava lenā taimi, o loo faia lava e Satani ni pepelo faapena, e pei o le aʻoaʻoga sesē faapea e ola pea le agaga pe a oti le tagata. Peitaʻi e ala i le toe tū o le a faailoa e Ieova na pepelo uma. O le a ia faamaonia ai o ia lava o le Faaola ma Lē e Toe Faafoʻisia le ola.
6, 7. O ā lagona o Ieova i le toe faatutūina o tagata, ma e faapefea ona tatou iloa ona lagona?
6 E finagalo Ieova e faataunuuina le toe tū. Ua taʻu manino mai e le Tusi Paia lagona o Ieova i lea tulaga. O se faaaʻoaʻoga, seʻi manatu i upu faagaeeina a le tane faamaoni o Iopu: “Afai e oti le tagata, e toe ola mai ea o ia? Ou te faatalitali atu i aso uma o le taua ua tofia ai aʻu, seʻia oo ina suia o aʻu. Ia e valaau mai, ona ou tali atu ai lea iā te oe; ia e finagalo alofa i le galuega a ou aao.” (Iopu 14:14, 15) O ā uiga o ia upu?
7 Na iloa e Iopu pe afai e oti o ia, o le a moe o ia i le oti mo se taimi. Na ia manatu i lea taimi o le “taua,” o se taimi e faatalitali ai seʻia faatūina o ia. Na mautinoa e Iopu le toe tū. Na iloa e Iopu e iai lona mapusaga. Aiseā? Ona na ia iloa lagona o Ieova. E “finagalo” Ieova e toe vaai i ana auauna faamaoni. Ioe, e finagalo le Atua e toe faatutūina tagata amiotonu. O le a tuuina atu foʻi e Ieova le avanoa i isi e ola ai e faavavau i le Parataiso i le lalolagi. (Luka 23:43; Ioane 5:28, 29) Ona o le finagalo lea o le Atua, o ai sē e mafai ona taofia o ia?
8. Ua faapefea ona “faamaonia” mai e Ieova lo tatou faamoemoe i le lumanaʻi?
8 Ua faamautinoa e le toe tū o Iesu lo tatou faamoemoe mo le lumanaʻi. Ina ua faia se lauga a Paulo i Atenai, na ia faapea atu: ‘Ua faatūina e le Atua le aso e faamasinoina ai le lalolagi ma le tonu, e le tagata ua tofia e ia; o loo faamaonia mai ai e ia i tagata uma lava i lona toe faatū mai iā te ia i ē ua oti.’ (Galuega 17:31) Sa tauemu nisi na faalogologo i le lauga a Paulo ina ua ia taʻua le toe tū o ē ua oti. Peitaʻi e toʻalaiti i latou na talitonu. Atonu na uaʻi atu ona o lea ua faamautinoa mai lenei faamoemoe. Na faia e Ieova se vavega sili ina ua ia faatūina Iesu. Na ia toe faatūina lona Alo mai le oti o se agaga malosi. (1 Peteru 3:18) Ua sili atu le malosi o Iesu ina ua toe faatūina na i lo le taimi a o leʻi avea o ia ma tagata. Ona o le a ola pea e lē mafai ona oti, ma o lona mana e lona lua atu iā Ieova, ua iai la iā Iesu le faaeaga e faataunuu ai ni tofiga iloga mai lona Tāma. E faaaogā e Ieova Iesu mo le faia o isi uma toe tutū, po o le toe tū i le lagi po o le lalolagi. Na fetalai Iesu: “O aʻu nei o le toe tū ma le ola.” (Ioane 5:25; 11:25) Ua faamautinoa mai e Ieova le faamoemoe mo tagata faamaoni i le toe faatūina mai o lona Alo.
9. Ua faapefea i faamaumauga a le Tusi Paia ona faamausalī ai le moni o le toe tū?
9 Na faaalia le toe tū i luma o tagata ma o loo tusia i le Afioga a le Atua. O loo faamatala i le Tusi Paia le toe faatutūina o tagata e toʻavalu i le lalolagi. O nei vavega na faia i luma o tagata ae e leʻi natiaina. Na toe faatūina e Iesu Lasalo ua fā aso talu ona maliu, ma na faia i luma o tagata faavauvau, e aofia ai lona aiga, uō ma tuaoi. Na faamaonia ai na auina mai e le Atua Iesu ma lē mafai ai e ona fili, o taʻitaʻi lotu ona teena le toetū. Na i lo lea na latou taupulepule e fasioti Iesu ma Lasalo! (Ioane 11:17-44, 53; 12:9-11) Ioe, e tatou te mautinoa o le toe tū o se faamoemoe moni. Ua aumaia e le Atua iā i tatou faamaumauga o toe tū i le taimi ua mavae, ina ia faamāfanafana ma faamalosia ai lo tatou faatuatua.
Maua Faamāfanafanaga i le Faamoemoe o le Toe Tū
10. E faapefea ona tatou maua faamāfanafanaga mai le Tusi Paia e faatatau i le toe tū?
10 Pe e te fia maua se faamāfanafanaga pe a lata mai le oti? E maua faamāfanafanaga i tala o loo i le Tusi Paia o ē na toe faatutūina. O le faitauina o ia tala, mafaufau loloto i ai, ma faaata ia mea, e mafai ona moni ai le faamoemoe o le toe tū iā te oe. (Roma 15:4) O nei tala e lē o ni tala fatu. O mea moni na tutupu i tagata e pei o i tatou, na ola i se taimi ma se nofoaga moni. Seʻi tatou tilofaʻia puupuu se tasi o faaaʻoaʻoga o le toe tū—le toe tū muamua o loo faamauina i le Tusi Paia.
11, 12. (a) O ā mafatiaga na oo i le fafine ua oti lana tane i Sarefata, ma o le ā lana tali muamua? (e) Faamatala mai po o le ā na faia e Ieova e ala i lana perofeta o Elia mo le fafine.
11 Seʻi mafaufau i le vaaiga lenei. Sa nofo le perofeta o Elia mo ni vaiaso i le afeafe o le fale o se fafine ua oti lana tane i Sarefata. O se vaitaimi faanoanoa. Ua oo le lāmala ma le oge i le nuu. E toʻatele o le a feoti. Ua uma ona faaaogā e Ieova Elia e faia se vavega e tauia ai le faatuatua o lenei fafine loto maulalo. Ua toeitiiti oo i le taimi e leai ai se la meaʻai ma lana tama, ua toe tasi lava le ʻaiga o totoe, ae avatu loa e Ieova le mana iā Elia e fai ai se vavega ina ia mafai e le sapalai o le falaoamata ma le suāuu a le fafine ona tausi faavavega ai i laʻua. O lea ua iai o ia i se tulaga mafatia. Ua faafuaseʻi ona maʻi lana tama, ma e leʻi umi ae tō le mānava. Pagā le matuā mafatia o le fafine! E faigatā le ola e aunoa ma le fesoasoani faapea ma le lagolago a lana tane, ae o lea foʻi ua oti lana tama e toʻatasi. Ona o lona mafatia, na ia tuuaʻia ai Elia ma lona Atua, o Ieova! O le ā o le a faia e le perofeta?
12 E leʻi aʻoaʻia e Elia le fafine ua oti lana tane ona o lana tuuaʻiga sesē. Na i lo lea, na ia faapea atu: “Inā aumaia lau tama iā te aʻu.” Ina ua uma ona avaʻe iā te ia i le afeafe, ona tatalo pea lea o Elia mo le ola o le tama ina ia toe faafoʻisia. Ona gaoioi loa lea o Ieova! Seʻi mafaufau i le fiafia o foliga o Elia ina ua vaai atu ua toe mānava le tama. Na matala mata o le tama ma ua toe ola. Na ave ifo e Elia le tama i lona tinā ma faapea atu: “Faauta mai, ua ola lau tama.” Ua lē mafai ona faamatalaina le fiafia o le fafine. Sa ia faapea mai: “O lenei, ua ou iloa i lenei mea o le tagata o le Atua oe; o le afioga foʻi a Ieova ua oo mai i lou fofoga e moni lea.” (1 Tupu 17:8-24) Ua matuā faamalosia lona faatuatua iā Ieova ma lana auauna.
13. Aiseā e faamāfanafanaloto ai iā i tatou i aso nei le toe faatūina e Elia o le tama a le fafine ua oti lana tane?
13 O le mafaufau loloto i ia tala e mautinoa o le a faamāfanafanaina ai oe. E manino lava e mafai e Ieova ona faatoʻilaloina lo tatou fili o le oti! Seʻi tau ina mafaufau i le aso o le a olioli ai le fafine ua oti lana tane faatasi ai ma le faitau afe o isi o le a toe tutū i luga o le lalolagi! O le a tele foʻi le fiafia i le lagi auā ua fiafia Ieova e faatonutonuina lona Alo i le faataunuuina o le toe tū i le lalolagi atoa. (Ioane 5:28, 29) Po ua maliu sē e pele iā te oe? E ese le faamāfanafanaloto o le iloa e mafai e Ieova ona toe faatutūina ē ua maliliu!
Lou Faamoemoe ma Lou Olaga i le Taimi Nei
14. E faapefea ona aafia lou olaga i le faamoemoe o le toe tū?
14 E faapefea i le faamoemoe o le toe tū ona aafia ai lou olaga i le taimi nei? E faamalosia oe e lenei faamoemoe pe a e fesagaʻia ni faigatā, faafitauli, sauāga, po o tulaga lamatia. E manaʻo Satani ia e matuā fefe i le oti, lea e oo ai ina e loto malie e fesuiaʻi lou faamaoni mo se folafolaga lē mautū o le saogalemu. Manatua na fai atu Satani iā Ieova: “O mea uma foʻi ua i ai i le tagata, e avatua e ia e sui aʻi lona ola.” (Iopu 2:4) I le faia o lea faamatalaga ua taʻuleagaina ai e Satani i tatou uma, e aofia ai ma oe. Pe e moni o le a e lē toe auauna i le Atua pe a e fesagaʻia tulaga lamatia? O le mafaufau i le faamoemoe o le toe tū, e mafai ai ona faatumau lou naunau e faia pea le finagalo o lou Tamā i le lagi.
15. E faapefea ona faamāfanafanaina i tatou i fetalaiga a Iesu o loo i le Mataio 10:28 pe a fesagaʻi ma lamatiaga?
15 Na fetalai Iesu: “Aua foʻi tou te matataʻu i ē fasioti le tino, a e latou te lē mafaia ona fasioti le agaga; a e lelei ona outou matataʻu i lē ua mafai ona fano iā te ia le agaga atoa ma le tino i Kēna.” (Mataio 10:28) E lē tatau ona tatou fefefe iā Satani po o tagata na te faaaogāina. E moni, e ono iai i nisi le malosi e faaleagaina ai pe e oo ai foʻi le oti i tagata. Peitaʻi e lē tumau mea leaga latou te faia. E aveesea e Ieova so o se mea leaga na faia i ana auauna faamaoni, e oo lava i le toe faatutūina o i latou. Ua na o Ieova e tatau ona tatou matataʻu ma faaalia i ai le migao. Ua na o Ia e iai le mana e aveesea ai le ola ma faamoemoega uma mo le ola e faavavau, ma faaumatia le tino ma le agaga i Kēna. Peitaʻi e lē finagalo Ieova e oo iā te oe lea tulaga. (2 Peteru 3:9) E mautinoa lo tatou saogalemu i le avea ai ma auauna a le Atua ona o le faamoemoe o le toe tū. E tatou te maua le ola e faavavau pe a faaauau ona tatou faamaoni, ma e lē mafai ona aveesea e Satani ma ana ʻau.—Salamo 118:6; Eperu 13:6.
16. E faapefea i lo tatou manatu i le toe tū ona aafia ai mea e tatou te faamuamua?
16 Pe afai e moni le faamoemoe o le toe tū iā i tatou, e mafai ona suia ai le auala tatou te ola ai. E tatou te iloa “pe ola pe oti i tatou, o tagata lava o [Ieova] i tatou.” (Roma 14:7, 8) Pe a faatulaga mea e faamuamua i o tatou olaga, tatou te faatatauina le fautuaga a Paulo: “Aua foʻi tou te amio faatasi ma lenei lalolagi, a e peitaʻi ia liliuina i le toe fuataʻiina o outou loto, ina ia outou suʻesuʻe pe se ā le finagalo o le Atua, o mea ua lelei, ma le mālie, ma le atoatoa.” (Roma 12:2) E toʻatele tagata e faanatinati e faamalie faanaunauga uma, sini, ma so o se mea e oso faafuaseʻi aʻe. Ona latou te manatu i le olaga e puupuu, e latou te faanaunau ai e faia mea e fiafia ai, ma pe afai latou te auai i se tapuaʻiga, e mautinoa e lē ōgatusa ma le “finagalo o le Atua.”
17, 18. (a) Ua faapefea ona faamaonia e le Tusi Paia le puupuu o le olaga o le tagata, ae o le ā le finagalo o le Atua mo i tatou? (e) O le ā e uunaʻia ai i tatou e vivii atu iā Ieova i aso taʻitasi?
17 E moni, e puupuu le olaga. “E vave ona mavae atu ia, ma [tatou] lele ese,” atonu i le 70 pe 80 tausaga. (Salamo 90:10) O tagata e ola ma oti e pei o le mutia, e pei o le ata e mavae atu, e pei o se mea lē aogā. (Salamo 103:15; 144:3, 4) Peitaʻi e lē o le finagalo lea o le Atua ina ia tatou ola mo ni tausaga, maua le tomai ma le poto masani ona mamaʻi lea ma feoti. Na faia e Ieova le tagata ma tuu i ai le faanaunauga e ola e faavavau. Ua taʻua i le Tusi Paia: “Ua tuuina foʻi e ia le manatu i le lalolagi i o latou loto.” (Failauga 3:11) Pe e lē alofa le Atua, i lona tuuina mai o sea faanaunauga ae lē faataunuuina? E leai, auā o le “Atua o le alofa lava ia.” (1 Ioane 4:8) O le a ia faaaogā le toe tū ina ia mafai ai ona ola e faavavau tagata ua maliliu.
18 O le a tatou maua se lumanaʻi mautinoa ona o le faamoemoe o le toe tū. E lē manaʻomia ona tatou taumafai e faataunuu mea uma tatou te mananaʻo e fai i le taimi nei. E ao ona tatou “lē fetagofi” atoatoa atu i lenei lalolagi leaga. (1 Korinito 7:29-31; 1 Ioane 2:17) E lē pei i tatou o ē e leai se faamoemoe, auā ua iā i tatou se meaalofa matagofie, e tatou te iloa a faaauau ona faamaoni iā Ieova le Atua, o le a tatou ola e faavavau e viiviia o ia ma fiafia ai i le ola. O lea la, ia tatou vivii i aso taʻitasi iā Ieova, o Lē ua faamautinoa mai le faamoemoe o le toe tū!
O le a Faapefea Ona E Tali?
• O ā o tatou lagona e ao ona iai i le toe tū?
• O ā vala ua faamautinoa ai le faamoemoe o le toe tū?
• E faapefea ona e maua faamāfanafanaga mai le faamoemoe o le toe tū?
• E faapefea ona aafia lou olaga
ona o le faamoemoe o le toe tū?
[Fesili mo le Suʻesuʻega]
[Ata i le itulau 28]
Na iloa e Iopu e finagalo Ieova e toe faatutūina tagata amiotonu
[Ata i le itulau 29]
“Faauta mai, ua ola lau tama”