A Oo Ina Ulusinā Latou te Fua Mai Pea Faaleagaga

“O ē ua totōina i le fale o Ieova, . . . A oo ina ulusinā, latou te fua mai pea lava.”—SALAMO 92:13, 14.

1, 2. (a) O le ā le auala e masani ona faamatala ai ē ua matutua? (e) O le ā ua folafola mai e le Tusi Paia e faatatau i aafiaga o le agasala a Atamu?

SOIFUA MATUA, o le ā e oso aʻe i lou mafaufau i lenā faaupuga? Ua maanuminumi le paʻu. Ua leaga le faalogo. Ua vaivai vae ma lima. Po o se isi o vala o “aso leaga” e pei ona aumaia i le Failauga 12:1-7? Afai o le tulaga lea, e tāua ona manatua faamatalaga o loo i le Failauga mataupu e 12 i le tino matua, e lē o le finagalo lea o Ieova na iai muamua mo i tatou, ae o āuga o le agasala a Atamu.—Roma 5:12.

² O le soifua matua lava ia e lē o se malaia, auā a o faaauau ona ola, e manaʻomia foʻi ona faaauau tausaga. O le mea moni, o le tuputupu aʻe ma oo ina matua, o vala ia e manaʻomia i le olaga o mea ola uma. O āuga o le ono afe tausaga o le agasala ma le tino augavale o loo tatou vaaia i le taimi nei, ua toe o se aga ona avea lea ma mea e mavae atu, ma o le a ola fiafia ē usiusitai e pei lava ona fuafua ai i le amataga, auā o le a lē toe iai se faanoanoa ona o le soifua matua ma le oti. (Kenese 1:28; Faaaliga 21:4, 5) I lenā taimi, “e lē fai mai foʻi se tasi ua mau ai, Ou te maʻi.” (Isaia 33:24) O le a toe foʻi ē ua matutua i “ona pō o [lo latou] tauleʻaleʻa” ma o le a ‘toe ola lelei o latou tino e sili i le tama itiiti.’ (Iopu 33:25) Peitaʻi i le taimi nei, e ao i tagata uma ona tauivi ma le agasala na tuufaasolo mai iā Atamu. Ae o auauna a Ieova ua latou maua ni faamanuiaga a o faasolosolo ina matutua.

3. O ā auala e ‘fua mai ai pea lava’ se Kerisiano ua ulusinā?

³ Ua faamautinoa mai e le Afioga a le Atua iā i tatou, “o ē ua totōina i le fale o Ieova, . . . A oo ina ulusinā, latou te fua mai pea lava.” (Salamo 92:13, 14) Ua aumaia e le faisalamo i se gagana faafaatusa, le mea moni e faatatau i auauna faamaoni a le Atua, e faaauau ona latou agaʻigaʻi i luma, lauolaola, ma manuia faaleagaga, e ui ua fai ifo lo latou malosi. E tele ni faaaʻoaʻoga mai le Tusi Paia ma aso nei e faamaonia ai lea manatu.

“E Leʻi Alu Ese”

4. Na faapefea ona faaalia e le perofeta fafine o Ana lona tuutoina atu i le Atua, ma o le ā se faamanuiaga na ia maua?

⁴ Seʻi manatu i le perofeta fafine i le uluaʻi senituri o Ana. I le 84 o ona tausaga “e leʻi alu ese ia i le malumalu, a ua auauna o ia i le Atua i anapogi ma talosaga i le ao ma le pō.” E lē mafai ona nofo Ana i le malumalu auā o lona tamā e lē o se sa Levī a o le “itu aiga o  Asera.” Seʻi manatu i le tele o ana taumafaiga ina ia iai i le malumalu i aso taʻitasi mo le taulaga mū o le taeao seʻia oo i le taulaga mū o le afiafi! Na faamanuiaina Ana ona o lona tuutoina atu i le Atua. Sa iā te ia le faaeaga o le iai i le malumalu ina ua aumai e Iosefa ma Maria le pepe o Iesu e tuuina atu iā Ieova e tusa ai ma le Tulafono. Ina ua ia vaai atu iā Iesu, “ua faafetai atu i le Atua ma tautala iā te ia i tagata uma lava ē na faatali atu i le togiola i Ierusalema.”—Luka 2:22-24, 36-38; Numera 18:6, 7.

5, 6. O ā auala o loo faaalia ai e i latou ua afu le soifua le agaga e pei o Ana?

⁵ I aso nei, e toʻatele ē ua afu le soifua e pei o Ana e auai e lē aunoa i sauniga, o loo latou tatalo naunautaʻi mo le faaauilumaina o le tapuaʻiga moni, ma naunau maelega e talaʻia le tala lelei. Ua faapea mai se uso ua silia ma le 80 ona tausaga, e auai e lē aunoa ma lana avā i sauniga: “Ua fai ma a masani le auai i sauniga. E ma te lē fia mananaʻo e ō i se isi nofoaga. E ma te mananaʻo e auai i le mea o iai tagata o le Atua. O inā e maua ai lo ma fiafia.” Maʻeu se faalaeiauga mo i tatou uma!—Eperu 10:24, 25.

⁶ “Pe afai e iai so o se mea faaleagaga e mafai ona fai ai soʻu sao, ou te manaʻo e fai.” O le manatu lenā e tausisi i ai Tini, o se tuafafine ua silia ma le 80 tausaga ma ua maliu lana tane. Sa ia faapea atili mai: “Ioe, e iai taimi ou te faanoanoa ai, ae aiseā e faanoanoa ai fua isi pe a ou faanoanoa?” O ona laufofoga ataata na faaalia ai lona fiafia e malaga atu i isi atunuu mo sauniga faaleagaga e ati aʻe ai. I sana malaga e leʻi leva atu na ia faapea atu i ana uō: “Ua ta lē toe fia vaai i nisi maota tetele; Ua ou fia talaʻi!” E ui na te leʻi iloa le gagana a le atunuu, na mafai e Tini ona faaosofia le fiafia o tagata i le feʻau o le Tusi Paia. E lē gata i lenā, sa ia galue mo ni tausaga i se faapotopotoga e manaʻomia ai le fesoasoani, e ui e manaʻomia ai ona aʻo se gagana fou ma e lua itula e agaʻi atu ai i le sauniga ma toe foʻi mai i le fale.

Ia Faagaoioi Pea le Mafaufau

7. Na faapefea ona faaalia e Mose lona faanaunau e tuputupu aʻe pea lana faiā ma le Atua e ui ua loa lona soifua?

⁷ E maua le poto masani i le olaga a o faagasolo taimi. (Iopu 12:12) O le matua faaleagaga e lē maua ona ua loa le soifua. O lea la, na i lo le tau ina faalagolago i le poto na maua mai i le taimi ua mavae, o auauna faamaoni a le Atua e taumafai e ‘tupu pea lo latou poto’ a o faagasolo tausaga. (Faataoto 9:9) Na avatu e Ieova se tofiga iā Mose ina ua 80 ona tausaga. (Esoto 7:7) E tusa ai ma lona vaitaimi, o tausaga na ia soifua ai e lē masani ona oo i ai se isi auā na ia tusi: “O tausaga o matou olaga e fitugafulu ia tausaga; a e afai e valugafulu tausaga ona o le malosi.” (Salamo 90:10) E leʻi manatu lava Mose ua matua tele o ia e aʻoaʻoina ni mea fou. Ina ua uma le tele o tausaga o auauna i le Atua, fiafia i le tele o faaeaga, ma faataunuu tiute tauave tāua, na aioi atu Mose iā Ieova: “Ia e faailoa mai iā te aʻu lou ala, ina ia ou iloa oe.” (Esoto 33:13) Sa matuā naunau Mose e tuputupu aʻe pea lana faiā ma Ieova.

8. Na faapefea ona faagaoioi pea e Tanielu lona mafaufau a ua silia i le 90 ona tausaga, ma o ā iʻuga?

⁸ Sa suʻesuʻe ma mafaufau loloto pea le perofeta o Tanielu i tusitusiga paia i le silia i le 90 o ona tausaga. O mea na ia iloaina mai ana suʻesuʻega i “tusi” atonu e aofia ai le Levitiko, Isaia, Ieremia, Hosea, ma le Amosa, na uunaʻia ai o ia e tatalo faatauanau iā Ieova. (Tanielu 9:1, 2) Na tali mai lenā tatalo i se faamatalaga faagaeeina e faatatau i le afio mai o le Mesia ma le lumanaʻi o le tapuaʻiga mamā.—Tanielu 9:20-27.

9, 10. O ā mea na faia e nisi e faagaoioi ai pea o latou mafaufau?

⁹ E pei o Mose ma Tanielu, e mafai ona tatou taumafai e faagaoioi pea o tatou mafaufau  i le taulaʻi atu i mea faaleagaga po o le ā lava le umi tatou te mafai ai. E toʻatele o loo faia faapea. O Worth o se toeaina ua silia ma le 80 ona tausaga, e taumafai e iloa le malamalamaga faaleagaga o loo iai i le taimi nei o loo saunia mai e le “auauna faamaoni ma le mafaufau.” (Mataio 24:45) Na ia faapea mai: “Ou te matuā faapelepele i le upu moni, ma ou te fiafia e vaai i le tuputupu aʻe pea o le malamalama o le upu moni.” (Faataoto 4:18) E faapena foʻi Feleti, o lē ua silia ma le 60 tausaga o galue i le auaunaga faataimi atoa, ma e fiafia e amata ni talanoaga faale-Tusi Paia ma uso talitonu. Na ia faapea mai: “E tatau ona ou manatua pea manatu o le Tusi Paia. E uigā atu le Tusi Paia pe a e manatuaina pea, ma pe afai e mafai ona e faatulaga mea ua e aʻoaʻoina i “matua o upu e ola ai,” ona lē tau lea na o ni nai faamatalaga e te iloaina. O le a mafai ona e silafia ai le vaitaimi saʻo na tutupu ai na faamatalaga taʻitasi.”—2 Timoteo 1:13.

¹⁰ E lē faapea a loa le soifua ona lē mafai ai lea ona aʻoaʻoina ni mea fou ma ni manatu faigatā. Ua mafai e tagata ua silia ma le 60, 70, e oo lava i le 80 tausaga ona foʻia le faafitauli o le lē iloa faitau, ma ua mafai foʻi ona latou aʻoaʻoina se gagana fou. O nisi o Molimau a Ieova ua latou faia lea tulaga ma le sini ina ia mafai ona talaʻi le tala lelei i tagata o isi atunuu. (Mareko 13:10) Na filifili Harry ma lana avā ua latalata i le 70 o la tausaga e fesoasoani i le oganuu Potukali. Na faapea mai Harry: “O le mea moni lava e faigatā so o se galuega e fai pe a matutua.” Peitaʻi i ni taumafaiga maumauaʻi, na mafai ona la faia ni suʻesuʻega faale-Tusi Paia i le gagana Potukali. Ua tele tausaga o faia foʻi e Harry ni lauga i tauaofiaga itumalo i lana gagana fou, le gagana Potukali.

11. Aiseā ua iloiloina ai mea ua ausia e ē faamaoni ua loa le soifua?

¹¹ E moni e lē o tagata uma e iai le malosi po o le tulaga e fesagaʻia ai ia luʻi. Aiseā la e talanoa ai i mea ua ausia e nisi ua loa le soifua? E lē faapea e tatau ai ona tatou taumafai e ausia ia lava mea. Na i lo lea, o le agaga e pei ona tusi le aposetolo o Paulo i Kerisiano i Eperu e faatatau i toeaina faamaoni o le faapotopotoga: “Ia outou faaaʻoaʻo i lo latou faatuatua, ma ia mafaufau i le iʻuga o a latou amio.” (Eperu 13:7) Pe a tatou mafaufau i ia faaaʻoaʻoga o le maelega, e mafai ona faalaeiau ai i tatou e faataʻitaʻi i lo latou faatuatua lea na uunaʻia ai la latou auaunaga i le Atua. Na faamatala mai e Harry ua 87 ona tausaga le mea na uunaʻia ai o ia: “Ou te manaʻo e faaaogā lelei oʻu tausaga o totoe i le auaunaga iā Ieova.” O Feleti lea na taʻua muamua, na ia maua le faamalieina i lana auaunaga i Peteli. Na ia mātau: “E tatau ona e iloa le auala sili e te auauna ai iā Ieova ma tumau ai i lenā auaunaga.”

Tuutoina Pea e Ui ua Mou le Malosi

12, 13. Na faapefea ona tuutoina atu Pasili i le Atua e ui i suiga o lona malosi?

¹² E faigatā le fesagaʻi ma suiga o le malosi o le tino. Peitaʻi, e mafai ona tuutoina atu i le  Atua e ui i ia suiga. O se faaaʻoaʻoga lelei o lea tulaga o Pasili le Kiliata. I le 80 o ona tausaga, na ia faaalia le talimālō iā Tavita ma lana ʻau, i le avatu o meaʻai ma le fale e nonofo ai i le taimi o le fouvalega a Apisaloma. Ina ua toe foʻi Tavita i Ierusalema, na alu Pasili e momoli le tupu ma lana ʻau i Ioritana. Na ofo atu e Tavita iā Pasili se vaega o lona maota e nofo ai. O le ā le tali a Pasili? “Ua valugafulu oʻu tausaga i lenei aso; . . . e lagona ea e lau auauna ni aʻu mea e ʻai ma ni aʻu mea e inu? ou te toe lagona ea le leo o tane pepese ma fafine pepese? . . . Silasila foʻi o lau auauna o Kimeama, e alu atu o ia ma loʻu alii le tupu, e te faia iā te ia se mea e te finagalo i ai.”—2 Samuelu 17:27-29; 19:31-40.

¹³ E ui ua mou atu le malosi o Pasili, ae na ia faia le mea na te mafaia e lagolago ai le tupu faauuina a Ieova. Na ia iloa o lana tofo ma lana faalogo ua lē o toe tutusa ma le tulaga sa iai muamua, ae e leʻi tigā lona loto ona le tulaga ua oo iai. Na i lo lea, na ia lē manatu faapito ma faapea atu, ia maua e Kimeama faamanuiaga ua ofo atu. O lea tulaga na iloa ai le agalelei ma le ituaiga tagata e iai Pasili. I le pei o Pasili, e toʻatele i latou ua loa le soifua i aso nei o loo faaalia le agaga lē manatu faapito ma le agalelei. E latou te faia le mea e mafai e lagolago ai le tapuaʻiga moni, auā ua latou iloa “o taulaga faapena e fiafia ai le Atua.” Maʻeu se faamanuiaga o lo tatou faatasi ma i latou faamaoni!—Eperu 13:16.

14. E faapefea i le soifua matua o Tavita ona faaopoopo i le uigā o upu o loo i le Salamo e 37:23-25?

¹⁴ E ui na tele taimi na suia ai tulaga o mea na oo iā Tavita a o faagasolo tausaga, ae na ia mautinoa e lē suia le tausiga a Ieova i ana auauna faamaoni. A o faaiʻuiʻu lona soifuaga, na fatu e Tavita le pese lea ua iloa i aso nei o le Salamo 37. Sei tomānatu foʻi, o loo mafaufau Tavita, o loo tā lana kitara ma usu lenei pese: “E mau iā Ieova le savali o le tagata; e fiafia foʻi o ia i lona ala. Afai e paʻū ia, e lē taatia pea ia i lalo; auā e taofia lona lima e Ieova. Ua ou toeaina aʻu nei, sa aʻu taulealea; a ou te leʻi iloa se tagata amiotonu na lafoaʻiina, po o ana fanau ua ʻaiisi i latou.” (Salamo 37:23-25) Na silafia e Ieova e tatau ona faaaofia tausaga o Tavita i lenei salamo faagaeeina. Maʻeu le loloto o faalogona e oso aʻe ona o ia upu e sau mai le loto!

15. Na faapefea ona faia e le aposetolo o Ioane se faaaʻoaʻoga mataʻina o le faamaoni e ui i le suia o le tulaga o mea ma lona soifua matua?

¹⁵ O se isi faaaʻoaʻoga mataʻina o le faamaoni, o le aposetolo o Ioane e ui ina suia le tulaga o mea mo ia ma lona soifua matua. Ina ua toeitiiti atoa le 70 tausaga o auauna i le Atua, na faaaunuua Ioane i le motu o Patamo ona o le molimau i le “afioga a le Atua ma le mau iā Iesu.” (Faaaliga 1:9) Ae e leʻi māʻea ai i inā lana galuega. O tusitusiga uma a Ioane i le Tusi Paia na tusia ina ua faaiʻuiʻu lona soifuaga. A o iai i Patamo, na avatu iā te ia le vaaiga matuā mataʻina o le Faaaliga, lea na ia faamauina ma le faaeteete. (Faaaliga 1:1, 2) E manatu na tatalaina o ia i le taimi o le pulega a le emeperoa Roma o Nerva. E tusa o le 98 T.A., atonu i le 90 po o le 100 o ona tausaga, na tusi ai e Ioane le Evagelia ma isi tusi Eleni e tolu o loo faaigoa i lona igoa.

 Talaaga Lē Masuia o le Onosai

16. E faapefea ona faaalia e i latou e lē lelei la latou tautala lo latou tuutoina atu iā Ieova?

¹⁶ O le tapulaa o mea e mafai ona fai, e tele auala e oo mai ai, ma e eseese foʻi lo latou tugā. O se faaaʻoaʻoga o nisi ua lē o toe atoatoa le malosi e oo lava i le talanoa atu i isi. Peitaʻi latou te manatua pea le alofa o le Atua ma lona agalelei. E ui e lē tele sa latou tala e fai mai, ae i totonu o o latou loto o loo latou fai atu iā Ieova: “Ua tele lava loʻu naunau i lau tulafono; ou te mafaufau i ai i le aso atoa.” (Salamo 119:97) E silafia e Ieova i latou o loo “mafaufau i lona suafa,” ma e na te talisapaia le itu e ese ai i latou mai le toʻatele o tagata, o ē e lē o mafaufau i ona ala. (Malaki 3:16; Salamo 10:4) E ese le faamāfanafanaloto o le iloa e fiafia Ieova i manatunatuga o o tatou loto!—1 Nofoaiga a Tupu 28:9; Salamo 19:14.

17. O le ā se mea mataʻina ua ausia e i latou ua auauna iā Ieova mo le tele o tausaga?

¹⁷ Aua neʻi galo, ua ausia se mea mataʻina e i latou o loo auauna ma le faamaoni iā Ieova mo le tele o tausaga, ma e lē mafai ona ausia i se isi auala—o le talaaga lē masuia lea o lo latou onosai. Na fetalai Iesu: “O lo outou onosai tou te maua ai lo outou ola.” (Luka 21:19) E tāua le onosai mo le mauaina o le ola e faavavau. O outou o ē ua ‘faia le finagalo o le Atua’ ma ua faamaonia lo outou faamaoni i o outou olaga, e mafai ona taulaʻi atu i le mauaina o le “mea na folafolaina.”—Eperu 10:36.

18. (a) O le ā le silafaga a Ieova e tusa ai o ē ua loa le soifua? (e) O le ā o le a iloiloina i le mataupu o loo sosoo mai?

¹⁸ E tāua iā Ieova lau auaunaga ma le loto atoa e tusa lava po o le ā le tele po o le itiiti e te mafaia. E ui i tulaga ua tupu i le “tagata i fafo” pe a matua se tasi, e faafouina “le [tagata] i totonu” mai i lea aso ma lea aso. (2 Korinito 4:16) E mautinoa e talisapaia e Ieova mea na e ausia i le taimi ua mavae, ma e manino mai foʻi e na te talisapaia mea o loo e faia i le taimi nei mo lona suafa. (Eperu 6:10) O le a tatou iloiloina aafiaga o lenei faatuatua i le mataupu o loo sosoo mai.

O le a Faapefea Ona E Tali?

• O le ā le faaaʻoaʻoga lelei na faia e Ana mo Kerisiano ua loa le soifua i aso nei?

• Aiseā e lē avea ai le soifua matua ma itu e tapulaa ai mea e mafai ona ausia e se tasi?

• E faapefea ona tuutoina atu pea i le Atua ē ua loa le soifua?

• O le ā le silafaga a Ieova i le auaunaga e avatu e i latou ua loa le soifua?

[Fesili mo le Suʻesuʻega]

[Ata i le itulau 23]

Na iloa e Tanielu o lē ua loa lona soifua le umi o le faaaunuua o Iuta, i mea na tusia i “tusi”

[Ata i le itulau 25]

E toʻatele ua loa le soifua ua avea ma faaaʻoaʻoga lelei i le auai e lē aunoa i sauniga, maelega i talaʻiga, ma naunau e aʻoaʻo ni mea