Fesili Mai le ʻAufaitau

Po o faamautinoa mai i le Faataoto 22:6 faapea, afai e lelei ona toleni fanau Kerisiano, o le a lē teʻa ese lava ma ala o Ieova?

Ua faitauina le fuaiupu lenei e faapea: “Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.” Pe a piʻo se tātupu e oso aʻe, o le a aafia ai lona tupu aʻe o se laau. E faapena foʻi fanau e lelei ona toleni, e sili atu ona naunau ia faaauau ona auauna iā Ieova a o tutupu aʻe. O loo silafia e mātua, e tele taimi ma taumafaiga e alu i le faia o lea toleniga. Ina ia avea a latou fanau ma soo Kerisiano, e tatau i mātua ona aʻoaʻo lelei, apoapoaʻi, faalaeiau, ma aʻoaʻi i latou faapea ma le faataatia o se faaaʻoaʻoga lelei. E ao ona latou faia pea lava pea ma le alofa lea tulaga mo le tele o tausaga.

Po o lona uiga ea, afai o le a lē toe fia auauna se tamaitiiti iā Ieova, e taʻu mai ai ua faalētonu le toleniga na fai e mātua? I nisi o tulaga, atonu na faalētonu mātua i le tausia aʻe o fanau i aʻoaʻiga ma apoapoaʻiga a Ieova. (Efeso 6:4) Ae i le isi i tu, e lē o faamautinoa mai e le faataoto faapea, o le a faamaoni fanau i le Atua, pe a lelei le toleniga na fai e mātua. E lē mafai ona suia e mātua a latou fanau i so o se mea lava latou te mananaʻo i ai. O fanau e pei lava o tagata matutua, o loo iai foʻi le saʻolotoga e filifili ai ala o o latou olaga. (Teuteronome 30:15, 16, 19) E tusa lava po o ā taumafaiga maumauaʻi e fai e mātua, ae e lē faamaoni lava nisi o le fanau, e pei o Solomona lea na tusia le fuaiupu o loo iloiloina nei. E oo lava iā Ieova na iai ni ona atalii sa lē faamaoni.

O lea la, e lē uiga le mau faapea o tamaiti uma o le a “lē teʻa ese ai” i aʻoaʻoga ua latou maua, ae i sona tulaga lautele o le iʻuga lenā e masani ona oo i ai. Maʻeu se faalaeiau o lenei tulaga i mātua! E ao ona faagaeetia mātua i le iloa faapea, o a latou taumafaiga maumauaʻi i le toleniina o a latou fanau i ala o Ieova o le a maua ai iʻuga lelei. Ona e tāua tele la latou matafaioi ma e sili atu ona lelei la latou taaʻiga, ua faalaeiauina ai mātua ina ia fai ma le faamaoni lo latou tiute tauave.—Teuteronome 6:6, 7.

E tusa lava po ua lē toe auauna le fanau iā Ieova, ae o mātua e mataala i le toleniina o a latou fanau, e mafai ona faamoemoe o le a iai le taimi e toe faasaʻo ai e fanau o latou lava mafaufau. E malosi upu moni o le Tusi Paia, ma e lē vave ona galo i fanau le toleniga na faia e mātua.—Salamo 19:7.