Le Malosi o le Laulaufaiva

O LE laulaufaiva o le serafi e oo atu i le 18 inisi le umī, e fegalemulemuaʻi ma lava le malosi e taseʻi ai lau mai lālā o laau. A o le laulaufaiva o le tafolā, e tutusa le mamafa ma le elefane. Seʻi manatu i le malosi e manaʻomia, e faagaoioi ai le laulaufaiva o le tafolā!

E laʻitiiti le laulaufaiva o le tagata pe a faatusatusa i le telē ma le mamafa o isi laulaufaiva. Peitaʻi e sili ai le malosi o le laulaufaiva o le tagata. Ua faapea mai le Tusi Paia i lea vaega laʻitiiti o le tino o le tagata: “O le oti ma le ola, o loo i le pule a le laulaufaiva ia.” (Faataoto 18:21) E tatou te faalogo soo i tala e faatatau i le faaaogā sesē e isi o le laulaufaiva, e fafau aʻe ai ni pepelo po o ni molimau pepelo lea e oo mai ai ni faanoanoaga, ma e iʻu ai lava ina feoti ai nisi o loo mamā mai ia pepelo.

Ua faapena foʻi ona toʻatele ni faigāuō lelei ua malepelepe ona o faamatalaga soonafai. Ua tigā faalogona i upu masoā. Na tagi Iopu ma faapea mai: “Tou te faatigāina ea loʻu loto, ma outou tuʻimomomoina aʻu i upu seʻia afea?” (Iopu 19:2) Na faaata mai e le soo o Iakopo le mataʻutia o le laulaufaiva pe a lē lelei ona puleaina i lona faapea mai: “E faapea foʻi le laulaufaiva, o le mea itiiti lea, a ua lafo upu faasausili. Faauta, o le afi itiiti e mū ai le vao laau e tele! O le laulaufaiva o le afi lea.”—Iakopo 3:5, 6.

Ae i le isi itu, e iai foʻi le malosi o le laulaufaiva e faaola ai. O upu e ati aʻe ma faamāfanafana ai ua fesoasoani i nisi e manumalo ai mai le lotovaivai ma le pule i le ola. O fautuaga aogā e faaaogā lelei, ua mafai ai e i latou na faaaogāina fualaau faasāina ma faia soligatulafono, ona ʻalofia le oti faafuaseʻi a o leʻi taitai le olaga. O le fua o le laulaufaiva o lē amiotonu “o le laau o le ola lea” ma “o le upu ua fai faatatauina, o moli auro ia i ato ario togitogi faamamanuina.”—Faataoto 15:4; 25:11.

Peitaʻi, o le auala sili e faaaogā ai le laulaufaiva, o le vivii atu lea iā Ieova le Atua, i le faalauiloaina o le tala lelei o le Malo o le Atua, ma le aʻoaʻoina o tagata i upu moni o i le Tusi Paia. Aiseā? Na fetalai Iesu: “O le ola [e] faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”—Ioane 17:3; Mataio 24:14; 28:19, 20.