Ua Faaalialia le Pogai o Mea Leaga!

I LE uluaʻi senituri, e toʻatele tagata Iutaia na faatalitali i le taunuu mai o le Mesia na folafolaina. (Ioane 6:14) Ina ua afio mai Iesu i le lalolagi, na ia aumaia faamāfanafanaga ma faateleina le malamalama i le Afioga a le Atua. Na ia faamālōlō maʻi, fafaga ē fia aai, faafilemu matagi, ma toe faatutū ē na maliliu. (Mataio 8:26; 14:14-21; 15:30, 31; Mareko 5:38-43) Na ia fetalaia foʻi afioga a Ieova ma folafola atu le ola e faavavau. (Ioane 3:34) O mea na fetalai ma faia e Iesu, na faaalia ai o ia lea o le Mesia o le a faasaʻolotoina tagata mai le agasala ma ona āuga leaga.

O le mea moni, o taʻitaʻi lotu Iutaia o i latou na e ao ona muamua talia Iesu, faalogo iā te ia, ma talia lana taʻitaʻiga. Peitaʻi latou te leʻi faia faapea. Na latou feita, faasauā, ma taupulepule e fasiotia o ia!—Mareko 14:1; 15:1-3, 10-15.

Na tonu la le taʻusalaina e Iesu o na tane agasala. (Mataio 23:33-35) Ae na silafia e Iesu e iai se isi e tatau foʻi ona taʻusalaina ona o mea leaga o loo i loto o nei tane. Na ia fetalai atu iā i latou: “O outou nai lo outou tamā le tiapolo, tou te fia faia foʻi mea e tuʻinanau i ai lo outou tamā. O le fasioti tagata ia talu le amataga, e lē tu lava ia i le upu moni, auā e lē o i totonu lava iā te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.” (Ioane 8:44) E ui na silafia e Iesu e mafai e tagata ona faia gaoioiga leaga, ae sa ia faasino atu i le pogai autū o mea leaga, o Satani le Tiapolo.

O le fetalai atu e faapea e leʻi ‘tū lava Satani i le upu moni,’ na faaalia ai e Iesu sa avea muamua lenei agelu ma auauna faamaoni a le Atua, ae ua liliu ese mai le ala saʻo. Aiseā na fouvale ai Satani iā Ieova? Auā sa ia totō ni lagona faamaualuga iā te ia, ma manatu ai e ao ona avatu iā te ia le tapuaʻiga lea e na o le Atua e avatu i ai. *—Mataio 4:8, 9.

Na iloa le fouvale o Satani i le faatoʻaga i Etena ina ua ia faasesē Eva e ʻai le fua faasāina. O le faia o le uluaʻi pepelo ma le taufaaleaga o Ieova, na faia ai e Satani o ia lava ma “tamā o le pepelo.” O le faasesēina foʻi o Atamu ma Eva e aua neʻi usiusitai, na ia faapogaia ai lo la agasala ma iʻu ai i lo la feoti ma le feoti o tupulaga na faasolo mai iā i laʻua. Na faia ai loa e Satani o ia lava ma “fasioti tagata,” o le fasioti tagata sili ona leaga ua loa ona iai!—Kenese 3:1-6; Roma 5:12.

Na oo atu foʻi taaʻiga leaga a Satani i le lagi, lea na ia uunaʻia ai isi agelu e faatasi ma ia i le  fouvalega. (2 Peteru 2:4) I le pei o Satani, na iai ni faanaunauga lē talafeagai o nei agelu leaga i tagata. I lo latou tulaga, o ni faanaunauga e lē tatau ona iai i feusuaʻiga lē mamā, e iai ni āuga e sili ona leaga.

Ua Tumu le Lalolagi i Mea Leaga

Ua taʻu mai iā i tatou e le Tusi Paia: “Ina [ua] amata ona faatoʻateleina o tagata . . . ma ua fanauina e i latou o afafine, ona vaavaai lea o atalii o le Atua i afafine o tagata, ua lalelei lava i latou; ona fai avā ai lea o i latou i fafine uma ua latou loto i ai.” (Kenese 6:1, 2) O ai na “atalii o le Atua”? O agelu, e lē o ni tagata. (Iopu 1:6; 2:1) E faapefea ona tatou iloa? Muamua, na faaipoipo tagata pe tusa o le 1,500 tausaga ua mavae, ma e leʻi manaʻomia fua ona taʻua na mea. O le uaʻi atu la i feusuaʻiga a “atalii o le Atua “ ia na liu tagata ma ave “afafine o tagata,” ua faasino atu ai le tala i se mea e lē talafeagai ma lē masani ai.

Ua faamaonia lenei tulaga e lē masani ai i fanau na maua mai i nei feusuaʻiga. Na taʻua o tagata maualuluga, na ola aʻe o ni tagata itulua ma avea o ni sauai. Sa avea foʻi o ni ē pule sauā. O “tagata maualuluga” o lona uiga o “tagata fasi tagata,” po o “ē e māfua ai ona paʻuū isi i lalo.” O nei tagata sauā, ua faamatalaina o ni “tagata malolosi ia ma le taʻua anamua.”—Kenese 6:4.

Na oo ina sili atu le leaga o nei tagata maualuluga ma o latou tamā i se tulaga e leʻi iai muamua. Ua taʻua i le Kenese 6:11: “Ua leaga lava le lalolagi i luma o le Atua, ma ua tumu . . . i le sauā.” Ioe, na faataʻitaʻi e tagata faiga sauā ma uiga leaga o ia tagata fou i na vaitaimi.

Na faapefea ona faaoo atu e tagata maualuluga ma o latou tamā nei taaʻiga sili ona leaga i tagata? E ala i le faatosina o tagata i o latou faanaunauga agasala. O le ā le iʻuga? “O tagata uma ua leaga . . . a latou amio i le lalolagi.” O le iʻuga, na faaumatia e Ieova lenā lalolagi i se Lolo tele, ae faasaoina na o Noa lē amiotonu ma lona aiga. (Kenese 6:5, 12-22) Ae na toe foʻi agelu i le lagi ua matuā faalumaina. I le avea o ni agelu ua iai i se tulaga paʻū maulalo, ua latou tetee ai pea i le Atua ma lona aiga amiotonu o agelu faamaoni. Na amata mai i lenā taimi ona faasā e le Atua le toe liutino tagata o agelu leaga. (Iuta 6) Ae ua tumau pea le malolosi o a latou taaʻiga i meafai a tagata.

Ua Matuā Faaalialia Lē o Loo Leaga!

Ua faailoa mai i le 1 Ioane 5:19 le tele ua oo i ai taaʻiga leaga a Satani: “O le lalolagi uma o loo nofo toʻilalo i loo leaga.” Ua faatupulaʻia pea ona faaoo e Satani i tagata ni faanoanoaga tugā. Ua ia vilivilitaʻi e faia mea leaga na i lo o se isi lava taimi muamua atu. Aiseā? Auā na tuliesea o ia ma temoni mai le lagi ina ua uma ona faavaeina le Malo o le Atua i le 1914. Na valoia i le Tusi Paia lenei mea: ‘Oi talofa i le fanua . . . auā ua alu ifo iā te oe le tiapolo ua lotoa tele, auā ua na iloa ua saasaa ona pō.’ (Faaaliga 12:7-12) E faapefea la ona taaʻina e Satani tagata i aso nei?

O le vala autū ua faia ai faapea e Satani, o le faaauilumaina o se agaga lea e pulea ai mafaufauga ma gaoioiga a tagata. Ua taʻua i le  Efeso 2:2 le Tiapolo o “le taʻitaʻi o le ʻau faipule i le va nimonimo, o le agaga [po o le uiga taatele] lea o loo matuā galue nei i ē ua faalogogatā.” Na i lo le faalaeiau ai e mataʻu i le Atua ma faia mea lelei, ua faapogaia e lenei “agaga” o temoni le fouvale i le Atua ma ana faatulagaga. Ua faaauiluma ai loa e Satani ma ana temoni mea leaga ua faia e tagata.

‘Ia Leoleoina Lou Loto’

O se tasi o faailoaga o lenei “agaga,” o ata matagā ia e uunaʻia ai faanaunauga lē talafeagai faaleituaiga, ma avea ai amioga e lē masani ai e pei e lelei. (1 Tesalonia 4:3-5) O le toso teine, o sauāga lē alofa, o vaega e faamalosia teine, feusuaʻiga ma manu, ma le faileagaina faaleituaiga o tamaiti, o nisi na o mea ua faaalia i ata matagā e faafiafia ai tagata. E oo i ata e lē matuā leaga, ae e mafai ona pulea ma faaleagaina ai ē e matamata ma faitau ai, ma uunaʻia ai e naunau pea e matamata i ai. * E leaga auā e faaleagaina ai faiā a tagata ma le faiā a se tasi ma le Atua. Ua faaatagia e ata matagā le paʻū maulalo faalemafaufau o temoni na māfua ai faanaunauga lē talafeagai i feusuaʻiga a o leʻi oo i le Lolo i aso o Noa.

E lētioa lapataʻi Solomona: “Ia sili ona leoleoina o lou loto i le leoleoina o mea uma; auā e tupu mai ai le amio.” (Faataoto 4:23) I se faatatauga aogā, o le leoleoina o lou loto mai le maileia i ata matagā, e uiga atu i le suia o le ata o le TV pe tapē le komepiuta pe a faaali mai ata e faagaee ai i faiga lē mamā. E tāua le vave gaoioi ma maumauaʻi! Ia manatu o oe o se fitafita o loo taumafai e tataʻi ese se ū fanafana ua taulaʻi mai i lou fatu. O loo taulaʻi Satani i lou fatu faafaatusa, le mea e māfua ai gaoioiga ma faanaunauga, ma ua ia manaʻo e lepeti.

E manaʻomia foʻi ona leoleoina lou loto mai le fiafia i faiga sauā, auā ua iloa e le Tiapolo, ‘e inosia e le finagalo o Ieova lē fiafia i le faasauā.’ (Salamo 11:5) E lē faia e Satani oe ia avea ma sē e leaga ma faamasaatoto, e avea ai ma fili o le Atua. Peitaʻi, na te totō iā te oe le fiafia i faiga sauā. E lē faapea na teʻi ua iai faiga sauā ma faiga faataulāitu lea ua faaauiluma i faasalalauga. Ua feoti ma ua lē o toe iai tagata maualuluga, ae o loo iai pea o latou uiga ma amioga! Po o faaalia i au filifiliga i faafiafiaga lou teena o togafiti a Satani?—2 Korinito 2:11.

 Le Auala e Teena ai Taaʻiga a Satani

E faigatā tele ona fesagaʻia taaʻiga o mea leaga. Ua taʻua i le Tusi Paia, o ē o loo tauivi e faafiafia le Atua e “tau . . . ma agaga leaga,” e ese mai le tauivi ma o latou tino lē lelei atoatoa. Ina ia manumalo i lenei tauiviga ma maua le finagalo malie o le Atua, e ao ona tatou faaaogā le tele o ana sauniuniga.—Efeso 6:12; Roma 7:21-25.

E aofia i nei sauniuniga le agaga paia o le Atua, le malosiaga sili i le lalolagi. Na tusi Paulo i Kerisiano i le uluaʻi senituri: “Ua maua e i matou, e lē o le agaga o lenei lalolagi, a o le agaga mai le Atua.” (1 Korinito 2:12) O i latou e taʻitaʻiina e le agaga o le Atua, e fiafia i mea e fiafia i ai le Atua ma ʻinoʻino i mea e na te inosia. (Amosa 5:15) E faapefea ona maua e se tasi le agaga paia? Muamua e ala i le tatalo, suʻesuʻe o le Tusi Paia, auā na māfua ona iai lea tusi ona o le agaga paia, ma le aufaatasiga mamā ma ē e alolofa moni i le Atua.—Luka 11:13; 2 Timoteo 3:16; Eperu 10:24, 25.

O le faaaogā o nei sauniuniga a le Atua, o le a e ofu ai le “ofutau atoatoa mai le Atua,” ua na o le pau lea o le puipuiga mautinoa i “togafiti a le tiapolo.” (Efeso 6:11-18) Ua sili atu nei ona faanatinati le faaaogā o nei sauniuniga na i lo o se isi lava taimi. E faapefea?

Ua Lata le Iʻuga o Mea Leaga!

Ua taʻua e le faisalamo: “A tupu olaola o ē amio leaga e pei o le vao iti, a fuga mai foʻi i latou uma o ē fai mea leaga, e faapea i latou ina ia faaumatia e oo i le faavavau lava.” (Salamo 92:7) I le pei o aso o Noa, o le faateleina o mea leaga i aso nei, o le faamaoniga lenā o le faaloloʻi mai o le faamasinoga a le Atua. E lē na o ē amioleaga, ae iā Satani ma ana temoni ia o le a lafo i le tō e lē gata e lē toe mafai ai ona gaoioi, o se faataʻimuaga lea o lo latou faasalaga e faavavau. (2 Timoteo 3:1-5; Faaaliga 20:1-3, 7-10) O ai o le a faaoo maia lenā faamasinoga? O Iesu, lē ua tatou faitau i ai e faapea: “O le mea lava lea na faaalia mai ai le Alo o le Atua, ina ia faaumatia e ia galuega a le tiapolo.”—1 Ioane 3:8.

Pe e te naunau e faamuta mea leaga? Afai o lea, ua faamāfanafanaina oe i folafolaga a le Tusi Paia. E leai se isi tusi o faaalialia mai ai le pogai autū o mea leaga, o Satani, ma faailoa mai ai le auala o le a tafiesea ai o ia ma ana galuega leaga uma. E matou te faalaeiauina oe e ave i fale le poto o le Tusi Paia, e puipuia ai nei oe mai taaʻiga leaga a Satani, ma faamautū ai le faamoemoe o le ola i se lalolagi e leai ni mea leaga.—Salamo 37:9, 10.

[Faamatalaga pito i lalo]

[Pusa/Ata i le itulau 6]

Tala o le Vavau e Moni Sona Vaega

O loo maua tala i tagata itulua, o tagata tinoeese, ma se lolo mataʻutia i tala faafaagogo anamuā a le lalolagi. O se faaaʻoaʻoga, ua taʻua i le tala a tagata Akaia iā Kilikamesa se lolo, o se vaa, ma ni tagata na faasaoina ai. Ua faamatalaina Kilikamesa o sē e iai ni faanaunauga leaga taufeusuaʻiga, e itulua ma sauā, pe iai foʻi sona itu atua ma se itu tagata. Ua taʻua i tala faafagogo a tagata Aztec se lalolagi i aso anamua na nonofo ai ni tagata tinoeese, ma se lolo tele. Ua faamatalaina i tala a tagata Norse ni tagata tinoeese, ma se tamāloa atamai e igoa iā Bergelmir na fausia se vaa telē na faasaoina ai o ia ma lona aiga. O le tuufaatasia o nei tala faafaagogo e faamautinoa ai le manatu o le Tusi Paia, na tupuga mai tagata uma mai ē na faasaoina mai se lolo lea na faaumatia ai se lalolagi leaga anamuā.

[Ata i le itulau 6]

Le papamaa o loo tusia ai le Tala a Kilikamesa

[Faamatalaga i Ata]

The University Museum, University of Pennsylvania (neg. # 22065)

[Ata i le itulau 5]

Ua vaaia uiga o tagata maualuluga i tagata i aso nei

[Ata i le itulau 7]

E faamalosia e le poto saʻo i tatou mai taaʻiga leaga