E Tāua iā Ieova Lou Usiusitai
E Tāua iā Ieova Lou Usiusitai
“Loʻu atalii e, ia poto oe, ma e faafiafia loʻu loto.”—FAATAOTO 27:11.
1. O le ā le agaga ua taatele i le lalolagi i aso nei?
UA TAATELE le agaga o le fia tutoʻatasi ma le lē usiusitai i le lalolagi i aso nei. Ua faamatala e Paulo le pogai i lana tusi i Kerisiano i Efeso e faapea: “Na outou savavali ai anamua, e tusa ma le tū a lenei lalolagi, e tusa ma le taʻitaʻi o le ʻau faipule i le va nimonimo, o le agaga lea o loo matuā galue nei i ē ua faalogogatā.” (Efeso 2:1, 2) Ioe, e te ono faapea mai ua faaaafia e Satani le Tiapolo, “le taʻitaʻi o le ʻau faipule i le va nimonimo,” le lalolagi atoa i le agaga o le lē usiusitai. Na ia faia faapea i le uluaʻi senituri, ma o loo ia faia pea i se tulaga e sili atu ona mataʻutia, talu ona lafo ese mai le lagi pe tusa o le taimi o le Taua Muamua a le Lalolagi.—Faaaliga 12:9.
2, 3. O ā māfuaaga tatou te usisuitai ai iā Ieova?
2 Ae i le avea ai o ni Kerisiano, ua tatou iloa e ao ona tatou usiusitai mai o tatou loto iā Ieova, auā o Ia na Faia i tatou, o Lē na te faatumauina lo tatou ola, o le Pule Silisili Ese, ma o ia o lo tatou Laveaʻi. (Salamo 148:5, 6; Galuega 4:24; Kolose 1:13; Faaaliga 4:11) I aso o Mose, na iloa e Isaraelu o Ieova o lo latou Foaʻi Ola ma le Laveaʻi. O le ala lea na taʻu atu ai e Mose iā i latou: “Ia outou anaana ia faia, faapei ona poloaʻi mai ai o Ieova lo outou Atua iā te outou.” (Teuteronome 5:32) Ioe, e ao ona latou usiusitai iā Ieova. Ae na vave ona latou lē usiusitai i lo latou Pule Silisili Ese.
3 O le ā le tāua o lo tatou usiusitai i Lē na Faia le vateatea? Na faatonu e le Atua le perofeta o Samuelu e taʻu atu i le tupu o Saulo: “O le faalogo e sili lea i le taulaga.” (1 Samuelu 15:22, 23) Aiseā?
Aiseā e ‘Sili ai le Usiusitai i lo Taulaga’?
4. I le ā le uiga e mafai ai ona tatou avatu se mea iā Ieova?
4 Ona o Ieova o ia Lē na Faia mea, o ia foʻi la e ana mea uma ua tatou maua i le itu faaletino. Pe e iai la se mea e tatou te avatu iā te ia? Ioe, e mafai ona tatou avatu iā te ia se mea e sili ona tautele. O le ā lenā mea? E tatou te maua le tali mai le timaʻiga lenei: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) E mafai ona tatou usiusitai i le Atua. E ui e eseese o tatou tulaga ma talaaga, ae o lo tatou usiusitai e mafai ona tali atu ai i le tuuaʻiga leaga a Satani e faapea, o le a lē tumau faamaoni tagata i le Atua i taimi o tofotofoga. Maʻeu se faaeaga!
5. E faapefea ona aafia le Atua pe a lē usiusitai? Faataʻitaʻi.
5 E naunau mai Ieova le Atua i filifiliga tatou te faia. E aafia o ia pe a tatou lē usiusitai. E faapefea? E tigā lona finagalo pe a silasila mai i so o se tasi o loo uia se ala e lē atamai. (Salamo 78:40, 41) Seʻi faapea ua lē tausisi se tagata maʻi suka i taumafa mo lona soifua mālōlōina lea na faatonu ai e le fomaʻi, ae o loo tausami pea i taumafa e lē lelei. O ā ni lagona o lana fomaʻi lea e manatu mamafa mai iā te ia? E faapena ona tatou mautinoa le tigā o le finagalo o Ieova pe a lē usiusitai tagata iā te ia, auā ua ia silafia iʻuga o le lē amanaʻia o ana faatonuga mo le ola.
6. O le ā se mea e fesoasoani iā i tatou e usiusitai ai i le Atua?
6 O le ā se mea e fesoasoani iā i tatou taʻitoʻatasi ina ia usiusitai ai? E talafeagai mo i tatou taʻitoʻatasi ona talosaga atu i le Atua mo se “loto matala,” e pei ona faia e le tupu o Solomona. Na ia talosagaina lea loto ina ia mafai e ia ona “masino ai i le lelei ma le leaga,” e faamasino ai ma le tonu i lona nuu o Isaraelu. (1 Tupu 3:9) E tatou te manaʻomia se “loto matala” e iloa ai le lelei ma le leaga, a o tatou iai i se lalolagi ua taatele ai le agaga o le lē usiusitai. Ua saunia e le Atua mo i tatou lana Afioga, o lomiga faale-Tusi Paia, sauniga faa-Kerisiano, ma toeaina alolofa o le faapotopotoga, ina ia mafai ai ona tatou ati aʻe se “loto matala.” Po o tatou faaaogā lelei ea nei sauniuniga alofa?
7. Aiseā ua faamamafa ai e Ieova le usiusitai e sili atu i lo taulaga?
7 Seʻi manatu i aso ua teʻa, na faailoa e Ieova i ona tagata e sili ona tāua le usiusitai na i lo taulaga i manu. (Faataoto 21:3, 27; Hosea 6:6; Mataio 12:7) Aiseā ua faapena ai, ae o lea na faatonu e Ieova ona tagata e ofo atu na taulaga? O le ā le uunaʻiga a lē o faia le taulaga? Po o ia faia ina ia faafiafia ai le Atua? Po o tau lava ina usitai i ni tū faalotu? A naunau moni sē e tapuaʻi e faafiafia le Atua, o le a ia taumafai e usitaia Ana faatonuga uma. E lē manaʻomia e le Atua taulaga i manu, ae e tāua lo tatou usiusitai iā te ia.
Se Faaaʻoaʻoga Lapataʻi
8. Aiseā na teena ai e le Atua Saulo o se tupu?
8 O le tala a le Tusi Paia i le tupu o Saulo ua faamatilatila mai ai le tāua tele o le usiusitai. Na amata le pulega a Saulo o se tupu e loto maulalo ma agamalu, sa ‘faatauvaa o ia i lona lava manatu.’ Ae mulimuli ane, na amata ona pulea ana faaiʻuga e le faamaualuga ma mafaufauga sesē. (1 Samuelu 10:21, 22; 15:17) I se mea na tupu, sa tatau ona tau Saulo ma ʻautau a Filisitia. Na fai mai Samuelu i le tupu e faatali atu iā te ia e sau e ofo le taulaga iā Ieova, ma aumai nisi faatonuga. Ae e leʻi sau Samuelu i le taimi na faatalitalia ai, ma na amata loa ona taape tagata. Ina ua vaaia e Saulo lenā tulaga, ona “fai ai lea e ia o le taulaga mū.” Sa lē fiafia ai le finagalo o Ieova. Ina ua taunuu Samuelu, na fai e le tupu se faamolemolega o lona lē usitai i le fai atu ua tuai Samuelu, o lea na ‘ia faamalosi’ ai e ofo atu le taulaga mū ina ia maua ai le finagalo malie o Ieova. Na sili atu le tāua iā Saulo o le ofo o le taulaga, na i lo le usitai i le faatonuga e faatali iā Samuelu e ofoina atu le taulaga. Na taʻu ane e Samuelu iā te ia: “Ua e valea i le mea ua e fai na, ua e lē tausia le poloaʻiga a Ieova lou Atua na ia poloaʻi atu ai iā te oe.” O le lē usiusitai o Saulo iā Ieova na aveesea ai lona tulaga o se tupu.—1 Samuelu 10:8; 13:5-13.
9. Na faaalia faapefea e Saulo se masaniga o le lē usiusitai i le Atua?
9 Pe na aʻoaʻoina e le tupu se lesona mai lenei mea? E leai! Mulimuli ane, na faatonu e Ieova Saulo e faatafuna le malo o Amaleka, lea e leʻi leva atu ona osofaʻia Isaraelu e aunoa ma se māfuaaga tatau. Sa lē tatau ona faasaoina e Saulo e oo lava i a latou lafu manu. Na ia usitai e ‘fasi Amaleka, e pau mai i Havila e oo i Sura.’ Ina ua faafeiloaʻi e Samuelu o ia, na fiafia tele le tupu i le manumalo ma fai atu: “Ia faamanuia oe e Ieova; ua ou faaiʻuina le afioga a Ieova.” Ae e ese mai faatonuga manino na latou maua, na faasao e Saulo ma ona tagata le tupu o Akako ma “ē aupito lelei o mamoe ma povi, . . . ma ē aupito i ai, ma tamaʻi mamoe, ma mea lelei uma.” Na taʻutonuina e Saulo lona ala lē usiusitai i le fai atu: “Ua faasaoina e le nuu o mamoe ma povi e aupito lelei, ina ia fai ai taulaga iā Ieova lou Atua.”—1 Samuelu 15:1-15.
10. O le ā le lesona e leʻi aʻoaʻoina e Saulo?
10 Ona fai atu lea o Samuelu iā Saulo: “E tusa ea ona fiafia o Ieova i taulaga mū ma taulaga, i lona fiafia i le faalogo i le siʻufofoga o Ieova? Faauta, o le faalogo e sili lea i le taulaga, ma le usiusitai e sili lea i le gaʻo o mamoe poʻa.” (1 Samuelu 15:22) Ona sa finagalo Ieova e faaumatia na manu, e lē talia la e ofo atu ai ni taulaga.
Ia Usiusitai i Mea Uma
11, 12. (a) O le ā le silafaga a Ieova i a tatou taumafaiga e faafiafia o ia i la tatou tapuaʻiga? (e) E ono faasesēina faapefea se tasi i le manatu o loo ia faia le finagalo o Ieova ae o loo ia lē o usiusitai?
11 Maʻeu le fiafia o Ieova e silasila mai i ana auauna faamaoni o loo tumau pea e ui i sauāga, e folafola atu le Malo e ui i le lē ano mai o tagata, ma auai pea i sauniga faa-Kerisiano e ui ina naunau e saʻili ni mea e tausia ai i latou! O lo tatou usiusitai i nei vala tāua o le olaga faa-Kerisiano, ua faafiafiaina ai lona finagalo! E tāua iā Ieova a tatou taumafaiga e tapuaʻi atu iā te ia pe a faia ona o le alofa. E ono lē amanaʻia e tagata a tatou galuega fitā, ae e silafia ma manatua e le Atua a tatou taulaga e ofoina atu mai o tatou loto.—Mataio 6:4.
12 Ae ina ia matuā faafiafia le Atua, e ao ona tatou usiusitai i vala uma o o tatou olaga. E lē tatau ona faasesēina i tatou i le manatu, e mafai ona see ese mai isi faatulagaga a le Atua ae i le taimi e tasi, o loo tatou tapuaʻi atu iā te ia i isi vala o le olaga. O se faaaʻoaʻoga, e ono faasesēina se tasi i le manatu pe afai o loo ia faatino nisi vala masani o le tapuaʻiga, e lē afāina foʻi la le faia o amioga lē mamā po o isi mea sesē. Pagā se sesē inā mataʻutia!—Kalatia 6:7, 8.
13. E ono tofotofoina faapefea lo tatou usiusitai iā Ieova i nofoaga e lē o iloa mai ai tatou e isi?
13 Ia fesili ifo iā i tatou lava, ‘Po o oʻu usiusitai iā Ieova i aʻu gaoioiga o faia i aso taʻitasi, e oo i mataupu e patino iā te aʻu lava?’ Na fetalai Iesu: “O lē faamaoni i le mea itiiti, e faamaoni foʻi o ia i mea e tele; o lē amiolētonu i le mea itiiti, e amiolētonu foʻi o ia i mea e tele.” (Luka 16:10) Po o tatou ‘savavali ma le loto saʻo’ e oo lava i ‘totonu o o tatou fale’ e lē o iloa mai e isi? (Salamo 101:2) Ioe, e ono tofotofoina lo tatou loto saʻo po o le faamaoni a o i totonu o o tatou fale. I le tele o atunuu ia o se mea masani le iai o komepiuta i fale o aiga, e faigofie tele ai ona matamata i ata matagā. I nai tausaga ua teʻa, e lē mafai ona matamata se tasi i ia ata seʻi vaganā ua alu i nofoaga ia e faaali ai nei faafiafiaga lē mamā. Po o le a tatou lotomalilie ea e usiusitai i fetalaiga a Iesu: “Ai sē vaai atu i le fafine ina ia manaʻo i ai, ua uma ona mulilua ma ia i lona loto”? Ioe, po o le a tatou lē mananaʻo foʻi e matamata i ata matagā? (Mataio 5:28; Iopu 31:1, 9, 10; Salamo 119:37; Faataoto 6:24, 25; Efeso 5:3-5) Ae faapefea polokalame o le televise e aumaia ai faiga sauā? Pe tatou te pei o lo tatou Atua o lē ‘ua inosia e lona finagalo lē fiafia i le faasauā’? (Salamo 11:5) Ae faapefea le inu tele i le ʻava malosi i nofoaga e lē o iloa atu e nisi? E taʻusala e le Tusi Paia le onā, ae ua lapataʻia foʻi Kerisiano ina ia aua neʻi inu tele i le “uaina.”—Tito 2:3; Luka 21:34, 35; 1 Timoteo 3:3.
14. O ā ni vala e tatou te usiusitai ai i le Atua i mea tautupe?
14 O se isi vala e manaʻomia ai ona tatou mataala ai, o le taulimaina lea o mea tautupe. Mo se faaaʻoaʻoga, po o le a tatou faaaafia ea i se faiga e vave ai ona maua ni tupe, lea ua toeitiiti lava tutusa ma faiga faagaoi? Po ua faaosoosoina ea i tatou e faia ni faiga e lē tusa ai ma le tulafono ina ia ʻalofia ai le totogiina o lafoga? Na i lo lea, po o tatou faamaoni ea e usiusitai i le faatonuga ina ia “avatu i tagata uma lava a latou mea; o le lafoga i ē ua tatau i ai le lafoga”?—Roma 13:7.
Usiusitai e Māfua Mai le Alofa
15. Aiseā ua e usitai ai i faatonuga a Ieova?
15 O le usiusitai i faatonuga a le Atua e iʻu i faamanuiaga. Mo se faaaʻoaʻoga, o le taumamao mai le ulaula tapaa, le ola i se olaga mamā, ma le faaaloalo i le tāua o le toto. O na mea uma e tatou te ono ʻalofia ai le maua i ni faamaʻi. O le ola foʻi e ōgatusa ma le upu moni o le Tusi Paia i isi vala o le olaga, e tatou te maua ai aogā i le itu tautupe, i le va fealoaʻi ma tagata, po o le aiga. (Isaia 48:17) O so o se aogā faaletino e maua, e manatu i ai o se faamanuiaga lea o le usiusitai i tulafono a le Atua. Ae o le pogai autū lava o lo tatou usiusitai iā Ieova, ona e tatou te alolofa iā te ia. E tatou te lē auauna i le Atua ona o ni māfuaaga manatu faapito. (Iopu 1:9-11; 2:4, 5) Na foaʻiina mai e le Atua le saʻolotoga tatou te filifili ai po o ai tatou te mananaʻo e usiusitai atu i ai. O lea ua tatou filifili ai e usiusitai iā Ieova, ona tatou te mananaʻo e faafiafia o ia, ma fai le mea ua tonu.—Roma 6:16, 17; 1 Ioane 5:3.
16, 17. (a)Na faapefea ona usiusitai Iesu i le Atua ona o lona alofa loloto? (e) E faapefea ona tatou faaaʻoaʻo iā Iesu?
16 Na faataatia e Iesu le faaaʻoaʻoga sili ona lelei i le usiusitai iā Ieova ona o le alofa loloto mo Ia. (Ioane 8:28, 29) A o iai Iesu i le lalolagi, “o mea sa tigā ai o ia na aʻoaʻoina ai o ia ia usiusitai.” (Eperu 5:8, 9) E faapefea? Na ‘faamaulalo e Iesu o ia lava, ua na anaana ua oo ina maliu, o le maliu lava lea i le satauro.’ (Filipi 2:7, 8) E ui sa usiusitai Iesu i le lagi, ae na toe tofotofoina foʻi lona usiusitai i le lalolagi. E tatou te mautinoa ua matuā agavaa Iesu i so o se vala, e galue ai o se Ositaulaga Sili mo ona uso faaleagaga atoa ma isi tagata talitonu.—Eperu 4:15; 1 Ioane 2:1, 2.
17 Ae faapefea i tatou? E tatou te faaaʻoaʻo iā Iesu i le faamuamuaina o le usiusitai i le finagalo o le Atua. (1 Peteru 2:21) E faamalieina i tatou pe afai e uunaʻia e lo tatou alofa mo le Atua le faia o mea ua faatonuina mai e Ieova, e oo lava i taimi e ono omia pe tofotofoina ai i tatou e faia se mea sesē. (Roma 7:18-20) E aofia ai lo tatou lotomalilie e usiusitai i faatonuga mai iā i latou o loo taʻimua i le tapuaʻiga moni, e ui e lē lelei atoatoa foʻi i latou. (Eperu 13:17) E tāua i le silafaga a Ieova lo tatou usiusitai i ana faatonuga i o tatou olaga.
18, 19. O le ā le iʻuga o lo tatou usiusitai mai le loto i le Atua?
18 I aso nei, e ono aofia i lo tatou usiusitai iā Ieova le tutumau a o fesagaʻi ma sauāga ina ia tausisia ai pea lo tatou faamaoni. (Galuega 5:29) O lo tatou usiusitai foʻi i le faatonuga a Ieova ina ia talaʻi ma aʻoaʻo atu, e manaʻomia ai foʻi lo tatou tumau seʻia oo i le iʻuga o lenei lalolagi. (Mataio 24:13, 14; 28:19, 20) E ao ona tatou onosai e faapotopoto faatasi pea ma o tatou uso, e ui lava tatou te ono fesagaʻi ma le tele o omiga mai lenei lalolagi. E silafia lelei e lo tatou Atua alofa a tatou taumafaiga e usiusitai i nei vala. Ae ina ia atoatoa lo tatou usiusitai, e ao ona tatou tauivi ma o tatou tino agasala ma liliu ese mai le leaga, ae ati aʻe se talisapaia mo mea lelei.—Roma 12:9.
19 Pe a tatou auauna iā Ieova ona o lo tatou alofa ma se loto talisapaia, o le a faapena foʻi ona ia “tauia mai o ē matuā saʻili iā te ia.” (Eperu 11:6) E talafeagai ma e manaʻomia taulaga, peitaʻi o le usiusitai iā Ieova i vala uma ona o le alofa, e sili ona faafiafia ai lona finagalo.—Faataoto 3:1, 2.
O le a Faapefea Ona E Tali?
• Aiseā e tatou te faapea atu ai e iai se mea e ao ona tatou avatu iā Ieova?
• O ā mea sesē na faia e Saulo?
• E faapefea ona e faailoa atu, e te talitonu e sili atu le usitai na i lo le taulaga?
• O le ā se mea ua uunaʻia ai oe e usiusitai iā Ieova?
[Fesili mo le Suʻesuʻega]
[Ata i le itulau 26]
O ā faalogona o se fomaʻi alofa i se maʻi ua lē amanaʻiaina ana faatonuga?
[Ata i le itulau 28]
Aiseā na lē fiafia ai le finagalo o Ieova i le tupu o Saulo?
[Ata i le itulau 30]
Po o e usiusitai i faatonuga a le Atua i taimi e te iai na o oe i lou fale?