Fesouaʻina i Suiga o Mea e Faatāuaina

SA IAI se faifilosofia e igoa iā Diogenes sa nofo i Atenai i le senituri lona fā T.L.M. Fai mai se talatuu, na fesavaliaʻi lenei tamāloa ma se mōlī matagi i le aoteatea e saʻili se tagata amiotonu, ae e leai se tasi faapena.

E lē mailoa pe moni lenei talatuu. Ae pe ana fai o soifua mai pea Diogenes, atonu o le a sili atu ona faigatā lona mauaina o se tagata amiotonu. E foliga mai e toʻatele tagata e tetee i le manatu faapea, e tatau iā i latou ona tumau i le faatāuaina o amioga lelei. O le tele o taimi e faasau i le televise, leitiō ma le nusipepa le paʻū maulalo o amioga i olaga o tagata lava latou, o faigāmalo, galuega, taaloga, ʻaufaipisinisi ma isi vaega o le olaga. O le tele o mea na faatāuaina e augātupulaga i taimi ua mavae ua lē o toe amanaʻia i aso nei. O tapulaa faavae o amioga ua fai ma toe iloiloina, ma i nisi o taimi e teena ai. E faatāuaina e nisi tau lava na o upu ae lē o gaoioiga.

Na faapea mai Alan Wolfe o sē suʻesuʻeina mea tau lotu: “Ua uma aso sa faatāua ai tapulaa o amioga lelei.” Na toe faapea mai: “E leʻi iai muamua lava se taimi ua faapea ai le lē faatuatuaina e tagata o a latou tū masani ma taʻitaʻiga a faalapotopotoga, e taʻitaʻia i latou i tapulaa o amioga talafeagai.” E tusa ai ma le lipoti a le Los Angeles Times i le mea ua mātauina e le faifilosofia o Jonathan Glover, o le faaitiitia o amioga tatau i lotu ma le lalolagi ua atili ai ona faatupulaʻia faiga sauā i le lalolagi.

O le tele o le fenuminumiaʻi i mea e masani ona faatāuaina, ua aʻe ai se tofā i isi tagata e saʻili pea mo ni taʻiala talafeagai tau amio. Na faapea mai Federico Mayor o lē na avea ma faatonusili o le UNESCO: “Ua sili atu ona tatau ona matuā faatāuaina e le lalolagi amioga talafeagai na i lo se isi lava taimi.” O le lē faatāuaina e le lalolagi o amioga talafeagai e lē faapea ai ua leai ni amioga talafeagai e tatau ona faaaogāina.

 Pe mafai ona malilie uma tagata i ni tapulaa tau amio e faaaogā? E leai. Afai la e leai ni tapulaa e malilie ai i le saʻo ma le sesē, e faapefea la ona iloilo e se tasi mea e faatāua? Ua taatele le fesuisuiaʻi o tulaga tau amio. A ua tatou molimauina o le fesuisuiaʻiga o amioga tatau, e lē o faaleleia ai le tulaga tau amio.

Na talitonu le tusitala Peretania o Paul Johnson, e uiga i le filosofia o le fesuisuiaʻi e tusa ai ma tulaga o mea, ua fesoasoani lea e “faalēaogāina . . . le matafaioi a le tagata lava ia, ma le pipii atu i tapulaa tau i amioga tatau” lea na foliga mai na taliaina a o leʻi oo i le amataga o le senituri lona 20.

Faamata e mafai ona maua “tapulaa moni tau amio” po o le faaaogāina o “tapulaa tau amio a le lalolagi”? Pe faamata e iai se pule e mafai ona aumaia ni tapulaa tau amio e faaauau pea ma e lē suia ona aogā, ma e fesoasoani e faatumauina i tatou ma aumaia le faamoemoe mo le lumanaʻi? O le mataupu e sosoo mai o le a talanoaina ai nei fesili.