Po o E Faataʻitaʻi iā Ieova i le Manatu mo Isi?

“IA TUUINA atu [i le Atua] mea uma tou te popole ai, auā o loo manatu mai o ia iā te outou.” (1 Peteru 5:7) Maʻeu le māfana o lenei valaaulia! E manatu mamafa Ieova mo ona tagata. E tatou te malu puipuia i ona aao.

E tatau foʻi ona tatou ati aʻe ma faaalia lea manatu alofa mo isi. Ona tatou te lē lelei atoatoa, e manaʻomia ai ona nofouta i tulaga e lē lelei ai le faaalia o le naunau fiafia i isi. A o leʻi talanoaina nisi o ia vala, seʻi tatou tilofaʻia muamua nisi o auala e manatu mamafa ai Ieova i ona tagata.

Na faaaogā e le faisalamo o Tavita le faaaʻoaʻoga i le leoleo mamoe e faamatala ai le tausiga alofa a le Atua: “O Ieova, o loʻu leoleo mamoe o ia; e leai se mea ou te mativa ai. Na te ave aʻu i le mea e i ai le vao muʻa ou te taoto ai; na te taʻitaʻi iā te au i tafatafa o vai e tafe lemū. Na te faafoʻisia mai loʻu agaga; . . . E ui lava ina ou savali i le vanu o le ata o le oti, ou te lē fefe lava i se mea leaga; auā o oe ta te faatasi ma aʻu.”—Salamo 23:1-4.

Na iloa lelei e Tavita le mea e aofia i le tausia o se lafu ona o ia o se leoleo mamoe. E puipuia e le leoleo mamoe ana mamoe mai manu feʻai, e pei o leona, o luko ma pea. E na te leoleoina le lafu mai le taapeape, suʻe mamoe leiloloa, sii mamoe ua vaivai i lona fatafata, ma tausia mamoe ua mamaʻi ma lavevea. I aso taʻitasi e na te faainu i lana lafu. Ae e lē faapea ai o le a pulea e le leoleo mamoe gaoioiga uma a le mamoe e fai. E puipuia mamoe peitaʻi e iā i latou le faitalia e feofeoaʻi solo ai.

O le auala lenā e tausia ai e Ieova ona tagata. Na faamatala e le aposetolo o Peteru: ‘Ua leoleoina oe e le mana o le Atua.’ O le uiga o le “leoleoina” o le “vaavaaia.” (1 Peteru 1:5) O le manatu mamafa moni o Ieova ua Ia vaavaaia ai pea i tatou ma nofo sauni i taimi uma e fesoasoani mai i so o se taimi tatou te talosaga atu ai. Peitaʻi, na faia i tatou e Ieova ma le tomai e fai ai filifiliga saʻoloto, o lea e na te lē faalavelave ai i a tatou gaoioiga ma faaiʻuga e fai. E faapefea ona tatou faataʻitaʻi iā Ieova i lea tulaga?

Faataʻitaʻi i le Atua i le Auala e Tausia ai Lau Fanau

“O le fanau, o le tofi lea mai iā Ieova.” E tatau ai i matua ona matuā puipuia lelei ma tausia a latou fanau. (Salamo 127:3) E aofia ai le faalaeiau o le fanau e faaleo mai o latou manatu ma faalogona, ma ia amanaʻia o latou manatu a o feagai ma i latou. Pe afai e taumafai  mātua e pulea gaoioiga uma e fai e le fanau, ma lē amanaʻia o latou manaʻoga, ua pei la i latou o se leoleo mamoe e taumafai e pulea ana mamoe e ala i le taʻitaʻiina i se manoa. E leai se leoleo mamoe e na te tausia ana mamoe i lea auala; e lē tausia foʻi e Ieova i tatou faapea.

Na faapea mai Mariko *: “I le tele o tausaga ou te fai atu soo i laʻu fanau, ‘Aua le faia le mea lenā’ pe ‘E lē tatau ona e faia le mea lenā.’ Na ou manatu o loʻu tiute tauave lea o se matua. E lē taitai oʻu faamālō iā i latou, ma iai ni a matou fesootaʻiga māfana.” E talanoa mo se taimi umi i le telefoni le tama teine a Mariko ma ana uō, ae e lē uumi a la talanoaga ma lona tinā. Na faapea atili mai Mariko: “Na ou mātauina le eseesega. Pe a ia talanoa i ana uō, e na te faaaogā faaupuga e faaalia ai le tigā alofa, e pei o le ‘Ioe, ou te malie i ai,’ po o le faapea atu ‘E faapena foʻi aʻu.’ Na amata ona ou faaaogāina faaupuga talitutusa e iloa ai faalogona o laʻu tama, ma e leʻi umi ae uumi a ma talanoaga fiafia.” E faamatilatila i lea tulaga le tāua o le lelei o fesootaʻiga, lea e toʻalua tagata e faia ae lē toʻatasi.

E manaʻomia ona iloa e mātua faalogona o a latou fanau, ma e manaʻomia foʻi ona iloa e le fanau le auala e puipuia ai i latou ona o le manatu mamafa o mātua. Ua timaʻi mai le Tusi Paia i fanau ia usiusitai i o latou mātua; ma aumai le māfuaaga: “Ina ia manuia ai oe, ma ia e nofo tuluʻi ai i luga o le laueleele.” (Efeso 6:1, 3) O tamaiti e iloa aogā o le gauaʻi, e faigofie iā i latou ona usiusitai.

Tausia le Lafu Mamoe a Ieova

O loo faaatagia le manatu alofa o Ieova i le faapotopotoga Kerisiano. I le avea ai o le Ulu o le faapotopotoga, ua faatonu ai e Iesu Keriso toeaina ia tausi i le lafu mamoe. (Ioane 21:15-17) O le upu Eleni mo le ovasia e fesootaʻi i se veape o lona uiga “tausia faalelei.” Na faamatilatila e Peteru le auala e faatinoina ai i lona faatonu o toeaina: “Ia outou leoleo i le lafu mamoe a le Atua o iā te outou, ia tausi i ai ma le loto, a e lē o le faatauanauina; aua foʻi neʻi faia ma le fia fai oloa, a o le loto fiafia. Aua foʻi neʻi faapei o ē pule faasauā i ē ua tofia i ai outou, a ia fai outou ma faaaʻoaʻo i le lafu mamoe.”—1 Peteru 5:2, 3.

Ioe, e talitutusa le galuega a toeaina ma  leoleo mamoe. E ao i toeaina Kerisiano ona tausia i latou ua mamaʻi faaleagaga ma toe suia o latou olaga ina ia atagia mai tapulaa amiotonu. O le tiute tauave o toeaina le faatulaga o sauniga, talaʻiga ma le tausia o le filemu i le faapotopotoga.—1 Korinito 14:33.

O upu a Peteru o loo taʻua i palakalafa ua mavae atu, e ao ai ona amanaʻia lamatiaga i toeaina e “faapei o ē pule faasauā” i le faapotopotoga. O se isi auala e iloa ai lea pule faasauā, pe a faia e se toeaina ni tulafono e lē manaʻomia. Ona o faanaunauga malolosi e puipuia le lafu mamoe, e ono tele ai ni ana tulafono e fai. I se tasi faapotopotoga i atunuu Asia, na faia e toeaina ni tulafono i le auala e faafeiloaʻi ai isi i le Maota mo Sauniga, e pei o ai e tautala muamua. Na latou manatu o le faia o ia tulafono o le a tausia ai le filemu i le faapotopotoga. E ui sa lelei o latou faanaunauga na fai ai, ae pe na latou faataʻitaʻi iā Ieova ma lana tausiga alofa mo ona tagata? E manino mai le manatu o le aposetolo o Paulo o loo faaalia mai i ana upu: “E leai foʻi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.” (2 Korinito 1:24) E talitonuina e Ieova ona tagata.

E lē gata i le ʻalofia ona faia o tulafono e aunoa ma ni faavae mai le Tusi Paia, e faaalia foʻi e toeaina le manatu mamafa, i le lē taʻuina o faamatalaga po o faafitauli patino o uso i isi. E latou te manatua le lapataʻiga mai le Atua: “Aua le faaali atu le upu faalilo a le tasi tagata.”—Faataoto 25:9.

Na faatusa e Paulo le faapotopotoga o Kerisiano faauuina i le tino o le tagata: “Ua faatatauina e le Atua le tino uma . . . ina nei i ai i le tino se maseiga, a ia fetausiaʻi faatasi uma itu tino.” (1 Korinito 12:12, 24-26) O le faaupuga Eleni ia “fetausiaʻi faatasi uma itu tino” o lona uiga ‘e tatau ona manatu mamafa mo le isi tagata.’ E tatau i ē i le faapotopotoga Kerisiano ona matuā naunau fiafia i isi.—Filipi 2:4.

E faapefea ona faaalia e se Kerisiano o loo ‘manatu mamafa mo le isi tagata’? E faaalia lo latou manatu mamafa i isi i le faapotopotoga e ala i a latou tatalo ma avatu le fesoasoani i ē manaʻomia. O le faia faapea e fesoasoani e iloa ai uiga lelei o isi. Seʻi manatu i le auala na fesoasoani ai lenei uiga o le manatu mamafa iā Tadataka. Ina ua ia papatiso i le 17 o ona tausaga, sa na o ia o lona aiga e auauna iā Ieova. Na ia faapea mai: “E masani ona valaaulia e se aiga mai le faapotopotoga aʻu mo se taumafataga ma faatasitasiga. E toeitiiti o taeao uma ou te afe ai i lo latou fale ae ou te leʻi alu i le aʻoga e talanoa le mau o le aso ma i latou. Na ou maua fautuaga aogā i le auala e fesagaʻia ai faafitauli i le aʻoga, ma matou te tatalo faatasi i ia mea. Na ou aʻoaʻoina mai lea aiga le agaga o le foaʻi.” Ua faatatauina e Tadataka mea na ia aʻoaʻoina e ala i le galue i se ofisa o lālā a Molimau a Ieova.

Na lapataʻi Paulo i itu lē lelei o le faaalia o le fiafia i isi. Na ia taʻua ni fafine na avea ma ē “soona tautala, ma matamata fua i galuega a nisi, ma tautalatala i mea lē tatau.” (1 Timoteo 5:13) E moni, e tatau ona naunau i isi, ae e ao ona tatou faaeteete i le faitatala i mataupu e fitoitonu i isi. O le naunau lē talafeagai i isi e faaalia ai le ‘tautatala i mea e lē tatau,’ e pei o le faia o ni faamatalaga e faamasinosino ai le isi tagata.

E ao ona tatou manatua, o Kerisiano e eseese auala e faagaoioia ai o latou olaga, o mea latou te filifili e taumafa ai, ma ituaiga o faiga mālōlōga e fai. E i le tagata lava ia le saʻolotoga e filifili ai ae e tatau ona ōgatusa le filifiliga ma taʻiala a le Tusi Paia. Na faatonu atu e Paulo Kerisiano i Roma: “Aua neʻi tatou toe fefaamasinoaʻi. . . . Ia tatou tausisi i mea e tupu ai le filemu ma mea e fefaamāfanafanaʻi.” (Roma 14:13, 19) E tatau ona faaalia lo tatou naunau moni i isi i le faapotopotoga, i le lē faitatala fua i olaga o isi, ae ia sauni e avatu le fesoasoani. O le a lauolaola le alofa ma le autasi i le aiga ma le faapotopotoga pe a tatou manatu i isi.

[Faamatalaga pito i lalo]

[Ata i le itulau 19]

Ia iloa manatu ma faalogona o lau fanau e ala i le faamālō ma le faaalia o faalogona tigā alofa