Ni Lesona Tāua mo Talavou Laiti

O GLADYS e faigaluega i se aʻoga i Mendoza, i Anitenitina. A o ui ane i luma o se potu aʻoga i se tasi aso, na ia vaaia le faiaʻoga o loo faitau i lana vasega, o tamaiti e 9 i le 10 tausaga le matutua, le tusi o Laʻu Tusi o Tala o Le Tusi Paia. * Na taʻu atu e Gladys i le faiaʻoga, o ia o se Molimau a Ieova, ma faasino i ai le auala o le a matuā aogā ai lenei tusi iā te ia. Na fiafia le faiaʻoga i le faamalamalamaga a Gladys, ma manaʻo ai e faaaofia le talanoaina o le tusi i se vaega o mataupu a le vasega. Peitaʻi sa tatau ona talosaga muamua i le pulega o le aʻoga mo se faatagaga. Maʻeu lona fiafia ina ua talia le talosaga!

Ina ua oo i le aso na faapitoa mo le uunaʻia o tamaiti ia fiafia e faitau tusi, na tofi ai e le faiaʻoga nisi o lana vasega e tofu le tamaitiiti ma se mataupu o le tusi e faitau mai i luma o le aʻoga. Sa matuā talisapaia lenei polokalame. O le iʻuga, na valaaulia e le televise o lenā vaipanoa le faiaʻoga e avea ma malo faapitoa i se polokalame a le televise. Ina ua talanoaina le tulaga o amio a le fanau aʻoga, na fesili lē sa faatautaia le polokalame i le faiaʻoga, “Ua mafai faapefea ona e pulea lelei lau vasega i le taimi o le aʻoga?” Na faamatala e le faiaʻoga sa ia faaaogā se lomiga ua faaulutalaina, Laʻu Tusi o Tala o Le Tusi Paia. Fai mai o ia, e ui e na te lē aʻoaʻoina ni mataupu faalotu i lana vasega, ae o le tusi lenei na mafai ai ona ia faaofi i mafaufau o tamaiti taʻiala o amioga tatau e pei o le faaaloalo, faapalepale, autasi, felagolagomaʻi, usiusitai, ma le alofa. Sa ioeina e i laʻua uma, o lesona tāua nei e tatau ona aʻoaʻoina e fanau.

Pe e te manaʻo e faaofi i lau fanau na taʻiala o amioga tatau? Talosaga ane i se tasi o Molimau a Ieova mo sau kopi o lenei lomiga matagofie, o Laʻu Tusi o Tala o Le Tusi Paia.

[Faamatalaga pito i lalo]