O Aʻoaʻoga a le Tusi Paia e Ati Aʻe ai le Faatuatua

“MAʻEU se faaeaga tāua o le faaaluina o le lima masina ua mavae e matuā uaʻi atu ai i manatu o Lē na Faia i tatou ma iloa ona fai mea i le auala e finagalo malie ai o ia!” o se tala lenā a se sui o le vasega lona 122 a le Aʻoga Faale-Tusi Paia a le Olomatamata o Kiliata i le aso o lo latou faauuga. O Mati 10, 2007, o se aso o le a manatua pea e le ʻauaʻoʻoga e toʻa 56 na auai, lea o le a amata la latou auaunaga faamisionare i atunuu e 26 ua tofia ai i latou.

Ina ua uma ona faafeiloaʻi ma le māfana le aofia e 6,205, e Theodore Jaracz, o se sui o le Vaega Pule, na ia faapea atu: “E matou te mautinoa o le a faamalosia outou faaleagaga ma ati aʻe lo outou faatuatua i le auai mai i le polokalame o le faauuga.” Na ia faailoa faasolosolo mai ni failauga se toʻafā o le a avatuina faalaeiauga ma fautuaga aogā e faavae mai le Tusi Paia, e fesoasoani iā i latou ina ia taulau manuia ai i o latou tofiga faamisionare.

Faalaeiauga Ina ia Ati Aʻe le Maufaatuatuaina o Isi

O Leon Weaver, o se sui o le Komiti o le Lālā a le Iunaite Setete na lauga i le matua, “Ia Faaauau Pea le Faia o Galuega Lelei.” Na ia faamanatu i le ʻauaʻoʻoga na latou faaaluina le 13 tausaga i le auaunaga faataimi atoa, i le faaauilumaina o aʻoaʻoga a le Tusi Paia e ati aʻe ai le faatuatua. Na ia faapea atu: “O se galuega lelei auā e aofia ai le faasaoina o ola o tagata, ae sili ona tāua, o se galuega lelei e faamamaluina ai lo tatou Tamā i le lagi o Ieova.” Ona faalaeiau lea e le uso o Weaver le ʻauaʻoʻoga e faaauau ona “lūlū i la le Agaga” ma ia ‘aua neʻi faapalapala i le amio lelei.’—Kalatia 6:8, 9.

Na faia e David Splane o se sui o le Vaega Pule ni timaʻiga i lana lauga “Ia Mautinoa ia E Amata i se Amataga Lelei.” Na faalaeiau e le uso o Splane misionare fou ina ia taulau manuia i le amataga o lo latou tofiga i le faia o mea nei: “Ia iai pea uiga mautinoa. Aua le vavevave i le faia o faaiʻuga. Ia faaleuō. Aua le faitio. Ia loto maulalo, ma amanaʻia uso i atunuu o le a outou galulue ai.” Na ia faapea atu atili: “Pe a outou taunuu i o outou tofiga, taumafai ia lelei le amataga, ma ia faamanuia e Ieova o outou vae mananaia a o outou avatu le ‘tala lelei o mea lelei’ i tagata.”—Isaia 52:7.

“O se Tofi e Matuā Mautinoa” o le matua lenā a  Lawrence Bowen o se faiaʻoga a Kiliata. Na faamanatu atu e le uso o Bowen i le ʻauaʻoʻoga, i le vaitaimi o le Taua Lona Lua a le Lalolagi, na faavaeina ai le Aʻoga a le Olomatamata o Kiliata, ona o le faatuatua atoatoa i le faataunuuina o le Afioga faavaloaga a Ieova. (Eperu 11:1; Faaaliga 17:8) Talu mai lenā taimi, ua avatu e Kiliata i tagata aʻoga le avanoa e faamalosia ai lo latou faatuatua. O le faatuatua malosi ua uunaʻia ai ē faauu mai lea aʻoga e ō atu e talaʻi ma le maelega le tala lelei.

Na talanoaina e Mark Noumair, o se isi foʻi o faiaʻoga i Kiliata le matua faaoso naunau “E Iai se Tasi Ou te Faatusaina i ai Outou.” Na faaautū lana lauga i le faaaʻoaʻoga a le perofeta o Elisaia, o lē sa faaalia le faatuatua ma le loto tele i lona tofiga. Na faavae  lana lauga i le 1 Tupu 19:21, ma faapea atu le uso o Noumair: “Na loto malie Elisaia e faia suiga i lona olaga, na lona lua ona manaʻoga ae na ia tauivi malosi i le faia o le finagalo o Ieova.” Na ia faamālō i le ʻaufaauu mo le faaalia o lea lava agaga e tasi ma faalaeiau i latou e faaauau ona faia faapea i o latou tofiga fou.

O le Faatuatua e Iʻu ai i le Talaʻi Atu Pea

A o faia le aʻoga lea na faamalosia ai le faatuatua o nei misionare fou, sa latou faaaogā foʻi faaiʻuga o vaiaso e talaʻi ai le tala lelei i isi. Na lelei ni mea na tutupu ai lea na faamatala ma toe faataʻitaʻi i se vaega na faia e Wallace Liverance, o se isi faiaʻoga o Kiliata. O le matua o lana lauga, “Ua Tatou Faatuatua, o le Mea Lea ua Tatou Tautatala Atu Ai,” lea e faasino atu i upu a le aposetolo o Paulo o loo i le 2 Korinito 4:13.

Na sosoo ai ma se vaega na faia e Daniel Barnes ma Charles Woody, o ni sui o le aiga Peteli, lea na la faatalatalanoa ai ē na avea muamua ma misionare ma ē o loo avea pea ma misionare i le taimi nei. Na faamatilatila ai le tausiga a Ieova ma lana faamanuia iā i latou e auauna faamaoni iā te ia. (Faataoto 10:22; 1 Peteru 5:7) Na faapea mai se tasi misionare: “Ua matuā ma iloaina ma laʻu avā le tausiga a Ieova e ala i le aʻoaʻoga ua ma maua i Kiliata. Ua matuā faamalosia ai lo ma faatuatua. E tāua le faatuatua ona o le a fesagaʻia e auauna uma a le Atua, e aofia ai misionare ia tofotofoga, o faafitauli, ma popolega.”

Ia Faaauau Pea Aʻoaʻoga Faale-Tusi Paia Lea e Ati Aʻe ai le Faatuatua

Na faia e Samuel Herd, o se sui o le Vaega Pule se lauga e talafeagai e faaiʻu ai le polokalame o le faauuga i lana matua “Ia Faamalosia Pea o Outou Uso.” Na fesili le uso o Herd: “O ā aogā o nei aʻoaʻoga mo le ʻauaʻoʻoga? O aogā ina ia aʻoaʻoina oe e faaaogā lou laulaufaiva e vivii ai iā Ieova, e aʻoaʻo ana upu moni i isi i lou tofiga fou, ma ati aʻe e le tasi le isi i le faatuatua.” Peitaʻi na ia faamanatu i le ʻauaʻoʻoga e mafai foʻi e le laulaufaiva ona tautala i mea e lē ati aʻe ai. (Faataoto 18:21; Iakopo 3:8-10) Na ia faalaeiau le ʻauaʻoʻoga e faataʻitaʻi i le faaaʻoaʻoga a Iesu i le auala e faaaogā ai o latou laulaufaiva. I se tasi taimi ina ua uma ona faalogologo aposetolo e toʻalua o Iesu iā te ia, na la faapea: “E leʻi mū ea o ta loto i totonu iā i taʻua, . . . ina ua faamatala mai foʻi e ia o Tusi iā te i taʻua?” (Luka 24:32) Na faapea atu le uso o Herd: “O le a pāʻia loto o outou uso ma tuafāfine i o outou tofiga, pe a lelei ma ati aʻe a outou upu.”

Na sosoo ai lea ma le tauaaoina atu o tipiloma a le ʻaufaauu. Ona lau ai lea o se tusi e faaalia ai le loto talisapaia o le vasega faauu. E faapea: “Ua matou matuā lagona le iā i matou o le tiute tauave e faaaogā ai mea ua matou aʻoaʻoina, e faataunuu ai ma le faamaoni o matou tofiga o ni misionare. A o matou sauni e ō atu i itu eseese o le lalolagi, e matou te tatalo o le a iʻu lelei a matou taumafaiga e avatu ai se viiga tele i lo tatou Aʻoaʻo Sili o Ieova le Atua.” Na patipati le aofia e talisapaia ai lea tusi. Ioe, na ati aʻe le faatuatua o ē uma na auai i le polokalame o le faauuga.

[Faamatalaga faaopoopo i le itulau 17]

“O le a pāʻia loto o outou uso ma tuafāfine i o outou tofiga, pe a lelei ma ati aʻe a outou upu”

[Pusa i le itulau 15]

FAAMAUMAUGA O LE VASEGA

Aofaʻi o atunuu o loo iai o latou sui: 9

Aofaʻi o atunuu ua tofia i ai: 26

Aofaʻi o tagata aʻoga: 56

Faatatauga o tausaga: 33.4

Faatatauga o tausaga i le upu moni: 16.8

Faatatauga o tausaga i le faiva faataimi atoa: 13

[Ata i le itulau 16]

Vasega Faauu Lona 122 o le Aʻoga Faale-Tusi Paia a le Olomatamata o Kiliata

I le lisi i lalo, e amata mai laina i luma ma faasolo i tua ma o suafa e lisi mai le agavale e agaʻi i le taumatau.

(1) Howitt, R.; Smith, P.; Martinez, A.; Pozzobon.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.