O le ā le Fofō mo le Faailogalanu?

SA TAOFIA e se laufalī i Sepania se taaloga soka sa faia. Aiseā? Ona sa faateteleina le upuleagaina o se tama taalo mai Cameroon lea sa faamataʻu o le a ia tuua le malae. I Rusia ua taatele sauāga e fai i tagata Aferika, Asia, ma tagata Latina mai Amerika; i le 2004 na faatupulaʻia ai sauāga faailogalanu i le 55 pasene ma oo ai le aofaʻi o nei faiga sauā i le 394 i le 2005. Pe ā ma le tasi vae tolu o tagata Asia ma tagata uli i totonu o Peretania na tali ane i se lisi o fesili, ma faapea ua lē o toe iai ni a latou galuega ona o le faailogalanu. O nei faaaʻoaʻoga o loo faaata mai ai le mea o loo tupu nei i le lalolagi aoao.

O le faailogalanu e eseese ona matuiā, e amata mai lava i faamatalaga lē mafaufau ma le lē amanaʻia o faalogona o isi, seʻia oo atu i taumafaiga e fai ni tulafono faalemalo e tafiesea ai se ituaiga o tagata. O le ā le pogai autū o le faailogalanu? E faapefea ona tatou ʻalofia le faaalia o le faailogalanu? Pe talafeagai le iai o se faamoemoe faapea o le a mafai ona nonofo fealofani uma ituaiga o tagata? E tele ni mea aogā o loo maua i le Tusi Paia e faatatau i lenei mataupu.

Sauāga ma le Feitagaʻi

Ua faapea mai le Tusi Paia: “[Ua] leaga o manatu o loto o tagata e afua mai ina o tama iti.” (Kenese 8:21) O lea, o se mea fiafia i nisi le faasauā i isi. Ua toe faapea atili mai le Tusi Paia: “Faauta foʻi i loimata o ē ua sauāina, ua leai foʻi sē na te faamāfanafanaina i latou; ua lima malosi foʻi ē na sauā iā te i latou.”—Failauga 4:1.

O loo faaalia foʻi e le Tusi Paia ua leva ona iai le feitagaʻi i ituaiga eseese o tagata. Mo se faaaʻoaʻoga i le 18 senituri ua mavae a o leʻi oo mai i o tatou aso, sa valaaulia ai e se Farao Aikupito ia Iakopo le Eperu e ō atu ma lona aiga toʻatele e nonofo i Aikupito. Peitaʻi mulimuli ane, na fefe le isi Farao ona o le toʻatele o nei tagata. O le iʻuga, na tusia: “Ua ia fai atu i lona nuu, Faauta, o le nuu o le fanauga a Isaraelu ua sili ona toʻatele ma le malosi iā i tatou; inā ō mai ia, inā tatou togafiti poto iā i latou, neʻi tupu tele. . . . Ona latou tofia ai lea o ē pule i galuega iā te i latou, ina ia latou faatigā iā te i latou i a latou avega mamafa.” (Esoto 1:9-11) Na faatonuina e le ʻau Aikupito suli o Iakopo, a fanau mai o se tama ia fasiotia.—Esoto 1:15, 16.

O le ā le Pogai Autū?

E tau leai se fesoasoani a lotu o lenei lalolagi i le teena o le faailogalanu. E moni e iai tagata totoa ua teena faiga faatigā, ae o le tele o taimi e lagolago e lotu tagata e faatigā i isi. O le mea na tupu i le Iunaite Setete o Amerika, na faileagaina tagata uli i lalo o le tulafono ma oo ai i le faasalaga oti, ma tulafono na faaauau seʻia oo i le 1967 o le faasāina ona fefaaipoipoaʻi ni ituaiga eseese o tagata. Sa faasā foʻi i lalo o le faigāmalo faailogalanu a Aferika i Saute (apartheid) ona faaipoipo i se tagata o se isi lanu, ona o le puipuia o o latou tulaga taualoa. O nisi o ia tagata na lagolagoina nei tulafono o le faailogalanu o ni tagata mapolotu.

Peitaʻi, o loo faaalia i le Tusi Paia se māfuaaga autū e faailogalanu ai tagata. O loo faaalia mai ai māfuaaga e faatigā ai le isi ituaiga i le isi ituaiga. Na faapea mai: “O sē lē alofa ua lē iloa e ia le Atua; auā o le Atua, o le alofa lava ia. Pe afai e faapea mai se tasi, ‘Ou te alofa i le Atua,’ ae ʻinoʻino i lona uso, o le pepelo lava  ia; auā o lē lē alofa i lona uso ua ia vaai atu i ai, e lē mafai ona alofa o ia i le Atua ua ia lē vaai atu i ai.” (1 Ioane 4:8, 20) O le faamatalaga lenei e iloa ai le puna o le faailogalanu. O le uiga lenā o loo faaalia e tagata—e tusa lava pe faapea mai e lolotu pe leai foʻi—auā latou te lē iloa, ma e lē alolofa foʻi i le Atua.

Le Poto i le Atua—O le Faavae mo le Autasia o Tagata Uma

E faapefea i le iloaina ma le alofa i le Atua ona maua ai le fealofani o ituaiga uma o tagata? O le ā le poto o loo i le Tusi Paia lea e taofiofia ai tagata mai le faatigā i tagata ese? O loo faaalia mai e le Tusi Paia o Ieova o le Tamā o tagata uma. Na faapea mai: “A e peitaʻi ua iā te i tatou le Atua e toʻatasi o le Tamā ia, e fua mai iā te ia mea uma.” (1 Korinito 8:6) Na faapea mai: “Ua faia foʻi e ia nuu uma o tagata i le toto e tasi.” (Galuega 17:26) O lona uiga la, e uso tagata uma.

E mitamita ituaiga uma o tagata ona ua latou maua le ola mai le Atua, peitaʻi e iai se lape i le mea na tatou tupuga uma mai ai. Na faapea mai le tusitala o le Tusi Paia o Paulo: “Faapei ona oo mai o le agasala i le lalolagi i le tagata e toʻatasi.” O lea la, “ua agasala tagata uma lava, ma ua lē oo i le mamalu o le Atua.” (Roma 3:23; 5:12) O Ieova o le Atua o tagata eseese uma—ma e leai ni meaola e lua e tutusa lelei. Peitaʻi, na te leʻi tuuina le aiā i se ituaiga o tagata e faasilisilia ai le latou ituaiga. E tuufaafeagai le manatu taatele faapea e sili atu le isi ituaiga i le isi ituaiga, ma le manatu o loo i le Tusi Paia. E manino lava e lagolagoina e le poto mai le Atua le fealofani o ituaiga uma o tagata.

E Amanaʻia e le Atua so o se Atunuu

Ua taumānatu nisi pe na faaituʻau le Atua i lona filifilia o tagata Isaraelu ma aʻoaʻoina i latou e taumamao mai tagata o nuu ese. (Esoto 34:12) Na iai le taimi na faatauina ai e le Atua le nuu o Isaraelu ona o le mataʻina o le faatuatua o le latou augātamā o Aperaamo. Sa puleaina e le Atua Isaraelu anamua, e ala i lona filifilia o a latou taʻitaʻi ma tuuina atu i ai ni tulafono tusitusia. A o lagolagoina e Isaraelu le pulega a le Atua, na iloa e isi tagata le eseesega o pulega a tagata ma le pulega a le Atua. Sa aʻoaʻoina foʻi e Ieova tagata Isaraelu i le manaʻomia o se taulaga e toe faafoʻisia ai le faiā lelei a tagata ma Ieova. E tele ni aogā ua maua e atunuu uma ona o feutagaʻiga a Ieova ma Isaraelu. Ua fetaui lelei ma lana fetalaiga iā Aperaamo: “O lau fanau foʻi e manuia ai  atu nuu uma lava o le lalolagi; auā ua e usiusitai i laʻu upu.”—Kenese 22:18.

Sa toe maua e le ʻau Iutaia le faaeaga o le mauaina o folafolaga a le Atua ma avea o le nuu o le a fanau mai ai le Mesia. Ae o lenei foʻi fuafuaga sa fuafua ina ia manuia ai atunuu uma. E iai ni faamatalaga faamāfanafana loto i Tusitusiga Eperu, o le a iai se taimi e maua uma ai e so o se ituaiga o tagata ia faamanuiaga: “E ō mai lava nuu ese e tele, ma latou faapea ane, Ō mai ia, tatou ō aʻe ia i le mauga o Ieova, o le fale foʻi o le Atua o Iakopo, e aʻoaʻo mai ai o ia iā te i tatou i ona ala, . . . e lē sii atu foʻi le pelu e le tasi nuu i le tasi nuu, latou te lē toe aʻoaʻo foʻi i taua. A e taʻitasi ma nofo i lalo o lona vine, ma lalo o lona mati, e leai foʻi sē na te faamataʻu mai.”—Mika 4:2-4.

E ui na talaʻi atu Iesu i tagata Iutaia ae na ia faapea mai: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma.” (Mataio 24:14) O le a maua e atunuu uma le tala lelei. Na faataatia e Ieova le faaaʻoaʻoga o le lē faaituʻau i se ituaiga o tagata e tasi. “E lē faailogaina tagata e le Atua; a e peitaʻi o le mataʻu iā te ia i nuu uma lava, ma fai le amiotonu, ua talia i latou e ia.”—Galuega 10:34, 35.

E faaalia e Ieova lona amanaʻia o atunuu uma e ala i tulafono na tuuina iā Isaraelu anamua. Mātau, e leʻi faapea mai le Tulafono e tau ina faapalepale i tagata o nuu ese o loo latou aumau faatasi, i le faapea mai: “O le tagata ese o loo āumau iā te outou, ia tusa lava ia iā te outou ma le tama a le eleele, e te alofa atu iā te ia e pei o oe lava iā te oe; auā sa āumau outou i le nuu o Aikupito.” (Levitiko 19:34) E tele tulafono a le Atua na aʻoaʻoina ai tagata Isaraelu ina ia alolofa i tagata o nuu ese. O lea, ina ua iloa atu e se tasi o augātamā o Iesu, o Poasa se fafine nuu ese o loo aoina toega o le seleselega, sa ia gaoioi e tusa ma mea na ia aʻoaʻoina mai le Atua, i lona faamautinoa i lana ʻaufaigaluega ia lava saito e faatotoeina mo le fafine o nuu ese.—Ruta 2:1, 10, 16.

Na Aʻoaʻo e Iesu le Agalelei

Na sili ona faailoa atu e Iesu le poto o le Atua na i lo se isi tagata. Sa ia faaalia i ona soo le auala e agalelei ai i so o se tagata. Na ia amata se talanoaga ma se fafine Samaria. Sa manatu faatauvaa pe ʻinoʻino tagata Iutaia i tagata Samaria, ma na faateʻia ai lenei fafine. A o faia le la talanoaga na faaalia e Iesu le agalelei i lenei fafine, i lona fesoasoani iā te ia e malamalama i le auala e mafai ona ia maua ai le ola e faavavau.—Ioane 4:7-14.

Na aʻoaʻo foʻi e Iesu i tatou i le auala e feutagaʻi ai ma tagata o isi ituaiga i le talafaatusa i le Samaria tausi tuaoi. Na tau lenei tamāloa i se tagata Iutaia o loo taatia ua manuʻa ona sa osofaʻia e ni tagata gāoi. Sa faigofie ona manatu le tagata Samaria: ‘Aiseā o le a ou fesoasoani ai fua i lenei tagata Iutaia? E ʻinoʻino  tagata Iutaia i le matou ituaiga.’ Ae na faailoa mai e Iesu le ese o le vaaiga a le tagata Samaria i tagata ese. E ui e toʻatele tagata femalagaaʻi na ui ane i tafatafa o lenei tamāloa pagatia, ae na o le tagata Samaria na “mutimuti vale lea o lona alofa” ma avatu loa le fesoasoani. Na faaiʻu le talafaatusa a Iesu i lona faapea mai, so o se tasi e manaʻo i le finagalo malie o le Atua ia faapea ona ia fai.—Luka 10:30-37.

Na aʻoaʻo e Paulo i latou ia e mananaʻo e faafiafia le Atua, ina ia suia o latou tagata ma faaaʻoaʻo i le auala e feagai ai le Atua ma tagata. Na tusi Paulo: “Ua toeseina e outou le tagata tuai atoa ma ana amio, a ua outou oofu i le tagata fou, o lē ua faafouina i le iloa, e faatatau ia foliga i lē na faia o ia. E lē o i ai se Eleni po o se Iutaia, o sē peritomeina po o sē lē peritomeina, o se tagata o nuu ese po o se Sekutia . . . A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:9-14.

Pe Suia e le Poto o le Atua Tagata?

Po o le iloaina o Ieova le Atua o le a suia moni ai le auala e feutagaʻi ai tagata ma i latou e ese le ituaiga e ō mai ai? Seʻi o tatou tilofaʻia le mea na tupu i se fafine Asia i Kanata, i lona lē fiafia i le manatu faapito o tagata. Sa ia feiloaʻi ma Molimau a Ieova ma amata loa ona latou suʻesuʻeina le Tusi Paia. Mulimuli ane na ia tusia se tusi faafetai ma faapea mai: ‘O outou o ni papalagi agalelei tele. Ina ua ou iloa le telē o lo outou eseesega mai isi papalagi, na ou taumānatu pe aiseā. Sa ou mafaufau mo se taimi umi ma ou mautinoa ai, o outou o Molimau a le Atua. E tatau ona iai se māfuaaga i le Tusi Paia. Sa ou vaaia i a outou sauniga ia tagata papaʻe, uli, eena, ae lanu gatasi uma o latou loto, ona o i latou o uso ma tuafāfine faaleagaga. Ua ou iloa la lē na faia outou. O lo outou Atua.’

O loo valoia mai i le Tusi Paia se taimi o le a “tumu [ai] le lalolagi i le malamalama o Ieova.” (Isaia 11:9) E oo lava i o tatou aso, ua faataunuuina valoaga a le Tusi Paia, i se motu o tagata e toʻatele lea e faitau miliona lona aofaʻi “mai atu nuu uma, ma aiga, ma nuu, ma gagana eseese” ua autasia i le tapuaʻiga moni. (Faaaliga 7:9) E latou te faatalitalia le taimi o le a suia ai le feitagaʻi i le fealofani i le lalolagi aoao, lea ua toeitiiti faataunuuina ai le fuafuaga a Ieova na tuuina mai iā Aperaamo: “E manuia ai aiga uma lava o le lalolagi.”—Galuega 3:25.

[Ata i le itulau 4, 5]

Na aʻoaʻoina e le Tulafono a le Atua tagata Isaraelu e alolofa i tagata o nuu ese

[Ata i le itulau 5]

O le ā se lesona tatou te aʻoaʻoina mai le talafaatusa i le Samaria agalelei?

[Ata i le itulau 6]

E leʻi tuuina e le Atua se māfuaaga i se ituaiga e tasi o tagata e faasilisilia ai i latou